1-2. Ongwaye Jehova tja tjita kutja tu ri re orupa rweṱunḓu re nu omomuano uṋe ma tjita nao?

JEHOVA we tu ṋanga kutja tu ri re orupa rweṱunḓu re ndi rikotamena ku ye. Tjiri ingo omaṋangero wapeke. Ouṋepo weṱunḓu ndi ovandu mbe riyandja oveni ku Mukuru nu mbe nongamburiro motjisuta tjonguturiro tjOmuna we. Oweṱe eṱunḓu rondjoroka. Eṱe tu yorokera ehupo nai mena rokutja tu nomaundjiro wokukahupa nga aruhe kutja omeyuru poo omoparadisa kombanda yehi.

² Jehova wa tjita kutja tu ri re orupa rweṱunḓu re mena rokutja we tu suvera tjinene, kutja ma tjite nao eye aa sokuyandja Omuna we omukwatwa erike. (Joh. 3:16) Eye we tu “randa okurira ouini we.” (1 Kor. 6:20) Okupitira motjisuta tjonguturiro, Jehova wa tjita kutja tu kare noupanga wopopezu ku na ye. Eṱe tu nondjingonekero okuisana Omundu omunenenene mevaverwa arihe kutja Tate. Nu morupa ndwa zuko eṱe twe rihongere kutja Jehova oIhe omusembasemba.

3. Omapuriro yeṋe ngu mape ya atu pura? (Wina lesa Okaongo nga “ Hapo Jehova u ndji tjiwa?”)

³ Otja omutjange umwe wOmbeibela eṱe mape ya atu pura kutja: “Muhona me Mu sutu na tjike kouwa auhe Eye mbwe ndji tjitira?” (Eps. 116:12) Eṱe kamaatu yenene okusuta Tate wetu womeyuru kouwa auhe mbwe tu tjitira. Posi yokutja orusuvero rwe kweṱe ru tu hinga kutja tu mu suvere wina. Omuapostele Johanes wa tja: “Eṱe tu suvera, Ndjambi tjinga a tenga po okutusuvera.” (1 Joh. 4:19) Omomiano viṋe mu matu yenene okuraisira Tate wetu womeyuru kutja twe mu suvera?

4. Otja ku Jakobus 4:8, ongwaye tji twa sokukondja okutumbuka popezu na Jehova?

⁴ Jehova u vanga kutja tu tumbuke popezu na ye nokuhungira kuna ye. (Lesa Jakobus 4:8.) Jehova aruhe u tu rakiza kutja tu “panḓere pokukumba,” nu eye aruhe u puratena kweṱe. (Rom. 12:12) Eye aruhe u kara noruveze nu kaurwa okupuratena kweṱe. Nu eṱe tu puratena ku ye mokulesa Embo re Ombeibela nomambo warwe nge tu vatera okuizuva nawa. Nu wina tu puratena ku ye mokuyandja ombango pozombongarero zombongo. Tjimuna okuhungira aruhe tji ku vatera ovanatje okukara noupanga wopopezu ku novanene vawo, okuhungira aruhe kuna Jehova ku tu vatera okukara noupanga wopopezu kuna ye wina.

5. Omomuano uṋe mu matu yenene okutjita kutja Jehova ma yakure ozongumbiro zetu?

⁵ Ripura kutja Jehova u vara vi ozongumbiro zoye. Jehova u vanga kutja tu mu raere omeripura wetu omakoto noumune wetu mongumbiro. (Eps. 62:8) Eṱe matu sokuripura oveni epuriro ndi: ‘Hapo mbi kumba okuza komutima tjiri, poo mbi kumba uriri okuhakahana nokuhina okuripurira koviṋa mbi me kumbu?’ Ove tjiri wa suvera Jehova tjinene nu u vanga okupamisa oupanga pokati keṋu. Kutja u tjite nao ove mo sokuhungira kuna ye aruhe. Mu raera omeripura woye omakoto. Mu raera ohunga noviṋa mbi kupa ondjoroka na mbi ku kendisa. Kara nongamburiro kutja mo yenene okuningira ombatero ku ye.

6. Ovikwaye mbi matu sokutjita kutja tu kare popezu na Tate wetu womeyuru?

⁶ Tji matu vanga okukara popezu na Jehova eṱe matu sokutja ndangi aruhe. Eṱe matu itavere nomutjange wepsalme ngwa tja: “Muhona, Ndjambi wetu, Ove we tu tjitira oviṋa ovingi ovihimise. Kape na ngu ri otja Ove! Andakuzu mba vanga okuserekarera omeripuriro woye omahimise, hitje yenena okuyevara.” (Eps. 40:5) Eṱe katu tja tu nondangi ku Jehova uriri nungwari tu i raisa momambo novitjitwa vyetu. Iho tji raisa kutja eṱe twa panguka kovandu ovengi ndino. Eṱe tu hupa mouye ovandu ovengi ndino mu ve ha raisa ondangi koviṋa avihe Mukuru mbye ve tjitira. Otjikaṋena tjimwe tji tji raisa kutja tu hupa “momayuva omasenina” otjo hi tjokutja ovandu kave nondangi. (2 Tim. 3:1, 2) Tjiri eṱe katu nokuvanga okukara nao.

7. Jehova u vanga kutja tu tjite vi nu omena ra tjike?

⁷ Ovanene kave vanga kutja ovanatje vawo verwe nungwari ve vanga kutja ve ri re omapanga. Momuano otjingewo Jehova u vanga kutja ovakarere ve avehe ve ri re omapanga. Nu otjiperi kutja orusuvero ndu tu raisasana ru raisa kutja oweṱe Ovakriste vatjiri. (Joh. 13:35) Eṱe matu itavere ku nomutjange wepsalme ngwa tja: “Tjiri, okokuwa nonyuṋe oovangu nomarumbi tji mave tura pamwe nave twara kumwe omitima.” (Eps. 133:1) Indu tji twa suvere ovakambure ovakwetu tu raisira Jehova kutja twe mu suvera. (1 Joh. 4:20) Tjiri otjiṋa otjiwa okukara norupa meṱunḓu rovakambure mbe ‘karasana nouwa nomitima omitarazu.’—Ef. 4:32.

8. Otja ku 1 Johanes 5:3, epu riṋe enanḓengu tjinene mu tu karera nonḓuviro ku Jehova?

⁸ Jehova u vanga kutja ovanatje ve kare nonḓuviro kovanene vawo, nu wina u vanga kutja tu kare nonḓuviro ku ye. (Ef. 6:1) Eṱe matu sokukara nonḓuviro ku ye mena rokutja eye Omuute wetu, Omuṱakamise womiinyo vyetu, nu u nounongo kombanda yovanene avehe. Posi yokutja epu enanḓengu tjinene mu tu karera nonḓuviro ku Jehova omena rokutja twe mu suvera (Lesa 1 Johanes 5:3.) Jehova ke tu ṋiṋikiza okukara nonḓuviro ku ye nandarire kutja pe nomapu omengi ngu matu  sokukara nonḓuviro. Jehova we tupa otjiyandjewa tjokuritoororera oveni, kunao eye u kara nenyando indu tji matu toorora okukara nonḓuviro ku ye mena rokutja twe mu suvera.

9-10. Ongwaye tje ri ounanḓengu okutjiwa omirari vya Mukuru nokuviṱakamisa?

⁹ Ovanene ve vanga kutja ovanatje vawo ve kare mondjeverero. Nu mena ranao owo ve twapo ozoveta nḓu maze ve tjevere. Indu ovanatje tji mave ṱakamisa ozoveta nḓo owo ve raisa kutja ve nongamburiro nu va tenga ovanene vawo. Kunao ounanḓengu kweṱe tjinene okutjiwa nokukara nonḓuviro komirari vya Tate wetu womeyuru. Indu tji twa tjiti nao, eṱe tu raisira Jehova kutja twe mu suvera nokumutenga nu ku tu yetera ouwa. (Jes. 48:17, 18) Posi yokutja imba mbe pirukira Jehova ve ri hihamisa oveni.—Gal. 6:7, 8.

¹⁰ Indu tji matu hupu momuano Jehova mbwe yakura, eṱe tu ritjevera koviṋa mbi tu hihamisa kotutu, momiinyo poo mbi zunḓa oupanga wetu kuna ye. Jehova u tjiwa imbi mbi ri oviwa kweṱe. Aurora, ngwa tura mehi ndi oUnited States, wa tja: “Ami me tjiwa kutja tji twa kara nonḓuviro ku Jehova matu kara nehupo ewa aruhe.” Ouatjiri kutja otjiṋa ho tji tjitwa kweṱe atuhe. Hapo ove wa muna ouwa uṋe mokukara nonḓuviro komirari vya Jehova vyorusuvero?

11. Okukumba ku tu vatera okutjita vi?

¹¹ Okukumba ku tu vatera kutja tu kare nonḓuviro, nandarire indu tje ri ouzeu okutjita nao. Povikando tjiva irira ouzeu okukara nonḓuviro  ku Jehova, mena rokutja eṱe atuhe kaweṱe ohomonena posi yokutja matu sokukondja nomasa aruhe okukara nonḓuviro ku ye. Omutjange wepsalme we riheka ku Mukuru kutja, ‘Ndji pa ombango yokukara nonḓuviro kOve.’ (Eps. 51:12) Denise, ngu ri omukandjira woruveze aruhe, wa tja: “Indu tji me munu ouzeu okuṱakamisa eronga ra Jehova, ami mbi ningira omasa ku ye kutja mbi tjite imbi ovisemba.” Eṱe tu nongamburiro kutja Jehova aruhe ma ziri ongumbiro otja indjo.—Luk. 11:9-13.

12. Otja kOvaefese 5:1, ovikwaye mbi matu hepa okutjita?

¹² Lesa Ovaefese 5:1. Mena rokutja oweṱe “ovanatje ovasuverwa” va Jehova, tu kondja pu matu yenene okumuhorera. Eṱe tu horera ku ye indu tji matu raisa orusuvero, otjari, nokuisira varwe. Indu varwe mbe hi nokutjiwa Mukuru tji mave munu ovihorera oviwa vyetu, owo mape ya ave vanga okurihonga ovingi ohunga na ye. (1 Petr. 2:12) Ovanene Ovakriste mave sokukondja okutjinda ovanatje vawo omuano Jehova me tu tjinda. Tji va tjiti nao ovanatje vawo mape ya wina ave vanga okurira omapanga wa Jehova.

13. Ovikwaye mbi matu hepa okutjita kutja tu rire ozombanḓe?

¹³ Ovanatje potuingi ve tjaterwa i yooihe nu ve kara nenyando okuhungira ohunga nawo. Momuano otjingewo eṱe tu tjaterwa i Tate wetu womeyuru Jehova, nu tu vanga kutja  varwe ve mu tjiwe. Eṱe atuhe tu noumune tjimuna wOmbara David, ngwa tja: “Ami me rihivire ondangu ya Muhona.” (Eps. 34:2) Posi yokutja mape ya atu kara nohoṋi okuhungira ohunga na Jehova. Hapo matu yenene vi okurira ozombanḓe? Eṱe matu yenene okurira ozombanḓe indu tji twe ripura ohunga nondjoroka Jehova ndji ma kara na yo, tji matu hungire ohunga na ye nokutja ouwa waye varwe mbu mave munu tjive rihongo ohunga na ye. Jehova me tupe ouvanḓe mbu matu hepa. Eye wa vatera ovakambure ovakwetu meserowondo etenga kutja ve rire ozombanḓe nu wina me tu vatere.—1 Tes. 2:2.

14. Ongwaye tje ri otjiṋa otjinanḓengu okukara norupa motjiungura tjokukaisapo ovandu ovahongewa?

¹⁴ Jehova ke nombangu, kunao u kara nenyando indu tji me tu munu tji matu raisa orusuvero ku varwe kainatja kutja vaza pi. (Oviung. 10:34, 35) Omuano umwe omuwa mu matu yenene okurasira varwe kutja twe ve suvera omokuvezuvarisira. (Mat. 28:19, 20) Ouwa wa ye mbuza motjiungura ho? Imba mbe puratena kweṱe ve yenena okurundurura ehupo rawo nai nu ve kara nomaundjiro wokukahupa nga aruhe moparadisa.—1 Tim. 4:16.

15-16. Omapu yeṋe ngu tu nawo nge tjita kutja tu kare nondjoroka?

¹⁵ Jehova oIhe worusuvero, kunao u vanga kutja eṱunḓu re ri kare nondjoroka. (Jes. 65:14) Pe nomapu omengi nge tjita kutja tu kare nondjoroka nai, nandarire kutja tu muna omauzeu. Otjotjihorera, tu nongamburiro kutja Tate wetu womeyuru wetu suvera tjinene. Eṱe tu nondjiviro youatjiri wEmbo ra Mukuru Ombeibela. (Jer. 15:16) Nu oweṱe orupa rweṱunḓu rapeke rovandu mba suvera Jehova, omirari vye nu mba suverasana.—Eps. 106:4, 5.

¹⁶ Eṱe matu yenene okukara nondjoroka mena rokutja tu nomaundjiro wokutja moruyaveze ehupo ma ri runduruka okurira ewa. Matu tjiwa kutja Jehova moruveze rwa tjimanga ma isapo ourunde nu ma ungurisa Ouhona we okutjita kutja ouye urire oparadisa. Nu wina tu nomaundjiro omawa wokutja imba mba ṱa mave kapendurwa nu atu hakaene kuna wo rukwao. (Joh. 5:28, 29) Tjiri indjo ondjoroka onene. Nu tjinenenene, tu nongamburiro kutja moruveze rwa tjimanga oviutwa meyuru nakombanda yehi mavi yandja ondjozikiro, ohiviro, nomerikotameneno nga pwira Tate wetu worusuvero.