GĨCUNJĨ KĨA WĨRUTI KĨA 7
Nĩ Twendete Jehova Ithe Witũ Mũno
“Ithuĩ twendanaga tondũ nĩwe waambire gũtwenda.” —1 JOH. 4:19.
RWĨMBO NA. 3 Ngai nĩ Mwĩhoko na Hinya Witũ
GĨCUNJĨ-INĨ GĨKĨ *
1-2. Jehova aathondekire njĩra atĩa nĩguo tũingĩre thĩinĩ wa famĩlĩ yake? Eekire ũguo nĩkĩ?
JEHOVA nĩ atũnyitĩte ũgeni tũkaingĩra thĩinĩ wa famĩlĩ ya athathaiya ake. Na githĩ ũcio ti mweke wa magegania? Andũ arĩa marĩ thĩinĩ wa famĩlĩ ĩyo nĩ andũ meyamũrĩire Ngai, na monanagia wĩtĩkio harĩ igongona rĩa ũkũũri rĩa Mũrũwe. Tũkoragwo thĩinĩ wa famĩlĩ ĩrĩ na gĩkeno. Ũtũũro witũ nĩ ũkoragwo na muoroto, na nĩ tũkenagĩra kĩĩrĩgĩrĩro gĩa gũgaatũũra tene na tene kũrĩa igũrũ kana thĩinĩ wa Paradiso gũkũ thĩ.
2 Tondũ Jehova nĩ atwendete mũno, nĩ aathondekire njĩra ya gũtũteithia kũingĩra thĩinĩ wa famĩlĩ yake, no nĩgetha eke ũguo nĩ aabatarire kwĩima na njĩra nene mũno. (Joh. 3:16) Bibilia yonanagia atĩ: ‘Twagũrirũo na thogora.’ (1 Kor. 6:20) Kũgerera ũkũũri, Jehova nĩ aatũhotithirie gũkorũo na ũrata wa hakuhĩ hamwe nake. Tũkoragwo na gĩtĩo kĩnene mũno gĩa gwĩta Jehova o we Mũnene mũno igũrũ na thĩ, Ithe witũ. Na o ta ũrĩa tuoonire thĩinĩ wa gĩcunjĩ kĩrĩa kĩhĩtũku, Jehova nĩwe Baba ũrĩa mwega biũ.
3. Nĩ ciũria irĩkũ hihi twĩyũragia? (Ningĩ rora gathandũkũ, “ Hihi Jehova nĩ Anjũĩ?”)
3 No kũhoteke nĩ twĩyũragia o ta mwandĩki wa Bibilia ũrĩa woririe ũũ: “Hihi ngũrĩha Jehova na kĩĩ tondũ wa maũndũ marĩa mothe mega anjĩkĩire?” (Thab. 116:12) Ũrĩa kũrĩ nĩ atĩ, tũtingĩhota kũrĩha Ithe witũ wa igũrũ. No wendo ũrĩa akoragwo naguo harĩ ithuĩ nĩ ũtũmaga o na ithuĩ tũmwende. Mũtũmwo Johana aandĩkire ũũ: “Ithuĩ twendanaga tondũ nĩwe waambire gũtwenda.” (1 Joh. 4:19) Hihi tũngĩonia Ithe witũ wa igũrũ atĩ nĩ tũmwendete na njĩra irĩkũ?
IKARAGA HAKUHĨ NA JEHOVA
Tuonanagia nĩ twendete Jehova Ithe witũ wa igũrũ, rĩrĩa twamũkuhĩrĩria kũgerera mahoya, twamwathĩkĩra, na twateithia andũ arĩa angĩ kũmwenda (Rora kĩbungo gĩa 4-14)
4. Kũringana Jakubu 4:8, nĩkĩ nĩ wega twĩrutanĩrie kũgĩa na ũrata wa hakuhĩ hamwe na Jehova?
4 Jehova endaga tũkorũo na ũrata wa hakuhĩ nake na twaranagĩrie nake. (Thoma Jakubu 4:8.) Atwĩrĩte ‘tũhoyage tũtegũtigithĩria,’ na hĩndĩ ciothe nĩ akoragwo ehaarĩirie gũtũthikĩrĩria. (Rom. 12:12) Gũtirĩ hĩndĩ akoragwo na mĩhang’o mĩingĩ kana arĩ mũnogu ũndũ atangĩhota gũtũthikĩrĩria. Ithuĩ tũmũthikagĩrĩria na njĩra ya gũthoma Kiugo gĩake Bibilia, o hamwe na mabuku marĩa matũteithagĩrĩria gũtaũkĩrũo nĩ Bibilia. Ningĩ nĩ tũmũthikagĩrĩria na njĩra ya gũthikĩrĩria na kinyi mĩcemanio-inĩ ya Gĩkristiano. Kwaranĩria na Jehova kaingĩ nĩ gũtũteithagia gũtũũria ũrata wa hakuhĩ hamwe nake, o ta ũrĩa ciana igĩaga na ũrata wa hakuhĩ hamwe na aciari rĩrĩa maranĩria kaingĩ.
Rora kĩbungo gĩa 5
5. Tũngĩagagĩria mahoya maitũ na njĩra ĩrĩkũ?
5 Hihi mahoya maku harĩ Jehova makoragwo mahaana atĩa? Jehova endaga tũmũitũrũrĩre ngoro citũ rĩrĩa tũrahoya. (Thab. 62:8) Nĩ twagĩrĩirũo kwĩyũria kĩũria gĩkĩ: ‘Hihi mahoya makwa makoragwo matariĩ ta mũndũ ũrathoma ndũmĩrĩri yandĩkĩtwo handũ, kana matariĩ ta marũa ma kuuma ngoro?’ Hatarĩ nganja nĩ wendete Jehova mũno, na nĩ wendaga gũtũũria ũrata waku hamwe nake ũrĩ na hinya. Nĩguo ũhote gwĩka ũguo, nĩ ũrabatara kwaranagĩria nake kaingĩ. Mwĩrage ũndũ ũrĩa ũrĩ ngoro-inĩ yaku. Mwĩre maũndũ marĩa matũmaga ũkene na marĩa matũmaga ũtangĩke. Koragwo na ma atĩ no agũteithie rĩrĩa wamũhoya ũteithio.
6. Nĩ ũndũ ũrĩkũ twagĩrĩirũo gwĩka nĩguo tũtũũrie ũrata wa hakuhĩ hamwe na Ithe witũ wa igũrũ?
6 Nĩguo tũtũũrie ũrata wa hakuhĩ hamwe na Ithe witũ wa igũrũ, nĩ twagĩrĩirũo hĩndĩ ciothe gũkoragwo na mwerekera wa gũcokia ngatho. Nĩ twĩtĩkanagia na mwandĩki wa thaburi ũrĩa woigire ũũ: “Nĩ wĩkĩte maũndũ maingĩ, wee Jehova Ngai wakwa, mawĩra maku ma magegania o na methugunda maku gũtwerekera. Gũtirĩ ũngĩ ũngĩringithanio nawe; korũo ndageria kwaria njuge ũhoro wamo, no makorũo marĩ maingĩ mũno ũndũ itangĩhota kũmagweta!” (Thab. 40:5) To kũigua tũiguaga tũrĩ na ngatho, ĩndĩ nĩ tuonanagia ngatho citũ kũrĩ Jehova kũgerera ciugo na ciĩko citũ. Ũndũ ũcio nĩ ũtũmaga tũkorũo tũrĩ ngũrani na andũ arĩa angĩ mahinda-inĩ maya tũratũũra. Thĩinĩ wa thĩ ĩrĩa tũratũũra, andũ aingĩ maticokagia ngatho nĩ ũndũ wa maũndũ maingĩ marĩa Ngai amekĩire. Andũ gũkorũo matarĩ na ngatho nĩ ũndũ ũmwe wonanagia atĩ tũratũũra “matukũ-inĩ ma kũrigĩrĩria.” (2 Tim. 3:1, 2) Tũtingĩenda gũkorũo na mwerekera ta ũcio!
7. Jehova endaga twĩke atĩa, na nĩkĩ?
7 Aciari matiendaga ciana ciao irũe no mendaga ikorũo na ũrata. Jehova o nake endaga ciana ciake ciothe ikorũo ciendaine. Hatarĩ nganja, wendo ũrĩa tũkoragwo naguo mũndũ na ũrĩa ũngĩ nĩ ũmenyithanagia atĩ tũrĩ Akristiano a ma. (Joh. 13:35) Nĩ twĩtĩkanagia na mwandĩki wa thaburi ũrĩa woigire ũũ: “Ĩ nĩ wega atĩa, o na nĩ ũndũ wĩ gĩkeno atĩa Ariũ a ithe ũmwe gũtũũrania hamwe marĩ na ũrũmwe!” (Thab. 133:1) Rĩrĩa twenda aarĩ na ariũ a Ithe witũ nĩ tuonagia Jehova atĩ nĩ tũmwendete. (1 Joh. 4:20) Na githĩ tũtikenaga gũkorũo thĩinĩ wa famĩlĩ ya aarĩ na ariũ a Ithe witũ arĩa monanagia ‘ũtugi kwerekera mũndũ na ũrĩa ũngĩ, na magacayanĩra marĩ na wororo’!—Ef. 4:32.
ONANAGIA WENDO NA NJĨRA YA GWATHĨKA
Rora kĩbungo gĩa 8
8. Gĩtũmi kĩnene kĩrĩa gĩtũmaga twathĩkĩre Jehova nĩ kĩrĩkũ kũringana na 1 Johana 5:3?
8 Jehova erĩgagĩrĩra ciana ciathĩkĩre aciari, na nĩ erĩgagĩrĩra o na ithuĩ tũmwathĩkĩre. (Ef. 6:1) Nĩ twagĩrĩirũo kũmwathĩkĩra tondũ nĩwe Mũũmbi witũ, Mũtũũria wa muoyo witũ, na nĩwe Mũciari ũrĩa mũũgĩ mũno. O na kũrĩ ũguo, gĩtũmi kĩnene kĩrĩa gĩtũmaga twathĩkĩre Jehova nĩ tondũ nĩ tũmwendete. (Thoma 1 Johana 5:3.) O na gũtuĩka harĩ na itũmi nyingĩ cia gwathĩkĩra Jehova, we ndatũtindĩkagĩrĩria tũmwathĩkĩre. Tondũ Jehova nĩ aatũheire wĩyathi wa gwĩthuurĩra, nĩ akenaga rĩrĩa twathuura kũmwathĩkĩra tondũ nĩ tũmwendete.
9-10. Nĩkĩ nĩ wega kũmenya ithimi cia Ngai na gũciathĩkĩra?
9 Aciari nĩ mendaga ciana ciao ikorũo na ũgitĩri. Nĩkĩo maciigagĩra mawatho ma maũndũ marĩa ciagĩrĩirũo gwĩka, na marĩa itagĩrĩirũo gwĩka. Rĩrĩa ciana ciamathĩkĩra, nĩ cionanagia atĩ nĩ citĩĩte aciari a cio na cikamahe gĩtĩo. Na githĩ ti ũndũ wa bata makĩria harĩ ithuĩ kũmenya ithimi cia Ithe witũ wa igũrũ na gũciathĩkĩra! Rĩrĩa tweka ũguo nĩ tuonagia Jehova atĩ nĩ tũmwendete na tũkamũhe gĩtĩo, na ithuĩ no tũgunĩkaga. (Isa. 48:17, 18) No andũ arĩa matathĩkagĩra Jehova na ithimi ciake, mekaga maũndũ ma kũmathũkia o ene.—Gal. 6:7, 8.
10 Rĩrĩa twatũũra kũringana na wendi wa Jehova, nĩ tũgitagĩrũo kĩĩmwĩrĩ, kĩĩmeciria, na kĩĩroho. Jehova nĩ amenyaga maũndũ marĩa mangĩtũguna. Aurora ũrĩa ũikaraga Amerika (US), ooigire ũũ: “Nĩ njũĩ atĩ ũtũũro ũrĩa mwega makĩria uumanaga na gwathĩkĩra Jehova hingo ciothe.” Ũguo nĩguo gũthiaga harĩ ithuĩ ithuothe. Hihi wee ũgunĩkĩte atĩa nĩ ũndũ wa gwathĩkĩra ũtaaro wa Jehova wa wendo?
11. Mahoya matũteithagia atĩa?
11 Mahoya nĩ matũteithagia gũkorũo tũrĩ athĩki, o na rĩrĩa atarĩ ũndũ mũhũthũ gwathĩka. Rĩmwe na rĩmwe ti ũndũ mũhũthũ gwathĩkĩra Jehova, no nĩ twagĩrĩirũo kũrũa na mwerekera wa kũhĩtĩria Jehova. Mwandĩki wa thaburi aathaithire Ngai akĩmwĩra: “Arahũra thĩinĩ wakwa wendi wa gũgwathĩkagĩra.” (Thab. 51:12) Denise ũrĩa ũtungataga arĩ painia wa hĩndĩ ciothe ooigire ũũ: “Rĩrĩa ndona ũrĩ ũndũ mũritũ gwathĩkĩra ũndũ mũna Jehova oigĩte nĩ ndĩmũhoyaga nĩguo ahe hinya wa gwĩka ũrĩa kwagĩrĩire.” Tũrĩ na ma atĩ hingo ciothe Jehova nĩ acokagia mahoya ta macio.—Luk. 11:9-13.
TEITHAGIA ANDŨ ARĨA ANGĨ KWENDA ITHE WITŨ
12. Nĩ ũndũ ũrĩkũ twagĩrĩirũo gwĩka kũringana na Aefeso 5:1?
12 Thoma Aefeso 5:1. Tondũ tũrĩ “ciana ciendetwo” nĩ Jehova, nĩ twĩkaga ũrĩa wothe tũngĩhota kwĩgerekania nake. Twĩgerekanagia nake na njĩra ya kuonania wendo, ũtugi, na kuohera andũ arĩa angĩ. Rĩrĩa andũ arĩa matoĩ Ngai mona ciĩko citũ njega, no magucĩrĩrio kwĩruta maũndũ makĩria mamwĩgiĩ. (1 Pet. 2:12) Aciari Akristiano nĩ magĩrĩirũo kwĩrutanĩria kwĩgerekania na Jehova harĩ ũrĩa marũmbũyanagia na ciana ciao. Rĩrĩa megerekania na Jehova, ciana ciao o nacio no ciende kũgĩa na ũrata wa hakuhĩ hamwe nake.
Rora kĩbungo gĩa 13
13. Nĩ atĩa twagĩrĩirũo gwĩka nĩguo tũgĩe na ũcamba?
13 Ciana nini nĩ ciguaga ciendete ithe wao na nĩ ikenaga kwaria ũhoro wake. O na ithuĩ nĩ tũiguaga twendete Jehova Ithe witũ wa igũrũ na nĩ twendaga andũ arĩa angĩ mamũmenye. Ngoro-inĩ citũ, ithuothe tũiguaga o ta Mũthamaki Daudi ũrĩa waandĩkire ũũ: “Nĩ ndĩrĩĩrahaga nĩ ũndũ wa Jehova.” (Thab. 34:2) Ĩ angĩkorũo nĩ tũiguaga guoya kwaria igũrũ rĩmwĩgiĩ? Tũngĩka atĩa tũgĩe na ũcamba? No tũgĩe na ũcamba tũngĩciria ũrĩa gwĩka ũguo kũngĩkenia Jehova, na ũrĩa andũ arĩa angĩ mangĩgunĩka nĩ ũndũ wa kwĩruta ũhoro ũmwĩgiĩ. Jehova nĩ arĩtũheaga ũmĩrĩru ũrĩa tũrabatara. Nĩ aateithirie aarĩ na ariũ a Ithe witũ a karine ya mbere kũgĩa na ũcamba, na o na ithuĩ no arĩtũteithagia.—1 Thes. 2:2.
14. Itũmi imwe itũmaga wĩra wa gũtua andũ arutwo ũkorũo ũrĩ wa bata nĩ irĩkũ?
14 Jehova ndarĩ mũthutũkanio, na nĩ akenaga kuona tũkĩonia andũ arĩa angĩ wendo gũtekũmakania kũrĩa moimĩte kana ũrĩa maũndũ mao mahaana. (Atũm. 10:34, 35) Njĩra ĩmwe njega tũngĩonia andũ arĩa angĩ wendo nayo nĩ kũmahunjĩria ũhoro ũrĩa mwega. (Mat. 28:19, 20) Hihi wĩra ũcio ũhingagia ũndũ ũrĩkũ? Andũ arĩa matũthikagĩrĩria no magagĩrie ũtũũro wao mahinda-inĩ maya, na magĩe na kĩĩrĩgĩrĩro gĩa gũgaatũũra tene na tene ihinda rĩrĩa rĩroka.—1 Tim. 4:16.
ENDA ITHE WITŨ NA NĨ ŨRĨKORAGWO NA GĨKENO
15-16. Tũrĩ na itũmi irĩkũ cia gũkorũo na gĩkeno?
15 Jehova nĩ mũciari ũrĩ wendo na kwoguo endaga famĩlĩ yake ĩkorũo na gĩkeno. (Isa. 65:14) Kũrĩ na maũndũ maingĩ mangĩtũma tũkorũo na gĩkeno mahinda-inĩ maya, o na akorũo nĩ tũragerera moritũ. Kwa ngerekano, tũrĩ na ma atĩ Ithe witũ wa igũrũ nĩ atwendete mũno. Tũrĩ na ũmenyo wa ma wĩgiĩ Kiugo kĩa Ngai Bibilia. (Jer. 15:16) Ningĩ tũrĩ thĩinĩ wa famĩlĩ ya mwanya ya andũ mendete Jehova, mendete ithimi ciake ndũgĩru ciĩgiĩ mĩtugo, na mendaine.—Thab. 106:4, 5.
16 No tũtũũrie gĩkeno gitũ tondũ tũrĩ na kĩĩrĩgĩrĩro kĩrũmu atĩ ũtũũro nĩ ũgaakorũo ũrĩ mwega ihinda rĩrĩa rĩroka. Nĩ tũĩ atĩ ica ikuhĩ Jehova nĩ ekweheria waganu wothe, na atĩ nĩ ekũhũthĩra Ũthamaki wake gũtua thĩ yothe Paradiso. Ningĩ tũrĩ na kĩĩrĩgĩrĩro kĩa magegania atĩ andũ arĩa makuĩte nĩ makaariũkio, na matũũranie rĩngĩ na andũ ao. (Joh. 5:28, 29) Na githĩ ũndũ ũcio ndũkarehe gĩkeno kĩnene! Ũndũ wa bata makĩria, tũrĩ na ma atĩ ica ikuhĩ andũ othe arĩa marĩ kũrĩa igũrũ na arĩa marĩ gũkũ thĩ nĩ makahee Ithe witũ ũrĩ wendo gĩtĩo, rũgooco, na wĩrutĩri ũrĩa agĩrĩire kũheo.
RWĨMBO NA. 12 Jehova nĩ Ngai Mwega
^ kĩb. 5 Nĩ tũĩ atĩ Jehova Ithe witũ nĩ atwendete mũno, na nĩ atũteithĩtie tũkaingĩra thĩinĩ wa famĩlĩ ya athathaiya ake. Ũndũ ũcio nĩ ũtũmaga tũmwende. Tũngĩonia Ithe witũ atĩa atĩ nĩ tũmwendete? Gĩcunjĩ gĩkĩ nĩ gĩkwarĩrĩria maũndũ mamwe tũngĩka tuonanie atĩ nĩ twendete Jehova.
