1-2. Dahaka dainai Iehova ese dala e kehoa iena ruma bese lalonai baita noho, bona edena dalai?

IEHOVA ese ita na e boirida Ia e toma henia dihomu ruma besena lalonai baita noho. Una na hahenamo hereadaena. Idia na edia mauri Iehova enai e gwauhamatalaia bona ia Natuna ena mauri idavalaina boubouna e abidadama heniamu. Una ruma bese lalonai ita iboudai na ta moalemu. Hari ita na eda mauri ta moalelaiamu, bona mauri hanaihanai hahenamona dainai ta moalemu​—⁠herevana una na guba ai eiava Paradaiso tanobada ai.

² Iehova ese ita e lalokau henida dainai dala e kehoa ita na iena ruma bese lalonai baita noho totona. Unu baine kara toma totona, Iehova ese boubou ḡauna bada hereana ta e heni. (Ioa. 3:16) Ita na ‘vada e hoida, mai davada.’ (1 Kor. 6:20) Mauri idavalaina boubouna amo Iehova ese dala e kehoa ia baita hetura henia diba. Ḡau iboudiai e lohiadiamu Tauna badana na ta gwauraiamu Tamada na hahenamo badana. Atikol 6 ai ta itaia Iehova na Tama hereadaena.

3. Siboda ese ededia henanadai baita heni? (Maua ladana “Iehova Ese Lau E Lalogumu, A?” ba itaia.)

³ Baibul e torea tauna ta heḡereḡerena baita henanadaimu: “Dahaka Iehova baina henia, ena harihari-bada idoinai egu ai na davana?” (Sal. 116:12) Haere na, ita na dia heḡereḡere Tamada ese e kara ḡaudia davadia baita halou. To dounu iena lalokau ese e hagoadadamu ia baita lalokau henia. Aposetolo Ioane na e gwa: “Ita na mai eda lalokau, badina be ia ese e lalokau henida guna.” (1 Ioa. 4:19) Ededia dalai baita hahedinaraia Tamada gubai na ta lalokau heniamu?

4. Iakobo 4:8 heḡereḡerena, dahaka dainai baita hekwarahi Iehova turana ai baitala na namo?

⁴ Iehova na e uramu ita na ia turana ai baitala bona ia baita hereva henia. (Iakobo 4:8 ba duahia.) E hagoadadamu  ‘ḡuriḡuri baita goadalaia,’ bona hanaihanai e hakala henidamu. (Roma 12:12) Ia na nega e atomu ita baine hakala henida bona se hesikumu. Ita ese ia ta kamonai heniamu dalana na, Baibul ta duahiamu bona baita lalopararalaia totona Baibul pablikeisin ta duahimu. Kristen heboudiai ta hakala namonamomu amo ia ta kamonai heniamu. Herevahereva namonamo karana ese tama sina bona natu edia hetura karana e hagoadaiamu heḡereḡerena, hanaihanai Iehova ida herevahereva karana ese iseda hetura karana ia ida be hagoadaiamu.

5. Edena dalai eda ḡuriḡuri baita hanamoa?

⁵ Namona na Dirava o ḡuriḡuri heniamu dalana na ba laloa. Iehova na e uramu eda ḡuriḡuri lalonai eda lalohadai bona hemami baita hamaorolaia. (Sal. 62:8) Siboda baita henanadai: ‘Na ḡuriḡurimu neganai, lau be ḡau tamona na gwauraia louloumu, eiava kudougu ai e miamu ḡauna na Iehova na hamaorolaiamu, a?’ Momokani, oi ese Iehova na o lalokau henia badamu bona o uramu emu hetura karana ia ida ba hagoadaia. Unu ba kara toma totona, namona na hanaihanai ia ba hereva henia. Emu hemami korikori na ia ba hamaorolaia. E hamoalemumu ḡaudia bona emu lalohekwarahi na ia ba hamaorolaia. Ba diba momokani ia ese oi na be durumumu.

6. Tamada guba ai e nohomu baita hetura henia totona, dahaka baita kara na namo?

⁶ Tamada gubai baita hetura henia totona, hanaihanai tenkiu karana baita hahedinaraia. Eda lalohadai na salamo e torea tauna ena ida heḡereḡere, ia na eto: “Iehova e, egu Dirava, emu hoa karadia bona ilalolaimai lalo-hadaidia vada o habada emai ai; oi na asi idaimu. Bama gwauraidia bona bama herevalaidia, to basinama duahidia diba.” (Sal. 40:5) Iehova enai eda tenkiu karana na dia hemami amo mo to eda kara bona hereva amo baita hahedinaraia. Unu amo ita na ina negai e nohomu taudia momo amo baita idau. Hari ina negai momo na Dirava ese idia totodia e kara ḡaudia daidiai Ia na asie tenkiu heniamu. “Dina gabedia” ai ta nohomu toana ta na, taunimanima ese tenkiu karana na asie hahedinaraiamu. (2 Tim. 3:1, 2) Ita na asita uramu unu baita kara toma.

7. Iehova be uramu dahaka baita kara, bona dahaka dainai?

⁷ Tama sina na asie uramu natudia na bae heiriheiri, to e uramu bae noho namonamo. Una heḡereḡerena, Iehova na e uramu ia natuna iboudiai na bae noho namonamo. Ta helalokau hehenimu karana ese e hamomokaniamu ita na Kristen taudia korikoridia. (Ioa. 13:35) Salamo e torea tauna ida ta lalotamonamu, ia na e gwa: “Tadikaka bae noho hebou mai lalodia tamona, una na namo, bona mai moalena danu.” (Sal. 133:1) Tadikaka taihu baita lalokau henidiamu neganai, ta hahedinaraiamu Iehova na ta lalokau heniamu. (1 Ioa. 4:20) Ta moalemu badina ita ta nohomu ruma besena lalonai tadikaka bona taihu na e ‘hekaha hehenimu’ bona e ‘hebogahisi hehenimu.’​—⁠Efe. 4:32.

8. Ioane Ginigunana 5:3 heḡereḡerena, Iehova ta kamonai heniamu badina badana be dahaka?

⁸ Iehova na e uramu natu ese tamadia sinadia bae kamonai henidia, bona e uramu ia danu baita kamonai henia. (Efe. 6:1) Unu baita kara toma na maoro badina ia na ita Ihavarada Tauna, mauri e heni Tauna, bona iena aonega ese tama sina iboudiai edia aonega na e hereaiamu. To, Iehova ta kamonai heniamu badina badana na Ia ta lalokau heniamu. (1 Ioane 5:3 ba duahia.) Ena be badi momo daidiai Iehova baita kamonai henia, to ita na se doridamu unu baita kara toma. Iehova ese harihari ḡauna, ura kwalimu e henida bona bema lalokau dainai ia baita kamonai heniamu, ia na be moalemu.

9-10. Dahaka dainai Dirava ena taravatu idibana bona ibadinana karana na mai anina bada?

 ⁹ Tama sina na e uramu natudia bae gimadia. Una dainai, taravatu haida e atomu natudia edia namo helaoreana. Natu ese unu taravatu e badinamu neganai, e hahedinaraiamu tamadia sinadia na e kamonai henidiamu bona e matauraidiamu. Unu amo ta dibamu Tamada gubai e nohomu ena taravatu baita dibadia bona baita badina na mai anina bada. Bena baita hahedinaraiamu Iehova na ta lalokau heniamu bona ta matauraiamu, dia una mo to eda mauri ai namo baita davarimu. (Isa. 48:17, 18) To, Iehova bona iena taravatu e dadaraimu taudia na dika e davarimu.​—Gal. 6:7, 8.

¹⁰ Iehova ese e moalelaiamu mauri dalana baita badinaiamu neganai, tauanida, eda hemami, bona Iehova ida eda hetura karana bae hadika ḡaudia amo ita na be gimadamu. Iehova na eda namo e laloa badamu. Aurora, United States ai e nohomu taihuna ta na e gwa: “Na diba momokani hanaihanai Iehova baita kamonai heniamu neganai, iseda mauri na be namomu.” Una na hanaihanai momokani. Iehova ena hahekau daladia o badina neganai, oi be edena dalai e durumu?

11. Ḡuriḡuri karana ese ita be ede be duruda tomamu?

¹¹ Ḡuriḡuri karana ese ita na be durudamu Iehova baita kamonai henia totona, ena be nega haida una na auka. Ita na kara dika tauda dainai nega haida Iehova ikamonai henina karana na be aukamu, to namona na baita hekwarahi Iehova na basita gwau-edeede  henia. Salamo e torea tauna na Dirava e noia e gwa: “Laloparara ba henigu, emu taravatu baina badinaia.” (Sal. 119:34) Denise na regula painia ta bona ia na e gwa: “Bema egu ai na e aukamu Iehova ena haheḡani baina badina, goada baina abi totona na ḡuriḡurimu unu amo kara maorona baina karaia.” Ta diba momokanimu Iehova ese ḡuriḡuri unu bamodia na be haerelaimu.​—⁠Luka 11:9-13.

12. Efeso 5:1 heḡereḡerena, dahaka baita kara?

¹² Efeso 5:1 ba duahia. Ita na “Dirava natuna” bona e lalokau henidamu dainai baita hekwarahi ia baita tohotohoa. Lalokau, hebogahisi, bona ma haida edia kara dika baita gwautao amo iena kara baita tohotoho diba. Dirava asie dibaia taudia ese eda kara namodia be itamu neganai, una ese idia na be durudiamu Ia bae dibaia totona. (1 Pet. 2:12) Kristen tama sina ese natudia e kara henidiamu neganai, Iehova bae tohotohoa. Unu be kara tomamu neganai natudia na be uramu Tamada lalokauna bae hetura henia.

13. Baita lalogoada totona dahaka baita kara na namo?

¹³ Natu maraḡina ta na tamana ena kara e moalelaimu dainai e herevalaiamu. Una heḡereḡerena, ita na Tamada Iehova ena kara ta moalelaimu bona ta uramu haida ediai ia baita herevalaia. Iseda hemami na King David ena ida heḡereḡere, ia na eto: ‘Iehova na heaḡilaiamu.’ (Sal. 34:2) To, bema ita na ta hemaraimu, dahaka baita kara na namo? Edena dalai baita lalogoada diba? Iehova ihamoleana daladia  bona haida na ia idibana karana amo namo bae abi daladia baita lalomu neganai, ita na baita lalogoada dibamu. Iehova ese be hagoadadamu. Ia ese Kristen ginigunadia e durudia e lalogoada heḡereḡerena, ita danu be durudamu.​—⁠1 Tes. 2:2.

14. Ededia badi haida daidiai sivarai namona na ma haida ta hadibalaidiamu?

¹⁴ Iehova ese taunimanima toadia na se lalomu dainai ia na e moalemu bema ita ese haida ta lalokau henidiamu ena be edia mauri daladia na idauidau. (Apos. 10:34, 35) Ma haida ta lalokau henidiamu dalana namona ta na, sivarai namona ta hadibalaidiamu. (Mat. 28:19, 20) Una ḡaukara ese dahaka be havaraiamu? Hari ina negai ita e kamonai henidamu taudia edia mauri na be namomu bona vaira negai mauri hanaihanai hahenamona be moalelaiamu.​—⁠1 Tim. 4:16.

15-16. Ededia badi daidiai baita moale?

¹⁵ Iehova na tama lalokauna ta, una dainai e uramu iena ruma bese na bae moale. (Isa. 65:14) Ena be hari eda mauri lalodiai hekwakwanai momo ta davarimu, to badi momo daidiai baita moale. Heḡereḡere, ita na ta dibamu Tamada gubai e nohomu ese ita na e lalokau henida badamu. Ita na Dirava ena Hereva amo diba maoromaorona ta abiamu. (Ier. 15:16) Bona ita ta nohomu ruma besena na idau badina una ruma bese taudia na Iehova e lalokau heniamu, iena kara maoromaoro taravatudia e badinamu, bona e helalokau hehenimu.​—⁠Sal. 106:4, 5.

¹⁶ Ta dibamu vaira negai mauri na be namo hereamu dainai baita moale. Ita na mai dibada kahirakahira Iehova ese kara dikadia iboudiai be haorediamu bona iena Basileia ena hahekau henunai tanobada na Paradaiso ai be halaoamu. Bona eda helaro namona ta na, mase taudia na be toreisi loumu bona idia ida baita hedavarimu. (Ioa. 5:28, 29) Una na moale negana namo hereana. To mai anina bada ḡauna na, kahirakahira gubai bona tanobadai be nohomu taudia iboudiai ese Tamada lalokauna be matauraiamu, be imodaiamu, bona be toma henia dihomu.