1-2. Mɛni Yehowa efee koni wɔsɛɛ lɛ, wɔnyɛ wɔbafata eweku lɛ he? Ni mɛni tsirɛ lɛ ni efee nakai?

YEHOWA ehã wɔbafata mɛi ni efee ekome tamɔ weku kɛmiijá lɛ lɛ ahe. Enɛ ji hegbɛ ni nɔ bɛ! Mɛi fɛɛ ni yɔɔ weku nɛɛ mli lɛ ejɔɔ amɛhe nɔ amɛhã Nyɔŋmɔ, ni amɛheɔ amɛyeɔ akɛ, ehã e-Bi lɛ kɛ ewala bashã afɔle ehã wɔ. Mɔ fɛɛ mɔ ni yɔɔ weku nɛɛ mli lɛ yɛ miishɛɛ, ejaakɛ amrɔ nɛɛ po lɛ, wɔkɛ wɔwala miitsu nibii ni sa Nyɔŋmɔ hiɛ, ni wɔyɛ hiɛnɔkamɔ akɛ wɔsɛɛ lɛ, wɔbaahi shi kɛya naanɔ, kɛ́ yɛ ŋwɛi jio, shikpɔŋ lɛ nɔ jio.

² Suɔmɔ kpele ni Yehowa yɔɔ kɛhã wɔ lɛ hewɔ lɛ, ekɛ enii ni jara wa fe fɛɛ lɛ shã afɔle yɛ wɔhewɔ, bɔ ni afee ni wɔsɛɛ lɛ, wɔnyɛ wɔbafata eweku lɛ he. (Yoh. 3:16) Biblia lɛ kɛɔ akɛ ‘ahé wɔ kɛ jara ni wa.’ (1 Kor. 6:20) Eji Yehowa hãaa e-Bi lɛ abagbo kɛkpɔ̃ wɔ kulɛ, wɔnyɛŋ wɔtsɛ lɛ wɔ-Tsɛ kɔkɔɔkɔ. Shi amrɔ nɛɛ, wɔná nakai hegbɛ lɛ, akɛ wɔbaatsɛ mɔ ni fe fɛɛ yɛ ŋwɛi kɛ shikpɔŋ lɛ akɛ wɔ-Tsɛ. Ni tamɔ bɔ ni wɔna yɛ nikasemɔ ni tsɔ hiɛ lɛ mli lɛ, tsɛ ko bɛ ni tamɔ lɛ.

3. Kɛ́ wɔsusu nibii kpakpai ni Yehowa efee ehã wɔ lɛ ahe lɛ, mɛɛ saji ekolɛ wɔbaabi? (Kwɛmɔ akrabatsa ni yitso ji, “ Ani Yehowa Jwɛŋɔ Mihe?” lɛ hu.)

³ Mɛi ni ŋma Biblia lɛ ateŋ mɔ kome bi akɛ: “Mɛni mikɛbaato Yehowa najiaŋ yɛ nibii kpakpai fɛɛ ni efee ehã mi lɛ hewɔ?” (Lala 116:12) Ekolɛ bo hu oobi ohe sane kome too nɛɛ nɔŋŋ. Hetoo lɛ ji, nɔ ko kwraa bɛ ni wɔkɛbaato wɔ-Tsɛ ni yɔɔ ŋwɛi lɛ najiaŋ. Shi bɔ ni esumɔɔ wɔ waa lɛ hewɔ lɛ, wɔ hu wɔsumɔɔ lɛ. Bɔfo Yohane ŋma akɛ: “Wɔjieɔ suɔmɔ kpo, ejaakɛ lɛ klɛŋklɛŋ esumɔ wɔ.” (1 Yoh. 4:19) Shi te wɔbaafee tɛŋŋ wɔhã wɔ-Tsɛ ni yɔɔ ŋwɛi lɛ ana akɛ wɔsumɔɔ lɛ?

4. Yɛ nɔ ni awie yɛ Yakobo 4:8 lɛ naa lɛ, mɛni hewɔ esa akɛ wɔfee nibii ni baahã wɔ kɛ Yehowa teŋ wekukpaa lɛ mli awa?

⁴ Yehowa miisumɔ ni wɔkɛ lɛ abɔ naanyo ni wɔkɛ lɛ agba sane. (Kanemɔ Yakobo 4:8.) Ekɛɛ wɔsɔle daa, ni be fɛɛ be ni wɔbaafee nakai lɛ, eboɔ wɔ toi. (Rom. 12:12) Yehowa ekɛŋ kɔkɔɔkɔ akɛ ebɛ dekã loo etɔ lɛ tsɔ ni ebaabo wɔ toi. Esa akɛ wɔ hu wɔbo lɛ toi. Gbɛ kome ni wɔbaanyɛ wɔtsɔ nɔ wɔfee nakai ji, ni wɔbaakane e-Wiemɔ lɛ, ni ji Biblia lɛ, kɛ asafo lɛ woji lɛ daa. Asafo lɛ woji lɛ yeɔ amɛbuaa wɔ ni wɔnuɔ Biblia lɛ shishi. Agbɛnɛ hu, esa akɛ wɔya asafoŋ kpeei, ni wɔbo saji ni awieɔ yɛ jɛmɛ lɛ toi jogbaŋŋ, ejaakɛ no hu baatsɔɔ akɛ wɔmiibo Yehowa toi. Bɔ ni kɛ́ bii kɛ amɛfɔlɔi gba sane be fɛɛ be lɛ, wekukpaa ni yɔɔ amɛteŋ lɛ mli baawa lɛ, nakai nɔŋŋ kɛ́ wɔkɛ Yehowa gba sane daa lɛ, wekukpaa ni yɔɔ wɔ kɛ lɛ teŋ lɛ mli baawa.

5. Mɛni baahã wɔsɔlemɔi asa Yehowa hiɛ jogbaŋŋ?

⁵ Yehowa miisumɔ ni kɛ́ wɔmiisɔle lɛ, ‘wɔfɔse wɔtsuiiaŋ wɔshwie ehiɛ.’ (Lala 62:8) Ani nakai ofeɔ? Bi ohe akɛ: ‘Eji misɔlemɔi lɛ tamɔ wolo kulɛ, ani Yehowa baana lɛ tamɔ wolo ni mi diɛŋtsɛ mijɛ mitsuiŋ miŋma? Aloo ebaana lɛ tamɔ wolo ni mɛi krokomɛi eŋma ni miyakɔ mikɛbahã lɛ?’ Wɔ fɛɛ wɔsumɔɔ Yehowa waa, ni wɔmiisumɔ ni wekukpaa kpakpa ahi wɔ kɛ lɛ teŋ be fɛɛ be, aloo jeee nakai? Shi ja wɔkɛ lɛ fɔɔ sanegbaa dani wɔbaanyɛ wɔná lɛ nakai. No hewɔ lɛ, gbaa Yehowa oyitsoŋ kɛ otsuiŋ saji fɛɛ; okɛ nɔ ko nɔ ko akatee lɛ. Gbaa lɛ nibii ni hãa onáa miishɛɛ kɛ nibii ni gbaa onaa fɛɛ. Ni kaashashao shi kwraa akɛ obaabi edɛŋ yelikɛbuamɔ.

6. Kɛ́ wɔmiisumɔ ni wekukpaa ni yɔɔ wɔ kɛ wɔ-Tsɛ ni yɔɔ ŋwɛi lɛ teŋ lɛ mli awa be fɛɛ be lɛ, mɛni esa akɛ wɔfee?

⁶ Kɛ́ wɔmiitao ni wekukpaa ni yɔɔ wɔ kɛ wɔ-Tsɛ ni yɔɔ ŋwɛi lɛ teŋ lɛ mli awa be fɛɛ be lɛ, esa akɛ wɔhiɛ asɔ nibii ni efeɔ ehãa wɔ lɛ. Lalatsɛ ko wie akɛ: “Ao Yehowa, mi-Nyɔŋmɔ, kwɛmɔ nibii babaoo ni ofee, onaakpɛɛ nitsumɔi kɛ jwɛŋmɔ ni ohiɛ yɛ wɔhe lɛ. Anyɛŋ akɛ mɔ ko mɔ ko ato ohe; kɛ́ mikɛɛ mawie he ni magba lɛ, amɛfa fe bɔ ni abaanyɛ akane!” (Lala 40:5) Ani okɛ lalatsɛ nɛɛ kpãaa gbee? Akɛni wɔhiɛ sɔɔ nibii ni Yehowa feɔ ehãa wɔ lɛ lɛɛlɛŋ hewɔ lɛ, anaa yɛ wɔwiemɔ kɛ wɔnifeemɔ mli, ni enɛ hãa esoroɔ wɔ kwraa yɛ mɛi pii ni yɔɔ je lɛŋ ŋmɛnɛ lɛ ahe. Ŋmɛnɛ lɛ, mɛi ahiɛ esɔɔɔ nibii pii ni Nyɔŋmɔ feɔ ehãa amɛ lɛ. Biblia lɛ wie akɛ, nibii ni baahã wɔna akɛ wɔyɛ “naagbee gbii lɛ” amli lɛ eko ji akɛ, mɛi baafee “mɛi ni hiɛ esɔɔɔ nii.” (2 Tim. 3:1, 2) Wɔsumɔŋ ni wɔfee wɔnii tamɔ amɛ kɔkɔɔkɔ!

7. Te Yehowa miisumɔ ni wɔkɛ wɔnyɛmimɛi lɛ ahi shi ahã tɛŋŋ? Ni mɛni hewɔ?

⁷ Fɔlɔi miisumɔ ni suɔmɔ ahi amɛbii lɛ ateŋ, ni amɛsumɔɔɔ ni amɛkɛ amɛhe béɔ. Yehowa hu miisumɔ ni ebii lɛ fɛɛ kɛ amɛhe ahi shi yɛ toiŋjɔlɛ mli, ni suɔmɔ ahi amɛteŋ. Anɔkwa, suɔmɔ ni yɔɔ wɔteŋ lɛ hãa anaa akɛ anɔkwa Kristofoi ji wɔ. (Yoh. 13:35) Mɛi ni ŋma Lala wolo lɛ ateŋ mɔ kome wie akɛ: “Kwɛ bɔ ni ehi, kwɛ bɔ ni eyɔɔ fɛo akɛ nyɛmimɛi baafee ekome kɛhi shi!” (Lala 133:1) Kɛ́ wɔsumɔɔ wɔnyɛmimɛi Kristofoi lɛ, no hãa Yehowa naa faŋŋ akɛ, wɔsumɔɔ lɛ. (1 Yoh. 4:20) Wɔ kɛ wɔnyɛmimɛi lɛ ateŋ mɔ fɛɛ mɔ ‘mli hi hã enyɛmi, ni wɔmusuŋ tsɔɔ wɔ yɛ wɔteŋ mɔ fɛɛ mɔ he.’ Enɛ yɛ fɛo pam, aloo jeee nakai?​—Efe. 4:32.

8. Yɛ nɔ ni awie yɛ 1 Yohane 5:3 lɛ naa lɛ, mɛni ji nɔ titri hewɔ ni wɔboɔ Yehowa toi?

⁸ Yehowa kɛɛ bii abo amɛfɔlɔi toi, ni eekpa gbɛ akɛ wɔ hu wɔbaabo lɛ toi. (Efe. 6:1) Yehowa ni bɔ wɔ, lɛ ehãa wɔ nibii ni he hiaa wɔ koni wɔhi wala mli, ni ehiɛ kã shi fe fɔlɔi fɛɛ ni yɔɔ je lɛ mli. No hewɔ lɛ, ani esaaa akɛ wɔboɔ lɛ toi? Kɛ̃lɛ, nɔ titri hewɔ ni wɔboɔ Yehowa toi ji akɛ, wɔsumɔɔ lɛ. (Kanemɔ 1 Yohane 5:3.) Nɔ fɛɛ nɔ tsɔɔ akɛ, esa akɛ wɔbo Yehowa toi. Fɛɛ sɛɛ lɛ, enyɛɛɛ wɔnɔ ni wɔfee nakai. Yehowa edro wɔ heyeli, no hewɔ lɛ, kɛ́ wɔhala akɛ wɔbaabo lɛ toi yɛ suɔmɔ ni wɔsumɔɔ lɛ hewɔ lɛ, emii shɛɔ ehe waa.

9-10. Mɛni hewɔ ehe miihia ni wɔle Nyɔŋmɔ mlai kɛ eshishitoo mlai lɛ ni wɔhi shi yɛ naa?

⁹ Fɔlɔi sumɔɔɔ ni amɛbii yeɔ amɛhe awui, ni no hewɔ amɛtsɔɔ amɛ bɔ ni amɛba amɛjeŋ amɛhã lɛ. Kɛ́ bii bo gbɛtsɔɔmɔi nɛɛ toi lɛ, amɛnáa he sɛɛ, ni ehãa amɛfɔlɔi naa akɛ, amɛheɔ amɛ amɛyeɔ ni amɛbuɔ amɛ. Ni wɔ-Tsɛ ni yɔɔ ŋwɛi lɛ hu? Ani esaaa akɛ wɔboɔ lɛ toi ni wɔhiɔ shi yɛ emlai kɛ eshishitoo mlai lɛ anaa? Esa akɛ wɔfee nakai aahu tsɔ. Kɛ́ wɔbo Yehowa toi lɛ, no tsɔɔ akɛ wɔsumɔɔ lɛ ni wɔbuɔ lɛ, ni wɔ diɛŋtsɛ wɔnáa he sɛɛ. (Yes. 48:17, 18) Mɛi ni kɛ Yehowa gbɛtsɔɔmɔi tsuuu nii lɛ yeɔ amɛhe awui.​—Gal. 6:7, 8.

¹⁰ Kɛ́ wɔhi shi bɔ ni sa Yehowa hiɛ lɛ, wɔfeŋ nibii ni baaye wɔgbɔmɔtso lɛ awui, nibii ni baahã wɔwerɛ aho wɔhe, loo nibii ni baafite wɔ kɛ lɛ teŋ. Yehowa le nibii ni kɛ́ wɔfee lɛ, ebaahi ehã wɔ. Nyɛmi yoo ko ni yɔɔ United States, ni atsɛɔ lɛ Aurora lɛ wie akɛ: “Mile  akɛ, kɛ́ mibo Yehowa toi lɛ, bɔ fɛɛ bɔ ni fee lɛ, ebaahi ehã mi waa.” Kɛ́ wɔ hu wɔbo Yehowa toi lɛ, ebaahi ehã wɔ. Mɛɛ gbɛ nɔ oná gbɛtsɔɔmɔi ni Yehowa jɛɔ suɔmɔ mli ekɛhãa wɔ lɛ ahe sɛɛ?

11. Mɛni sɔlemɔ baanyɛ aye abua wɔ ni wɔfee?

¹¹ Nɔ kome ni baawa wɔ ni wɔbo Yehowa toi kɛ́ nakai feemɔ wa kɛhã wɔ po ji, sɔlemɔ. Jeee be fɛɛ be wɔbaaná lɛ mlɛo akɛ wɔbaabo Yehowa toi, ejaakɛ wɔyeee emuu. Shi esa akɛ wɔmia wɔhiɛ wɔbo lɛ toi be fɛɛ be koni wɔkafee esha. Maŋtsɛ David kpa Nyɔŋmɔ fai yɛ lala ko ni efo lɛ mli akɛ: “Kanyamɔ mi koni majɛ misuɔmɔ mli mabo bo toi.” (Lala 51:12) Nyɛmi yoo gbɛgbalɔ ko ni atsɛɔ Denise lɛ wie akɛ, “Kɛ́ mina akɛ ewa hã mi akɛ mabo mla ko ni Yehowa ewo lɛ toi lɛ, misɔleɔ mibiɔ lɛ ni ewaje mi koni mabo toi.” Wɔle akɛ be fɛɛ be ni wɔ hu wɔbaasɔle nakai lɛ, Yehowa baabo toi.​—Luka 11:9-13.

12. Yɛ nɔ ni awie yɛ Efesobii 5:1 lɛ naa lɛ, mɛni esa akɛ wɔfee?

¹² Kanemɔ Efesobii 5:1. Akɛni Yehowa bii ji wɔ, ni esumɔɔ wɔ hewɔ lɛ, wɔbɔɔ mɔdɛŋ akɛ wɔbaakase lɛ. Kɛ́ wɔsumɔɔ mɛi, wɔmli hi yɛ amɛnɔ, ni wɔkɛ amɛtɔmɔi ke amɛ lɛ, belɛ wɔmiikase wɔ-Tsɛ lɛ. Kɛ́ mɛi ni ebaleko Nyɔŋmɔ lɛ na wɔsubaŋ kpakpa lɛ, ekolɛ no baatsirɛ amɛ ni amɛkase Nyɔŋmɔ he nii. (1 Pet. 2:12) Fɔlɔi, ehi jogbaŋŋ akɛ nyɛbaakase Yehowa yɛ bɔ ni nyɛkɛ nyɛbii lɛ yeɔ nyɛhãa lɛ mli. Kɛ́ nyɛfee nakai lɛ, ekolɛ no baahã nyɛbii lɛ aná he  miishɛɛ akɛ amɛkɛ wɔ-Tsɛ ni yɔɔ suɔmɔ lɛ baabɔ naanyo.

13. Mɛni nɔ esa akɛ wɔkɛ wɔjwɛŋmɔ ama?

¹³ Gbekɛbii pii sumɔɔ amɛtsɛmɛi asane waa, ni amɛsumɔɔ ni amɛgba mɛi amɛtsɛmɛi lɛ ahe sane. Nakai nɔŋŋ wɔ hu wɔsumɔɔ Yehowa, wɔ-Tsɛ ni yɔɔ ŋwɛi lɛ sane, ni wɔmiisumɔ ni mɛi fɛɛ ale lɛ. Yɛ wɔtsuiŋ tɔ̃ɔ lɛ, wɔ fɛɛ wɔnuɔ he tamɔ bɔ ni Maŋtsɛ David nu he be ni ewie akɛ, “Mashwã yɛ Yehowa hewɔ” lɛ. (Lala 34:2) Shi bei komɛi lɛ, ŋmiŋmi mɔɔ wɔ ni wɔhiɛ gboɔ akɛ wɔbaagba mɛi Yehowa he sane. Mɛni baaye abua wɔ ni wɔnyɛ wɔfee ekãa? No ji, ni wɔbaajwɛŋ bɔ ni Yehowa mii baashɛ ehe ehã kɛ́ wɔgba mɛi ehe sane, kɛ bɔ ni mɛi lɛ hu baaná he sɛɛ amɛhã lɛ he. Kɛ́ wɔkɛ wɔjwɛŋmɔ ma enɛ nɔ lɛ, wɔbaafee ekãa. Yehowa baawa wɔ ni wɔfee ekãa. Eye ebua wɔnyɛmimɛi ni hi shi yɛ bɔfoi lɛ abeiaŋ lɛ ni amɛfee ekãa, ni nakai nɔŋŋ ebaaye ebua wɔ hu.​—1 Tes. 2:2.

14. Mɛni hewɔ ehe miihia ni wɔshiɛ wɔhã mɛi?

¹⁴ Yehowa kwɛɛɛ hiɛiaŋ, no hewɔ lɛ, kɛ́ ena ni wɔmiijie suɔmɔ kpo wɔmiitsɔɔ mɛi ekɔɔɔ he eko mɛi ni amɛji loo he ni amɛjɛ lɛ, emii shɛɔ ehe. (Bɔf. 10:34, 35) Nibii ni hi waa ni wɔbaanyɛ wɔfee kɛtsɔɔ akɛ wɔsumɔɔ mɔ ko lɛ ateŋ ekome ji, ni wɔbaashiɛ wɔhã lɛ. (Mat. 28:19, 20) Kɛ́ wɔshiɛ wɔhã mɛi lɛ, mɛɛ gbɛ nɔ amɛnáa he sɛɛ? Amɛteŋ mɛi ni boɔ toi lɛ tsakeɔ amɛjeŋba ni no hãa amɛnáa miishɛɛ yɛ shihilɛ mli amrɔ nɛɛ, ni wɔsɛɛ lɛ, amɛbaaná hegbɛ amɛhi shi kɛya naanɔ.​—1 Tim. 4:16.

15-16. Mɛni hewɔ esa akɛ wɔná miishɛɛ?

¹⁵ Wɔ-Tsɛ Yehowa sumɔɔ wɔ, ni eesumɔ ni eweku lɛ mli bii lɛ aná miishɛɛ. (Yes. 65:14) Amrɔ nɛɛ po lɛ, wɔbaanyɛ wɔná miishɛɛ, ekɔɔɔ he eko naagbai ni ekolɛ wɔkɛmiikpe. Mɛni hewɔ? Klɛŋklɛŋ lɛ, wɔle akɛ, wɔ-Tsɛ Yehowa sumɔɔ wɔ waa. Agbɛnɛ hu, wɔkase Nyɔŋmɔ Wiemɔ lɛ, ni ji Biblia lɛ, ni wɔbale anɔkwale lɛ. (Yer. 15:16) Kɛfata he lɛ, wɔji weku ko ni nɔ bɛ lɛ mli bii. Mɛi fɛɛ ni yɔɔ weku nɛɛ mli lɛ sumɔɔ Yehowa, amɛhiɔ shi yɛ eshishitoo mlai lɛ anaa, ni amɛsumɔɔ amɛhe.​—Lala 106:4, 5.

¹⁶ Hiɛnɔkamɔ ni wɔyɔɔ akɛ bɔ fɛɛ bɔ ni fee lɛ, wɔsɛɛ lɛ, je lɛŋ shihilɛ baatsake kwraa lɛ hu ji nɔ kroko ni hãa wɔnáa miishɛɛ. Wɔle akɛ, etsɛŋ, Yehowa baajie mɛi fɔji fɛɛ kɛje shikpɔŋ lɛ nɔ, ni ebaatsɔ e-Maŋtsɛyeli lɛ nɔ esaa shikpɔŋ lɛ nɔ fɛɛ ni efee lɛ Paradeiso. Wɔyɛ hiɛnɔkamɔ hu akɛ, abaatee mɛi ni egboi lɛ shi kɛba wala mli, ni wɔbaana amɛ ekoŋŋ. (Yoh. 5:28, 29) Kwɛ bɔ ni wɔmii baashɛ wɔhe waa yɛ nakai beiaŋ! Nɔ ni fe fɛɛ lɛ, wɔle waa akɛ etsɛŋ, mɛi fɛɛ ni yɔɔ ŋwɛi kɛ shikpɔŋ lɛ nɔ lɛ baawo Yehowa, wɔ-Tsɛ ni sumɔɔ wɔ lɛ hiɛ nyam, amɛjie eyi, ni amɛjá lɛ, ejaakɛ esa jamɔ.