1-2. Чьрʹа у чаԝа Йаһоԝа мәрʹа мәщал да, кӧ бьбьнә нәфәред малбәта ԝи?

ЙАҺОԜА әм тʹәглиф кьрьнә, кӧ бьбьнә нәфәред малбәта ԝи. Әԝ тʹәглифкьрьн рʹасти жи чьԛас мәхсус ә! Әԝ малбәт жь ԝан мәрьва йә, йед кӧ хԝә тʹәсмили Хԝәде кьрьнә у баԝәрийа хԝә ԛӧрбана Кӧрʹе ԝи тиньн. Әм малбәтәкә бәхтәԝар ьн. Әм нә тʹәне иро пе әʹмьре бәхтәԝар дьжин, ле һевийа мә һәйә, ԝәки әм ахьрийеда һʹәта-һʹәтайе бьжин, фьрԛи тʹӧнә сәр әʹрде Щьнәтеда йан сәр әʹзмана.

² Йаһоԝа жь һʹьзкьрьне тьштәки ӧса кьр, ԝәки әм бькарьбьн бьбьнә нәфәред малбәта ԝи. Ле сәва ве йәке әԝи һәԛе мәзьн да (Йуһʹн. 3:16). Әм «бь ԛимәт һатьнә кʹьрʹине» (1 Корн. 6:20). Йаһоԝа бь сайа кʹьрʹине мәрʹа мәщал да, ԝәки һәләԛәтийа мә тʹәви ԝи незик бә. Ԛәдьрәки мәйи мәзьн һәйә, ԝәки нава гәрдунеда Кәсе лапи мәзьнрʹа, бежьн Баво. У чаԝа мә готара пешийа веда дит, Йаһоԝа Бавәки лапи баш ә.

3. Чахе әм дәрһәԛа һʹәму ԛәнщийед Йаһоԝа дьфькьрьн, дьбәкә кʹижан пьрс бал мә пешда те? (Бьньһерʹә ӧса жи чаргошә « Гәло Йаһоԝа Дина Хԝә Дьдә Мьн?»)

³ Мина зәбурбежәки, дьбәкә әм жи пьрсе дьдьнә хԝә: «Әз чь бьдьмә Хӧдан, бона тʹәмамийа ԛәнщийа Ԝийә сәр мьн?» (Зәб. 116:12) Щаба ве пьрсе әԝ ә, кӧ бь рʹасти әме тʹӧ щар нькарьбьн бона һәр тьшти һәԛе Баве хԝәйи әʹзмана бьдьн. Ле йәкә һʹьзкьрьна ԝи һьндава мә, мә һелан дькә ԝәки ԝи һʹьз бькьн. Йуһʹәннайе шанди ньвиси: «Әм һʹьз дькьн, чьмки әԝи пешда әм һʹьзкьрьн» (1 Йуһʹн. 4:19). Ле ча әм дькарьн Баве хԝәйи әʹзманарʹа нишан кьн, ԝәки әм ԝи һʹьз дькьн?

4. Ль гора Аԛуб 4:8 чьрʹа әм гәрәке незики Йаһоԝа бьн?

⁴ Йаһоԝа дьхԝазә, ԝәки әм досте ԝи бьн у тʹәви ԝи  хәбәр дьн. (Бьхунә Аԛуб 4:8.) Әԝ мәрʹа дьбежә, ԝәки әм «һәр гав дӧа бькьн», у әԝ тʹьме гӧһ дьдә мә (Рʹом. 12:12). Әԝ тʹьме һазьр ә у тʹӧ щар наԝәстә гӧһ бьдә мә. Ле әм гӧһ дьдьнә ԝи, чахе Хәбәра ԝи дьхуньн, у ӧса жи әʹдәбйәтед дьн, кʹижан кӧ али мә дькьн Хәбәра ԝи фәʹм кьн. Әм ӧса жи ԝи дьбьһен, чахе бәрнамед щьвата рʹьнд гӧһ дьдьн. Чахе зарʹ тʹьме тʹәви де-баве хԝә хәбәр дьдьн, әԝана һе незики һәв дьбьн. Ӧса жи һәрге әм һәр гав тʹәви Йаһоԝа хәбәр дьн у гӧһ бьдьнә ԝи, әме незики ԝи бьминьн.

5. Әм ча дькарьн дӧайед хԝә һе баш кьн?

⁵ Бьфькьрьн кӧ һун ча Йаһоԝарʹа дӧа дькьн. Йаһоԝа дьхԝазә, ԝәки әм дӧайед хԝәда дьле хԝә жерʹа вәкьн (Зәб. 62:8). Ләма жи ԝе баш бә әм пьрсе ӧса бьдьнә хԝә: «Гәло дӧайед мьн һәр щар мина һәв ьн, йан әз Йаһоԝарʹа гьли дькьм чь дьле мьнда һәйә?» Бешьк, һун Йаһоԝа гәләк һʹьз дькьн, у дьхԝазьн кӧ һәләԛәтийа ԝә тʹәви ԝи незик бә. Ләма жи һун гәрәке тʹьме тʹәви ԝи хәбәр дьн. Итʹбарийа хԝә ԝи биньн у жерʹа гьли кьн дьле ԝәда чь йә. Жерʹа гьли кьн чь ԝә ша дькә, у чь дьле ԝә дешинә. Дӧдьли нәбьн, ԝәки һун тʹьме дькарьн жь ԝи аликʹарийе бьхԝазьн.

6. Әм гәрәке чь бькьн, сәва незики Баве хԝәйи әʹзмана бьн?

⁶ Сәва һәләԛәтийа мә тʹәви Баве мәйи әʹзмана незик бьминә, әм гәрәке һәр гав рʹазибуна хԝә жерʹа бьдьнә кʹьфше. Әм ԛайил ьн тʹәви әван гьлийед зәбурбеж: «Гәләк ьн кьрьнед Тә, йа Хӧдан, Хԝәдейе мьн, әԝ кʹәрәмәт у фькьред Тәйә ль сәр мә, тʹӧ һәйин тʹӧнә мина Тә. Мьне әԝ сальх кьрана у бькьра дәнги, ле беһʹәсаб ьн, найенә готьн» (Зәб. 40:5). Әм нә тʹәне дьле хԝәда тʹәхмин дькьн, кӧ әм жь ԝи рʹази нә, ле ӧса жи пе хәбәрдан у кьред хԝә әве йәке дьдьн кʹьфше. Ӧса әм нишан дькьн, ԝәки әм нә мина мәрьвед ве дьнйайе нә. Әм дьжин дьнйакә ӧсада, кʹидәре мәрьв нашекьриньн һʹәму ԛәнщийед кӧ Хԝәде бона ԝан дькә. Әм әʹщебмайи наминьн, чьмки әԝ жи нишана «рʹожед ахьрийе» йә, кӧ мәрьв иро бешекьр ьн (2 Тимтʹ. 3:1, 2). Ле әм тʹӧ щар нахԝазьн бьбьнә мина ԝан!

7. Йаһоԝа чь дьхԝазә кӧ әм бькьн, у чьрʹа?

⁷ Де-бав нахԝазьн, ԝәки зарʹед ԝан һәврʹа шәрʹ бькьн, ле дьхԝазьн кӧ һәврʹа һәвалтийе бькьн у һәв һʹьз бькьн. Йаһоԝа жи дьхԝазә, ԝәки һʹәму зарʹед ԝи һәврʹа тʹьфаԛ бьн у һәвалтийе бькьн. У һәма һʹьзкьрьна мә һьндава һәвда, нишана ве йәке йә кӧ әм Мәсиһийед рʹаст ьн (Йуһʹн. 13:35). Әм тʹәви зәбурбеж ԛайил ьн, йе кӧ ньвиси: «Чаԝа ԛәнщ ә, чаԝа хԝәш ә, кӧ бьра һәврʹа йәктийеда нә!» (Зәб. 133:1) Чахе әм хушк-бьред хԝә һʹьз дькьн, әм Йаһоԝарʹа избат дькьн, ԝәки әм ԝи һʹьз дькьн (1 Йуһʹн. 4:20). Чьԛас баш ә кӧ әм нава малбәтәкә ӧсада ньн, кʹидәре һьндава һәвдӧ «ширьн у дьлшәԝат» ьн! (Әфәс. 4:32)

8. Ль гора 1 Йуһʹәнна 5:3, мәʹнийа сәрәкә кʹижан ә, кӧ әм гӧрʹа Йаһоԝа дькьн?

⁸ Йаһоԝа дьхԝазә, ԝәки зарʹ гӧрʹа де-бавада бьн у әԝ ӧса жи дьхԝазә, ԝәки әм гӧрʹа ԝида бьн (Әфәс. 6:1). Әԝ һежа йә, ԝәки әм гӧрʹа ԝи бькьн, чьмки әԝ Әʹфьрандаре мә йә, демәк Жийиндаре мә, у әԝ жь һʹәму де-бава билантьр ә. Ле мәʹнийа сәрәкә, кӧ чьрʹа әм гӧрʹа Йаһоԝа дькьн әԝ ә, кӧ әм ԝи һʹьз дькьн. (Бьхунә 1 Йуһʹәнна 5:3.) Рʹаст ә гәләк мәʹнийед мә һәнә, кӧ гӧрʹа Йаһоԝа бькьн, ле әԝ тʹӧ щар зоре мә накә. Йаһоԝа мәрʹа азайа бьжартьне дайә, ләма жи әԝ ша дьбә чахе  әм жь һʹьзкьрьне хԝәха сафи дькьн гӧрʹа ԝи бькьн.

9-10. Чьрʹа фәрз ә әм дәрһәԛа принсип у ԛанунед Хԝәде бьзаньбьн у анәгори ԝан бьжин?

⁹ Де-бав дьхԝазьн, ԝәки зарʹед ԝан хԝәйкьри бьн, ләма жи әԝана бона кʹара зарʹед хԝә рʹабун-рʹуньштьнеда ԝанрʹа синора датиньн. Чахе зарʹ ԝан тьштада гӧрʹа де-баве хԝә дькьн, әԝана дьдьн кʹьфше, ԝәки итʹбарийа хԝә де-баве хԝә тиньн у ԛәдьре ԝан дьгьрьн. Бьдьнә һʹәсабе хԝә чьԛас фәрз ә, кӧ әм принсип у ԛанунед Баве хԝәйи әʹзмана бьзаньбьн у анәгори ԝан бьжин. Чахе әм ӧса дькьн, әм Йаһоԝарʹа нишан дькьн, кӧ ԝи һʹьз дькьн у ԛәдьре ԝи дьгьрьн, у һьн жи әм кʹаре дьстиньн (Иша. 48:17, 18). Ле әԝед кӧ пьшта хԝә дьдьнә Йаһоԝа у принсипед ԝи пьшт гӧһе хԝәва давежьн, ахьрийеда зийане дьдьнә хԝә (Галт. 6:7, 8).

¹⁰ Чахе әм ӧса дьжин ча дьле Йаһоԝа хԝәш те, ӧса әм хԝә жь ԝан тьшта хԝәй дькьн, чь кӧ дькарьн зийане мәрʹа биньн сьһʹәт-ԛәԝатеда, емосийалида у рʹӧһʹанида. Йаһоԝа занә бона мә лапә баш чь йә. Аԝрора, йа кӧ Амәрикайеда дьжи, дьбежә: «Әз заньм кӧ һәрге әм гӧрʹа Йаһоԝа бькьн, әʹмьре мә ԝе гәләк баш бә». Әԝ рʹасти жи ӧса нә. Ле һун чь кʹаре дьстиньн чахе гӧрʹа Йаһоԝа дькьн?

11. Чьда дӧа али мә дькә?

¹¹ Дӧа али мә дькә кӧ гӧрʹа Йаһоԝа бькьн һәла һе һьнге жи, чахе мәрʹа чәтьн ә. Щара әм зоре хԝә дькьн, кӧ гӧрʹа Йаһоԝа бькьн, чьмки әм гьшк гӧнәкʹар ьн. Ләма  жи әм гәрәке һәр гав сәр хԝә бьхәбьтьн, кӧ гӧрʹа ԝи бькьн. Зәбурбеж жь Хԝәде һиви дькьр: «Мьн сәрԝахт кә, һинкьрьна Тә әз хԝәй кьм у бь тʹәмамийа дьле хԝә ԝе бьԛәдиньм» (Зәб. 119:34). Денис, йе кӧ пешәнг ә, дьбежә: «Чахе мьнрʹа чәтьн ә тьштәкида гӧрʹа Йаһоԝа бькьм, әз жерʹа дӧа дькьм, ԝәки ԛәԝате бьдә мьн ве йәке бькьм чь кӧ рʹаст ә». Әм дькарьн дӧдьли нәбьн, ԝәки Йаһоԝа тʹьме щаба дӧайед ӧса дьдә (Луԛа 11:9-13).

12. Ль гора Әфәси 5:1, әм гәрәке чь бькьн?

¹² Бьхунә Әфәси 5:1. Чаԝа «зарʹед» Йаһоԝайә һʹьзкьри, әм чьԛас дькарьн чʹәʹв дьдьнә ԝи. Әм чʹәʹв дьдьнә хәйсәт-һʹӧнӧред ԝи. Мәсәлә әм һьндава мәрьвада бь һʹьзкьрьн у һʹәйф ьн, у дьбахшиньн ԝан. Чахе әԝед кӧ Хԝәде нас накьн рʹабун-рʹуньштьна мә дьвиньн, әԝана дьбәкә бьхԝазьн һе зедә дәрһәԛа ԝи пебьһʹәсьн (1 Пәт. 2:12). Ле де-бав кӧ Мәсиһи нә, гәрәке чʹәʹв бьдьнә Йаһоԝа, кӧ тʹәви зарʹед хԝә ӧса бьн, ча әԝ һьндава мәда йә. Һәрге әԝана ӧса бькьн, зарʹед ԝан жи дьбәкә ахьрийеда бьхԝазьн бьбьнә достед Баве мәйи бь һʹьзкьрьн.

13. Әм сәр чь гәрәке бьфькьрьн?

¹³ Зарʹ баве хԝәрʹа фьрнаԛ дьбә у ша дьбә чахе дәрһәԛа ԝи кәсәкирʹа гьли дькә. Әм жи Йаһоԝа, Баве хԝәйи әʹзманарʹа фьрнаԛ дьбьн, у дьхԝазьн ԝәки мәрьвед дьн жи ԝи нас кьн. Дьле хԝәда әм тʹәхмин  дькьн ве йәке, чь кӧ Даԝьд пʹадша тʹәхмин дькьр. Әԝи гот: «Нәфса мьн пе Хӧдан дьфьрʹә» (Зәб. 34:2). Ле һәрге әм шәрмокә нә, әм ча дькарьн бьбьнә мерхас? Әм дьһа мерхас дьбьн, чахе дьфькьрьн кӧ әм чьԛас дьле Йаһоԝа ша дькьн у чьԛас мәрьв ԝе кʹәрәма бьстиньн, чахе дәрһәԛа ԝи пебьһʹәсьн. У Йаһоԝа ԝе мерхасийе бьдә чахе мәрʹа лазьм бә. Әԝи али Мәсиһийед ԛьрʹна йәке кьр, кӧ мерхас бьн у әԝ ԝе али мә жи бькә (1 Тʹеслн. 2:2).

14. Кʹижан ьн һьнә мәʹни, кӧ чьрʹа әм гәрәке мьзгинийе бәла кьн?

¹⁴ Йаһоԝа тʹӧ щар фьрԛийе накә ортʹа мәрьва, у әԝ ша дьбә чахе дьвинә, кӧ әм һʹәмуйарʹа һʹьзкьрьне дьдьнә кʹьфше, фьрԛи тʹӧнә әԝана жь кʹидәре нә йан чь мьләти нә (Кʹар. Шанд. 10:34, 35). Щурʹе лапә баш ча мәрьварʹа һʹьзкьрьне  бьдьнә кʹьфше әԝ ә, кӧ мьзгини ԝанрʹа  гьли кьн (Мәт. 28:19, 20). Ле чь кʹар ә  һәрге әм ве йәке бькьн? Әԝед кӧ гӧһ дьдьнә мә ида ньһада дькарьн бәхтәԝар бьн у һевийе бьстиньн кӧ һʹәта-һʹәтайе сәр әʹрде бьжин (1 Тимтʹ. 4:16).

15-16. Чь мәʹнийед мә һәнә кӧ бәхтәԝар бьн?

¹⁵ Йаһоԝа бавәки һʹьзкьри йә, у ләма әԝ дьхԝазә малбәта ԝи бәхтәԝар бә (Иша. 65:14). Гәләк мәʹни һәнә, кӧ чьрʹа әм ида ньһа дькарьн әшԛ у ша бьн, һәла һе жи чахе рʹасти чәтьнайа тен. Мәсәлә, әм баԝәр ьн, ԝәки Баве мәйи әʹзмана мә гәләк һʹьз дькә. Әм рʹастийа жь Хәбәра Хԝәде заньн (Йерәм. 15:16). У әм малбәтәкә ӧса мәхсусда ньн, кʹидәре гьшк Йаһоԝа у ԛанунед ԝи һʹьз дькьн, у ӧса жи һәвдӧ һʹьз дькьн (Зәб. 106:4, 5).

¹⁶ Әм шабуна хԝә ӧнда накьн, чьмки һевийа мә һәйә, кӧ әʹмьре мә ахьрийеда ԝе дьһа хԝәш бә. Әм заньн ԝәки зутьрәке Йаһоԝа ԝе һʹәму щурʹә хьраби бьдә һьлдане у бьн рʹебәрийа Пʹадшатийа хԝә әʹрде бькә Щьнәт. Хенщи ве йәке, һевийа мә һәйә кӧ мьри ԝе рʹабьн у әме диса кʹеләка мәрьвед хԝәйи незик бьн (Йуһʹн. 5:28, 29). Әԝ рʹасти жи ԝе ԝәʹдәки чьԛас хԝәш бә! Ле йа лапә фәрз әԝ ә, кӧ зутьрәке һәр кәс ча сәр әʹзмана ӧса жи сәр әʹрде, ԝе һӧрмәт у пәсьна бьдьнә Баве мәйи һʹьзкьри у тʹәне ԝи бьһʹәбиньн, чьмки тʹәне әԝ һежайи ве йәке йә.