1, 2. (1) ¿Kasa naaʼinraka Jeʼwaa süpüla nüpüshinjanain waya? (2) ¿Jamüsü naaʼinraka tia?

NÜRÜTKEʼERÜIN waya Jeʼwaa nünainmüin süpüla nüpüshinjanain waya. Na nüpüshikana Jeʼwaa naapüin naaʼin nümüin süpüla naʼyataainjanain nümüin otta kojutusü maʼin namüin naapajiraain nikii Jesuu. Talatüsü maʼin waaʼin süka waʼyataain nümüin Jeʼwaa. Watüjaa aaʼu tü waaʼinrajatkat süpüla talatüin waaʼin maaʼulu otta watüjaa aaʼu eein süpüla katüin woʼu süpüla kaʼikat süpüshuaʼa jaʼitashii chainjanain waya chaa iipünaa jee yaainjanale waya yaa mmapaʼa.

² Süka alin maʼin waya nüpüla Jeʼwaa, naapüin nikii chi Nüchonkai waaʼu süpüla nüpüshinjanain waya (Juan 3:16, TNM). Saashin tü Wiwüliakat outushi Jesuu jee amülasü nüsha saaʼu tü waainjalakat (1 Cor. 6:19, 20). Saaʼu naapajiraain nikii Jesuu waaʼu, eeinapa süpüla aleewain waya nümaa Jeʼwaa. «Taata», eeinapa süpüla wamüin nümüin chi Laülaakai saaʼu kasakat süpüshuaʼa. Maʼaka wekirajaain sünain tü palajatkalü ekirajaaya, nnojoishi eein wanee wayuu aipüraikai maʼin maʼaka naaʼin chi Washikai Jeʼwaa.

3. ¿Kasa eeka süpüla wasakirüirüin anain waaʼin? (Paashajeʼera tü pütchikat « ¿Kachipünaasüche naaʼin Jeʼwaa takuwaʼipa?»).

³ Anuu tü nüsakirakalü anain naaʼin wanee wayuu ashajakai tü Wiwüliakat: «¿Kaseetkajasaʼa tawalaajüin aka nümüin Jeʼwaa süpüshuaʼa tü kasa anasü naaʼinrakat tapüleerua?», eesüjaʼa wasakirüirüle waaʼin sünain tia (Sal. 116:12). Watüjaa aaʼu nnojoluin eein wanee kasa eeka süpüla wawalaajüin aka tü naaʼinrakat wapüleerua chi Washi iipünaajachikai. Aipejeʼe nia wapüla süka alin waya nüpüla. Anuu nünüiki chi aluwataaushikai Juan: «Aishi wapüla chi Maleiwakai süka alin waya nüpüla palajana» (1 Juan 4:19).  ¿Kasa waaʼinrajatka süpüla weeʼiyatüin naalin wapüla chi Washikai Jeʼwaa?

4. ¿Jamüshii waashajaʼawalinjanaka nümaa Jeʼwaa saashin Santiago 4:8?

⁴ Nücheka achikit Jeʼwaa warütkaainjanain nünainmüin otta aleewainjanain waya nümaa (paashajeʼera Santiago 4:8). Naashin Jeʼwaa achuntuinjana waya nümüin waneepia otta nüküjain wamüin naapajeerüin wanüiki (Roma 12:12). Nnojoleechi nia macheʼeyaain suulia wanüiki, jama matüjain nia mapüsaa. ¿Kasakaʼa waaʼinrajatüin süpüla waapajüin nünüiki? Wanee sukuwaʼipa shia waashajeʼerüle tü Wiwüliakat otta tü karaloʼuta ayuʼluushikat sünainjee. Waapajüinya nünüiki Jeʼwaa jülüjale waaʼin tü ekirajünakalü sünain tü outkajawaakat. Jamüshijaʼa naashajaale waneepia wanee wayuu nümaa nüchon, aleewajiraashii maʼin naya. Müinjatia neʼe wakuwaʼipa nümaa Jeʼwaa, aashajaainjana waya waneepia nümaa süpüla aleewain waya nümaa.

5. ¿Kasa waaʼinrüinjatka süpüla wanouteʼerüin sukuwaʼipa woʼuraajia?

⁵ ¿Jamawaisüche sukuwaʼipa wanüiki nümüin Jeʼwaa wachuntapa nümüin? Nücheka achikit Jeʼwaa waküjain nümüin tü suluʼukat waaʼin (Sal. 62:8). Müsüjeseʼe wasakireʼerüinjatüin waaʼin sünain tüü: «¿Müsüche tanüiki nümüin Jeʼwaa maʼaka saaʼin wanee pütchi tashatalaka sünainjee wanee karaloʼuta? ¿Mataapa aka saaʼin wanee pütchi tashajalaka sükajee taaʼin? Aishi maʼin Jeʼwaa wapüla otta aleeweeshii waya nümaa waneepia, müshiijeseʼe waashajaʼawalinjanain nümaa waneepia. Waküja nümüin Jeʼwaa tü shapaakalü atuma waaʼin otta tü talatakalü atuma waaʼin. Watüjaa aaʼu nükaalinjeenain waya wachuntule kaalinwaa nümüin.

6. ¿Kasa waaʼinrüinjatka süpüla ayatüin aleewain waya nümaa Jeʼwaa?

⁶ Wane kasa waaʼinrüinjatka süpüla ayatüin aleewain waya nümaa Jeʼwaa shia kojutuinjatüin wamüin tü naaʼinrakat wapüleerua. Eesüjaʼa müle wanüiki maʼaka naaʼin wanee wayuu ashajakai wanee salmo, anuu nünüiki: «Watta maʼin saalii tü kasa pukumajalakat Tamaleiwasekai Jeʼwaa. Anakatche maʼin tü pukumajalakat otta tü püchekakat wapüleerua —nnojoishi eein wanee makai aka paaʼin—. Taküjeere süchiki tia, iseerü tachiki taküjain süpüshuaʼa süka wainmain maʼin shia» (Sal. 40:5). Nnojotsü kojutuinjatüin neʼe wamüin tü naainjakat Jeʼwaa wapüleerua, jaʼyainjatü saaʼu wakuwaʼipa kojutuin shia wamüin. Nnojotsü wanaawain waaʼin namaa na wayuukana maaʼulu yaa süka mojutuin namüin tü naaʼinrakat Maleiwa napüleerua otta matüjainsalii aapaa analuʼut. Müsü sukuwaʼipa wayuu süka sülüʼülüin sükalia süpüla sajaʼttajatüin kasakat süpüshuaʼa (2 Tim. 3:1, 2). Jalia majayaai wakuwaʼipa maʼaka naaʼin.

7. (1) ¿Kasa nüchekaka Jeʼwaa wapüleerua? (2) ¿Jamüsü waaʼinrajatka tia?

⁷ Na wayuu kachonshiikana, nnojotsü nacheküin napüleerua nachonnii natkaajiraainjanain, shia nachekaka napüleerua aijiraainjanain naya. Müsia neʼe tü nüchekakat Jeʼwaa wapüleerua, aijiraainjanain waya. Ayaawatünüshii na anoujashii shiimainshiikana sükajee aijiraain maʼin naya (Juan 13:35). Wanaawasüche waaʼin sümaa tü nümakat wanee wayuu aʼyataakai nümüin Jeʼwaa. Anuu nünüiki: «¡Anakatche maʼin kottiraale jee paaʼinwajiraale na wayuu pawalaawajiraakana!» (Sal. 133:1). Aire wapüla na wawalayuukana, aishia Jeʼwaa wapüla (1 Juan 4:20). Anamia maʼin na wawalayuukana otta aijiraashii maʼin naya. Talatüsü waaʼin süka napüshin waya na wayuu makana akuwaʼipa (Éf. 4:32).

8. Saashin 1 Juan 5:3, ¿jamüshii woonooinjanaka sümaa nünüiki Jeʼwaa?

⁸ Nücheküin Jeʼwaa napüleerua na tepichikana noonooinjanain sümaa sünüiki nei jee sümaa nünüiki nashi. Müinjanaʼaya waya nümüin Jeʼwaa, oonooinjana waya sümaa nünüiki (Éf. 6:1).  Oonooinjana waya nümaa Jeʼwaa süka niain Kakumajalain waya, süka naapüin wamüin kataa oʼuu otta süka niain neʼe chi kekiikai maʼin nümüiwaʼa. Oonooinjanapejeʼe waya nümaa süka alin nia wapüla (paashajeʼera 1 Juan 5:3). Wainma tü kasa woonooinjatkalü aaʼujee nümüin Jeʼwaa. Nnojoliipejeʼe waya nüpüleeruain aaʼin süpüla waaʼinrüin tü nümakat. Nuuʼulaain Jeʼwaa waneeküin wamüiwaʼa woonooinjanale nümaa saaʼu alin nia wapüla. Waaʼinrüle tia, talateerü naaʼin.

9, 10. ¿Jamüsü choʼujaaka wekirajaainjanain sünain tü nuluwataakalü anain Jeʼwaa otta waaʼinrüin shia?

⁹ Keeʼireesü naaʼin na wayuu kachonshiikana anainjatüin nakuwaʼipa nachonnii. Müshiijeseʼe nekirajüin naya sünain tü nakuwaʼipainjatkat. Na tepichi oonookana sümaa nünüiki nashi jee nei, naaʼinrüin tia süka kojutuin naya namüin jee nayaawatüin saaʼu aneerüin nakuwaʼipa noonoole sümaa nanüiki. Alanaʼaleesia maʼin tü nuluwataakalü anain waya chi Washi iipünaajachikai makalaka wekirajaainjatüin sünain jee waaʼinrüinjatüin tü nümakat. Müle shia watuma jaʼyeerü waaʼu alin wapüla Jeʼwaa otta kojutuin nia wamüin. Aneerü wakuwaʼipa waaʼinrüle tia (Is. 48:17, 18). Kachajaalashii neʼe na wayuu mojutkana amüin Maleiwa jee na ayoutakana tü nuluwataakalü anain (Gal. 6:7, 8).

¹⁰ Aneerü wakuwaʼipa, nnojoleerü shapaain waaʼin otta aneerü wanoula woonoole sümaa nünüiki Jeʼwaa, jama niain atüjaain saaʼu tü aneetkalü atuma wakuwaʼipa. Anuu sünüiki wanee wawala Aurora sünülia, kepiasü chaa Estados Unidos: «Tayaawata aaʼu aneerüin maʼin takuwaʼipa toonoole sümaa nünüiki Jeʼwaa». Maʼleesia nanüiki na aʼyataakana nümüin Jeʼwaa. Püsakira  paaʼin sünain tüü: «¿Kasa anasü teʼraka sutuma toonooin sümaa tü nümakat Jeʼwaa?».

11. ¿Jamüshii wachuntajanaka kaalinwaa nümüin Jeʼwaa?

¹¹ Achuntajana waya kaalinwaa nümüin Jeʼwaa süpüla woonooin waneepia sümaa tü nümakat wamüin, jaʼitasü kapüleein shia wamüin. Süka waleʼeruʼuin tü kaainjalaakat, eesü kapüleere wamüin woonooin sümaa tü nümakat Jeʼwaa. Mayaainjeʼe müin tia, wachajaainjatü sukuwaʼipa süpüla waaʼinrüin tü nümakat. Anuu tü nuchuntakat nümüin Jeʼwaa wanee wayuu ashajakai salmo: «Pükaalinja taya süpüla suchuntaain taaʼin aaʼinraa tü pümakat» (Sal. 51:12). Anuu tü sümakat wanee wawala, pürekutsoot rekulaat shia, Denise sünülia: «Kapüleere tamüin aaʼinraa wanee kasa nuluwataaka anain Jeʼwaa, tachuntuin kaalinwaa nümüin süpüla taaʼinrüin shia». Nükaalinjain Jeʼwaa waneepia na achuntakana nümüin süpüla noonooin sümaa nünüiki (Luc. 11:9-13).

12. ¿Kasa waaʼinrüinjatka saashin Éfeso 5:1?

¹² (Paashajeʼera Éfeso 5:1). Süka nüchooinapain waya Maleiwa, wainma kasa waaʼinraka süpüla washatüin nukuwaʼipa. Washatüin nukuwaʼipa Jeʼwaa kamaneere waya sümüin wayuu, motule waaʼin saainjala otta aire shia wapüla. Anale wakuwaʼipa neʼrüin na wayuu nnojoliikana eʼraajüin Jeʼwaa, eeshiijaʼa natüjeerü sooʼomüin nüchiki (1 Ped. 2:12). Na wayuu kachonshiikana, alinjana napüla nachonnii maʼaka alin waya nüpüla Jeʼwaa. Müle shia natuma, eesüjaʼa nachekeerüle achiki na tepichikana aleewain naya nümaa Jeʼwaa.

13. ¿Kasa akaalinjeenaka waya japüleʼere waya jee isale wachiki wekirajüin nüchiki Jeʼwaa?

 ¹³ Talatüsü maʼin naaʼin wanee jintüi nümaa nüshi otta anasü nünüiki naashajaapa nüchiki. Müshiʼiya wayakana, talatüsü maʼin waaʼin nümaa chi Washikai Jeʼwaa otta weʼraajirüin nüchiki sümüin wayuu. Wanaawasü waaʼin sümaa tü nümakat chi aluwataaikai David, anuu nünüiki: «Talateerü maʼin taaʼin süka teʼraajirüin nüchiki Jeʼwaa» (Sal. 34:2). Eeshiijaʼa japüleʼere waya jee isale wachiki wekirajüin wayuu nüchiki Jeʼwaa, ¿kasa akaalinjeenaka waya müle wakuwaʼipa? Jülüjainjatü waaʼin talateerüin naaʼin Jeʼwaa wekirajüle nüchiki otta aneerüin sukuwaʼipa wayuu shiyaawatapa saaʼu tü shiimainkat nüchiki. Nükaalinjeena waya Jeʼwaa süpüla yalayalain waaʼin maʼaka nükaalinjain na anoujashii namaiwajanakana (1 Tes. 2:2).

14. ¿Jamüshii waküjainjanaka pütchi sümüin wayuu?

¹⁴ Nnojotsü koʼuin nukuwaʼipa Jeʼwaa sümüin wayuu, müshijeseʼe talatüin nia aire wapüla wayuu jaʼitasü jalejeʼewalüin shia (Aluw. 10:34, 35). Wanee sukuwaʼipa süpüla weeʼiyatüin saalin wayuu wapüla shia waküjale pütchi sümüin (Mat. 28:19, 20). ¿Kasa anasü eeka sünainjee tia aʼyatawaakat? Eesü süpüla anain nakuwaʼipa na wayuu aapajakana wanüiki otta eesü süpüla katüin noʼu waneepia (1 Tim. 4:16).

15, 16. Püküja waneirua kasa talatüinjatka atuma waaʼin.

¹⁵ Aipürai maʼin Jeʼwaa otta shia nüchekaka napüleerua na nüchonniikana talatüinjatüin naaʼin (Is. 65:14). Mayaainjeʼe weʼrüin müliaa eesü wainma kasa talatüinjatkalü aaʼujee waaʼin. Talatüshii maʼin waya süka watüjaain saaʼu alin maʼin waya nüpüla chi Washikai Jeʼwaa. Sükajee tü Wiwüliakat, wayaawata aaʼu tü shiimainkat nüchiki Jeʼwaa (Jer. 15:16). Otta napüshishii waya na wayuu aikana apüla Jeʼwaa, kojutukana amüin tü nuluwataakalü anain otta aijiraakana maʼin (Sal. 106:4, 5).

¹⁶ Wane kasa talatüinjatka atuma waaʼin shia süka watüjaain saaʼu aneerüin maʼin wakuwaʼipa mapeena. Watüjaa aaʼu najaʼttireenain Jeʼwaa soʼu palit kaʼi na mojulaashiikana otta Paʼaraiiseerüin tü Mmakat nuluwataapa. Jee müsia watüjaa aaʼu süsoʼiraajeerüin naaʼin na outushiikana otta nantiraajeenain sümaa napüshi (Juan 5:28, 29). ¿Aashin anain maʼin tia? Süntapa tia kaʼikat, aʼwaajüneechi Jeʼwaa. Kojuteechi nia sutuma wayuu maʼleekalia, kojuteechi nia natuma na kepiainjanakana saaʼu Mmakat jee natuma na chainjanakana chaa iipünaa.