1-2. Ngu kutxani ni ku i ngu nzila yihi Jehovha a nga maha ti to hi va txienge txa mwaya wakwe?

JEHOVHA a hi rambile ti to hi va txienge txa mwaya wa vakhozeli vakwe. Hi nga wona txirambo txiya txo tsakisa ngutu! Mwaya wathu wu wumbwa ngu vathu va va nga tiningetela vapune ka Txizimu ni va va kombisako likholo ka digandelo da mtirulo wa Mwanana wakwe. Athu hi mwaya wu wu nga tsaka. Ha tidila ngu wutomi konkuwa, ni ku ha tsaka ngu themba ya wutomi wo mbi guma ti si nga ni mhaka ni ti to i na va ha mafuni hawa mwendo nzumani.

² Jehovha ahi tulete nzila ya ti to hi va txienge txa mwaya wakwe nguko ahi dhundako ngutu. (Joh. 3:16) Athu hi “xavilwe ngu txuma txa hombe.” (1 Vak. 6:20) Ngu kuthumisa digandelo, Jehovha a mahile ti koteka ti to hi va ni wuxaka wa hafuhi nayo. Hi ni lungelo ya hombe yo dhana M’thu wa wuako wotshe kota Tate wathu. Nga ha hi nga ti wona ngu kona ka msungo wu wu nga pinda, Jehovha ngene Tate wathu wa hombe.

3. Ngu sihi siwotiso si hi fanelako ku ti wotisa? (Wona ni dibhokiso di di ku “ Ina Jehovha wa ni wona?”)

³ Kufana ni m’bhali mmwani wa Bhiblia ti nga maha hi ti wotisa tiya: “Ni na bongisa kutxani ka MKOMA wotshe wunene wu a nga ni mahela kani?” (Mas. 116:12) Ditshuri ngu ti to kha hi nge sikoti kutshumeta txilo ka Tate wa nzumani. Kambe lirando lakwe li hi maha hi mu randa nathu. Mpostoli Johani a bhate tiya: “Athu hina ni lirando, nguko txi khatile Txizimu txi hi randa.” (1 Joh. 4:19) Ngu tihi tinzila ti hi nga kombisako ngu tona to ha m’dhunda Tate wathu wa nzumani?

4. Ngu kuya ngu Jakobe 4:8, ngu kutxani hi di fanete kumaha mizamo yo tshuketa hafuhi ka Jehovha?

⁴ Jehovha a lava hi tshuketa hafuhi nayo hi tshumela hi womba-womba nayo. (Lera Jakobe 4:8.) Ene a hi kuzeta ku hi “simama kukhongelani.” (Var. 12:12) Jehovha kha zumbi adi ñolekile, ni ku kha karali. Kuhambana ni eto, hi nga mu engisa ngu kulera Dipswi dakwe i ku Bhiblia, kumweko ni marevhista ya ma hi vhunako ku di pfisisa. Hi nga tshumela hi mu engisa ngu kuriya kwati nzeve hi di mitshanganoni. Kufana ni kuwomba-womba mbimo yotshe kuvhunako vanana ti to ve va hafuhi ni vaveleki, kubhula ni Jehovha mbimo yotshe ti nga hi maha hi va hafuhi ni nene.

5. Hi nga yi tshukwatisisa kutxani mikombelo yathu ti to yi amukeleka ka Jehovha?

⁵ Alakanya ngu ti u mahisako tona mikombelo yako ka Txizimu. Jehovha a lava hi phofula ta mbiluni kwathu kwakwe ngu mkombelo. (Mas. 62:8) I nga va tinene ku ti wotisa tiya: ‘Ina mikombelo yangu i ndando yi ni phinda phindako, mwendo no womba ati ti ku mbiluni? Kha ti kanakanisi to wa m’dhunda ngutu Jehovha, ni ku u lava ti to wungana wako nayo wu tsana. Kasi ku u maha toneto, ti lava u womba-womba ngutu nayo mbimo yotshe. M’thembe. M’gele ti ti kumahako u tsaka ni ti ti ku vilelisako. Tsaniseka to awe u nga kombela txivhuno kwakwe.

6. Hi fanete kumaha txani ti to hi va hafuhi ni Tate wathu wa nzumani?

⁶ Ti to hi va hafuhi ni Tate wathu wa nzumani, hi fanete hi ziva kubonga. Hi nga tumelelana ni m’bhali wa masalmo awu a nga khene: “Awe MKOMA, Txizimu txangu, u hi mahete sixamaliso sako sa hombe; kha nga ho m’thu wu a dinganiswako ni nawe! U mahile makungo a hombe o xamalisa a ku hi vhuna; mithumo yako, hambi idiku no lava ku yi bala ni ku yi xawuta, nga ni si sikoti, nguko nja kutanda vabali.” (Mas. 40:5) Hi nga maha ta tingi kupinda kutipfa hi txi bonga, hi nga kombisa kubonga kwathu ka Jehovha ngu mapswi ni simaho. Eto ti kombisa ti to ha hambana ni vathu vamwani. Hi hanya ka mafu ya ma nga tala ngu vathu va va si sikotiko kubonga totshe ti Jehovha ava mahelako. Ngu toneto, tximwani txi txi kombisako ti to hi hanya ka “masiku a kugwitisa” ngu ti to vathu kha va tizivi kubonga. (2 Tim. 3:1, 2) Athu kha hi lavi kutekelela mahanyelo awe!

7. Jehovha a lava ti to hi maha txani? Ngu kutxani?

⁷ Vaveleki kha va lavi kuwona vanana va txi lwisana, kambe va lava ku va wona va txi sakana votshe. Ngu ha kufanako, Jehovha a lava ti to votshe vanana vakwe ve va ni wungana wa wunene. Lirando li hi ku nalo ngu vamwani, ngu lona li kombisako to hi Makristu a ditshuri. (Joh. 13:35) Ha tumelelana ni m’bhali wa masalmo awu a nga khene: “Eto ti tshambisako tona ni kutsakisa, ngako maxaka ma txi hanya kumweko ngu kupfana!” (Mas. 133:1) Mbimo yi hi randako vanathu, hi kombisa to ha m’randa Jehovha. (1 Joh. 4:20) Ti tsakisa ngutu kuva ka mwaya wa vanathu ‘vavanene ni vo pfelana wumbilu’!—Vaef. 4:32.

8. Ngu kuya ngu 1 Johani 5:3, ngu txihi txivangelo txo khata txo hi randa Jehovha?

⁸ Jehovha a emela to vanana ve engisa vaveleki, ni ku a lava ku nathu hi mu engisa. (Vaef. 6:1) Ene a lava ku hi mu engisa nguko ngene a nga hi Vanga, ni ku hi simama hi hanya ngu mhaka yakwe futhi ngene awu a ku ni wutxhari kupinda vatate vathu va nyama. Kambe txo khata atxi txi hi mahako hi engisa Jehovha ngu ti to ha mu randa. (Lera 1 Johani 5:3.) Hambiku ku ku ni sivangelo so tala ti to hi  mu engisa, ene kha hi sinzisi kumaha toneto. Jehovha a hi ningile mkhululeko wo ti mahela sisungo, ngu toneto, wa tsaka ngutu ngako hi txi sawula ku mu engisa ngu lirando li hi ku nalo ngu ngene.

9-10. Ngu kutxani i di ta lisima kuziva ni kuhanya ngu milayo ya Txizimu?

⁹ Vaveleki va lava ti to vanana vawe ve vhikeleka. Ngu toneto va vekako milayo ni mihingano ti to ve vhikela vanana vawe. Mbimo yi vanana va engisako sialakanyiso soneso, va kombisa ti to va themba ni kuxonipha vaveleki vawe. Se nda lisima ngutu ku hi ziva milayo ya Tate wathu wa nzumani ni kuhanya ngu yona. Ngako hi txi maha toneto, hi kombisa Jehovha to ha m’randa ni ku m’xonipha, eto ta hi wuyelisa. (Isaya 48:17, 18) Kambe ava va si laviko kuengisa milayo ya Jehovha kha va mani litsako.—Vag. 6:7, 8.

¹⁰ Mbimo yi hi hanyako ngu milayo ya Jehovha, ha vhikeleka ngu didhawa da nyama, mialakanyo ni da moya. Jehovha wa ti ziva ati i ku ta tinene kwathu. Mwanathu Aurora awu a zumbako Estados Unidos a wombile tiya: “Na ti ziva to kuengisa Jehovha ti tisa makatekwa ka wutomi.” Hotshethu ha tumelelana nayo. Hi nga alakanya ngu wuyelo ya yinene ayi u nga yi mana ngu kuengisa milayo ya Jehovha!

11. Mkombelo wu nga hi vhunisa kutxani?

¹¹ Mkombelo wa hi vhuna ti to hi engisa hambi ti txi karata kumaha toneto. Mbimo yimwani ta hi karatela kuengisa Jehovha nguko kha ha hetiseka, kambe hi fanete kusimama hi maha mizamo. M’bhali wa masalmo a kombete  tiya ka Txizimu: ‘Ni tsanise ngu moya wako wa mtamo.’ (Mas. 51:12) Denise awu i ku nyaphandule a wombile tiya: “Mbimo yi ti ni karatelako kuengisa Jehovha, no maha mkombelo ti to e ni tsanisa kasi ku ni maha ti i ku ta tinene.” Hi nga tsaniseka ti to mbimo yotshe Jehovha a na xamula mikombelo yoneyo.—Luka 11:9-13.

12. Ngu kuya ngu Vaefesu 5:1, hi fanete kumaha txani?

¹² Lera Vaefesu 5:1. Kota “vanana . . . vo randeka ngutu” va Jehovha, hi lava ku mu etetela. Hi lava kuetetela tifanelo takwe ngu kukombisa lirando, wunene, ni kudivalela vamwani. Mbimo yi vathu vamwani va wonako mahanyelo athu a manene, ti nga va maha ve lava kugonda to tala ngu Txizimu. (1 Pedro 2:12) Vaveleki va ni sivangelo so pfala so etetela Jehovha ka nzila yi va ñolako ngu yona vanana vawe. Ngako vaveleki va txi tekelela Jehovha, ti nga maha vanana ni vona ve va vangana va Jehovha.

13. Hi fanete kumaha txani ti to hi va ni txibindi?

¹³ Mwanana wa ti guleta ngu tate wakwe ni ku wa tsaka ngutu ngu kuwomba-womba ngu ngene. Ngu ha kufanako, nathu ha ti guleta ngu Jehovha, ni ku hi lava ti to vamwani ve mu ziva. Ngu mbiluni hotshethu hi lava kufana ni Mkoma Dhavhida awu a nga khene: “MKOMA ngene wudhumo wangu!” (Mas. 34:2) Kambe ti nga maha hi txi thava kubhulela vamwani ngu Jehovha. Hi nga txi  manisa kutxani txibindi? Hi nga txi mana ngu kualakanya ngu litsako li hi ngo ninga Jehovha ni nzila yi vamwani va nga vhunekako ngu yona va txi gonda ngu ngene. Jehovha a na hi ninga txibindi txi txi lavekako. Ene a vhunile vanathu va dilembe dizana do khata ti to ve va ni txibindi, se a na hi vhuna nathu.—1 Vat. 2:2.

14. Ngu kutxani i di ta lisima kutxhumayela mahungu a manene ka vathu votshe?

¹⁴ Jehovha kha na txisawu-sawu ni ku wa tsaka ngako a txi wona to ha kombisa lirando ka votshe ti si nga ni mhaka ni siemo sawe. (Mith. 10:34, 35) Nzila yimwani yo hi kombisa lirando ka vamwani ngu txhumayela mahungu a manene. (Mat. 28:19, 20) Ngu tihi ti mthumo wuwa wu ti hetisisako? Ava va hi engisako va nga mana wutomi wa txikongomelo konku ni themba ya wutomi wo mbi guma mbimo yi yi tako.—1 Tim. 4:16.

15-16. Ngu sihi sivangelo si hi ku naso so hi tsaka?

¹⁵ Jehovha i tate wu a ku ni lirando, se a lava ti to mwaya wakwe wu tsaka. (Isaya 65:14) Ku ni sivangelo so tala so hi tsaka konku, hambiku hi mananako ni sikarato. Ngu txikombiso, ha tsaniseka ti to Tate wathu wa nzumani wa hi randa ngutu. Hi ni wuzivi wa ditshuri wa Dipswi da Txizimu Bhiblia. (Jer. 15:16) Ni ku hi txienge txa mwaya wakwe a wu wu wumbwako ngu vathu ava va randako Jehovha, milayo yakwe ya mahanyelo ni kuranda vamwani.—Mas. 106:4, 5.

¹⁶ Hi nga simama hi di tsakile nguko hi ni themba yo tsana ya ti to wutomi wu na tsakisa mbimo yi yi tako. Ha ti ziva to i si nga kale, Jehovha a na gumisa votshe vabihi ngu kuthumisa Mfumo wakwe, mafu me hundulwa me va Paradhise. Hi ni themba yo tsakisa ya ti to votshe vafi va na tshumela ve wuka ve tshangana ni maxaka awe. (Joh. 5:28, 29) Eto ti na tsakisa ngutu! Txa lisima ngutu, ha tsaniseka ti to i si nga kale nzumani ni ha mafuni votshe va na ninga wudhumo ni ku va na khozela Tate wathu wa lirando nga ti a ti lavisako tona.