1-2. Ka Jéova fè pou nou té pé rantré an fanmi a-y é poukwa i fè sa ?

JÉOVA pwopozé-nou rantré an fanmi a-y. A pa ti bèl envitasyon-lasa bèl ! Sé moun ki ba Jéova vi a yo ki adan fanmi-lasa. Anplisdisa, yo ka montré kè yo ni fwa an ranson-la Jéova péyé la èvè sakrifis a gason a-y. Nou adan on fanmi ki ni tchè-kontan. Dépi alè, vi an nou ni on sans, é nou kontan toubònman lè nou ka sonjé ké nou ké viv pou touttan, swa an syèl-la oswa an paradi-la asi latè.

² Jéova fè ansòt pou nou rantré an fanmi a-y pas i enmé-nou onlo. Men pousa, i té oblijé fè on gwo sakrifis toubònman (Jan 3:16). I ‘péyé on pri pou achté-nou’ (1 Kor. 6:20). Grasa ranson-la Jéova péyé la, nou pé vin bon zanmi èvè-y. Nou pé kriyé moun-la ki pli enpòwtan la adan linivè : Papa. É sa sé on gran lonnè menm ! Kon nou vwè simenn pasé, Jéova sé méyè Papa nou pé ni.

3. Ki kèsyon nou té’é pé pozé-nou ? (gadé osi ti karé-la «  Ès Jéova ka pran tan gadé-mwen ? »).

³ Pétèt nou pé ka pozé-nou menm kèsyon-la ki yonn adan sé moun-la ki maké Bib-la. I mandé : « Ka an pé ba Jéova an rètou pou tout bon biten i ja fè ban-mwen ? » (Sòm 116:12). Mi répons-la : Nou pé’é jen pé woumèt Pap’an nou ki an syèl-la tousa i fè ban nou. Men menmsi nou pé pa fè sa, konm i enmé-nou nou anvi enmé-y an rètou. Lapòt Jan maké : « Nou ka aji èvè lanmou pas i aji èvè lanmou épi nou an prèmyé » (1 Jan 4:19). Kijan nou pé montré Pap’an nou ki an syèl-la kè nou enmé-y ?

4. Dapré Jak 4:8, poukwa fò-nou fè éfò pou nou rété bon bon zanmi èvè Jéova ?

⁴ Jéova vlé kè nou vin bon bon zanmi èvè-y é kè nou palé èvè-y (li Jak 4:8). I ka ankourajé-nou a « kontinyé priyé », é i ka òwganizé-y pou i toujou disponib pou kouté-nou (Wom. 12:12). I pa jen two okipé ni two las pou kouté-nou. Nou aprézan, nou ka kouté-y lè nou ka li Pawòl a-y, Labib, é lè nou ka li sé piblikasyon-la ki ka édé-nou konprann Labib. Nou ka kouté Jéova osi lè nou byen konsantré asi sa yo ka di pannan sé réinyon krétyèn la. Menmjan on timoun ki ka palé souvan èvè pap’a-y é manman-y ka rété bon bon zanmi èvè-yo, menmjan-la osi, si nou ka pran labitid palé èvè Jéova nou ké rété bon bon zanmi èvè-y.

5. Ka ou pé fè pou priyé pibyen ?

⁵ Pran on tan pou analizé priyè a-w. Jéova vlé kè nou di-y tousa nou ka rèsanti (Sòm 62:8). Ou té’é pé mandé-w : ‘Ès an ka enki priyé san réfléchi konsi sé résité an ka résité on résitasyon oben an ka pran on tan pou di Bondyé sa an ni an fon a tchè an mwen ?’ Sèten ou enmé Jéova fò é kè ou vlé rété bon bon zanmi èvè-y. Pou ou rivé fè sa, fò ou pran labitid palé ba-y touttan. Rakonté-y tout sèkré a-w. Palé-y dè sa ki ka rann tchè a-w kontan é dè sa ki ka fè-w lapenn. Mèt sa fon an tèt a-w : ou pé mandé-y édé-w !

6. Ka pou nou fè pou rété bon bon zanmi èvè Pap’an nou ki an syèl-la ?

⁶ Pou nou rété bon zanmi èvè Pap’an nou ki an syèl-la, fò-nou toujou ni onlo rèkonésans pou-y. Nou dakò èvè sa on nonm ki maké déotwa sòm ni lokazyon ékri : « Ou fè onpakèt biten, O Jéova Bondyé an nou. Ou fè biten èstraòwdinè pou nou é ou ni lentansyon fè onlo biten pou nou ! Pa ni 2 moun kon-w ; si sé té pou mwen rakonté é palé dè tousa, té’é ni twòp biten a di ! » (Sòm 40:5). A pa enki rèsanti pou nou rèsanti rèkonésans pou Jéova men fò-nou fè dé biten é fò-nou di dé biten ki ka montré kè nou ni rèkonésans pou-y. Konsa, nou pé’é aji kon onlo moun ka aji aprézan. Sé vré, lamajorité a moun pa ni pon rèkonésans pou tousa Bondyé ka fè pou yo. Sa pa ka étoné-nou paskè Labib té ja anonsé kè pannan dènyé jou a sistèm-lasa, moun té ké « engra » (2 Tim. 3:1, 2). Nou pa vé sanm-yo ditou-ditou !

7. Kijan Jéova vlé nou aji, é poukwa ?

⁷ Pa ni pon manman ni pon papa ki té’é vlé vwè timoun a yo goumé men yo té’é préféré kè yo bon zanmi. Menmjan-la, Jéova vlé kè tout timoun a-y antann-yo byen. É lè yonn enmé lòt, sa ka montré vréman kè nou sé disip a Jézikris (Jan 13:35). Nou dakò èvè sa on nonm ki maké déotwa sòm ka di : « A pa ti bèl sa bèl é a pa ti agréyab sa agréyab pou dé frè dè viv soudé ansanm-ansanm ! » (Sòm 133:1). Lè nou enmé frè é sè an nou, nou ka montré Jéova kè nou enmé-y osi (1 Jan 4:20). Sa bèl toubònman lè ou adan on fanmi ki plen frè é sè ‘ki ka aji èvè bonté yonn èvè lòt, é ki ka aji èvè on konpasyon ki plen tandrès !’ (Éféz. 4:32).

8. Sèlon sa ki maké an 1 Jan 5:3, poukwa nou ka fè sa Jéova ka mandé-nou ?

⁸ Jéova vé kè sé timoun-la kouté fanmi a yo, é i vé kè nou kouté-y osi (Éféz. 6:1). I mérité nou obéyi-y pas sé li ki  kréyé-nou, sé-y ki ka ban-nou tousa nou bizwen pou viv é anplisdisa, i lontan pli saj ki tout papa ki asi latè. Men, prèmyé rézon ki fè si nou ka kouté Jéova sé pas nou enmé-y (li 1 Jan 5:3). Menmsi fò-nou obéyi-y pou onpakèt rézon, apapousa i ka fòsé-nou obéyi-y. Grasa Jéova, nou lib dè chwazi sa nou vé fè. É i ka kontan toubònman lè i ka konstaté kè nou ka chwazi dè fè sa i ka mandé-nou pas nou enmé-y.

9-10. Poukwa sa enpòwtan kè nou konnèt é kè nou suiv prensip a Jéova adan vi an nou ?

⁹ Tout paran vé pwotéjé timoun a yo. Sé pousa yo ka mété sèwten règ anplas pou byen a sé timoun-la. Lè sé timoun-la ka suiv sé règ-lasa, yo ka montré kè yo ka fè fanmi a yo konfyans é kè yo ka rèspèkté-yo. Nou ka tou konprann kè sa pi enpòwtan ankò dè konnèt é dè suiv tout règ kè Pap’an nou ki an syèl-la mèt anplas. Konsa, nou ka montré-y kè nou enmé-y é kè nou ka rèspèkté-y, men anplisdisa, sa ka pwokiré-nou onlo byenfé (Iz. 48:17, 18). Pawkont, malè ka rivé toutmoun ki ka lagé Jéova é ki pa’a suiv prensip a-y (Gal. 6:7, 8).

¹⁰ Lè nou ka viv on mannyè ki ka fè Jéova plézi, sa ka pwotéjé santé an nou, tchè an nou é lanmityé an nou èvè Jéova osi. Jéova konnèt sa ki pibon pou nou. Aurora ka viv Ozétazini é mi sa i ka di : « An konstaté kè lè on moun ka fè sa Jéova ka di, i ka menné méyè vi ki tini. » Nou  osi nou pé di sa. Prensip a Jéova toujou plen lanmou. Ki byenfé ou pwokiré-w davwa ou suiv sé prensip-lasa adan vi a-w ?

11. Ka lapriyè ka édé-nou fè ?

¹¹ Lè nou ka priyé Jéova sa ka édé-nou obéyi-y menm lè sa difisil. Défwa, nou ni dimal a fè sa Jéova ka mandé-nou pas nou enpawfè. Men menmsi péché-la an zo an nou, fò-nou kontinyé goumé èvè-y. Gadé kijan on nonm ki ékri déotwa sòm sipliyé Jéova : « Ban-mwen anvi obéyi-w » (Sòm 51:12). Denise, sé on sè ki pyonyé pèwmanan. Mi sa i ka di : « Lè an ni dimal a suiv on komandman a Jéova, an ka priyé-y pou i ban-mwen fòs pou fè sa ki byen. » Nou pé sèten kè Jéova ké toujou réponn a on priyè kon tala (Lik 11:9-13).

12. Sèlon Éfézyen 5:1, ka nou dwètèt fè ?

¹² (Li Éfézyen 5:1.) Konm nou sé dé « timoun kè Bondyé enmé », nou ka fè tousa nou pé pou nou sanm-li. Nou ka imité-y é pousa nou ka aji èvè lézòt épi lanmou, épi bonté é nou toujou paré a padonné-yo. É lè moun ki pa konnèt Bondyé ka vwè kè nou ni on bon konduit, sa pé ba-yo anvi konnèt-li (1 Pyè 2:12). Sé krétyen-la dwètèt fè éfò pou aji èvè timoun a yo kon Jéova ka aji èvè nou. Si sé paran-la ka aji konsa, pétèt kè timoun a yo osi ké anvi vin zanmi a Jéova, Pap’an nou ki plen lanmou.

13. Ka nou pé fè pou nou vin pi brav ?

¹³ An jénéral, on timoun fyèw dè papa-y  é i enmé palé dè-y. Menmjan-la osi, nou fyèw dè Jéova, Pap’an nou ki an syèl-la, é nou vé fè toutmoun ki alantou an nou konnèt-li. An tchè an nou, nou ni menm santiman ki wa David. Mi sa i maké : ‘Sé Jéova ki ké ban-mwen tchè-kontan’ (Sòm 34:2). Men ka pou nou fè si nou timid ? Ka ki pé édé-nou vin pi brav ? Nou ké vin pi brav si nou ka sonjé kè lè nou ka palé dè Jéova alantou an nou sa ka mété onlo jwa an tchè a-y, é sa ka pwokiré sé moun-la onlo byenfé. Jéova ké ban-nou kouraj-la nou bizwen la. O 1^é syèk, i édé frè an nou vin pi brav, alò i ké édé-nou osi (1 Tés. 2:2).

14. Bay déotwa rézon ki ka montré kè sa enpòwtan kè nou chèché a fè disip.

¹⁴ Konm Jéova pa’a fè préférans, i ka kontan lè i ka vwè kè nou ka aji èvè lanmou épi tout kalté moun kèlkèswa sa yo ni oben la yo sòti (Akt 10:34, 35). Yonn dé pi bèl fason ki ni pou montré sé moun-la kè nou enmé-yo, sé lè nou ka fè-yo konnèt bon nouvèl-la (Mat. 28:19, 20). Ki rézilta travay-lasa pé bay ? Touséla ki ka kouté-nou la pé menné on vi ki pi bèl dépi konnyéla é yo pé ni lèspwa dè viv pou touttan adan paradi-la (1 Tim. 4:16).

15-16. Pou ki rézon nou kontan dépi konnyéla ?

¹⁵ Jéova sé on Papa ki plen lanmou, kifè i vé tout fanmi a-y ni tchè-kontan (Iz. 65:14). Pétèt kè nou ka jwenn éprèv, men magrésa ni onlo biten ki ka rann tchè an nou kontan dépi aprézan. Pa ègzanp, nou sèten a san pou san kè Pap’an nou ki an syèl-la enmé-nou fò. Anplisdisa, grasa Pawòl a Bondyé, Labib, nou konnèt lavérité (Jér. 15:16). É nou ka fè pawti a on fanmi ki vréman èspésyal pas toutmoun ki adan-y enmé Jéova, enmé lwa a-y é yonn enmé lòt (Sòm 106:4, 5).

¹⁶ Nou sav kè talè lavi ké lontan pi bèl ki aprézan, é sa ka édé-nou kontinyé ni tchè-kontan. Nou sav kè plita, Jéova ké woté tout kalité méchansté é kè grasa wayòm a-y, i ké fè latè wouvin on paradi. Anplisdisa, nou ni on èspwa ki èstraòwdinè : moun nou té enmé é ki mò ké résisité é yo ké ansanm èvè nou ankò (Jan 5:28, 29). Mésyé, a pa ti bèl sa ké bèl ! Men on biten ki pi enpòwtan ankò sé kè nou sèten kè talè, toutmoun, ki yo an syèl-la ki yo si latè, ké ba Jéova lonnè-la é glwa-la i mérité la. Yo ké adoré-y kon i mérité osi.