1-2. Morwasinke Jehova ga tu zigidira tu ya hamene kepata lyendi ntani ngapi omu ga yi rugana?

JEHOVA kwatu zigida tu ya hamene kepata lyovakareli vendi. Aso kuna kara sininke sosiwa sili. Mepata eli kwa hamena mo vantu ava va ligava kwaKarunga ntani ava ava likida epuro monzambo zaMunwendi zosizoweseso. Ose kwa kara mepata lyoruhafo. Ose kuhafera eparu ngesi ntani twa kara nehuguvaro lyokukagwana mwenyo gwanarunye, yi kare asi meguru ndi moparadisa pevhu.

² Eharo kwa tumangedere Jehova a lizambere yipo a tu zigide tu ya hame kepata lyendi. (Joh. 3:16) Bibeli kutanta asi: ‘Ose kwa tu randa ndiro.’ (1 Kol. 6:20) Jehova kwa tulire po ewapaiko kupitira monzambo zosizoweseso yipo tu kare nelikwatakano lyewa nage. Jehova kuna kara Muntu gomulyo po mouzuni ou, nye ose ngesi kuvhura kumutumbura asi Guhyetu. Ntani ngomu ka tu yi zogerere mosirongwa sa ka pita, Jehova kuna kara Guhya gomuwa po.

3. Nsene tu gazadara ko kweyi ga tu ruganena Jehova, epuro musinke natu vhura kulipura? (Tara hena kakende “ Jehova ga diva nge ndi?”)

³ Ngwendi mutjangi gumwe goBibeli, nose kuvhura tu lipure asi: “Yinke eyi nani futa HOMPA mouwa wendi ou ga ruganena nge?” (Epis. 116:12) Elimbururo kuna kara asi kapi ngatu vhura kufuta Guhyetu gemeguru. Nye mokumona asi ga tu hara, ayo kututumangeda nose tu mu hare. Mupositoli Johanesa kwa tjenge asi: “Ose kwa hara vakwetetu, yeeyi Karunga yige ga hova kutuhara.” (1 Joh. 4:19) Ngapi natu likida Guhyetu gemeguru asi ose twa mu hara?

4. Kuliza naJakopo 4:8, morwasinke natu uyungira naJehova nkenye apa?

⁴ Jehova ana hara tu mu hedere pepi ntani tu uyunge nage. (Resa Jakopo 4:8.) Age kutukorangeda tu “kanderere narunye” ntani age kutupurakena nkenye apa. (Rom. 12:12) Age nkenye apa kulitulira po siruwo yipo a tu purakene ntani kapi a roroka. Ose kupurakena kwendi pokuresa Nonkango dendi Bibeli, kumwe noyimbapiratjangwa eyi ayi tu vatere tu zi kwate egano. Ose kupurakena hena kwendi apa atu purakene nawa komapongo. Apa vanona ava zogere novakurona vawo nkenye apa, ayo kuvavatera va kare vakaume. Mokulifana, nsene tu uyunga naJehova nkenye apa, ayo ngayi tu vatera tu kare pepi nage.

5. Ngapi omu natu vhura kukanderera yipo Jehova a tambure makanderero getu?

⁵ Gazadara ko kuhamena monkedi omu o kanderere kwaKarunga. Jehova ana hara tu mu tantere eyi tuna kugazara nomu tuna kulizuvha. (Epis. 62:8) Yipo nye, ya wapa kulipura asi: ‘Ame kuruguruka yininke yokulifana momakanderero gange ndi ame kukanderera kutundilira komutjima?’ Yosili ove wa hara unene Jehova ntani ono hara kunkondopeka ukaume woge kumwe nage. Nsene ono hara yi ku tompoke, wa hepa kuuyunga nage nkenye apa. Tantera Jehova yininke eyi o dili kutantera nkenye muntu. Mu tantera kuhamena yininke eyi ayi ku hafesa neyi ayi ku guvisa. Kara nehuguvaro asi age kuvhura a ku vatere.

6. Yisinke twa hepa kurugana mokukara pepi naGuhyetu gemeguru?

⁶ Mokukara pepi naGuhyetu gemeguru, twa hepa kukara norupandu. Nose kulizuvha ngwendi mutjangi gepisarome ogu ga tente asi: “Yinzi eyi wa tu ruganena, HOMPA Karunga gwetu; kutupu ogu ga ku heteka! Ove kwa tu gazarera yitetu yoyinzi. Nsene ni heteka asi ni yi uyunge nayinye, ngano nokuvhura si kuyinongauka.” (Epis. 40:5) Mevango tupu lyokulizuvha asi twa kara norupandu kwaJehova, twa hepa kurugana ko yuma eyi nayi likida asi twa kara norupandu kweyi ga tu ruganena. Eyi ngayi tu ninkisa tu lisige novantu wovanzi. Vantu wovanzi naina kapi va kara norupandu kweyi Karunga ava ruganene. Sininke simwe esi sina kulikida asi ose kuna kuparuka “pomazuva gopouhura” kuna kara asi vantu kapi vana paka mpandu. (2 Tim. 3:1, 2) Kapi tuna hara kuhonena nkareso ozo.

7. Yisinke ana tu harere Jehova tu rugane ntani morwasinke?

⁷ Vakurona kapi va harera vana vawo va litangwise, nye awo kwa va harera va kare vakaume. Mokulifana, Jehova ana hara vana vendi va kare mouumwe. Apa atu likida eharo kovakwetu, ayo kutudimbwilisa asi ose Vakriste wousili. (Joh. 13:35) Nose kulizuvha ngwendi mutjangi gepisarome ogu ga tente asi: “Ee, yireru omu ya wapa ayo ya tovara yokukara vantu vaKarunga kumwe ngwendi vantu namumbyendi!” (Epis. 133:1) Nsene tu likida eharo kovanavazinyetu, ose ngatu yi likida asi twa hara Jehova. (1 Joh. 4:20) Yosili, ayo kutuhafesa kweyi twa hama kepata lyovanavazinyetu ava va kara ‘nombili nonkenda.’—Efe. 4:32

8. Kuliza na-1 Johanesa 5:3, konda musinke zomulyo unene zeyi natu limburukwira Jehova?

⁸ Jehova kwa harera vanona va limburukwe kovakurona vawo, mokulifana age kuna tu harere tu mu limburukwe. (Efe. 6:1) Twa hepa kumulimburukwa morwa yige Musiti gwetu, age kutupakera mbili ntani age ga kara nonondunge kupitakana vakondi navenye. Nye konda zomulyo  po unene zeyi natu limburukwira Jehova kuna kara asi morwa twa mu hara. (Resa 1 Johanesa 5:3.) Jehova kapi a tu sininike tu mu limburukwe nampili ngomu twa kara nonokonda dononzi deyi natu yi ruganena ngoso. Age kwa tu pa umanguruki, yipo nye ayo kumuhafesa apa atu tokora kumulimburukwa morwa twa mu hara.

9-10. Morwasinke ya karera nomulyo tu dive nompango daJehova nokudilimburukwa?

⁹ Vakurona kwa hara kupopera vana vawo. Eyi yiyo nye ava tulire po noveta edi adi vhuru kuretera vana vawo mauwa. Apa vanona ava limburukwa noveta odo, awo kulikida asi va huguvara vakurona vawo ntani vava fumadeka. Eyi yiyo nye ya karera nomulyo unene tu dive noveta edi ga tura po Guhyetu gemeguru nokudilimburukwa. Nsene tu yi rugana, ose ngatu likida Jehova asi twa mu hara ntani twa mu fumadeka. Ose ngatu gwanena mo hena mauwa. (Jes. 48:17, 18) Mokulisiga, vantu ava ava dili kulimburukwa Jehova nonompango dendi, awo kuyaligwanekera nomaudigu konyima.—Gar. 6:7, 8.

¹⁰ Nsene tu paruka monkedi ezi azi hafesa Jehova, ayo kutupopera koyininke eyi nayi vhura kutukoresa ndi koyininke eyi nayi vhura kutura elikwatakano lyetu naJehova mosiponga. Jehova ga diva yoyiwa po kwetu. Aurora ogu ga tunga moAmerika kwa tanta asi: “Ame na yi diva asi apa atu limburukwa Jehova, ayo kuninkisa eparu lyetu li wape unene.” Eyi yiyo atu limonene  natuvenye. Nove wa gwanena mo uwa pokulimburukwa nompango daJehova deharo ndi?

11. Uwa musinke atu gwanene mo apa atu kanderere?

¹¹ Kukanderera kutuvatera tu limburukwe nampili apa ayi tu karere udigu. Poyiruwo yimwe ayo kutudigopera kulimburukwa Jehova morwa tu vananzo, nye twa hepa kukondja yipo tu mu limburukwe. Mutjangi gepisarome kwa likwamberere kwaKarunga asi: “Ninka mpepo zange zi limburukwe.” (Epis. 51:12) Denise ogu a rugana uzuvhisi wokukarerera kwa tanta asi: “Apa ayi karere nge udigu kulimburukwa Jehova, ame kukanderera kwendi yipo a pe nge ko nonkondo dokurugana yoyiwa.” Yosili, ose twa kara nehuguvaro asi Jehova kulimburura makanderero gangoso nkenye apa.—Ruk. 11:9-13.

12. Kuliza noVaefeso 5:1, 2, yisinke twa hepa kurugana?

¹² Resa Vaefeso 5:1, 2. Mokumona asi ose “vana vaKarunga” twa hepa kumuhonena. Ose kumuhonena apa atu likida eharo nokukara nombili ntani nokugusira po vakwetu. Ano apa vantu ava va dira kudiva Karunga ava mono yikara yetu yoyiwa, ayo kuvhura yi va tumangede va hare kulironga yoyinzi kumuhamena. (1 Pet. 2:12) Vakurona va hepa kuhetekera ko kutekura vana vawo ngwendi moomu Jehova a tu tekura. Nsene vakurona va honena Jehova, ayo  ngayi tumangeda vana vawo va tulise po ukaume naGuhyetu geharo.

13. Yisinke twa hepa kurugana nsene tuna hara kukara nouradi?

¹³ Sinzi sovanona kwa hara vaguhya vawo ntani awo kutantera ko vakwawo kuhamena vaguhya vawo. Mokulifana, nose twa hara Guhyetu gemeguru Jehova, ntani tuna hara kutantera ko wopeke kuhamena Guhyetu. Ose kulizuvha ngwendi hompa Ndafita ogu ga tente asi: “Ame ngani uyunga yininke yoyiwa kuhamena Jehova.” (Epis. 34:2, NW.) Nye ngapi nsene ose nomuga? Yisinke nayi tu vatera tu kare nouradi? Nsene tu demenena kweyi ayi hafesa Jehova ntani mauwa aga ngava gwanena mo wopeke pokudiva Jehova, ayo ngayi tu vatera tu kare nouradi. Jehova nga tu pa uradi ou twa hepa. Age nga tu vatera ngwendi moomu tupu ga vaterere vapuli vakwetu mosiruwo sovapositoli va kare nouradi.—1 Tes. 2:2.

14. Morwasinke natu lihamekera mosirugana sokutulisa po varongwa?

¹⁴ Jehova kapi ga kara nompongo ntani age kuyihafera apa atu mono kuna kulikida eharo kovakwetu yi kare asi kupi va tundilira. (Yirug. 10:34, 35) Nkedi zongwa omu natu likida eharo kovakwetu, kuna kara pokuvazuvhisira mbudi zongwa. (Mat. 28:19, 20) Uwa musinke ngava gwanena mo? Nsene va tu purakena, ayo ngayi vhura kuwapeka eparu lyawo ngesi ntani ngava kara nehuguvaro lyokukaparuka narunye komeho.—1 Tim. 4:16.

15-16. Yininke musinke ayi tu ninkisa tu twikire kukara noruhafo?

¹⁵ Guhyetu Jehova age Karunga gorufo, yipo nye age kuna harere epata lyendi li kare noruhafo. (Jes. 65:14) Nampili ngomu tuna kuligwanekera nomaudigu, twa kara nonokonda dononzi deyi natu karera noruhafo. Pasihonena, ose twa yi pura nawa-nawa asi Guhyetu gemeguru ga tu hara unene. Ntani ose twa diva hena usili womoNonkango dendi, Bibeli. (Jer. 15:16) Ose kwa hamena hena kepata lyovantu ava va hara Jehova nokuhara nompango dendi ntani ava va lihara-hara.—Epis. 106:4, 5.

¹⁶ Ose kuvhura tu twikire kukara noruhafo morwa twa kara nehuguvaro asi eparu ngali ka wapa unene komeho. Ose twa yi diva asi ntaantani tupu Jehova nga ka guse po yininke yoyidona nayinye ntani Uhompa wendi ngau ka retesa po paradisa pevhu. Ose twa kara hena nehuguvaro asi vantu ava va fa ngava ka va vhumbura noku ka twikira kuparuka kumwe nose. (Joh. 5:28, 29) Aso ngasi ka kara siruwo soruhafo! Unene po, ose twa yi diva asi ntaantani tupu vantu navenye ava vana kara pevhu nemeguru ngava ka fumadeke nokuhamberera Guhyetu geharo nokukamukarera.