1-2. Ebɛnadze ntsi na Jehovah ebue kwan ama hɛn dɛ yɛmbɛka n’ebusua ho, na ebɛn kwan do na ɔayɛ dɛm?

JEHOVAH ato nsa afrɛ hɛn dɛ yɛmbɛka n’ebusua a wɔyɛ n’asomfo no ho. Iyi yɛ nsatofrɛ a ɔkyɛn biara a hɛn nsa aka! Hɔn a wɔwɔ ebusua yi mu no yɛ nkorɔfo a woehyira hɔnho do ama Nyankopɔn. Nkyii so, wɔwɔ gyedzi wɔ ne Ba no no werdam afɔrbɔ no mu. Enyigye piinara wɔ ebusua yi mu. Ndɛ, hɔn a wɔwɔ dɛm ebusua yi mu no wɔ akomatɔyamu wɔ hɔn asetsena mu. Afei so, wodzi dɛw osiandɛ wɔwɔ enyidado dɛ daakye wobenya onnyiewiei nkwa wɔ sor anaa wɔ Paradise wɔ asaase yi do.

² Jehovah ebue kwan ama hɛn dɛ yɛmbɛka n’ebusua ho, osiandɛ ɔdɔ hɛn papaapa. Naaso, ansaana ɔrebɛyɛ dɛm no, ɔdze biribi a ɔsom bo papaapa bɔɔ afɔr. (John 3:16) Ɔtɔɔ hɛn “aboɔdzen.” (1 Cor. 6:20) Jehovah nam werdam afɔrbɔ no do ama ayɛ yie ama hɛn dɛ yɛnye no benya ebusuabɔ a no mu yɛ dzen. Yeenya ho kwan kɛse dɛ yɛbɛfrɛ Nyia ɔsõ kyɛn obiara wɔ amansan yi mu no dɛ hɛn Egya. Dɛ mbrɛ yehunii wɔ adzesua a odzi iyi enyim mu no, Jehovah yɛ Egya a ɔkyɛn egya biara.

3. Ebɛn nsɛm na yebotum ebisa hɛnho? (Hwɛ adakaba a wɔato dzin “ Ana Jehovah Nyim Me?”)

³ Dɛ mbrɛ Bible kyerɛwfo bi bisae no, bi a hɛn so yebebisa dɛ: ‘Ebɛnadze na medze mebɛhyɛ Jehovah ananmu, wɔ ne yie a ɔyɛ me nyinara ntsi?’ (Ndw. 116:12) Mbuae no nye dɛ yerunntum nnyɛ biribiara nnhyɛ hɛn sor Egya no ananmu da. Ɔdɔ a Jehovah wɔ ma hɛn no kenyan hɛn so ma yɛdɔ no bi. Ɔsomafo John kyerɛɛw dɛ: ‘Yɛdɔ, osiandɛ ɔno na odzii kan dɔɔ hɛn.’ (1 John  4:19) Ebɛn akwan na yebotum afa do akyerɛ hɛn sor Egya no dɛ yɛdɔ no?

4. Dɛ mbrɛ James 4:8 kyerɛ no, ebɛnadze ntsi na ɔsɛ dɛ yɛyer hɛnho dɛ yɛbɔtwe abɛn Jehovah?

⁴ Jehovah pɛ dɛ yɛtwe bɛn no na yɛbɔ no mpaa. (Kenkan James 4:8.) Ɔhyɛ hɛn nkuran dɛ ‘yɛnkɔ do nkura asɔryɛ mu,’ osiandɛ aber nyina ɔayɛ krado dɛ obetsie hɛn. (Rom. 12:12) Ɔwɔ adagyer a ɔdze tsie hɛn; nkyii so, ɔnnyɛ obi a ɔberɛ na ɔaakã dɛ ɔaberɛ ntsi orunntum nntsie hɛn. Afei so, yɛkenkan Bible no nye nwoma ahorow a ahyehyɛdze no ayɛ a ɔboa hɛn ma yɛtse n’Asɛm ase no. Yɛyɛ dɛm dze kyerɛ dɛ yeritsie no. Bio so, yɛyɛ aso ma no ber a yɛkyɛn hɛn aso pɛnn tsie dza ɔkɔ do wɔ Christianfo nhyiamu ase no. Sɛ mbofra nye hɔn awofo bɔ nkɔmbɔ daa a, ɔma wɔbɛn hɔn awofo yie. Dɛmara so na sɛ yɛbɔ Jehovah mpaa daa a, ɔboa hɛn ma yɛkɔ do bɛn no.

5. Yebesi dɛn akɔ do ama hɛn mpaabɔ aasɔ Nyankopɔn enyi?

⁵ Ɔsɛ dɛ isusu mbrɛ wo mpaabɔ tse wɔ Nyankopɔn enyim ho. Jehovah pɛ dɛ yɛkã hɛn akoma mu nsɛm kyerɛ no wɔ mpaabɔ mu. (Ndw. 62:8) Ɔsɛ dɛ yebisa hɛnho dɛm asɛm yi: ‘Ana me mpaabɔ tse dɛ obi ne nsɛm a mahwɛ do akyerɛw anaa me mpaabɔ tse dɛ nsɛm a ofi m’akoma mu a mankasa makyerɛw?’ Ekyingye biara nnyi ho dɛ, edɔ Jehovah papaapa, na epɛ dɛ ekɔ do hyɛ enye no ntamu ebusuabɔ no mu dzen. Sɛ ibotum akɔ do ayɛ dɛm a, ɔsɛ dɛ ebɔ no mpaa dabaa. Kã mbrɛ isi tse nka ho asɛm kyerɛ no. Enye no nkyɛ dza ɔma w’enyi gye nye dza ɔma idzi yaw. Nya ahotodo dɛ ibotum aserɛ no hɔ mboa.

6. Ebɛnadze na ɔsɛ dɛ yɛyɛ ama yaakɔ do atakyer Jehovah ho?

⁶ Sɛ yebotum atakyer hɛn sor Egya no ho a, ɔsɛ dɛ dabaa yɛkyerɛ dza ɔyɛ ma hɛn no ho enyisɔ. Yɛnye ɔdwontofo a ɔkãa dɛm asɛm yi yɛ adwen: ‘Jehovah, me Nyankopɔn, w’anwanwa ndwuma a ayɛ dɔɔ sõ, na w’adwen a ɔwɔ hɛn do no, worunntum nnhyehyɛ no akyerɛpɛn wɔ w’enyim; sɛ merekã na makasa ho a, wɔdɔɔ sõ sen dɛ wobotum akan.’ (Ndw. 40:5) Yɛyɛ pii sen enyisɔ a yenya ma Jehovah; yɛdze hɛn nsɛm nye hɛn ndzeyɛɛ kyerɛ dɛ hɛn enyi sɔ no. Iyi ma yɛda nsew koraa fi nyimpa pii a wɔwɔ hɔ ndɛ no ho. Wiadze a yɛtse mu yi, nyimpa piinara na wɔnnkyerɛ dza Nyankopɔn yɛ ma hɔn no ho enyisɔ. Nokwasɛm nye dɛ, adze kor a ɔma yehu dɛ yɛtse “nda a odzi ekyir” no mu nye dɛ nyimpa yɛ bɔnyiayɛfo. (2 Tim. 3:1, 2) Mma yennsũasua su a ɔtse dɛm da!

7. Ebɛnadze na Jehovah pɛ dɛ yɛyɛ, na ebɛnadze ntsi a?

⁷ Awofo mmpɛ dɛ hɔn mba nye obiara kõ, mbom wɔpɛ dɛ hɔn mba nye obiara tsena asomdwee mu. Dɛmara so na Jehovah pɛ dɛ n’asomfo nye hɔnho tsena asomdwee mu. Nokwasɛm nye dɛ, ɔdɔ a yɛwɔ ma hɛnho no na ɔda hɛn edzi dɛ nokwar Christianfo. (John 13:35) Yɛnye ɔdwontofo a ɔkãa dɛm asɛm yi yɛ adwen: “Hwɛ, mbrɛ odua na ɔyɛ fɛw ma enuanom dɛ wɔbɔbɔ mu atsena koryɛ mu!” (Ndw. 133:1) Sɛ yɛda ɔdɔ edzi kyerɛ hɛn nuanom mbarimba na mbaa a, yɛma Jehovah hu dɛ yɛdɔ no. (1 John 4:20) Hwɛ enyigye ara a ɔyɛ dɛ yɛka enuanom mbarimba na mbaa a wɔyɛ ebusua kor a ‘wɔwɔ ayamuyie nye ayamuhyehye ma hɔnho nkorkor’ no ho!​—Eph. 4:32.

8. Dɛ mbrɛ 1 John 5:3 ma yehu no, adze tsitsir ntsi a yɛyɛ setsie ma Jehovah nye dɛn?

⁸ Jehovah pɛ dɛ mbofra yɛ setsie ma hɔn awofo, na ɔpɛ dɛ hɛn so yɛyɛ setsie ma no. (Eph. 6:1) Ɔfata dɛ yɛyɛ setsie ma no osiandɛ ɔno nye hɛn Bɔfo, nyia ɔkora hɛn nkwa do, nye ɔwofo a onyim nyansa kyɛn ɔwofo biara. Naaso, adze tsitsir ntsi a yɛyɛ setsie ma Jehovah  nye dɛ, yɛdɔ no. (Kenkan 1 John 5:3.) Ɔwɔ mu dɛ yɛwɔ siantsir pii ntsi a ɔsɛ dɛ yɛyɛ setsie ma Jehovah dze, naaso ɔnnhyɛ hɛn dɛ yɛnyɛ dɛm. Jehovah ama hɛn ho kwan dɛ yemfi hɛn pɛ mu nyɛ adze, ntsi sɛ yɛpaw dɛ yɛbɛyɛ setsie ama no osian ɔdɔ a yɛwɔ ma no a, ɔma n’enyi gye papaapa.

9-10. Ebɛnadze ntsi na ɔwɔ dɛ yehu Nyankopɔn ne mbra na yedzi do?

⁹ Awofo pɛ dɛ wɔbɔ hɔn mba ho ban. Dɛm ntsi na wɔhyehyɛ mbra a ɔbɔ hɔn mba ho ban no. Sɛ mbofra dzi mbra a ɔtse dɛm do a, wɔda no edzi dɛ wɔwɔ hɔn awofo mu ahotodo na wobu hɔn. Dɛm ntsi, no ho hia papaapa dɛ yehu mbra a hɛn sor Egya ahyehyɛ na yedzi do. Sɛ yɛyɛ dɛm a, yɛma Jehovah hu dɛ yɛwɔ ɔdɔ na obu ma no. Afei so, sɛ yedzi ne mbra do a, yenya do mfaso. (Isa. 48:17, 18) Naaso, hɔn a wɔpow Jehovah nye ne mbra no, wotwa do aba yayaayaw.​—Gal. 6:7, 8.

¹⁰ Sɛ yɛbɔ hɛn bra ma ɔsɔ Jehovah n’enyi a, ɔbɔ hɛnho ban fi ndzɛmba a obotum epira hɛn wɔ honam nye nkãtse afamu ho. Afei so, ɔbɔ hɛnho ban fi ndzɛmba a obotum asɛɛ yɛnye Jehovah ntamu ebusuabɔ no ho. Jehovah na onyim dza oye papaapa ma hɛn. Aurora yɛ hɛn akyerɛbaa a ɔwɔ United States. Ɔkãa dɛ, “Minyim dɛ sɛ yɛyɛ setsie ma Jehovah a, hɛn asetsena besi hɛn yie daa.” Iyi yɛ nokwar aber nyina. Ana ayɛ setsie ama Jehovah n’akwankyerɛ a ɔdɔ wɔ mu no ma esi wo yie?

11. Ebɛnadze na mpaabɔ boa hɛn ma yɛyɛ?

¹¹ Mpaabɔ boa hɛn ma yɛyɛ setsie ma Jehovah ber mpo a ɔyɛ dzen ma hɛn dɛ yɛbɛyɛ dɛm. Ɔtɔ da a, ɔyɛ dzen dɛ yɛbɛyɛ setsie ama Jehovah  osiandɛ yɛtɔ sin ntsi. Naaso, ɔsɛ dɛ dabaa yɛbɔ mbɔdzen kɛse dɛ yɛbɔkõ etsia biribiara a ɔbɛma yɛayɛ bɔn. Ɔdwontofo no serɛɛ Jehovah dɛ ɔmma no “ɔpɛ sunsum” a ɔdze betsie no. (Ndw. 51:12) Denise yɛ hɛn akyerɛbaa a ɔyɛ daa kwampaaefo. Ɔkãa dɛ, “Sɛ muhu dɛ ɔyɛ dzen ma me dɛ mibedzi Jehovah ne mbra no mu kor do a, mobɔ mpaa serɛ ahoɔdzen a medze bɛyɛ dza ɔtsen.” Yebotum enya awerɛhyɛmu dɛ dabaa Jehovah betsie mpaabɔ a ɔtse dɛm.​—Luke 11:9-13.

12. Dɛ mbrɛ Ephesusfo 5:1 kyerɛ no, ebɛnadze na ɔsɛ dɛ yɛyɛ?

¹² Kenkan Ephesusfo 5:1. Osiandɛ yɛyɛ Jehovah ne ‘mba’ a ɔdɔ hɛn ntsi, yɛyer hɛnho papaapa dɛ yebosũasua no. Yesũasua no ber a yɛda ɔdɔ nye ayamuyie edzi kyerɛ afofor na yɛdze hɔn mfom kyɛ hɔn no. Sɛ hɔn a wonnyim Nyankopɔn hu hɛn abrabɔ pa a, obotum ekenyan hɔn ma woeesũa noho adze pii. (1 Pet. 2:12) Ɔsɛ dɛ awofo a wɔyɛ Christianfo bɔ mbɔdzen dɛ wɔnye hɔn mba bedzi dɛ mbrɛ Jehovah nye hɛn dzi no. Sɛ wɔyɛ dɛm a, bi a hɔn mba so benya ɔpɛ dɛ wɔnye hɛn Egya a ɔwɔ ɔdɔ no bɛfa nyɛnko.

13. Ebɛnadze na ɔsɛ dɛ yɛyɛ ama yeenya akokodur?

¹³ Mbofra taa pɛ hɔn egyanom hɔn asɛm na hɔn enyi gye ho dɛ wɔbɛkã hɔn egyanom ho asɛm akyerɛ afofor. Dɛmara so na yɛpɛ Jehovah hɛn sor Egya no asɛm, na yɛpɛ dɛ yɛboa afofor ma wohu no. Yɛtse nka wɔ hɛn akoma mu dɛ mbrɛ Ɔhen David tsee nka no. Ɔkãa dɛ:  ‘Me kra hyehyɛ noho wɔ Jehovah mu.’ (Ndw. 34:2) Naaso, sɛ yesuro dɛ yɛbɛkã Jehovah ho asɛm akyerɛ afofor ɛ? Yebesi dɛn enya akokodur? Sɛ yɛdwendwen mbrɛ yɛbɛma Jehovah n’enyi agye nye mfaso a afofor benya ber a woesũa noho adze no ho a, ɔno bɛma yenya akokodur. Jehovah bɛma hɛn akokodur a yehia. Dɛ mbrɛ ɔboaa tsetse Christianfo no ma wonyaa akokodur no, dɛmara so na ɔbɔboa hɛn ma yeenya akokodur.​—1 Thess. 2:2.

14. Ebɛnadze ntsi na no ho hia dɛ yɛyɛ esuafoyɛ edwuma no?

¹⁴ Jehovah nnyɛ enyimhwɛ, ntsi sɛ ohu dɛ yɛreda ɔdɔ edzi akyerɛ afofor ɔmmfa ho tsebea a wɔwɔ mu nye beebi a wofi a, ɔma n’enyi gye. (Andw. 10:34, 35) Yɛwɔ akwan ahorow a otu mpon a yebotum afa do ada ɔdɔ edzi akyerɛ afofor. No mu kor nye dɛ yɛbɛkã asɛmpa no akyerɛ hɔn. (Matt. 28:19, 20) Ebɛnadze na obotum efi dɛm edwuma yi mu aba? Hɔn a wotsie hɛn no botum enya asetsena a otu mpon ndɛ na woeenya enyidado dɛ daakye wɔbɛtsena ase daa wɔ Paradise wɔ asaase do.​—1 Tim. 4:16.

15-16. Ebɛnadze ntsi na ɔsɛ dɛ hɛn enyi gye?

¹⁵ Jehovah yɛ Egya a ɔwɔ ɔdɔ, ntsi ɔpɛ dɛ ne mba nya enyigye. (Isa. 65:14) Siantsir pii wɔ hɔ ntsi a yebotum enya enyigye ndɛ ɔmmfa ho nsɛndzendzen a bi a yerihyia no. Dɛ nhwɛdo no, yɛwɔ ahotodo dɛ hɛn sor Egya no dɔ hɛn papaapa. Yɛwɔ Nyankopɔn n’Asɛm Bible no mu nyimdzee a odzi mũ. (Jer. 15:16) Afei so, yɛka ebusua soronko bi ho. Dɛm ebusua no mufo dɔ Jehovah, wɔdɔ ne mbra, na wɔdodɔ hɔnho.​—Ndw. 106:4, 5.

¹⁶ Yebotum akɔ do ara enya enyigye osiandɛ yɛwɔ enyidado papabi dɛ asetsena bɛyɛ kama daakye. Yenyim dɛ ɔnnkɛkyɛr Jehovah beyi emumuyɛfo nyina efi hɔ, na ɔnam n’Ahendzi no do bɛma asaase nyina adan Paradise. Afei so, yɛwɔ enyidado dɛ wobenyan hɔn a woewuwu no ma wɔnye hɔn adɔfo aabɔ mu bio. (John 5:28, 29) Iyi bɛyɛ enyika! Na dza ɔkyɛn ne nyina no, yenyim dɛ ɔnnkɛkyɛr obiara a ɔwɔ sor nye asaase do no dze enyidzi, ayɛyi, nye ɔsom a ɔfata bɛma hɛn Egya a ɔwɔ ɔdɔ no.