NAʼLEBʼ RE TZOLOK 7
Qʼaxal naqara li Jehobʼa li Qayuwaʼ
«Laaʼo nokoorahok xbʼaan naq Aʼan kooxra xbʼenwa» (1 JUAN 4:19).
BʼICH 3 Tú me das fuerza, confianza y valor
RUʼUJIL LI TZOLOM *
1, 2. Kʼaʼut naq li Jehobʼa xooxkanabʼ wank saʼ xyanq li xjunkabʼal, ut chanru kixbʼaanu?
LI JEHOBʼA xkʼe qe jun xchaqʼal ru bʼoqom: naraj naq tooʼokenq saʼ xyanq li xjunkabʼal. Saʼ li junkabʼal aʼin nekeʼokenk ebʼ li poyanam li ak xeʼxqʼaxtesi li xyuʼam chiru ut wankebʼ xpaabʼal chirix li xkamik li Jesús. Ut jwal sa saʼ qachʼool joʼ junkabʼal. Naqanaw chik kʼaʼut naq xooyobʼtesiik ut nasahoʼk qachʼool naq wank qoybʼenihom: xyalbʼal xsahil li junelik yuʼam saʼ choxa malaj saʼ li Chʼinaʼusil Naʼajej arin saʼ Ruuchichʼochʼ.
2 Saʼ xkʼabʼaʼ li rahok, li Jehobʼa kixkuy rilbʼal naq kikamsiik li Ralal re naq laaʼo tooruuq wank saʼ xyanq li xjunkabʼal (Juan 3:16). Li Santil Hu naxye chiqix: «Loqʼbʼilex chi terto eetzʼaq!» (1 Cor. 6:20). Saʼ xkʼabʼaʼ li xkamik li Jesús, li Yos kixbʼaanu naq toowanq saʼ amiiwil rikʼin. Oxloqʼ chiqu naq naqaye; at Qayuwaʼ, re laj echal re li choxachʼochʼ. Ut joʼ xqatzol saʼ li tzolom rubʼelaj, maakʼaʼ chik junaq Yuwaʼbʼej jwal chaabʼil joʼ li Jehobʼa.
3. Kʼaru ebʼ li patzʼom maare nanumeʼk saʼ qachʼool? (Chaawil ajwiʼ li kaaxukuut « Ma naxkʼe xchʼool li Jehobʼa chiwix?»).
3 Maare nanumeʼk saʼ qachʼool li patzʼom li kixbʼaanu jun rehebʼ li kitzʼiibʼank re li Santil Hu naq kixye: «Chanru tintoj re li Qaawaʼ chixjunil li usilal xbʼaanu we?» (Sal. 116:12). Li xyaalal aʼan naq maakʼaʼ nayoʼlaak qe li tooruuq wiʼ xtojbʼal re li qachoxahil Yuwaʼ li rusilal saʼ qabʼeen. Abʼanan, saʼ xkʼabʼaʼ naq nokooxra, laaʼo ajwiʼ naqaj xraabʼal. Li Apostol Juan kixtzʼiibʼa: «Laaʼo nokoorahok xbʼaan naq Aʼan kooxra xbʼenwa» (1 Juan 4:19). Joʼkan bʼiʼ, chanru tooruuq xkʼutbʼesinkil re li Qayuwaʼ naq naqara?
CHOOWANQ JUNELIK CHIXKʼATQ LI JEHOBʼA
Naqakʼutbʼesi naq qʼaxal naqara li Jehobʼa li qachoxahil Yuwaʼ, naq nokootijok re naq junelik toowanq chixkʼatq, naq nokooʼabʼink chiru ut naq naqatenqʼahebʼ li junchʼol chi xraabʼal. (Chaawil li raqal 4 toj 14).
4. Joʼ naxye Santiago 4:8, kʼaʼut naq tento tqakʼe qaqʼe chi jilok chixkʼatq li Jehobʼa?
4 Li Jehobʼa naraj naq toojiloq chixkʼatq ut naq junelik tqaseeraqʼi re li naqekʼa (taayaabʼasi Santiago 4:8). Naxye qe naq inkʼaʼ tqakanabʼ tijok, ut aʼan junelik seebʼ xchʼool chi qabʼinkil (Rom. 12:12). Aʼan maajunwa tixkanabʼ qabʼinkil xbʼaan naq lubʼlu malaj laatzʼ ru. Ut laaʼo, chanru naqabʼi? Rikʼin rilbʼal xsaʼ li Santil Hu ut li qatasal hu li nokooʼeʼxtenqʼa chi xtawbʼal ru li Raatin. Naqabʼi ajwiʼ naq naqakʼe qachʼool chi rabʼinkil li nayeemank saʼebʼ li chʼutam. Joʼ naq jun li yuwaʼbʼej naxkʼam ribʼ saʼ usilal rikʼin li ralal xkʼajol naq nekeʼseeraqʼik chiribʼilebʼ ribʼ, joʼkan ajwiʼ, naq rajlal nokooseeraqʼik rikʼin li Jehobʼa nokooruuk chi jilok chixkʼatq.
Chaawil li raqal 5.
5. Chanru tooruuq xchaabʼilobʼresinkil ru li qatij?
5 Naq nokooseeraqʼik rikʼin li Yos, ma naqaye re chixjunil li naqakʼoxla ut naqekʼa? Aʼan naraj naq tqate li qachʼool chiru naq nokootijok (Sal. 62:9). Joʼkan naq, us raj naq tqakʼoxla: «Ma inkʼaʼ ninjal bʼayaq li waatin naq nintijok? Malaj naq nintijok ninbʼaanu joʼ naq ninʼaatinak rikʼin jun li wamiiw ut ninye chixjunil li wank saʼ linchʼool?». Relik chi yaal naq qʼaxal naqara li Jehobʼa ut naqaj wank chixkʼatq chi junelik. Re naq tooruuq xbʼaanunkil aʼin, tento naq rajlal tooʼaatinaq rikʼin. Qatehaq li qachʼool chiru, qayehaq re li naxkʼe xsahil qachʼool ut li naxkʼe qakʼaʼuxl. Chʼolchʼooq chiqu naq tooruuq xpatzʼbʼal re naq tooxtenqʼa.
6. Kʼaru tento tqabʼaanu re naq junelik toowanq chixkʼatq li Yos?
6 Re naq toowanq junelik chixkʼatq li Jehobʼa, tento naq toobʼanyoxinq. Naqakʼulubʼa li aatin li kixye jun rehebʼ li kitzʼiibʼank re li Salmo: «At Qaawaʼ, at inYos, naabʼal li sachbʼachʼoolej xabʼaanu, kʼajoʼ xkʼihal li xninqal ru aakʼaʼuxl chiqix: maajun truuq xjuntaqʼeetankil ribʼ aawikʼin! Nawaj raj xyeebʼal resil ut xpuktesinkil, abʼan inkʼaʼ ninruhank chi rajlankilebʼ» (Sal. 40:6). Joʼkan naq moko kaʼaj tawiʼ yal naqaye naq nokoobʼanyoxink. Naqakʼutbʼesi bʼan chiru li Jehobʼa rikʼin li qaatin ut li qabʼaanuhom. Chi joʼkaʼin naqakʼutbʼesi naq moko nokoonaʼlebʼak ta joʼ li ruuchichʼochʼ aweʼ. Wanko saʼ xyanq ebʼ li kristiʼaan li inkʼaʼ nekeʼxbʼanyoxi li naxbʼaanu li Yos saʼ xkʼabʼaʼebʼ. Relik chi yaal, jun reetalil naq wanko «saʼ rosoʼjikebʼ li kutan» aʼan naq ebʼ li kristiʼaan maakʼaʼ chik nekeʼxnaw xyoxinkil (2 Tim. 3:1, 2). Maajunwa taxaq tooʼeʼxbʼon rikʼin li xnaʼlebʼebʼ.
7. Kʼaru naraj li Jehobʼa naq tqabʼaanu, ut kʼaʼut?
7 Ebʼ li naʼbʼej yuwaʼbʼej nekeʼraj naq ebʼ li ralal xkʼajol teʼxkʼam ribʼ saʼ usilal ut inkʼaʼ yooqebʼ chi pleetik. Ut aʼan ajwiʼ naraj li Jehobʼa choʼq rehebʼ li ralal xkʼajol. Yaal tzʼaqal, li rahok li wank saʼ qayanq naxkʼutbʼesi naq laaʼo tzʼaqal aj paabʼanel (Juan 13:35). Jun li xmoos li Yos kixtzʼiibʼa: «Kʼehomaq reetal: kʼajoʼ xloqʼal, makachʼin xchʼinaʼusal naq wankebʼ laj paabʼanel saʼ junajil!» (Sal. 133:1). Peʼyaal naq joʼkan ajwiʼ naqekʼa qibʼ laaʼo? Naq naqara ebʼ li qahermaan, naqakʼutbʼesi chiru li Jehobʼa naq naqara ajwiʼ aʼan (1 Juan 4:20). Qʼaxal chaabʼil tzʼaqonk rikʼinebʼ li qahermaan saʼ jun li junkabʼal bʼarwiʼ chixjunilebʼ chaabʼilebʼ chiribʼilebʼ ribʼ, nekeʼuxtaanank u ut nekeʼkuyuk maak (Efes. 4:32).
CHOOʼABʼINQ RE NAQ TQAKʼUTBʼESI LI QARAHOM
Chaawil li raqal 8.
8. Joʼ naxye saʼ 1 Juan 5:3, bʼar wank li xnimal ru xyaalal naq nokooʼabʼink chiru li Jehobʼa?
8 Li Jehobʼa naraj naq ebʼ li alal kʼajolbʼej teʼabʼinq chiru li xnaʼ xyuwaʼ, ut naraj ajwiʼ naq laaʼo tooʼabʼinq chiru (Efes. 6:1). Xkʼulubʼ naq tooʼabʼinq chiru xbʼaan naq aʼan kiyobʼtesink qe, naxkʼe li naʼajmank re naq yoʼyoqo ut maakʼaʼ chik junaq Yuwaʼbʼej li naxkʼutbʼesi naq wank tzʼaqal xnaʼlebʼ joʼ aʼan. Abʼan li xnimal ru xyaalal naq nokooʼabʼink chiru aʼan naq naqara (taayaabʼasi 1 Juan 5:3). Yaal naq numtajenaq xyaalal re abʼink chiru, abʼan maajunwa naxmin qu chi xbʼaanunkil. Laaʼo bʼan yaal qe ma tqabʼaanu malaj inkʼaʼ, abʼan nasahoʼk saʼ xchʼool naq nokooʼabʼink chiru saʼ xkʼabʼaʼ naq naqara.
9, 10. Kʼaʼut naq wank xwankil xnawbʼal ut xyuʼaminkil li xchaqʼrabʼ li Yos?
9 Ebʼ li naʼbʼej yuwaʼbʼej nekeʼraj naq ebʼ li ralal xkʼajol us teʼelq saʼ li xyuʼam. Joʼkan naq nekeʼxye rehebʼ kʼaru teʼxbʼaanu ut kʼaru inkʼaʼ teʼxbʼaanu. Ebʼ li kokʼal li nekeʼxpaabʼ li nayeemank rehebʼ nekeʼxkʼutbʼesi naq nekeʼxkʼojobʼ xchʼool rikʼin li xnaʼ xyuwaʼ ut naq nekeʼroxloqʼi ruhebʼ. Qʼaxal wank wiʼ chik xwankil naq laaʼo tqanaw ebʼ li xchaqʼrabʼ li qachoxahil Yuwaʼ ut naq tqayuʼami. Chi joʼkan naqakʼutbʼesi chiru li Jehobʼa naq naqara ut naqoxloqʼi ru. Ut saʼ xkʼabʼaʼ aʼin, us nokooʼelk saʼ li qayuʼam (Is. 48:17, 18). Abʼanan, li nekeʼxtzʼeqtaana li Yos ut inkʼaʼ nekeʼxpaabʼ li xchaqʼrabʼ xjunesebʼ nekeʼxsikʼ xrahilal (Gál. 6:7, 8).
10 Naq naqabʼaanu li nawulak chiru li Jehobʼa naqakol li qajunxaqalil, li qachʼool ut li qapaabʼal. Aʼan naxnaw kʼaru li qʼaxal us choʼq qe. Li xʼAurora jun li qechpaabʼanel ixq li wank Estados Unidos naxye: «Chʼolchʼo chiwu naq qʼaxal us tooʼelq saʼ li qayuʼam wi nokooʼabʼink chiru li Jehobʼa». Ut aʼin tzʼaqal nakʼulmank junelik. Qakʼoxlaq aweʼ: «Kʼaru rusilal xkʼam chaq saʼ linyuʼam abʼink chiru li Jehobʼa?».
11. Chanru nokooxtenqʼa li tijok?
11 Li tijok nokooxtenqʼa chi abʼink chiru li Jehobʼa usta nachʼaʼajkoʼk chiqu. Saʼ xkʼabʼaʼ naq chiqajunilo aj maak, wank sut aajel ru naq tqakʼe qaqʼe re abʼink chiru. Abʼan miqakanabʼ xbʼaanunkil. Jun rehebʼ li kitzʼiibʼank re li Salmo xʼelajink chiru li Yos: «Chaakʼe taxaq xkawilal inchʼool re naq tinbʼaanu li kʼaru nakaawaj» (Sal. 51:12, Li Santil Hu, Wycliffe Bible Translators. Akʼ tzʼiibʼ). Li xDenise jun aj kʼamolbʼe saʼ li puktesink naxye: «Wi nachʼaʼajkoʼk chiwu xpaabʼankil jun rehebʼ li xchaqʼrabʼ li Jehobʼa, nintzʼaama chiru naq chixkʼehaq inmetzʼew re xbʼaanunkil li us». Chʼolchʼooq chiqu aweʼ: li Yos junelik narabʼi ebʼ li tij joʼ aʼin (Luc. 11:9-13).
QATENQʼAQ EBʼ LI JUNCHʼOL CHI XRAABʼAL LI QAYUWAʼ
12. Kʼaru nokooxtaqla chi xbʼaanunkil Efesios 5:1?
12 (Taayaabʼasi Efesios 5:1). Saʼ xkʼabʼaʼ naq laaʼo «ralal xkʼajol» li Jehobʼa li raaroko xbʼaan, naqabʼaanu chixjunil li wank saʼ quqʼ re xkʼambʼal qe rikʼin, ut naqabʼaanu aʼin naq nokoorahok, naq tuulano ut naq naqakuyebʼ xmaak li junchʼol. Naq ebʼ li poyanam li inkʼaʼ nekeʼxnaw ru li Yos teʼril li xchaabʼilal ru qanaʼlebʼ, maare teʼraj xnawbʼal ru li Yos (1 Ped. 2:12). Ebʼ li naʼbʼej yuwaʼbʼej aj paabʼanel wank tzʼaqal xyaalal chiruhebʼ re naq teʼril li ralal xkʼajol joʼ naxbʼaanu li Jehobʼa qikʼin. Wi joʼkan teʼxbʼaanu, maare t-alaaq saʼ xchʼool ebʼ li ralal xkʼajol wank choʼq ramiiw li Jehobʼa li qʼaxal narahok.
Chaawil li raqal 13.
13. Wi inkʼaʼ naʼelk qu chi aatinak, kʼaru ttenqʼanq qe re naq tooruuq chi aatinak chirix li Jehobʼa?
13 Rajlal, ebʼ li kokʼal sahebʼ saʼ xchʼool naq nekeʼaatinak chirix li xyuwaʼ. Laaʼo ajwiʼ nasahoʼk saʼ qachʼool naq nokooʼaatinak chirix li qachoxahil Yuwaʼ ut naqaj naq jalanebʼ chik teʼxnaw ru. Naqekʼa qibʼ joʼ li awabʼej David li kixtzʼiibʼa: «Laaʼin ninnima wibʼ saʼ xkʼabʼaʼ li Qaawaʼ» (Sal. 34:3). Abʼan maare wiibʼ oxibʼ inkʼaʼ nekeʼelk ru chi aatinak ut saʼ xkʼabʼaʼ aʼin maakʼaʼ nekeʼxye chirix li Yos. Kʼaru ttenqʼanq qe wi joʼkan naqakʼul? Xkʼoxlankil rix naq jwal tqasahobʼresi xchʼool li Jehobʼa ut li rusilal li nekeʼxtaw li nekeʼxnaw ru. Li Yos tixkawubʼresi li qachʼool joʼ naʼajmank chiqu. Joʼ kixtenqʼahebʼ li qechpaabʼanel saʼ xkutankilebʼ li Apostol, joʼkan ajwiʼ tixbʼaanu qikʼin (1 Tes. 2:2).
14. Bʼar wank wiibʼ oxibʼ li xnimal ru xyaalal re xkʼebʼal ebʼ li kristiʼaan choʼq xtzolom li Kriist?
14 Li Jehobʼa inkʼaʼ nasikʼok u, ut nasahoʼk saʼ xchʼool naq naqarahebʼ li junchʼol maakʼaʼ naxye bʼar chalenaqebʼ (Hech. 10:34, 35). Jun li naʼlebʼ re xkʼutbʼesinkil naq naqara ebʼ li qas qiitzʼin aʼan naq naqapuktesi li chaabʼil esilal (Mat. 28:19, 20). Kʼaru rusilal naxkʼam chaq li kʼanjel aʼin? Naq ebʼ li teʼabʼinq qe teʼxtaw rusilal li xyuʼam anaqwan ut teʼruuq ajwiʼ xtawbʼal li junelik yuʼam saʼ li kutan chalk re (1 Tim. 4:16).
QARAHAQ LI QAYUWAʼ UT SAHAQ SAʼ LI QACHʼOOL
15, 16. Kʼaʼut naru nasahoʼk saʼ li qachʼool?
15 Li Jehobʼa aʼan jun Yuwaʼbʼej li qʼaxal narahok ut naraj naq sahaq saʼ xchʼool li xjunkabʼal (Is. 65:14). Usta tqakʼul ebʼ li chʼaʼajkilal, abʼan wank naabʼal xyaalal chiqu re naq sahaq saʼ qachʼool. Jun eetalil, kutan saqenk chiqu naq li qachoxahil Yuwaʼ qʼaxal nokooxra. Naqanaw chirix kʼaru tzʼaqal naʼaatinak wiʼ li Santil Hu (Jer. 15:16). Ut nokootzʼaqonk saʼ jun li junkabʼal li jwal chaabʼil bʼarwiʼ chixjunilebʼ nekeʼxra li Jehobʼa, nekeʼxra li xloqʼlaj chaqʼrabʼ ut nekeʼxra ribʼ chiribʼilebʼ ribʼ (Sal. 106:4, 5).
16 Naru ajwiʼ nasahoʼk saʼ qachʼool xbʼaan naq chʼolchʼo chiqu naq saʼ li kutan chalk re qʼaxal chaabʼilaq ru li qayuʼam. Naqanaw naq chi seebʼ li Jehobʼa tixsachebʼ ru li maaʼusebʼ xnaʼlebʼ ut naq saʼ xkʼabʼaʼ li Xʼawabʼejilal tchʼinaʼusoʼq li Ruuchichʼochʼ. Joʼkan ajwiʼ, wank li xchaqʼalil ru qoybʼenihom naq ebʼ li kamenaq teʼwakliiq wiʼ chik chi yoʼyo ut teʼxtaw wiʼ chik ribʼ rikʼinebʼ li xkomon (Juan 5:28, 29). Peʼyaal naq kʼajoʼaq xchaqʼalil ru aʼin? Ut li qʼaxal wank xwankil aʼan naq wulak re xhoonalil naq chixjunilebʼ li wankebʼ saʼ choxa ut saʼ Ruuchichʼochʼ teʼxkʼe re li Jehobʼa li loqʼal, li nimank u ut li loqʼonink joʼ xkʼulubʼ.
BʼICH 12 Jehová, nuestro gran Dios
^ párr. 5 Naqanaw naq li Jehobʼa li Qayuwaʼ qʼaxal nokooxra ut xooxkanabʼ wank saʼ li xjunkabʼal bʼarwiʼ nekeʼtzʼaqonk ebʼ li xmoos li inkʼaʼ nekeʼxtzʼeqtaana. Saʼ xkʼabʼaʼ aʼin, laaʼo naqara ajwiʼ. Chanru tooruuq xkʼutbʼesinkil naq naqara? Li tzolom aweʼ tixtzʼil rix wiibʼ oxibʼ li naʼlebʼ li tooruuq xbʼaanunkil.
