CILONGESA 7
Twazema Manene Tate Yetu Yehova
“Tuzema omwo Njambi watuzemene ha kulibanga.”—1 YOWA 4:19.
MWASO 3 Maata Aluna ni Sepo Yaluna
BILI MUNO MU CILONGESA *
1-2. Bika binalingisa Yehova atunene mu naanga yendi, co natunenemo bati?
YEHOVA natulanya ngwendi tukale mu naanga yendi ije ili na kumulemesa. Eci cilanyo cinapu cacibwa manene. Naanga yetu inapu ya banu baje banalikundika kuli Njambi, co bali na kumwesa likulahelo mu ñombelo ya Munendi. Naanga yetu yapwa ya kubwahelela. Twabwahelela, mwafwa tuli na lilabelelo lya kukayoya myaka yoshe, ipwe kukayoya mwilu nambe kukayoya mu Paladaisi hano hasi.
2 Yehova watuzemene manene mukemwo natunene mu naanga yendi. Oloni wapandele kwana cuma cakama manene simbu kanda atunene mu naanga yendi. (Yowa 3:16) ‘Batulandele na ndando’ yakama. (1 Koli 6:20) Yehova watwanene ndando ya kupatula mangana tulikute nendi busamba bwa kukanyama. Tunabezika kusana Munu wakama manene wa mwilu na hasi ngwetu Tate. Ngwe mutunasimutwiiye mu cilongesa cinahu, Yehova wapwa Tate wamubwa manene.
3. Bihula muka bitunasa kwihula? (Taleni lalo cipalo ca “ Kuma Yehova Anjizibuka Mwamubwa Ndi?”)
3 Netu twasa kulihula ngwe mwalihwile muka-kwimba uje wehwile ngwendi: “Cuma mukajo cinjikana kuli Shukulu Kalunga, omwo ha bibezikiso byendi byoshe kuli yange?” (Myaso 116:12) Kutwasa kufweta Tate yetu wa mwilu, oloni twasa kumuzema. Kapositolo Yowano wasonekele ngwendi: “Tuzema omwo Njambi watuzemene ha kulibanga.” (1 Yowa 4:19) Twasa kumwesa bati ngwetu twazema Tate yetu wa mwilu?
SHWENYENI KUYEHI NA YEHOVA
Tumwesa ngwetu twazema manene Tate yetu wa mwilu, Yehova nga tushwenya kuyehi nendi mu lilombelo na kumwononoka na kukwasa bakwetu bamuzeme (Taleni palagilafu 4-14)
4. Kwesekesa na Yakomba 4:8, mwafwa bika tunapande kulinga mwoshe mutwasela kushwenya kuyehi na Yehova?
4 Yehova ashaka ngwendi tushwenye kuyehi nendi na kusimutwiya nendi. (Tandeni Yakomba 4:8.) Natushongangeya ngwendi: ‘Tulombe simbu yoshe,’ mwafwa ali na kutolilila ku malombelo etu. (Loma 12:12) Yehova kesi kujuka kutolilila ku malombelo etu. Netu twasa kutolilila kuli ikeye nga tutanda Mbimbiliya na mabulu aje ali na kutukwasa tuizibisise mwamubwa. Co lalo tumutolilila nga twaka mbunge ku byuma bitulilongesa ku biwano byetu. Banike bakakulahela manene bisemi babo nga basimutwiya nabo simbu yoshe. Netu twasa kushwenya kuyehi na Yehova nga tusimutwiya nendi simbu yoshe.
Taleni palagilafu 5
5. Tunapande kulomba bati mangana Yehova atambule malombelo etu?
5 Mukalombo bati kuli Njambi? Yehova ashaka ngwendi tumuleke byoshe bili ku mbunge yetu mu lilombelo. (Myaso 62:8) Tunapande kulihula ngwetu: ‘Kuma njikalombela lika kwa kujeneka kusinganyekesesa, nambe kutembwinina lika bakwetu, indi njikalombo kutundilila kwisi ya mbunge yange?’ Tuzibuka ngwetu mwazema Yehova, co mushaka ngweni busamba bweni nendi bukanyame. Nga mushaka ngweni busamba bweni bukanyame, co simutwiyeni nendi kushwa kumo. Mulekeni na bije kumwasa kuleka bakweni. Mulekeni bije binamizibisa kubwaha na bije binamilubalesa. Mulombeni amikwase nga muli mu bukalu.
6. Bika bitunapande kulinga mangana tushwenye kuyehi na Tate yetu wa mwilu?
6 Nga tushaka ngwetu tushwenye kuyehi na Tate yetu wa mwilu, co tunapande kukala na mbunge ya kukandelela. Twasa kwendeka ngwe muka-kwimba uje wasonekele ngwendi: “Unatulingila byuma byabingi yobe Shukulu Kalunga Njambi yetu, kukwesi weka lalo wakufwa ngwe yobe. Yobe unatulingila matumbe amangi a kukomokesa, aje kunjasa kuwatumbula oshe, anapu amangi manene.” (Myaso 40:5) Kutwapandele kuliziba lika ngwetu tuli na kukandelela kuli Yehova, oloni tunapande kumwesa ngoco mu byuma bitwendeka nebi bitulinga. Oku kutulingisa tuliseze na baka-kaye. Tuli na kuyoya mu kaye muje mwalisala banu baje kubesi na kukandelela ku byuma byali na kubalingila Njambi. Co obu bukaleho bumwesa ngwabo tuli na kuyoya mu “matangwa a kukotoka” muje muli banu ba kujeneka kukandelela. (2 Tima 3:1, 2) Keti tubatembwinine.
7. Yehova ashaka ngwendi tulinge bika, co mwafwa bika?
7 Bisemi kubashakele ngwabo bana babo bapwe baka-lwozi, oloni bashaka ngwabo balizibasane na bakwabo. Mu ngila imo lika, Yehova ashaka ngwendi bana bendi boshe balizibasane na bakwabo. Cizemo cili mukati ketu cimwesa ngwaco tu baka-Kilistu ba busunga. (Yowa 13:35) Tulitombola na muka-kwimba uje wasonekele ngwendi: “Kengeni mubwapwa bubwa na kubwahelela omwo banu ba Njambi bakala hamo na mbunge imo.” (Myaso 133:1) Nga tuzema bandolome na bandokazi betu, co tumwesa ngwetu twazema Yehova. (1 Yowa 4:20) Kwapwa kwakubwa manene kukala mu naanga ya bandolome na bandokazi baje bakala na ngozi, co bakazibila bakwabo mema ku mbunge.—Efeso 4:32.
MWESENI NGWENI MWAZEMA YEHOVA HA KUMWONONOKA
Taleni palagilafu 8
8. Kwesekesa na 1 Yowano 5:3, cuma muka cakama citulingisa twononoke Yehova?
8 Yehova atonda ngwendi bana bononoke bisemi babo, co atonda lalo ngwendi netu tumwononoke. (Efeso 6:1) Tunapande kumwononoka, mwafwa ikeye watutangele, ali na kutwana byuma bitukwasa tutwaleleleho kuyoya, co lalo wapwa cisemi wa mana manene kutubakana bisemi boshe. Oloni cuma cakama citulingisa twononoke Yehova cinapu, cizemo cetu kuli ikeye. (Tandeni 1 Yowano 5:3.) Yehova natwana bukaleho bwabungi butulingisa tumwononoke, oloni kesi kutusindiya tulinge ngoco. Natwana lalo nzili ya kulyangwila byakulinga, co akabwahelela mwakamono ngwendi tumwononoka mwafwa ya cizemo cetu kuli ikeye.
9-10. Bika bikwapwila kwakubwa kuzibuka mashiko a Njambi na kuwakabangeya?
9 Bisemi kubashakele ngwabo bana babo bakobele mu bukalu, mukemwo bakaka mashiko aje anyungilila bana babo. Nga bana bononoka aje mashiko, co bamwesa ngwabo banakulahela bisemi babo na kubasingimika. Ngeci, kunapu kwa seho manene kuzibuka mashiko a Tate yetu wa mwilu na kuwononoka. Nga tulinga ngoco, co tumwesa ngwetu twazema Yehova na kumusingimika, co lalo tubezika. (Isaya 48:17, 18) Oloni baje bali na kubyana Yehova na mashiko endi bali na kulikobelesa mu bukalu.—Ngala 6:7, 8.
10 Nga tuyoya mu ngila ije izibisa Yehova kubwaha, co tulinyungilila ku mubila, mu bisinganyeka na ku sipilitu. Yehova azibuka byuma byabibwa binatupande. Aurora wa ku America ngwendi: “Njizibuka ngwange mukatundu bubwa mu kwononoka Yehova.” Tubaboshe twalimwena busunga bwa awa majwi. Bubwa muka bumunalimwena mwafwa ya kwononoka mashiko a Yehova?
11. Lilombelo litukwasa bati?
11 Lilombelo litukwasa tupwe baka-kwononoka nameme ha simbu ikutukaluwila kulinga ngoco. Bisimbu bimo, kwasa kutukaluwila kwononoka Yehova, mwafwa kutwalumbunukile. Oloni simbu yoshe twesekeni mwoshe mutwasela mangana tumwononoke. Muka-kwimba walombele Njambi ngwendi: ‘Njipwise muka-kwononoka.’ (Myaso 51:12) Denise uje wapwa painiya wa simbu yoshe ngwendi: “Nga kunjikaluwila kwononoka lishiko limo lya Yehova, njikalombo nzili yendi mangana injikwase kulinga byuma byabibwa.” Twakulahela ngwetu Yehova akumbulula malombelo a cifwa eci.—Luka 11:9-13.
KWASENI BAKWENI BAZEME TATE YETU
12. Kwesekesa na Efeso 5:1, bika bitunapande kulinga?
12 Tandeni Efeso 5:1. Ha kupwa “bana ba Njambi bamuya ku mbunge,” tunapande kumutembwinina. Tutembwinina bifwa byendi nga tuzema bakwetu, kubazibila ngozi na kubasambesa. Baje kubazibuka Njambi mubamona bilinga byetu byabibwa, co basa kulilongesa bya Yehova. (1 Petu 2:12) Baka-Kilistu baje banapu bisemi banapande kuzema bana babo ngwe mwatuzemena Yehova. Nga balinga ngoco, co bana babo balikuta busamba na Tate yetu wa cizemo.
Taleni palagilafu 13
13. Twasa kupwa bati ba kusimpa?
13 Kakangi banike bakazituka kusimutwiya hali bisemi babo. Mu ngila imo lika, netu twazituka kwendeka bya Tate yetu wa mwilu Yehova, co tushaka kulekako bakwetu bamuzibuke. Tuli na kuliziba ngwe mwalizibilile Mwene Ndabiti uje wasonekele ngwendi: “Njilishasha hali Yehova.” (Myaso 34:2, NWT) Batico nga twakala na shwamwa? Twasa kupwa bati ba kusimpa? Tupwa ba kusimpa nga tusinganyekesesa kubwaha kwaziba Yehova omwo tusimutwiya byendi na bubwa bubawana bakwetu nga balilongesa byendi. Yehova atukwasa tupwe ba kusimpa. Wakwasele bandolome betu ba mu simbu ya tupositolo kupwa ba kusimpa, co netu atukwasa.—1 Tesa 2:2.
14. Bika bikunapwila kwa seho kupwisa banu bandongesi?
14 Yehova kakele na kangu, co akabwahelela nga atumona tuzema bakwetu nameme ba bisemwa byeka. (Vili 10:34, 35) Ngila yaibwa itumwesa ngwetu twazema bakwetu inapu kubambulwila muzimbu waubwa. (Mateo 28:19, 20) Co bika bitundamo? Baje batutolilila bakala na buyoye bwabubwa na kukala na lilabelelo lya kukayoya myaka yoshe.—1 Tima 4:16.
ZEMENI TATE YETU, CO MUPWA BA KUBWAHELELA
15-16. Bika bitulingisa tupwe ba kubwahelela?
15 Yehova wapwa cisemi wa cizemo, co atonda naanga yendi ipwe ya kubwahelela. (Isaya 65:14) Kuli byuma byabingi bitulingisa tupwe ba kubwahelela nameme tuli mu bukalu. Tuzibuka ngwetu Tate yetu wa mwilu watuzema manene. Co lalo tuzibuka mwamubwa Lijwi lya Njambi, Mbimbiliya. (Njele 15:16) Tuli mu naanga ya banu baje bazema Yehova, bazema mashiko endi na kuzema bakwabo.—Myaso 106:4, 5.
16 Twasa kutwalelelaho kupwa ba kubwahelela, mwafwa tunakulahela ngwetu kulutwe tukayoya mwamubwa. Tuzibuka ngwetu Yehova ololo atundisako bubi bwoshe na kunena Bumwene bwendi buje bukatengulula kaye koshe kupwa Paladaisi. Co lalo twabandamena kukamona mubakasanguka banu baje batsa na kukayoya na babushoko bwabo lalo. (Yowa 5:28, 29) Tukabwahelela manene. Oloni cuma cakama cituzibisa kubwaha, cinapu kuzibuka ngwetu ololo banu boshe mwilu na hasi basingimika Tate yetu wa mwilu na kumushangazala na kumulemesa.
MWASO 12 Mulimu Yomutuna, Jehova
^ par. 5 Tuzibuka ngwetu Tate yetu Yehova, watuzema manene, co natunene mu naanga yendi ya banu baje bali na kumulemesa. Ngeci netu tunapande kumuzema. Twasa kumwesa bati ngwetu twazema Tate yetu uje watwaka mbunge? Muno mu cilongesa tusimutwiya byuma bimo bitunapande kulinga.
