1-2. Na cava e vakarautaka kina o Jiova na sala meda lewe kina ni nona vuvale? E vakarautaka vakacava?

E SURETI keda o Jiova meda mai lewe ni nona vuvale era qaravi koya. Qori e dua dina na ka marautaki! Era lewe ni vuvale qo o ira na yalataki ira vua na Kalou, era vakaraitaka nira vakabauta na isoro ni veivoli i Luvena. Eda vuvale mamarau. Io, e vakainaki na noda bula, eda marautaka tale ga noda inuinui ni bula tawamudu i lomalagi se na Parataisi e vuravura.

² E vakuai koya o Jiova me vakarautaka na sala meda lewena kina na nona vuvale. E cakava qori ni lomani keda vakalevu. (Joni 3:16) Sa rauta me tukuni nida “voli ena isau levu sara.” (1 Kor. 6:20) E vakarautaka o Jiova na ivoli me rawa nida veiwekani voleka kei koya. E dua dina na ka dokai meda vakatokai koya e cecere duadua ena lomalagi kei na vuravura me Tamada. Io, me vaka eda vulica ena ulutaga sa oti, o Jiova e Tamada vinaka duadua.

3. Na taro cava eda na rairai taroga? (Raica tale ga na kato “ E Kauaitaki Au o Jiova?”)

³ Eda na rairai duavata kei na ka e taroga e dua na dauvola iVolatabu, e kaya: “Na cava au na dolea vei Jiova ena vuku ni veika vinaka kece sa cakava vei au?” (Same 116:12) E macala ga nida na sega ni dolea rawa na veika sa cakava na Tamada vakalomalagi. Ia na nona loloma e uqeti keda meda lomani koya tale ga. E vola na yapositolo o Joni: “Eda veilomani baleta ni a liu sara ga na nona lomani keda na Kalou.” (1 Joni 4:19) Na sala cava eda rawa ni vakaraitaka kina  vua na Tamada vakalomalagi nida lomani koya?

4. Me vaka e tukuni ena Jemesa 4:8, na cava meda saga kina meda toro voleka vei Jiova?

⁴ E vinakata o Jiova meda toro voleka vua, meda rogoci koya, meda masu tale ga vua. (Wilika Jemesa 4:8.) E uqeti keda meda “gumatua ena masu,” ena tu vakarau me rogoci keda ena veigauna. (Roma 12:12) Ena sega vakadua ni oca se osooso me rogoci keda. Ia eda na rogoci koya vakacava? Oya nida wilika nona Vosa na iVolatabu kei na ivola e vakarautaki meda kila vinaka kina. Eda rogoci koya tale ga nida vakarorogo vinaka ena soqoni vaKarisito. Me vaka ga nodra veivolekati na gone kei na nodra itubutubu nira veitalanoa wasoma, eda na volekati Jiova tiko ga nida rogoci koya, eda masu tale ga vua.

5. Eda na vakavinakataka vakacava noda ivakarau ni masu?

⁵ Vakasamataka mada na ivakarau ni nomu masu vua na Kalou. E vinakata o Jiova meda sova yani vua na lomada. (Same 62:8) E vinaka gona meda taroga: ‘Vakacava e duadua tu ga na ivakarau ni noqu masu seu dau masu sara ga mai vu ni lomaqu?’ E macala ni o lomani Jiova vakalevu, o vinakata tale ga me dei nomudrau veiwekani. Ena rawa qori ni o masu wasoma vua. Talaucaka vua na lomamu, na ka vuni mada ga. Tukuna vua na ka o marautaka kei na veika o rarawataka. Mo kua ni rere ni kerea nona veivuke.

6. Na cava meda cakava me dei noda veiwekani kei na Tamada vakalomalagi?

⁶ Me dei noda veiwekani kei na Tamada vakalomalagi, e bibi meda vakavinavinakataka tiko ga na veika e cakava. Eda duavata kei na ka e vola na daunisame: “E levu na ka oni sa cakava, i Jiova na noqu Kalou, na nomuni cakacaka veivakurabuitaki kei na nomuni nanumi keimami. E sega ni dua e tautauvata kei kemuni, keu tovolea meu tukuna qai vakamacalataka, ena sega ni tukuni rawa!” (Same 40:5) Eda na sega ni vakasamataka ga na ka eda vakavinavinakataka, eda na vakaraitaka sara ga vei Jiova ena ka eda tukuna kei na ka eda cakava. Qori e dua na ka eda duidui kina vei ira e levu nikua. Levu era sega sara ga ni vakavinavinakataka na ka kece e cakava vei ira o Jiova. Nodra sega ni dau vakavinavinaka e levu, e ivakatakilakila ni “iotioti ni veisiga.” (2 Tim. 3:1, 2) Me kua mada ga ni va qori na noda rai!

7. Na cava e vinakata o Jiova meda cakava? Na vuna?

⁷ Era sega ni vinakata na itubutubu mera dau veivala na luvedra ia mera veilomani. E vinakata tale ga o Jiova mera veimaliwai vinaka na luvena. Io, na noda veilomani e dusia nida lotu vaKarisito dina. (Joni 13:35) Eda duavata kei na ka e vola na daunisame: “Sa dua na ka vinaka qai marautaki nira tiko ena duavata na veitacini!” (Same 133:1) Nida lomani ira na tacida, eda sa vakaraitaka tiko vei Jiova nida lomani koya. (1 Joni 4:20) E totoka dina nida lewena na mataveitacini era ‘veilomani, era veinanumi’ tale ga!—Efeso 4:32.

8. Me vaka e tukuni ena 1 Joni 5:3, na cava na vuna levu eda talairawarawa kina vei Jiova?

⁸ Era vinakata na itubutubu mera talairawarawa na luvedra, qori tale ga na ka e vinakata vei keda o Jiova. (Efeso 6:1) E dodonu ga meda talairawarawa vua ni Dauveibuli, e vakarautaka na ka meda bula kina, e vuku sara vei ira na tamada e vuravura. Ia na vuna levu eda talairawarawa kina vei Jiova oya nida lomani koya. (Wilika  1 Joni 5:3.) E levu na vuna meda lomani Jiova kina, ia e sega ni vakasaurarataki keda. E solia vei keda na galala ni vakatulewa, e marau gona nida digia meda talairawarawa vua nida lomani koya.

9-10. Na cava meda kila kina nona ivakatagedegede na Kalou qai muria sara?

⁹ Era vinakata na itubutubu mera taqomaki luvedra. Era vakarautaka gona na ivakatagedegede mera muria mera vinaka kina. Nira muria qo na luvedra, era vakaraitaka nira nuitaka na nodra itubutubu, era dokai ira tale ga. E bibi sara meda kila na nona ivakatagedegede na Tamada vakalomalagi da qai muria. Nida cakava qori, eda vakaraitaka vei Jiova nida lomani koya, eda dokai koya, ena vinaka tale ga vei keda. (Aisea 48:17, 18) Ia vakacava o ira na beci Jiova kei na nona ivakatagedegede? Era na vakaleqai ira ga.—Kala. 6:7, 8.

¹⁰ Nida vakamarautaki Jiova ena ka eda cakava, eda na taqomaki vakayago, vakayalo, ena vinaka tale ga na ivakarau ni lomada. Io, e kila o Jiova na ka eda na vinaka kina. E kaya o Aurora e dua na tacida yalewa mai Merika, “Au kila ni noda talairawarawa vei Jiova, ena vinaka ga kina noda bula.” Eda duavata kei na tacida qori. Vakacava o vakadinata na yaga ni nomu talairawarawa ina veidusimaki vakayalololoma i Jiova?

11. Ena yaga vakacava na masu?

¹¹ Na masu ena uqeti keda meda talairawarawa ke mani dredre mada ga. E  dau dredre ena so na gauna meda talairawarawa vei Jiova nida ivalavala ca, ia meda sasaga tiko ga meda muria na ka e vinakata. E vakamamasu vua na Kalou na daunisame: “Ni uqeta na lomaqu meu talairawarawa vei kemuni.” (Same 51:12) E kaya o Denise e dua na tacida e painia tudei, “Ni dredre meu muria e dua na ivakaro i Jiova, au dau masu meu kerea na kaukaua meu cakava na ka e dodonu.” Eda nuidei ni na sauma o Jiova na masu va qori.—Luke 11:9-13.

12. Me vaka e tukuni ena Efeso 5:1, na cava meda cakava?

¹² Wilika Efeso 5:1. E okati keda o Jiova meda “luvena lomani,” eda na vakatotomuri koya ena noda vinaka kece. Oya nida dau loloma, yalovinaka, veivosoti tale ga. Nira raica o ira na sega ni kilai Jiova na noda itovo vinaka, de dua era na via vulica na veika me baleti koya. (1 Pita 2:12) Mera saga tale ga na itubutubu mera vakaraitaka vei luvedra na itovo i Jiova. Nira cakava qori, ena rawa ni uqeti luvedra mera via veitokani tale ga kei na Tamada dauloloma.

13. Na cava meda cakava meda doudou kina?

¹³ Ena sakitaki tamana o luvena lailai, ena marau ni talanoataki koya. Io, eda sakitaki Jiova tale ga na Tamada vakalomalagi, da qai vinakata mera mai kilai koya eso tale. Eda duavata kei na rai nei Tui Tevita ni  vola: “Au na sakitaki Jiova.” (Same 34:2) Ia vakacava ke da dau mamadua? Ena rawa vakacava nida doudou? Eda na doudou nida vakasamataka na levu ni nona marau o Jiova nida tukuni koya kei na kena yaga vei ira na rogoca. O Jiova ena vukei keda meda yaloqaqa. A vukei ira na tacida ena imatai ni senitiuri mera doudou, ena vukei keda tale ga.—1 Ces. 2:2.

14. Ena yaga vakacava nida vakaitavi ena veivakatisaipelitaki?

¹⁴ E sega ni dau veivakaduiduitaki o Jiova. E marau gona nida lomani ira eso tale se mani vanua cava era gole mai kina se kedra ituvaki. (Caka. 10:34, 35) Dua na sala eda vakaraitaka kina noda loloma oya nida vunautaka na itukutuku vinaka. (Maciu 28:19, 20) Ena yaga vakacava? Ena vinaka kina nodra ivakarau ni bula na rogoci keda, era na rawata tale ga na inuinui marautaki ni bula tawamudu.—1 Tim. 4:16.

15-16. Na cava meda mamarau tiko ga kina?

¹⁵ E Tama dauloloma o Jiova, e vinakata gona me marau na nona vuvale. (Aisea 65:14) E levu na vuna meda mamarau kina ena gauna qo ke da sotava mada ga na ituvaki dredre. Kena ivakaraitaki, eda nuidei ni lomani keda vakalevu na Tamada vakalomalagi. Eda sa mai kila na ka dina ena Vosa ni Kalou na iVolatabu. (Jere. 15:16) Eda dua tale ga na vuvale totoka era lewena na lomani Jiova, era mareqeta nona ivakatagedegede savasava ra qai veilomani.—Same 106:4, 5.

¹⁶ Eda na marau tiko ga nida kila ni na totoka vakaoti na bula ena gauna se bera mai. Eda kila ni sa vakarau vakarusai ira kece na tamata ca o Jiova, ena qai vakayagataka nona Matanitu me veisautaka na vuravura me Parataisi. Eda nanamaki tale tu ga ena inuinui totoka ni veivakaturi meda sotavi ira tale na wekada lomani era takali. (Joni 5:28, 29) Io, ena marautaki dina! Koya e bibi sara, eda kila ni sa voleka na gauna era na sokalou duadua ga kina vua na Tamada dauloloma na lewe i vuravura kei lomalagi, era rokovi koya, era lagiti koya tale ga.