1, 2. ¿Chucoch tsiʼ yʌcʼʌyonla ochel bajcheʼ i familia jiñi Jehová, i bajcheʼ tsiʼ mele?

JEHOVÁ subebilonla chuqui wen utsʼatax bʌ: Yom chaʼan mi la cochel tiʼ familia. Yaʼ ochemob jiñi am bʌ i yʌcʼʌyob i cuxtʌlel tiʼ tojlel yicʼot miʼ ñopob i Yalobil ti jiñi i cuxtʌlel tsaʼ bʌ i yʌcʼʌ. I wen tijicñayonbʌla familia. Añʌch i cʼʌjñibal mi la cubin jiñi laj cuxtʌlel ili ora, i tijicñayonla cheʼ woli (choncol) lac pijtan chumtʌl tiʼ pejtelel ora, mach yʌlʌyic mi yaʼ ti panchan o ila ti Pañimil cheʼ sujtemix ti jumpʼejl Paraíso.

² Tiʼ cʼuxbiya, Jehová tsiʼ yʌcʼʌ jumpʼejl ñuc bʌ majtañʌl chaʼan mi lac mejlel ti ochel bajcheʼ i familia (Jn. 3:16). Jiñi Biblia miʼ yʌl: «Tsaʼ mʌjñiyetla, tojbiletla» (1 Co. 6:20). Wocolix i yʌlʌ jiñi i tojol laj coltʌntel, Dios tsaʼ mejli i mel chaʼan miʼ mejlel lac lʌcʼtesan lac bʌ tiʼ tojlel. Tijicñayonla cheʼ miʼ mejlel lac suben bajcheʼ lac Tat jiñi Cʼax ñuc bʌ tiʼ pejtelel pañimil yicʼot ti panchan. I cheʼ bajcheʼ tsaʼ laj qʼuele ti jiñi yambʌ estudio, jiñʌch ñumen wem bʌ lac Tat am bʌ lac c chaʼan.

3. Cheʼ mi lac ñaʼtan pejtelel chuqui utsʼat an i mele Dios ti lac tojlel, ¿chuqui tac miʼ mejlel laj cʼajtiben lac bʌ? (Qʼuele jaʼel jiñi recuadro « ¿Muʼ ba i qʼuelon Jehová?»).

³ An qʼuiñil mi laj cʼajtiben lac bʌ tsaʼ bʌ i cʼajtibe i bʌ juntiquil tsaʼ bʌ i tsʼijbu tʼan tac am bʌ ti Biblia, tsiʼ yʌlʌ: «¿Pero wʌle chuqui miʼ mejlel cʌqʼuen lac Yum chaʼan pejtelel i yutslel tsaʼ bʌ i pʌsbeyon?» (Sal. 116:12). Maʼan chuqui miʼ mejlel la cʌqʼuen jiñi lac Tat am bʌ ti panchan chaʼan mi lac tojben. Pero, cheʼ miʼ cʼuxbiñonla miʼ ñijcañonla chaʼan mi laj cʼuxbin jaʼel. Jiñi apóstol Juan tiʼ tsʼijbu: «Mi laj cʼuxbin Dios, come ñaxan tsiʼ cʼuxbiyonla»  (1 Jn. 4:19). Jin chaʼan, ¿bajcheʼ miʼ mejlel lac pʌsben jiñi lac Tat chaʼan mucʼʌch laj cʼuxbin?

4. Cheʼ bajcheʼ miʼ yʌl Santiago 4:8, ¿chucoch yom mi lac chaʼlen wersa chaʼan mi lac lʌcʼtesan lac bʌ ti Jehová?

⁴ Jehová yom chaʼan mi lac lʌcʼtesan lac bʌ tiʼ tojlel yicʼot chaʼan ti bele ora mi lac pejcan ti oración (pejcan Santiago 4:8). Miʼ subeñonla chaʼan maʼañic mi laj cʌy lac pejcan ti oración, i tiʼ pejtelel ora yomʌch i ñʌchʼtañonla (Ro. 12:12). Tiʼ pejtelel ora ujtʌch i chaʼan yicʼot maʼañic baqui ora miʼ lujbʼan. ¿I bajcheʼ mi lac ñʌchʼtʌben i tʼan joñonla? Junchajp jiñʌch cheʼ mi lac pejcʌben i Tʼan, jiñi Biblia, yicʼot jiñi jun tac muʼ bʌ i coltañonla lac ñumen chʼʌmben i sujm chuqui miʼ subeñonla. Cheʼ jaʼel, mi lac ñʌchʼtan Jehová ti chuqui miʼ yʌjlel ti tempa bʌ tac. Cheʼ miʼ chʌcʌ pejcañob i bʌ juntiquil tatʌl yicʼot i yalobilob, miʼ yʌcʼ chaʼan temel miʼ yajñelob, cheʼ jaʼel, cheʼ ti bele ora mi lac pejcan Jehová miʼ coltañonla chaʼan lʌcʼʌl mi la cajñel yicʼot.

5. ¿Bajcheʼ miʼ mejlel lac weñʼesan jiñi la coración?

⁵ ¿Bajcheʼ mi lac pejcan Dios ti oración? Dios yom chaʼan mi lac suben tiʼ pejtelel chuqui an ti lac pusicʼal cheʼ mi lac pejcan ti oración (Sal. 62:8). Jin chaʼan, yom mi laj cʼajtiben lac bʌ: «¿Junsujm jach ba chuqui mic taj ti tʼan ti coración? ¿O muʼ ba c jamben pusicʼal Jehová cheʼ bajcheʼ mic pejcan juntiquil camigo?». Mucʼʌch lac wen cʼuxbin Jehová yicʼot la com chaʼan chʌn temel mi la cajñel yicʼot. Jin chaʼan yom ti bele ora mi lac pejcan. Laʼ lac suben chuqui an ti lac pusicʼal, chuqui miʼ yʌqʼueñonla lac tijicñʌyel yicʼot muʼ bʌ laj cʼojoʼtan. Laʼ lac ñop chaʼan mejlʌch laj cʼajtiben chaʼan miʼ coltañonla.

6. ¿Chuqui yom mi lac mel chaʼan lʌcʼʌl mi la cajñel tiʼ tojlel Jehová?

⁶ Chaʼan lʌcʼʌl mi la cajñel yicʼot Jehová, yom mi la cʌqʼuen wocolix i yʌlʌ jaʼel. Cheʼ mi lac ñaʼtan bajcheʼ jiñi salmista tsaʼ bʌ i yʌlʌ: «C Yum Dios, tsaʼix a pʼojlesa jini ñuc tac bʌ a melbal tic tojlel lojon. Wolaʼ chʌn ñaʼtañon lojon. Maʼanic yambʌ bajcheʼ jatet. Aniqui, tsac subu. Mach mejlic ti tsijquel a melbal» (Sal. 40:5). Pero mach cojach yom mi la cubin ti lac pusicʼal chaʼan mi la cʌqʼuen wocolix i yʌlʌ Jehová. Yom mi lac pʌsben ti lac tʼan yicʼot ti chuqui tac mi lac mel. Mach lajalonla yicʼot jiñi yonlel wiñicob xʼixicob (quixtañujob) ili ora. Chumulonla ti jumpʼejl pañimil (mulawil) baqui jiñi quixtañujob maʼañix miʼ yʌqʼueñob wocolix i yʌlʌ Dios cheʼ bʌ miʼ coltañob. Miʼ pʌs chaʼan chumuloñixla «ti cojix bʌ qʼuin tac» cheʼ jiñi quixtañujob maʼañix chuqui miʼ qʼuelob ti ñuc (2 Ti. 3:1, 2). Mach yomic chaʼan mi lac toybeñob i melbal.

7. ¿Chuqui yom Jehová chaʼan mi lac mel, i chucoch?

⁷ Jiñi tatʌlob mach yomic chaʼan jiñi i yalobilob miʼ contrajiñob i bʌ, yom chaʼan miʼ qʼuelob i bʌ ti wen. I cheʼʌch yom Jehová tiʼ tojlel i yalobilob. Cheʼ jaʼel, jiñi cʼuxbiya muʼ bʌ la cubin tiʼ tojlel yambʌlob miʼ pʌs chaʼan i sujm bʌ xñoptʼañonla (Jn. 13:35). Juntiquil i wiñic bʌ Dios tiʼ tsʼijbu: «Utsʼatax cheʼ tijicña miʼ tem ajñelob hermanojob» (Sal. 133:1). ¿Mach ba lajalic mi la cubin lac bʌ bajcheʼ jiñi salmista? Cheʼ bʌ mi laj cʼuxbin jiñi la quermañujob, mi lac pʌsben Jehová chaʼan mi laj cʼuxbin jaʼel (1 Jn. 4:20). Wen utsʼatax cheʼ ochemonla ti jumpʼejl familia añoʼ bʌ ‹yutslel i pusicʼal› yicʼot miʼ pʼuntañob i bʌ (Ef. 4:32).

8. Cheʼ bajcheʼ miʼ yʌl 1 Juan 5:3, ¿baqui bʌ jiñi ñuc bʌ i sujmlel cheʼ mi lac jacʼben i tʼan Jehová?

⁸ Jehová miʼ pijtan chaʼan jiñi alobob miʼ jacʼbeñob i tʼan i tat i ñaʼ, i cheʼʌch miʼ mulan chaʼan mi lac mel tiʼ tojlel jaʼel (Ef. 6:1). Yomʌch mi lac mel come jin tsaʼ bʌ i meleyonla (pʌtʌyonla), miʼ yʌcʼ chaʼan bej cuxulonla yicʼot jiñʌch jiñi Tatʌl cabʌl bʌ i ñaʼtʌbal. Pero jiñi i sujmlel cheʼ mi lac jacʼben i tʼan chaʼañʌch  mi laj cʼuxbin (pejcan 1 Juan 5:3). An cabʌl chucoch yom mi lac jacʼben i tʼan, pero maʼañic miʼ xicʼonla. An i yʌcʼʌ chaʼan mi lac yajcan chuqui la com, jin chaʼan miʼ taj i tijicñʌyel cheʼ mi lac yajcan lac jacʼben i tʼan ti laj cʼuxbiya.

9, 10. ¿Chucoch ñuc i cʼʌjñibal cheʼ mi laj cʌn jiñi i mandar tac Dios yicʼot mi lac pʌs ti laj cuxtʌlel?

⁹ Jiñi tatʌlob yom chaʼan jiñi yalobilob wen miʼ yajñelob. Jin chaʼan miʼ subeñob chuqui yom miʼ melob. Jiñi alobob muʼ bʌ i jacʼbeñob i tʼan i tat i ñaʼ miʼ pʌsob chaʼan mucʼʌch i qʼuelob ti ñuc yicʼot miʼ ñopob chaʼan jiñʌch yujilob chuqui wen tiʼ tojlelob. Jin chaʼan, ñumen ñucto cheʼ mi laj cʌn jiñi i mandar tac lac Tat am bʌ ti panchan yicʼot mi lac chumtan. Cheʼʌch mi caj lac pʌsben Jehová chaʼan mi laj cʼuxbin yicʼot mi laj qʼuel ti ñuc. I wen mi caj la cajñel (Is. 48:17, 18). Pero miʼ bajñel ticʼlañob i bʌ jiñi mach bʌ yomobic i jacʼbeñob i tʼan Dios yicʼot i mandar tac (Gá. 6:7, 8).

¹⁰ Cheʼ mi lac chumtʌl bajcheʼ miʼ mulan Jehová miʼ cʌntañonla chaʼan wen mi la cajñel, ti bajcheʼ yubil mi la cubin lac bʌ yicʼot tiʼ chaʼan bʌ Dios. Yujil chuqui ñumen wem bʌ ti lac tojlel. Juntiquil hermana, chʼoyol bʌ ti Estados Unidos, i cʼabaʼ Aurora miʼ yʌl: «Cujil chaʼan cheʼ mi lac jacʼben i tʼan Jehová, ti bele ora weñʌch mi la cajñel». I cheʼʌch miʼ yujtel ti lac pejtelel. Laʼ laj cʼajtiben lac bʌ: «¿Bajcheʼ an i coltayon cheʼ mic jacʼ chuqui miʼ subeñon Jehová?».

11. ¿Bajcheʼ miʼ coltañonla jiñi oración?

¹¹ Jiñi oración miʼ coltañonla chaʼan mi lac jacʼben i tʼan Dios, cheʼto jaʼel cheʼ wocolʌch mi la cubin. Come luʼ xmulilonla, an qʼuiñil yom mi  lac chaʼlen wersa chaʼan mi lac jacʼben i tʼan Jehová. Pero yomʌch mi lac chʌn mel. Juntiquil salmista tsiʼ cʼajtibe Dios: «Aqʼueñon c wersa chaʼan mic mel chuqui toj ti jumpʼejl c pusicʼal» (Sal. 51:12). Juntiquil precursora regular i cʼabaʼ Denise miʼ yʌl: «Cheʼ wocol mi cubin chaʼan mic jacʼ jumpʼejl i mandar Jehová, mij cʼajtiben chaʼan miʼ yʌqʼueñon c pʼʌtʌlel chaʼan mic mel chuqui toj». Mach ñajʌyic lac chaʼan: Mi lac ñop chaʼan Dios tiʼ pejtelel ora mi caj i jacʼ jiñi oración tac lajal bʌ bajcheʼ iliyi (Lc. 11:9-13).

12. ¿Chuqui miʼ subeñonla lac mel Efesios 5:1?

¹² (Pejcan Efesios 5:1). Come ‹cʼuxbibil bʌ i yalobilonla› Jehová, mi lac chaʼlen wersa chaʼan mi lac pʌs jiñi lac melbal bajcheʼ i chaʼan. Mi lac mel cheʼ mi lac pʌs jiñi laj cʼuxbiya yicʼot cheʼ utsonla, i mi lac ñusʌben i mul yambʌlob. Cheʼ bʌ jiñi quixtañujob mach bʌ i cʌñʌyobic Dios miʼ qʼuelob chaʼan weñʌch mi lac pʌs lac melbal tac, mi caj i ñumen mulañob i cʌn Jehová (1 P. 2:12). Jiñi tatʌlob xñoptʼañoʼ bʌ yomʌch chaʼan miʼ pʌsob wem bʌ i melbalob tiʼ tojlel i yalobilob, cheʼ bajcheʼ Jehová miʼ mel ti lac tojlel. Mi mucʼʌch i melob, jiñi i yalobilob tajol mi caj i mulañob chaʼan miʼ sujtelob tiʼ yamigo jiñi cʼuxbibil bʌ lac Tat.

13. ¿Chuqui yom mi la cʌcʼ ti lac jol chaʼan mi laj cʌy bʌqʼuen yicʼot mi lac suben yambʌlob i chaʼan bʌ Jehová?

¹³ Juntiquil alʌl tijicña miʼ yubin i bʌ chaʼan majqui jiñi i tat i tijicña miʼ yubin cheʼ miʼ taj  ti tʼan i melbal. Lajal mi la cubin lac bʌ tiʼ tojlel jiñi lac Tat am bʌ ti panchan i la com chaʼan miʼ cʼotel i cʌñob yambʌlob. Cheʼʌch mi la cubin lac bʌ cheʼ bajcheʼ jiñi rey David, tsaʼ bʌ i tsʼijbu: «Mi caj i ñucʼan c pusicʼal chaʼan c Yum» (Sal. 34:2). Pero tajol la cujil bʌqʼuen i wocol mi la cubin chaʼan mi la cʌl tiʼ tojlel Jehová. ¿Chuqui mi caj i coltañonla? Jiñʌch cheʼ mi la cʌcʼ ti lac jol chaʼan miʼ mejlel lac tijicñesʌben i pusicʼal yicʼot chaʼan mi caj i tajob i wenlel jiñi muʼ bʌ i cʼotel i cʌñob. Mi caj i yʌqʼueñonla lac chʼejlel. Cheʼ bajcheʼ tsiʼ colta jiñi hermanojob ti wajali, mi caj i coltañonla jaʼel (1 Ts. 2:2).

14. ¿Baqui tac bʌ i sujmlel cheʼ ñucʌch i cʼʌjñibal mi lac sutqʼuin ti xcʌntʼan yambʌlob?

¹⁴ Jehová junlajal miʼ qʼuelonla i tijicña miʼ yubin cheʼ miʼ qʼuel chaʼan mi lac pʌsben cʼuxbiya yambʌlob, mach yʌlʌyic baqui chʼoyolob (Hch. 10:34, 35). Junchajp bajcheʼ miʼ mejlel lac ñumen pʌs chaʼan mi laj cʼuxbin yambʌlob jiñʌch cheʼ mi lac loqʼuel ti subtʼan (Mt. 28:19, 20). ¿Chuqui miʼ tajtʌl ti ili eʼtel (troñel)? Chaʼan jiñi muʼ bʌ i ñʌchʼtañonla miʼ mejlel i coltan chaʼan wen miʼ chumtʌl ili ora yicʼot miʼ pijtan chumtʌl tiʼ pejtelel ora ti talto bʌ qʼuin (1 Ti. 4:16).

15, 16. ¿Chucoch yom tijicñayonla?

¹⁵ Jehová jiñʌch lac Tat am bʌ i cʼuxbiya i yom chaʼan tijicña miʼ yajñel jiñi i familia (Is. 65:14). Anquese mi lac ñusan wocol tac, añʌch chucoch yom tijicña mi la cubin lac bʌ ili ora. Jumpʼejl ejemplo, la cujil chaʼan jiñi lac Tat am bʌ ti panchan miʼ wen cʼuxbiñonla. An lac chaʼan jiñi i sujm bʌ cʌntesʌntel tiʼ chaʼan bʌ Biblia (Jer. 15:16). I ochemonla ti jumpʼejl familia maʼañic bʌ i lajintel baqui jiñi quixtañujob miʼ cʼuxbiñob Jehová, miʼ jacʼbeñob i mandar tac yicʼot miʼ tem cʼuxbiñob i bʌ (Sal. 106:4, 5).

¹⁶ Tijicñayonla jaʼel come la cujil chaʼan ñumen wen mi caj lac chumtʌl ti talto bʌ qʼuin. Mach jalix yom chaʼan Jehová mi caj i jisan jiñi jontoloʼ bʌ i chaʼan jiñi i Yumʌntel miʼ sujtesan ti jumpʼejl Paraíso ili Pañimil. Cheʼ jaʼel, mi lac pijtan chaʼan jiñi tsaʼix bʌ chʌmiyob (sajtiyob) miʼ chaʼ cuxtʌyelob i miʼ chaʼ qʼuelob i familia (Jn. 5:28, 29). ¡Wen utsʼatax chuqui mi caj i yujtel! I ñumen ñuc bʌ i cʼʌjñibal jiñʌch cheʼ mach jalix yom chaʼan tiʼ pejtelel añoʼ bʌ ti pañimil yicʼot ti panchan mi caj i yʌqʼueñob i ñuclel yicʼot chaʼan jin jach mi caj i chʼujutesañob jiñi cʼuxbibil bʌ lac Tat.