1-2. Samu na yinki mpe wa’ faso Yehova fungula beto nzila ya kukota na kati ya dikanda ya yandi?

YEHOVA muntu bokilá beto samu beto kuma mosi ya bantu ya dikanda ya yandi. Ya ke bweso ya nene! Bantu nyonso ya dikanda yango me pesá deja luzingu ya bawu na Nzambi mpe ke tulá kiminu na munkayulu ya mwana ya yandi (rançon). Dikanda ya beto, ke dikanda mosi ya kilengi. Beto ke na kilengi samu bubu yayi deja beto ke na natá luzingu ya mbote, mpe samu beto ke na kivuvu ya kuzinga ntangu nyonso, ya vanda na zulu to awa na ntoto.

² Samu yandi zola beto mingi, Yehova fungulá beto nzila samu beto kota na dikanda ya yandi. Kasi samu ya salama, Yehova salá sakrifise ya nene. (Yoa. 3:16) Yandi “sumbá beto na ntalu.” (1 Ko. 6:20) Na nzila ya munkayulu ya Yesu, Yehova pesá beto bweso ya kuvanda na kindiku ya ngolo na yandi. Beto ke na bweso ya kubokila muntu ya kulutila nene na yinza nyonso, Tata ya beto. Mpe, faso beto longokak’ yawu na artikle yina me luta, Yehova ke Tata ya kulutila mbote.

3. Wapi byuvu beto lenda yufula? ( tala mpe tablo “ Yehova ke tudilá kwandi mu meso?”)

³ Faso mosi ya ba yina soniká Bankunga, beto mpe lenda yufula: “Yinki mu ke pesa Yehova samu na mambu nyonso ya mbote yina yandi salá samu na munu?” (Nku. 116:12) Mvutu ni yayi: Beto lenda futa ata kima mosi na Tata ya beto ya mazulu. Kasi, luzolo ya yandi samu na beto ke natá beto na kuzolo yandi mpe. Apotre Yoane soniká: “Beto ke zolá, samu yandi zolá ntete beto.” (1 Yoa. 4:19) Wa’ faso beto lenda lakisa na Tata ya beto ya mazulu ti beto ke zolak’ yandi?

4. Faso Zaki 4:8 ke na zonzak’ yawu, samu na yinki beto zola sala bangolo samu na kuvanda pene-pene na Yehova?

⁴ Yehova zola ti nge vanda ndiku ya yandi mpe nge vanda na kifu ya kusololá na yandi. (Tanga Zaki 4:8.) Yandi ke lombá na beto na “kuvanda ya kukangama na lusambu,” samu yandi ke wá beto ntangu nyonso. (Rom. 12:12) Yandi ke ve faso bantu samu yandi vanda ve na ntangu ya kuwa beto, mpe yandi ke lembá ve na kuwa beto. Beto mpe ke wá Nzambi, ntangu beto ke tangá Biblia to mikanda yina ke sadisá beto na kuzaba Biblia mbote-mbote. Dyaka, beto ke wak’ yandi ntangu beto ke teká dikutu na balukutakanu. Ni kifu ya kusololá na bibuti ya bawu, ke sadisá bana na kuvanda pene-pene na bibuti. Faso mosi mpe, kifu ya kusololá na Yehova ke sadisa beto na kuvanda pene-pene na yandi.

5. Wa’ faso beto lenda bongisa faso ya beto ya kusambila?

⁵ Kanisa na faso ya nge ya kusolola na Yehova. Yehova zola beto fungula yandi bantima ya beto nyonso ntangu beto ke sambilaka. (Nku. 62:8) Beto zola yufula kyuvu yayi: ‘Balusambu ya munu ke vandá ya zulu-zulu, ya ke vandá neti mu ke na tangá mukanda yina muntu ya nkaka me soniká, to ya ke vandá neti mukanda yina mu me baka ntangu ya kusonika, samu na kuzonza na Yehova yina ke na munu na ntima?’ Ntembe ve, nge ke zolá mingi Yehova, mpe nge ke salá nyonso samu kindiku ya beno vanda kaka ngolo. Na yina, nge me bonga kusolola na yandi ntangu nyonso. Zonza na yandi bamambu ya nge ya ntima. Kabula bantangu ya nge ya kilengi na ya mpasi na yandi. Zaba ti nge lenda lomba na yandi, yandi sadisa nge.

6. Yinki beto me lunga kusala samu na kuvanda pene-pene na Tata ya beto ya mazulu?

⁶ Samu na kuvanda pene-pene na Tata ya beto ya mazulu, beto zola vanda na ntima yina ke tondaka. Beto me ndima mambu yina mosi ya ba yina sonika bankunga zonzá: “Nge me sala mambu mingi, O Yehova Nzambi ya munu, bima yina nge salá ke ya ngitukulu mpe makanisi ya nge samu na beto. Muntu ve ke faso nge; si mu meka kubasisa mpe kuzonzila yawu, ya ke lutila yina mu lenda zonza!” (Nku. 40:5) Beto ke suká ve kaka na kuvutula matondo; kasi beto ke lakisá na nzonzolo mpe na ndyatulu ya beto ti, beto ke tondá Yehova. Ya ke lakisá ti beto ke ve faso bantu mingi bubu yayi. Na yinza, bantu mingi ke vutulá ve matondo na yina Nzambi ke salá samu na bawu.Ya ke mosi ya bamambu ke na lakisá ti beto ke na zingá na “bilumbu ya mansukina.” (2 Tim. 3:1, 2) Beto zola vanda ve faso bawu!

7. Yinki Yehova zola beto sala, mpe samu na yinki?

⁷ Bibuti ke zolá ve ti bana ya bawu swana, kasi ba vanda bandiku. Faso mosi mpe, Yehova ke zolá ti bana ya yandi nyonso wisana bawu na bawu. Na yina, luzolo yina beto ke na yawu samu na bampangi ke lakisá ti beto ke bakristo ya tsyeleka. (Yoane 13:35) Beto mpe lenda zonza faso mosi ya ba yina sonika bankunga zonzá: “Ya tsyeleka, ya ke mbote mpe kilengi mingi samu na bampangi na kuzinga kintwadi na bumosi!” (Nku. 133:1) Beto ke lakisá ti beto zola Yehova ntangu beto ke zolá bampangi ya beto ya kento na ya bakala. (1 Yoa. 4:20) Ya ke kilengi mingi na kuvanda na dikanda ya bampangi yina ke lakisá “ntima ya mbote bawu na bawu, [mpe] ntima yina ke talá bantu ya nkaka mawa”!—Ef. 4:32.

8. Wapi yina ke rezon ya ntete na 1 Yoane 5:3, yina ke natá beto na kuwa Yehova?

⁸ Yehova ke lombá na bana na kuwa bibuti ya bawu, yandi ke lombá mpe na beto na kuwa yandi. (Ef. 6:1) Samu ni yandi Muntu yidiká beto mpe ke kipeke luzingu ya beto, mpe ni yandi me lutila batata nyonso na mayela, beto me lunga na kuwa yandi. Kasi, rezon ya ntete yina ke natá  beto na kuwa Yehova, ke samu beto ke zolak’ yandi. (Tanga 1 Yoane 5:3.) Ata beto ke na barezon mingi yina ke natá beto na kuwa Yehova, kasi yandi ke puseke ve beto na ngolo na kusala yawu. Yehova pesá beto liberte ya kusola. Na yina, yandi ke vandá na kilengi ntangu beto ke solá na kuwa yandi samu beto zola yandi.

9-10. Samu na yinki ya ke mfunu na kuzaba mpe na kusadila misiku ya Yehova?

⁹ Bibuti ke zola kubumba bana ya bawu. Samu na yawu, ba ke tulá misiku yina ke sadisá bawu na kubwa ve na mambu ya yimbi. Ntangu bana ke sadilá misiku yina, ba ke lakisá buzitu na bibuti ya bawu, mpe ba ke lakisá ti ba ke tulá bawu ntima. Na yina, ya me lutila mfunu na kuzaba, mpe na kuzitisa misiku ya Tata ya beto ya mazulu. Ntangu beto ke salak’ yawu, beto ke lakisá na Yehova ti, beto ke zolak’ yandi, ke pesak’ yandi buzitu, mpe ya ke natiná beto bambote. (Iza. 48:17, 18) Kasi ba yina ke mangá kusadila misiku ya Yehova, ke manisa yimbi.—Gal. 6:7, 8.

¹⁰ Ntangu beto ke natá luzingu na faso yina ke sepelisá Yehova, yandi ke bumba beto na nyonso ya yimbi yina lenda bebisa luzingu, makanisi, mpe kimpeve ya beto. Yehova zaba yina ke mbote samu na beto. Aurora, mpangi ya kento yina ke vandá na Etats-Unis me zonza: “Mu zaba ti kulanda misiku ya Yehova ke natá kaka bambote na luzingu.” Nge me zwá deja bambote samu nge ke landá misiku ya Nzambi?

11. Wa’ faso lusambu ke sadisá beto?

¹¹ Lusambu ke sadisá beto na kulanda misiku ya Yehova, ata ntangu ya ke vandá mpasi. Ntangu ya nkaka, ya ke vandá mpasi na kulanda misiku  ya Yehova samu beto ke bantu ya masumu, kasi beto zola sala bangolo samu na kulenda. Mosi ya ba yina soniká bankunga dilá na sika ya Nzambi: “Vumbula na kati ya munu [nsatu] ya kulanda misiku ya nge.” (Nku. 51:12) Denise, mpangi ya kento yina ke pionier ya ntangu nyonso, zonzá: “Ntangu ya ke vandá mpasi na munu na kulanda mosi ya misiku ya Yehova, mu ke sambilá samu na kuzwa ngolo ya kusala mambu ya mbote.” Beto lenda ndima ti, Yehova ke pesá kaka mvutu na balusambu ya faso yayi.—Luke 11:9-13.

12. Faso ke na zonzilá Baefeze 5:1, yinki beto zola sala?

¹² Tanga Baefeze 5:1. Samu beto ke “bana yina Yehova ke zolá”, beto ke salá bangolo samu na kulanda kifwani ya yandi. Beto ke landá kifwani ya yandi ntangu beto ke zolá bampangi, ke lakisá ntima ya mbote, mpe ntangu beto ke lemvokilá bawu. Ntangu ba yina zaba ve Yehova ke talá ndyatulu ya beto ya mbote, ya lenda nata bawu na kusosa kuzab’ yandi. (1 Pi. 2:12) Bibuti ya bakristo zola landa kifwani ya Yehova na yina me tadila faso ya kukulisa bana ya bawu. Ntangu bibuti ke salá faso yina, bana ya bawu mpe lenda sosa kukuma bandiku ya Yehova.

13. Yinki beto zola sala samu na kukuma na bukindi?

¹³ Mwana nyonso ke bulá ntulu samu na tata ya yandi, mpe yandi ke na kilengi ya kuzonzila yandi na bantu ya nkaka. Faso mosi mpe, beto ke bulá ntulu samu na Tata ya beto ya mazulu, Yehova, mpe beto ke sosá ti bantu ya nkaka  zaba yandi. Na bantima ya beto, beto ke kanisá faso Mfumu David, yina soniká: “Mu ke bula ntulu na Yehova.” (Nku. 34:2) Kasi, si beto ke na nsoni to boma, wa’ faso beto lenda vanda na bukindi? Beto ke kumá na bukindi ntangu beto ke kanisá na kilengi yina ke vandá na Yehova ntangu beto ke zonzilá nkumbu ya yandi. Mpe na bambote yina bantu yina ke longoká na kuzaba yandi ke kuzwa. Yehova ke pesá beto bukindi yina beto ke na yawu nsatu. Yandi sadisá bakristo ya siekle ya ntete na kukuma na bukindi. Yandi ke sadisa beto mpe.—1 Tes. 2:2.

14. Wapi yina ke barezon ya mfunu ke natá beto na kukumisa bantu bilandi?

¹⁴ Yehova ke talá ve bandinga to bampusu ya bantu, mpe yandi ke na kilengi ntangu yandi ke talá ti beto ke na lakisá luzolo na bampangi, ata beto ke ve bwala to ndinga mosi. (Bis. 10:34, 35) Mosi ya bafaso ya mbote yina beto lenda lakisa luzolo ya beto na bampangi, ni na kulongá bawu mambu ya Nzambi. (Mat. 28:19, 20) Yinki kisalu ya predikasion ke lungisaka? Ba yina ke wá beto lenda bongisa luzingu ya bawu bubu yayi, mpe kuzwa luzingu ya ntangu nyonso na Paradis.—1 Tim. 4:16.

15-16. Wapi barezon beto ke na yawu ya kuvanda na kilengi?

¹⁵ Yehova ke Tata ya luzolo, na yina, yandi zola ti dikanda ya yandi vanda na kilengi. (Iza. 65:14) Ya ke na barezon mingi yina ke salá ti beto vanda na kilengi bubu yayi, ata beto ke na lutisá bantangu ya mpasi. Na kifwani, beto ke ndimá na ntima mosi ti, Tata ya beto ya mazulu ke zolá beto mingi, mpe beto ke na kilengi samu beto me zaba Biblia mbote-mbote. (Yer. 15:16) Dyaka, beto ke na kati ya dikanda kaka mosi na ntoto yina ke zolá Yehova, ke zolá misiku ya yandi mpe ke zolasanaka.—Nku. 106:4, 5.

¹⁶ Beto lenda vanda ntangu nyonso na kilengi samu beto zaba ti, luzingu ke bonga na bilumbu ke kwiza. Beto me zaba ti ntangu fioti me bikana, Yehova ke katula mambu nyonso ya yimbi, mpe ke sadila kimfumu ya yandi samu na kukumisa ntoto nyonso paradis. Beto ke mpe na kivuvu ti, ba yina nyonso kufwá ke vutuka na luzingu, mpe ke vukana dyaka na beto. (Yoa. 5:28, 29) Ya ke vanda kilengi mingi! Yina me lutila mfunu, beto me zaba ti, ya vanda na zulu to awa na ntoto, beto nyonso ke pesa Tata ya beto ya luzolo lukumu, nkembo mpe ke sadila yandi na faso yina me lunga.