1-2. Etke Jeova ear kõpel̦l̦o̦k juon ial̦ ñan kõj bwe jen maroñ m̦õttan baam̦le eo an? Im ewi wãween an kar kõm̦m̦ane men in?

JEOVA ear kũr kõj bwe jen kobal̦o̦k im ro uwaan baam̦le eo an rej kabuñ ñane. El̦ap an lukkuun em̦m̦an naan in kũr in! Kõj ro ilo baam̦le in em̦õj ad ajel̦o̦k mour ko ad ñan Anij im ewõr ad tõmak ilo katok in mour an Nejin. Baam̦le in ad ej juon baam̦le eo elem̦õn̦õn̦õ. Im rainin jej m̦õn̦õn̦õ kõn mour in elukkuun em̦m̦an, jej bar m̦õn̦õn̦õ kõn jeraam̦m̦an eo ñan ad maroñ mour indeeo​—ilo lañ ak ilo Pedetaij eo ijin ioon lal̦.

² Kõn an Jeova lukkuun yokwe kõj, meñe ear pen ñan e ak ikijjeen katok in mour eo an Jesus, ear kõpel̦l̦o̦k ñan kõj juon ial̦ bwe jen maroñ m̦õttan baam̦le eo an. (Jon 3:16) Ear ‘wiaik kõj kõn juon on̦ããn.’ (1 Kor. 6:20) Jeova ear kõm̦m̦an bwe en maroñ wõr juon ad kõtaan epaak ippãn, ikijjeen katok in mour eo an Jesus. Ej juon ad jeraam̦m̦an el̦ap an em̦m̦an bwe jemaroñ kũr Eo me eutiejtata ilo lal̦ im ilañ bwe ej Jemãd. Im, ãinwõt ad kar kwal̦o̦k ilo katak eo jinoin, bwe Jeova ej Jemãd eo eutiejtata.

3. Kajjitõk ta ko jemaroñ kajjitõk? (Bar lale bo̦o̦k eo etan  “Jeova Ej Kea Ke Kake Eõ?”)

³ Ãinwõt an kar juon ri-jeje Baibõl̦ kajjitõk, jemaroñ bar kajjitõk: “Ta eo inaaj lel̦o̦k ñan Jeova kõn men ko otemjej Ear letok ñan eõ?” (Sam 116:12) Uwaak eo ej bwe jejjab maroñ karo̦o̦l ak kõl̦l̦ãik jabdewõt ñan Jemãdwõj ilañ. Bõtab kõn an yokwe kõj men in ej kõm̦m̦an bwe jen bar yokwe e. Rijjilõk Jon ear je: “Jej yokwe, kõnke e eo m̦okta ear yokwe kõj.” (1 Jon 4:19) Ilo wãween et ko jemaroñ kwal̦o̦k ñan Jemãdwõj ilañ bwe jej yokwe e?

4. Ekkar ñan Jemes 4:8, etke jej aikuj kate kõj ñan epaakel̦o̦k Jeova?

⁴ Jeova ekõn̦aan bwe jen epaake e im bwebwenato ippãn. (Riit Jemes 4:8.) Ej rõjañ kõj bwe jen “niknik ilo jar,” im epojak in roñjake kõj aolep iien. (Rom 12:12) Ejjañin kar poub im m̦õk ñan an roñjake kõj. Kõn men in, jej bar roñjake e ikijjeen ad riiti Naan eo an, Baibõl̦ eo, ekoba bok ko jet me rej jipañ kõj mel̦el̦e kõn kobban Baibõl̦ eo. Jej bar roñjake e ikijjeen ad lukkuun roñjaki katak ko ilo iien kweilo̦k ko an Kũrjin. Ãinwõt an ajri ro epaakel̦o̦k jemãer im jineer ñe ej emmakijkij aer kõnono ippãer, ejja ãindein wõt ñe emmakijkij ad kõnono ippãn Jeova men in enaaj jipañ kõj bwe jen epaake wõt e.

5. Ewi wãween ad kakõm̦anm̦anl̦o̦k wãween ad jar?

⁵ L̦õmn̦ak m̦õk kõn wãween am̦ kõnono ippãn Anij. Jeova ekõn̦aan bwe jen lutõke l̦o̦k aolepen bũruod ñane ikijjeen ad jar. (Sam 62:8, UBS) Kõn men in em̦m̦an jen kajitũkin kõj make kajjitõk in: ‘Ñe ij jar ij ke jar bajjek im ãinwõt ñe ejjab lukkuun aorõk, jar ko aõ rej ke ãinwõt lõta ko kar kaape ki im bũriini, ak rej ke ãinwõt jar ko rej itok jãn bũruõ ak ko em̦õj jei ilo juon lõta?’ Ejjel̦o̦k pere bwe em̦wilal̦ yokwe eo am̦ ñan Jeova, im kokõn̦aan bwe kõtaan eo am̦ ippãn en kajoor wõt. Bwe kwõn maroñ kõm̦m̦ane men in, ej aikuj emmakijkij am̦ kõnono ippãn. Lukkuun kwal̦o̦k ñane aolep men ko rej pãd ilo bũruom̦. Kwal̦o̦k ñane men ko kwõj m̦õn̦õn̦õ kaki im men ko kwõj inepata kaki. Kwõn lõke bwe kwõmaroñ kajjitõk jipañ ippãn aolep iien.

6. Ta eo jej aikuj in kõm̦m̦ane bwe jen epaake wõt Jemãdwõj ilañ?

⁶ Bwe jen maroñ epaake wõt Jemãdwõj ilañ, jej aikuj wõnm̦aanl̦o̦k wõt im kwal̦o̦k ad kam̦m̦oolole. Jej errã ilo naan kein an ri-jeje sam in ke ear ba: “O Jeova aõ Anij, Kwaar kõm̦m̦an elõñ menin bwilõñ, im l̦õmn̦ak ko Am̦ kõn kõm relõñ wõt; ejjel̦o̦k ej ãinwõt Kwe. El̦aññe inaaj kõn̦aan kwal̦o̦k im kõnono kaki, relõñ jãn maroñ in bwini.” (Sam 40:5) Ejjab bwe ñe ewõr ad eñjake in kam̦m̦oolol Jeova, jej aikuj kaalikkare ilo naan im kõm̦m̦an ko ad. Men in ej kwal̦o̦k ad lukkuun oktak jãn elõñ armej ilo raan kein. Jej mour ilo juon lal̦ me armej ro ie rejjab kwal̦o̦k aer kam̦m̦oolol kõn aolep men ko Anij ear kõm̦m̦ani ñan er. Ilo m̦ool, juon wãween ej kwal̦o̦k bwe jej mour ilo “raan ko ãliktata” eñin bwe armej rejaje kwal̦o̦k kam̦m̦oolol. (2 Tim. 3:1, 2) Jejjab kõn̦aan bõk kadkad in!

7. Ta eo Jeova ekõn̦aan bwe jen kõm̦m̦ane, im etke?

⁷ Rũtto ro rejjab kõn̦aan bwe ajri ro nejier ren jum̦aik doon ak rekõn̦aan bwe ren m̦õttãik doon. Ilo ejja wãween in wõt, Jeova ekõn̦aan bwe aolep ajri ro nejin en em̦m̦an aer kõm̦m̦an ñan doon. Ilo m̦ool, yokwe eo ad ñan doon ej kaalikkar bwe jej Kũrjin ro rem̦ool. (Jon 13:35) Jej errã ippãn ri-jeje sam eo me ear je: “Enañin em̦m̦an im men in m̦õn̦õn̦õ, ñe ro jemjein im jemjatin rej pãd ippãn doon ilo bõro juon.” (Sam 133:1) Jej kam̦ool ñan Jeova bwe jej yokwe e, ñe jej yokwe ro jeid im jatid. (1 Jon 4:20) Juon men me el̦ap an kam̦õn̦õn̦õ ej kõn ad uwaan baam̦le eo an ro jeid im jatid me rej ‘kwal̦o̦k jouj ñan doon, im tũriam̦o’!—Eps. 4:32.

8. Ekkar ñan 1 Jon 5:3, ta un eo el̦aptata unin ad pokake Jeova?

⁸ Jeova ekõn̦aan bwe ajri ro ren pokake jemãer im jineer, im ebar kõn̦aan bwe jen pokake e. (Eps. 6:1) Ekkar bwe jen pokake e kõnke ej ri-Kõm̦anm̦an eo, ej Wũnjãn ad mour, im emãlõtlõtl̦o̦k jãn jabdewõt jemãn armej. Ak,  un eo el̦aptata unin ad pokake Jeova ej kõnke jej yokwe e. (Riit 1 Jon 5:3.) Meñe elõñ un ko unin ad aikuj pokake Jeova, ak ejjab iuuni kõj bwe jen kõm̦m̦ane men in. Jeova ear letok ñan kõj anemkwõj eo ñan kããlõt, im ej m̦õn̦õn̦õ ñe jej kããlõt ñan pokake e kõn ad yokwe e.

9-10. Etke eaorõk bwe jen jel̦ã kõn naan in tõl ko an Anij im mour ekkar ñani?

⁹ Rũtto ro rekõn̦aan kõjparok ajri ro nejier. Eñin unin rej kõm̦m̦ani kien ko rekkar bwe ajri ro ren aikuj pokaki, me enaaj wõr tokjãer ñan ro nejier. Ñe ajri ro rej pokake kien kein, rej kwal̦o̦k bwe rej lõke jemãer im jineer im rej kautiej er. Kõn men in el̦apl̦o̦k an aorõk bwe jen jel̦ã kõn kien ko an Jemãdwõj ilañ im mour ekkar ñani. Ñe jej kõm̦m̦ane men in, jej kwal̦o̦k ñan Jeova bwe jej yokwe e im kautiej e bareinwõt ewõr tokjãn ko rem̦m̦an ñan kõj ñe jej pokake e. (Ais. 48:17, 18, UBS) Bõtab, ro rej kõjekdo̦o̦n Jeova im naan in tõl ko an, ilo m̦ool rej ko̦kkure er make.​—Gal. 6:7, 8.

¹⁰ Ñe jej mour ilo wãween eo Jeova ej buñbũruon kake, jej bõk kõjparok ilo ãnbwin, eñjake im jen jabdewõt men ko renaaj ko̦kkure kõtaan eo ad ippãn. Jeova ejel̦ã ta eo em̦m̦antata ñan kõj. Aurora, eo ej jokwe ilo Amedka, ej ba: “Ijel̦ã bwe aolep iien ñe jej pokake Jeova, enaaj lukkuun em̦m̦an mour ko ad.” Aolep iien jej kam̦oole men in. Ewi wãween am̦ kar bõk tokjãn kõn am̦ kar pokake naanin tõl ko an Jeova?

11. Ewi wãween an jar jipañ kõj?

¹¹ Jar ej jipañ kõj bwe jen pokake, meñe ewõr iien epen ñan pokake. Ewõr iien, enaaj pen ñan ad pokake Jeova, bõtab jej aikuj kate  wõt kõj ñan anjo̦ ioon kõn̦aan eo ñan jerawiwi. Ri-jeje sam eo ear akwel̦ap ñan Anij im ba: “Kõm̦m̦an bwe aõ en pokake eok.” (Sam 51:12, UBS) Denise, eo ej juon rekũl̦ar bainier, ej ba, “Ñe ij lo bwe epen ñan aõ pokake juon iaan kien ko an Jeova, ij jar bwe en letok kajoor ñan kõm̦m̦ane men eo ejim̦we.” Jemaroñ lõke bwe aolep iien Jeova enaaj uwaake kajjitõk rot kein.​—Luk 11:9-13.

12. Ekkar ñan Epesõs 5:1, ta eo jej aikuj kõm̦m̦ane?

¹² Riit Epesõs 5:1. Ãinwõt ‘ro nejin Jeova rejitõnbõro,’ jej lukkuun kate kõj ñan anõke e. Jej anõke kadkad ko kadkadin ilo ad kwal̦o̦k yokwe, jouj, im ñe jej jeorl̦o̦k an ro jet bõd. Ñe ro rejjab jel̦ã kõn Anij rej loe ad kwal̦o̦k kadkad ko rem̦m̦an, men in emaroñ kõm̦m̦akũt er ñan kõn̦aan kal̦apl̦o̦k aer jel̦ã kõn e. (1 Pit. 2:12) Ewõr un ko rem̦m̦an bwe rũtto ro rej Kũrjin ren anõke Jeova ilo wãween aer kõm̦m̦an ñan ajri ro nejier. El̦aññe renaaj kõm̦m̦ane men in, ajri ro nejier renaaj kõn̦aan ejaake juon aer make jem̦jerã ippãn Jemãd eo el̦ap yokwe ippãn.

13. Ta eo jej aikuj kõm̦m̦ane bwe jen peran?

¹³ Juon ajri jidikdik ej buñbũruon kõn jemãn im em̦õn̦õn̦õ in kõnnaan kake. Ãindeinl̦o̦k wõt kõj, e buñbũruod kõn Jemãdwõj ilañ, Jeova, im jekõn̦aan bwe ro jet ren jel̦ã kõn e. Ilo bũruod, jej bõk ejja eñjake eo wõt an kar Kiiñ Devid, eo ear je : “Aõ enaaj kõmmejãje ilo Jeova.” (Sam 34:2) Ak, ta el̦aññe jej jook in kõnnaan kõn Jeova? Ewi wãween bwe jen  peran? Jemaroñ in peran ñe jej l̦õmn̦ak kõn joñan an Jeova naaj m̦õn̦õn̦õ ñe jenaaj kõnnaan kõn e im kõn an ro jet naaj bõk tokjãn jãn aer katak kõn e. Jeova enaaj letok peran eo jej aikuji. Ear jipañ ro jeid im jatid ilo iien ko an rijjilõk ro bwe ren peran, im enaaj bar jipañ kõj.​—1 Tes. 2:2.

14. Ta jet iaan un ko unin an aorõk ñan ad bõk kun̦aad ilo jerbalin kõm̦m̦an ri-kal̦oor?

¹⁴ Jeova ejjab kalijekl̦o̦k, kõn men in ej m̦õn̦õn̦õ ñe ej loe ad kwal̦o̦k yokwe ñan ro jet, jekdo̦o̦n aelõñ ta eo aer. (Jrb. 10:34, 35) Juon iaan wãween ko rem̦m̦antata ñan ad kwal̦o̦k yokwe ñan ro jet ej ilo ad kwal̦o̦k kõn ennaan eo em̦m̦an ñan er. (Matu 28:19, 20) Ta tokjãn ko remaroñ wal̦o̦k jãn jerbal in? Ro rej roñjake kõj remaroñ kakõm̦anm̦anl̦o̦k wãween mour ko aer kiiõ im remaroñ bõk jeraam̦m̦an eo ñan mour indeeo ilju im jekl̦aj ilo Pedetaij.​—1 Tim. 4:16.

15-16. Ta un ko unin ad m̦õn̦õn̦õ wõt?

¹⁵ Jeova ej juon jemãn eo el̦ap an yokwe, kõn men in ekõn̦aan bwe baam̦le eo an en m̦õn̦õn̦õ. (Ais. 65:14) Elukkuun lõñ un ko unin ad m̦õn̦õn̦õ kiiõ meñe jej iiooni men ko reppen. Ñan waanjoñak, jejel̦ã bwe Jemãd ilañ el̦ap an yokwe kõj. Ewõr ippãd jel̦ãl̦o̦kjen̦ eo ejim̦we kõn Naan eo an Anij, Baibõl̦ eo. (Jrm. 15:16) Im jej uwaan baam̦le eo ejejuwaan me armej ro ie rej yokwe Jeova, rej yokwe kien ko an, im rej yokwe doon.​—Sam 106:4, 5.

¹⁶ Jemaroñ m̦õn̦õn̦õ wõt kõnke ewõr ad kõjatdikdik bwe mour enaaj em̦m̦anl̦o̦k ilo naaj ilju im jekl̦aj. Jejel̦ã bwe m̦õttan jidik Jeova enaaj jol̦o̦k aolep men ko renana im ikijjeen naaj tõl eo an Aelõñ eo an, lal̦in enaaj oktak ñan juon Pedetaij. Bareinwõt ewõr ippãd kõjatdikdik eo bwe ro rar mej renaaj bar jerkak im mour im bar pãd ippãn ro rejitõnbõro ippãer. (Jon 5:28, 29) Enaaj juon iien elukkuun kalañlõñ! Im men eo eaorõktata, jejel̦ã bwe m̦õttan wõt jidik aolep ro ilañ bareinwõt ro ioon lal̦in renaaj lel̦o̦k ñan Jemãd eo el̦ap yokwe ippãn aiboojoj, nõbar, im kabuñ eo ñan e wõt.