TANE MEKUN 7
Easa Hnimi Iehova Keme Së
“Easë a ihnim, ke pa i nyidrëti kö hnimi së.”—1 IOANE 4:19.
NYIMA 3 Trenge Catre Hun, Mejiune Hun, Me Hna Troa Qale Kow
MEKUN KA TRU *
1-2. Nemene la kepin me aqane aijijë së hnei Iehova troa hane sin la lapa ka cahae i Nyidrë?
HNEI Iehova hna könë së matre troa hane sin la lapa ka cahae i Nyidrë. Drei la ketre aqane ihë ka sisitria catr! Ame la itre atrene la lapa cili, tre, angatr a nyihlue i Iehova me lapaune kowe la thupene mel. Easa madrin pine laka, hetre aliene hë la mele së. Easë fe a mejiune kowe la mel ka tha ase palua kö, e koho hnengödrai maine ngöne la Paradraiso e celë fen.
2 Ngacama jole koi Iehova, ngo hnei Nyidrëti hna hnimi së me aijijë së troa hane sine la lapa ka cahae i Nyidrë. Ngo hetre ewekë hna kuca hnei Iehova. (Ioane 3:16) Hnei Iehova “hna itö” së. (1 Kor. 6:20) Celë hi matre, jëne la thupene mel, hnei Iehova hna aijijë së troa acatrene la aqane imelekeu së me Nyidrë. Ijije hi tro sa ithanata kowe la Keme së e koho hnengödrai. Tune lo hne së hna ce wang ngöne lo tane mekun hnapan, Iehova la Keme së ka sisitria.
3. Nemene la hnying hne së hna troa ce wang? (Wange ju la hna eköhagen hna hape, “Iehova Kö a Wangatrunyi Ni?”)
3 Maine jë, easa hnying tune lo atre cinyihane la Tusi Hmitrötr, ka hape: “Tro ni a të hnei nemene koi Iehova la ite loi asë i nyidëti koi ni?” (Sal. 116:12) Tha ijiji së kö troa të la gufa koi Iehova, Keme së. Ngo kola upi së troa hane hnimi Nyidrë. Öni Ioane aposetolo: “Easë a ihnim, ke pa i nyidrëti kö hnimi së.” (1 Ioane 4:19) Nemene la aqane tro sa amamane koi Iehova laka, easa hnimi Nyidrë?
CATRE JË LAPA QALE KOI IEHOVA
Easa amamane la ihnimi së koi Iehova, ngöne la easa thith me drengethenge Nyidrë, me xatuane la itre xan troa hane hnimi Nyidrë (Wange ju la paragarafe 4-14)
4. Thenge la hna qaja ngöne Iakobo 4:8, pine nemene matre loi e tro sa thele troa nyi sinee i Iehova?
4 Iehova a ajane tro sa nyi sinee i Nyidrë, me ithanata me Nyidrë. (E jë la Iakobo 4:8.) Öni Iehova: “Thithi jë the mano kö,” nge Nyidrëti a dreng la itre thithi së. (Rom. 12:12) Tha Iehova kö a wangacone itre ej. Ketre, easa drei Nyidrë ngöne la easa e Tusi Hmitrötr memine la itre xaa itus, me drenge hnyawa ngöne la hna icasikeu. Maine tro palahi sa thithi koi Iehova, tro hë sa easenyi catre koi Nyidrë, tune la nekönatr ka majemine ithanata kowe la kem me thine i nyën.
Wange ju la paragarafe 5
5. Nemene la nyine tro sa kuca matre tro Iehova a kapa la itre thithi së?
5 Pane mekune jë la pengöne la itre thithi së. Iehova a ajane tro sa fe la itre mekun me itre aliene hni së. (Sal. 62:8) Loi e tro sa isa hnying ka hape: ‘Ame la eni a thith, eni kö a e gufan maine qaja la itre aliene hning?’ Tru la ihnimi së koi Iehova, matre easa ajane troa acatrene la aqane imelekeu së me Nyidrë. Celë hi matre, loi e tro palahi sa ithanata koi Iehova. Tro sa qaja la itre aliene hni së, tune la itre ewekë ka amadrinë së me itre hne së hna hnehengazon. Loi e xecie koi së laka, ijije hi tro sa sipo ixatua koi Nyidrë.
6. Nemene la nyine tro sa kuca matre troa easenyi catr koi Iehova?
6 Maine easa ajane troa easenyi catre koi Iehova, Keme së, loi e tro palahi sa hetre hni ne ole koi Nyidrë. Caasi la mekuna së memine la hna qaja hnene la atre cinyihane la Salamo. Öni angeic: “Iehova Akötesingöti fe, nyimute la nöjei huliwa i cilie nyine haine hnei cilieti hna kuca, me ite mekune i cilie koi hun; tha nune qaja zizine koi cilie; pi tro ni a amamane me qaja, ngo kösaue it’ eje tha nune e kö!” (Sal. 40:5) Tha easë hmekuje kö a hetre hni ne ole koi Iehova. Easë fe a amamane la hni ne ole së jëne la itre hne së hna qaja me kuca. Tha tro kö sa tune la itre atr enehila ka pë hni ne ole kowe la itre hnei Akötresieti hna kuca. Celë hi ka amamane laka, easa melëne la “itre drai hnapin.” (2 Tim. 3:1, 2) Tha aja së kö troa hane tui angatr!
7. Nemene la hnei Iehova hna ajan tro sa kuca, nge pine nemen?
7 Tha aja i kem me thine kö tro la itre nekö i nyidroti a isi, ngo tro pe nyudreni a ihnimikeu me hetre sinee. Ketre tui Iehova, Nyidrëti a ajane tro la itre hlue i Nyidrëti a ihnim. Ame la easa ihnimikeu, easë hi lai a amamane laka, itre nyipi Keresiano së. (Ioane 13:35) Caasi hi la mekuna së memine la atre cinyihan la Salamo: “Lolopi hë me sheminge pi hë la kola ce lapa la ange tejin!” (Sal. 133:1) Ame la easa hnime la itre trejin, easë hi lai a amamane la ihnimi së koi Iehova. (1 Ioane 4:20) Ketre manathith ka tru la troa sine la lapa ne la itre trejin ka “loi hni jë nyipunie, ketre koi ketre, nge utipi itre xane ju”!—Efe. 4:32.
TROA IDRENGETHENGE MATRE AMAMANE LA IHNIMI SË
Wange ju la paragarafe 8
8. Thenge la hna qaja ngöne 1 Ioane 5:3, pine nemene matre easa drengethenge Iehova?
8 Iehova ajane tro la itre nekönatr a drengethenge la itre kem me thin. Nyidrëti fe a ajane tro sa drei Nyidrë. (Efe. 6:1) Eje hi, Iehova la Atre Xupi së me Atre nyihnyawane la mele së, nge ka inamacane kö Nyidrëti hune la itre kem me thin. Ngo easa drengethenge Iehova pine laka, tru la ihnimi së koi Nyidrë. (E jë la 1 Ioane 5:3.) Nyimutre la itre kepin matre loi e tro sa drengethenge Iehova. Ngo tha Nyidrëti kö a musinë së. Nyidrëti a nue së troa isa iën. Madrine catre Iehova ngöne la easa drengethenge Nyidrë ke, easa hnimi Nyidrë.
9-10. Pine nemene matre nyipiewekë troa atre me trongëne la itre hna amekötin qaathei Akötresie?
9 Ame la aja ne la kem me thin, tre, troa lolo la mele ne la itre nekö i nyidro. Celë hi matre, nyidroti a acile la itre hna amekötin. Ame la itre nekönatr a trongëne itre ej, nyudreni a amamane la mejiun me metrötre i nyudreni koi nyidro. Haawe, nyipiewekë tro sa atre me trongëne la itre hna amekötin ne la Keme së e koho hnengödrai. Easë hi lai a amamane laka, easa hnimi Nyidrë me metrötrë Nyidrë, nge hetre eloine koi së. (Is. 48:17, 18) Ngo hetre ethane kowe la itre ka tha drei Iehova, me nuetrije la itre hnei Nyidrëti hna amekötin.—Gal. 6:7, 8.
10 Ame la easa drengethenge Iehova, kola thupëne la mele së. Ketre, kola thupë së qa ngöne la itre ewekë ka troa thë la aqane imelekeu së me Nyidrë. Atre hi Nyidrëti la ka loi thatraqane la mele së. Öni Aurora qa Etazini: “Maine tro palahi sa drengethenge Iehova, tro ha tingeting me lolo la mele së.” Ka nyipici palahi lai enehila. Hapeu, hetre eloine fe kö hne së hna kapa qa ngöne la hna trongëne la itre hna amekötin qaathei Iehova?
11. Nemene la aqane troa xatua së hnene la thith?
11 Loi e tro sa catre thith ke, celë hi ka xatua së troa trongëne la itre hna amekötin ngacama jole ju hë. Ame itre xaa ijin, jole koi së troa idrengethenge ke, itre atr ka ngazo së. Hnene la atre cinyihan la Salamo hna sipo ielene koi Iehova, ka hape: “Sajuë ni hnene la u ka canga ajan.” (Sal. 51:12) Öni Denise, ketre pionie lapa: “Maine jole koi ni troa trongëne la hna amekötin hnei Iehova, eni a thith matre tro Nyidrëti a hamë ni la trengecatr troa kuca la meköt.” Tro palahi Iehova a sa la itre thithi cili.—Luka 11:9-13.
XATUANE JË LA ITRE XAN TROA HNIMI IEHOVA, KEME SË
12. Thenge la hna qaja ngöne Efeso 5:1, nemene la nyine tro sa kuca?
12 E jë la Efeso 5:1. Easë la “itre nekö hnimina” i Iehova, matre easa nyitipu Nyidrë. Easa thel troa nyitipune la aqane ihnimi Nyidrë, me thiina ka menyik, me nue la ngazo. Ame la itre xan a öhn la itre thiina cili, angatr a ajane troa hane atrepengöi Iehova hnyawa. (1 Pet. 2:12) Ketre, loi e tro la itre kem me thin Keresiano a nyihnyawane la itre nekönatr tui Iehova. Tro lai a thue aja koi nyudren troa hane nyi sinee i Iehova.
Wange ju la paragarafe 13
13. Nemene la nyine tro sa kuca matre troa catr?
13 Madrine catr la nekönatr troa qaja aloine la kem i nyën. Ketre tu së fe, easa madrine troa qeje Iehova koi itre xan ke, easa ajane tro angatr a hane atre Nyidrë. Caasi hi la mekuna së me Dravita joxu. Öni nyidrë: “Tro ha la ung’ a selë Iehova.” (Sal. 34:2) Ngo tune kaa e xou së troa qeje Iehova? Nemene la ka troa xatua së? Loi e tro sa lapa mekun la madrine i Iehova memine la itre manathith hna troa kapa hnei itre xan, e tro angatr a atre Nyidrë. Ketre, tro kö Iehova a hamë së la trengecatr ka ijij. Hnei Nyidrëti hna xatuane la itre Keresiano ekö troa catr, nge tro fe Nyidrëti lai a hane xatua së.—1 Thes. 2:2.
14. Pine nemene matre nyipiewekë tro sa catre cainöj me inine la itre atr?
14 Tha ka ië hna hnime kö Iehova, nge Nyidrëti a madrine la easa hnime la itre xan, ngacama isa aqane mele së kö me isa hane ngönetrei së kö. (Itre hu. 10:34, 35) Easa amamane la ihnimi së ngöne la easa cainöj koi itre xan. (Mat. 28:19, 20) Nemene la thangane la huliwa cili? Easa xatuane la itre atr troa trongëne la itre ini qaathei Iehova, me saze la mele i angatr, me mejiune kowe la mel ka tha ase palua kö ngöne la Paradraiso.—1 Tim. 4:16.
LOI E TROA HNIMI IEHOVA MATRE MADRIN
15-16. Pine nemene matre easa madrin?
15 Iehova la Keme së ka tru ihnimin, matre Nyidrëti a ajane tro la lapa ka cahae i Nyidrë a madrin. (Is. 65:14) Nyimutre la itre kepin matre ijije hi tro sa mele madrin enehila, ngacama easa cile kowe la itre jol. Xecie hnyawa koi së laka, Iehova a hnimi së. Ketre, atre hi së la hna qaja hnei Tusi Hmitrötr. (Iere. 15:16) Easë mina fe a sine la lapa ka cahae i Iehova, itre ka hnimi Nyidrë, me hnin la itre wathebo i Nyidrë, me ihnimikeu.—Sal. 106:4, 5.
16 Easa madrin ke, atre hi së laka, troa tingeting me lolo la mele së elany. Easenyi hë matre tro Iehova a apatrene la itre atr ka ngazo. Tro la Baselaia i Nyidrëti a aparadraisone la ihnadro. Ketre, easa mejiune la ijine troa amelene hmaca la itre sinee së hna hnim. (Ioane 5:28, 29) Drei la ketre manathith ka tru! Easa madrin ke, easenyi hë la ijine tro la itre ka mel e koho hnengödrai me e celë fen a ce atrunyi Iehova, Keme së.
NYIMA 12 Iehova, Akötresieti Ka Draië
^ Iehova Keme së a hnimi së. Hnei Nyidrëti hna ië së, matre troa hane sin la lapa ka cahae i Nyidrë. Celë hi kepin matre easa hnimi Nyidrë. Nemene la aqane tro sa amamane la ihnimi së koi Iehova? Tro sa ce wang ngöne la tane mekun celë la nyine tro sa kuca.
