1-2. Be iJehova rẹ tuje uwedẹ a yẹ nin mhan da sabọ deba azagba-uwa nọnsọle? Bezẹle nin ọle da lu ọnan?

JEHOVA tie mhan nin mhan dọ deba azagba-uwa nọnsọle. Ọnan wo manman ti mhan bhọ! Ẹbho ne re egbe guẹ nin Jehova fo, ne yẹ mhọn urẹọbhọ da uyumhin nọnsi Jesu, ele ribhi ọne azagba-uwa nọnsi Jehova nan. Azagba-uwa nin eghọnghọn manman ye nọn. Mhan ghọnghọn ranmhude ikhuaẹloghe nin mhan mhọn ghe, mhan dẹ nyẹnlẹn bhi ighegheghe bhi otọ ọfubhegbe nọn vade la bhi okhun ẹlinmhin.

² Ranmhude oyẹẹ nin ọle mhọn da mhan, Jehova da zẹ imhan deba azagba-uwa ne ga ọle. Nin ọnan rẹ sabọ sunu, ọle da zẹ emhin bhi obọ. (John 3:16) Ọle da re iẹnlẹn ọsi ọmọn nọnsọle rẹ zọese rẹ dẹ mhan kiere bhi obọ olukhọ. (1 Cor. 6:20) Ọne izọese nan Jehova rẹ tuje uwedẹ a nin mhan rẹ sabọ deba ọle ha mhọn ikolu nọn ziẹnlẹn. Udede ekpẹn nọn rẹji mhan rẹ ha tie Ọria nọn ke okhun nẹ Aba. Beji mhan ka luẹ bhi uhọnmhọn-ọta nọn gbera, iJehova hi Aba nọn mhẹn nẹ.

3. Inọnta nela mhan ha sabọ nọọn egbe mhan le? (Yẹ fẹ ẹkpẹti ghe nọn yọle “ Jehova Be Gene Lẹn Mẹn?”)

³ Beji ọkpa bhi ẹwẹ ẹbho ne gbẹn Baibo nọọn ọlẹn, mhan sabọ yẹ ha nọọn egbe mhan yọle: “Be imẹn ha rẹ sabọ ha iJehova osa bhi emhin esili rebhe nin ọle lu nin mẹn?” (Ps. 116:12) Bhi ọsi ẹmhọanta, mhan ida sabọ ha iJehova osa. Ọrẹyiriọ, mhan guanọ nin mhan hoẹmhọn ọlẹn. John nin odibo da gbẹn yọle ghe, mhan hoẹmhọn Osẹnobulua ranmhude ọle ka họemhọn mhan. (1 John 4:19) Uwedẹ nela mhan ha rẹ rẹman Aba mhan nin Jehova ghe mhan hoẹmhọn ọlẹn?

4. Beji James 4:8 rẹman, bezẹle nọn da khẹke nin mhan dọnmhegbe ha sikẹ iJehova?

⁴ Jehova guanọ nin mhan ha yi imọẹ ọle. Ọle yẹ guanọ nin mhan ha nanlẹn talọ. (Tie James 4:8.) Ọle guanọ nin mhan ha nan erọnmhọn ji ọle ẹghe rebhe ranmhude ọle dẹ wo ha ka mhan ehọ. (Rom. 12:12) Egbe ilọ ọle re ka mhan ehọ. Mhan dẹ yẹ sabọ ka iJehova ehọ sade mhan tie iBaibo, bi ebe nin agbotu gbẹn dagbere rẹ rẹkpa mhan lẹn otọ iBaibo. Mhan yẹ ka ọle ehọ sade mhan gbehọkotọ nọnsẹn bhi ikolo oga. Beji imọn bi ene biẹ ele rẹ manman sikẹ egbe sade ele ko zilo ẹghe rebhe, iriọ mhan ha yẹ rẹ manman sikẹ iJehova sade mhan nan erọnmhọn ji ọle yẹ ka ọle ehọ ẹghe rebhe.

5. Be uwẹ ha rẹ ha nan erọnmhọn ji Jehova nọnsẹn yẹ?

⁵ Ọkhẹke nin uwẹ ria ẹmhọn ebi uwẹ rẹ nan erọnmhọn ji Jehova yẹ. Jehova guanọ nin mhan ha tan ọkhọle a man ọlẹn sade mhan nan erọnmhọn. (Ps. 62:8) Bhiriọ, ọkhẹke nin mhan nọọn egbe mhan ene inọnta nan: ‘Erọnmhọn nin mẹn nan ji Jehova, ọ be diabe erọnmhan nan gheghe nan, la ọkhọle nọnsẹmhẹn ọ na vae?’ Edandan iribhọ ghe uwẹ manman họemhọn iJehova yẹ guanọ nin uwẹ deba ọle ha mhọn ikolu nọn dinmhin. Bhiriọ, ọkhẹke nin uwẹ ha nan erọnmhọn ji ọle ẹghe rebhe. Tan ọkhọle a man ọlẹn. Taman ọlẹn emhin ne re uwẹ ghọnghọn bi emhin ne kpokpo uwẹ bhi ọkhọle. Ha mhọn ọlẹn bhi ọkhọle ghe uwẹ dẹ sabọ taman ọlẹn nin ọle rẹkpa uwẹ bhi ẹghe nọn hi ki rẹ khin.

6. Be imhan ha lu yẹ nin mhan rẹ sabọ sikẹ iJehova nin Aba mhan?

⁶ Nin mhan rẹ sabọ sikẹ iJehova nin Aba mhan, ọkhẹke nin mhan ji ebi ọle lu nin mhan ha ti mhan bhọ. Bha ji mhan diabe ọkpa bhi ẹwẹ ẹbho ne gbẹn ebe iPsalms nọn yọle: “Uwẹ sẹ wo lu emhin ne bunbun, Eo iJehova nin Osẹnobulua nọnsẹmhen, Iwẹnna ọhan-ilo nesẹ bi emhin nin uwẹ ria da mhan. Ọria soso iribhọ nan ha rẹ khọkhọ uwẹ; Mẹn ha yọle nin mẹn wewe ele man ẹbho, la tẹmhọn ele man ẹbho, mẹn ida sabọ tale fo ranmhude ele manman bunbun!” (Ps. 40:5) Mhan ida wo gheghe ha mhọn ọtibhọ da emhin nin Jehova lu nin mhan, ọ yẹ khẹke nin mhan re ọne ọtibhọ man bhi emhin nin mhan lu bi ọta nin mhan ta. Ọnan dẹ re imhan dikẹ bhi ẹbho ne ribhi ọne agbọn nan ne imhọn ọtibhọ da emhin nin Osẹnobulua lu nin ele. Bhi ọsi ẹmhọanta Baibo bhọ taman mhan ghe inian ẹbho ha dia bhi “ẹghe ọkike.” (2 Tim. 3:1, 2) Mhan iguanọ nin mhan re egbe khọkhọ ele!

7. Be iJehova guanọ bhi obọ ene ga ọle? Bezẹle?

⁷ Ene biẹ imọn iguanọ nin imọn nesele ha ne egbe khọnlẹn. Ele guanọ nin ele ko ha yi imọẹ. Iriọ Jehova yẹ rẹ guanọ nin ene ga ọle rebhe rẹ ha yi imọẹ. Bhi ọsi ẹmhọanta, oyẹẹ nin mhan rẹ ko ne egbe lu emhin, ha re ẹbho lẹn ghe iKristiẹn ọsaje mhan khin. (John 13:35) Iriọ ọ yẹ dia mhan bhi egbe bii ọkpa bhi ẹwẹ ẹbho ne gbẹn ebe iPsalms nọn yọle: “Sẹ ghe! Ebi ọ rẹ manman mhẹn yẹ, bi ebi ọ rẹ manman lẹnlẹn yẹ, nin ibhio rẹ ha nyẹnlẹn kugbe bhi ọfure!” (Ps. 133:1) Ahoẹmhọn-egbe nin mhan mhọn da ibhio mhan, ọle mhan rẹ rẹman iJehova ghe mhan hoẹmhọn ọlẹn. (1 John 4:20) Emhin eghọnghọn nọn rẹji mhan ghe, mhan deba azagba-uwa ọsi eria ne “re ifuẹkẹ man egbe,” yẹ mhọn ẹkẹ ẹjẹjẹ da egbe!—Eph. 4:32.

8. Beji 1 John 5:3 rẹman, be bhọ emhin nọn manman zẹ nin mhan ha da ha hẹnmhọn nin Jehova?

⁸ Beji Jehova rẹ guanọ nin imọn ha hẹnmhọn nin ene biẹ ele, iriọ ọle yẹ rẹ guanọ nin mhan ha hẹnmhọn nanlẹn. (Eph. 6:1) Ọkhẹke nin mhan ha hẹnmhọn nanlẹn  ranmhude ọle hi ọnọn man mhan nọn yẹ gbẹloghe mhan. Ọle hi Aba nọn mhọn ẹwanlẹn nẹ aba rebhe. Oyẹẹ nin mhan mhọn da iJehova, ọle manman zẹ nin mhan da hẹnmhọn nanlẹn. (Tie 1 John 5:3.) Arẹmiẹn emhin ne bunbun ribhọ nọn zẹle nọn da khẹke nin mhan ha hẹnmhọn nin Jehova, ọle isua mhan nin mhan ha lu iriọ. Ọle re isẹhoa nin mhan rẹ zẹ ebi mhan ha lu. Bhiriọ, ọ manman yẹẹ ọle sade mhan tobọmhan zẹ rẹ hẹnmhọn nanlẹn ranmhude oyẹẹ nin mhan mhọn da ọle.

9-10. Bezẹle nọn da khẹke nin mhan lẹn uhi nin Jehova nin Aba mhan gbe nin mhan, yẹ re obọ rẹkhan ele?

⁹ Ene biẹ imọn iguanọ nin imọn nesele miẹn ikuan-egbe. Ọnan zẹle nin ele da gbuhi nin imọn nesele nin iẹnlẹn da sabọ kiọnlẹn nin ele. Imọn ha hẹnmhọn nin ene biẹ ele, ele ki rẹman ghe ele mun udu nyan ene biẹ ele yẹ mun ekpẹn nin ele. Ahamiẹn imọn sabọ lu iriọ da ene biẹ ele, ọ manman khẹke nin mhan lẹn uhi nin Jehova nin Aba mhan gbe nin mhan, yẹ re obọ rẹkhan ele. Mhan ha lu iriọ, mhan ki rẹman iJehova ghe mhan hoẹmhọn ọlẹn yẹ mun ekpẹn nanlẹn. Bhiriọ, ọle ki nan erọnmhọn nin mhan. (Isa. 48:17, 18) Sokpan, ene gbobọra uhi nesi Jehova ki si ikuan-egbe ji egbe ele.—Gal. 6:7, 8. 

¹⁰ Mhan ha lu ebe yẹẹ iJehova, ọle ki gbega mhan bhi ọbọ emhin kẹkẹ ne ha sabọ si ikuan-egbe ji mhan, la emhin ne ha sabọ mun ikolu nin mhan bi Jehova ko mhọnlẹn ọbhi okhẹnan. Jehova lẹn emhin ne khẹke imhan. Aurora nọn nyẹnlẹn bhi United States da yọle: “Mẹn lẹnmhin ghe, mhan ha hẹnmhọn nin Jehova, ọle iẹnlẹn ha da kiọnlẹn nin mhan.”  Iriọ wo nọn tee! Elele nela uwẹ sẹ miẹn beji uwẹ rẹ ha re obọ rẹkhan uhi nesi Jehova?

11. Uwedẹ nela erọnmhọn rẹ rẹkpa mhan?

¹¹ Erọnmhọn dẹ rẹkpa mhan rẹ ha hẹnmhọn nin Jehova aharẹmiẹn mhan ribhi idia nọn kaka. Ranmhude ọ bha gba nin mhan, ọ nọghọ mhan ẹgheso rẹ ha hẹnmhọn nin Jehova. Sokpan, mhan manman dọnmhegbe nin mhan hẹi gbobọra uhi nesi Jehova. Ọnan zẹle nin ọkpa bhi ẹbho ne gbẹn ebe iPsalms, da bhii Osẹnobulua nin ọle re ọne ọkhọle nan rẹ hẹnmhọn nanlẹn. (Ps. 51:12) Obhio mhan ọkpa nin ọkanẹfan natiọle Denise da yọle: “Ọ ha nọghọ mẹn rẹ re obọ rẹkhan ọkpa bhi uhi nesi Jehova, mẹn ki bhii ọle nin ọle re ahu nin mẹn rẹ lu ebe gbale.” Mhan lẹnmhin ghe, Jehova dẹ họn erọnmhọn nọn sẹ iriọ.—Luke 11:9-13.

12. Be Ephesians 5:1 yọle nin mhan lu yẹ?

¹² Tie Ephesians 5:1. Ranmhude imọn nesi Jehova mhan khin, mhan dọnmhegbe nin mhan rẹ ha re egbe khọkhọ ọle. Ọle mhan re egbe khọkhọ sade mhan re ifuẹkẹ bi oyẹẹ man, bi sade mhan rẹhunmhan ẹbho ne rahiẹ mhan. Ẹbho ne iga iJehova ha daghe ikpẹ esili nin mhan rẹman, ọ sabọ rẹ ha ti ele bhọ rẹ dọ lẹn ẹmhọn ọlẹn. (1 Pet. 2:12) Ọkhẹke nin ene biẹ ọmọn ha re egbe khọkhọ iJehova bhi uwedẹ nin ele rẹ ne imọn nesele lu emhin. Ele ha lu iriọ, imọn nesele sabọ rẹ ha guanọ nin ele yẹ deba iJehova ha lu ọmọẹ.

13. Be ọkhẹke nin mhan lu nin mhan da sabọ ha mhọn izebhudu?

¹³ Ọ manman ti ibhokhan bhọ rẹ ha tẹmhọn  aba ele man ẹbho, ranmhude ẹmhọn ọlẹn ti ele bhọ. Iriọ yẹ nọn rẹji mhan. Ranmhude ẹmhọn IJehova nin Aba mhan nọn ribhi okhun ti mhan bhọ, mhan guanọ nin ẹbho yẹ vae dọ lẹn ọlẹn. Inian ọ dia mhan bhi egbe beji ọ yẹ dia IDavid bhi egbe ẹghe nin ọle rẹ yọle: “Mẹn dẹ re iJehova ha hio.” (Ps. 34:2) Ahakimiẹn ghe ọria nin ẹkhọle lo mhan khin kii, be ha rẹkpa mhan rẹ ha mhọn izebhudu? Mhan dẹ sabọ ha mhọn izebhudu sade mhan yere ghe Jehova dẹ ha ghọnghọn sade mhan tẹmhọn ọlẹn, bi sade mhan yere elele nin ẹbho ha miẹn bhọ sade ele luẹ ẹmhọn iJehova. Ọle dẹ rẹkpa mhan rẹ ha mhọn izebhudu. Beji ọle ka rẹ rẹkpa Kristiẹn bhi ore nin ọhẹnhẹn rẹ ha mhọn izebhudu, iriọ ọle ha yẹ rẹkpan mhan ẹlẹnan.—1 Thess. 2:2.

14. Bezẹle nọn da yi emhin kpataki nin mhan rẹ deba ha tẹmhọn Osẹnobulua man ẹbho?

¹⁴ Jehova izọn ọria soso. Bhiriọ, ọ re ọle ghọnghọn sade ọle daghe ghe, mhan re oyẹẹ ne ẹbho lu emhin aharẹmiẹn agbaẹbho ọbhebhe ele na vae. (Acts 10:34, 35) Uwedẹ ọkpa nin mhan ha rẹ sabọ re oyẹẹ man ẹbho hi, sade mhan tẹmhọn Osẹnobulua man ele. (Matt. 28:19, 20) Be ha nabhọre sade mhan lu ọne iwẹnna nan? Ẹbho ne ka mhan ehọ dẹ sabọ ha nyẹnlẹn iẹnlẹn esili nian. Bhi ẹghe odalo, ele ki sabọ miẹn iẹnlẹn ọsi ighegheghe.—1 Tim. 4:16.

15-16. Emhin nela zẹle nin mhan da ghọnghọn?

¹⁵ Aba nọn hoẹmhọn imọn nesọle, ọle iJehova khin. Ọle guanọ nin azagba-uwa nọnsọle ha ghọnghọn. (Isa. 65:14) Mhan mhọn emhin ne bunbun ne ha rẹ mhan ha ghọnghọn ẹlẹnan nian aharẹmiẹn mhan ribhi ọnọghọ. Bhi ọsi ijiẹmhin, ọ ko mhan udu re rẹ lẹn ghe Aba mhan nọn ribhi okhun manman hoẹmhọn mhan. Sẹyẹ, mhan dọ manman lẹn otọ iBaibo. (Jer. 15:16) Sẹyẹ, mhan dọ ha yi ọkpa bhi agbotu ọsi ene ga iJehova, bhi eji ọrebhe da kugbe bii azagba-uwa ọkpa, bhi eji ọrebhe da hoẹmhọn uhi nesọle, bi bhi eji ọrebhe da hoẹmhọn ọdeọde.—Ps. 106:4, 5. 

¹⁶ Mhan dẹ wo miẹn eghọnghọn ẹghe rebhe ranmhude mhan lẹnmhin ghe, emhin dẹ dia nọnsẹn bhi ẹghe odalo, ghe Jehova dẹ kẹ dọ re Agbejele nọnsọle rẹ ne emhin ebe rebhe sibhi ọne otọ nan re. Ẹghenin, ọne otọ nan ki kiẹn otọ ọfubhegbe. Mhan yẹ mhọn ikhuaẹloghe ghe, a dẹ riọ ene yu kpanọ bhi uu nin ele dọ deba mhan ha nyẹnlẹn. (John 5:28, 29) Ẹghe eghọnghọn ọnan dẹ wo ha khin! Ẹghe nọn bha yẹ ree gbe nian, ọrebhe bhi okhun bi ọrebhe bhi ọne otọ nan ki ha re ogẹn ji Aba mhan nin Jehova.