1, 2. ¿Kenke Jehová kinejki ma tielikaj tlen ichampoyouaj, uan kenijkatsa kichijki?

JEHOVÁ kichijtok se tlamantli tlen tlauel techpakilismaka, techtlanejtok nojkia ma tielikaj tlen ichampoyouaj, kampa itstokej maseualmej tlen kimaktilijtokej ininnemilis uan tlaneltokaj ipan iKone imikilis. Uan nochi tlauel tiyolpakij. Nama tijmatij amo san tlapik tiitstokej, uan tlauel tiyolpakij pampa timotemachiaj teipa tiitstosej nochipa, sekij iluikak uan miakej ipan Xochimili.

² Pampa nelnelia tlauel techiknelia, Jehová kinejki ma tielikaj tlen ichampoyouaj maske monekiyaya temakas se ueyi tlamantli (Juan 3:16). Biblia kiijtoua “tlaxtlajki patiyo” uan kiampa kejuak techkojki (1 Cor. 6:20). Pampa toTeotsij temakak nopa tlaxtlauili, nama tojuantij tiuelij kuali timouikaj iuaya. Tijselijtokej se ueyi tlateochiualistli pampa nama tiuelij tikiljuiaj toTata katli kinauatia nochi tlen onka. Uan kej tikitakej ipan tlamachtili 6, san Jehová nelnelia eli se kuali teTaj.

3. ¿Tlake tlamantli uelis timotlajtlaniaj? (Nojkia xikita nopa recuadro “ ¿Kiita Jehová tlen nijchiua?”).

³ Uelis tojuantij nojkia timotlajtlaniaj kej se katli kiijkuilok se salmo: “¿Kejatsa uelis nijtlaxtlauis toTeko ipampa nochi tlen nechchiuilijtok?” (Sal. 116:12). Amo tijpiaj yon se tlamantli tlen ika uelis tijtlaxtlauisej toTata. Maske kiampa pano, tojuantij nelia tijnekij tikiknelisej pampa ya techiknelia. Apóstol Juan kiijtok: “Tojuantij tikikneliaj toTeko, pampa yajaya  achtoui techiknelik” (1 Juan 4:19). Uajka, ¿kenijkatsa uelis tijnextilisej toTata nelnelia tikikneliaj?

4. Kej kiijtoua Santiago 4:8, ¿kenke moneki tijchiuasej kampeka tijnechkauisej Jehová?

⁴ Jehová kineki ma tijnechkauikaj uan nochipa ma tikamanaltikaj iuaya (xijpoua Santiago 4:8). Techiljuia nochipa ma timomaijtojtinemikaj, pampa ya nochipa kineki techtlakakilis (Rom. 12:12). Ya amo kema motekiuijtos o siajtos kema timomaijtosej. Uan tojuantij nojkia tijtlakakiliaj kema tijpouaj Biblia uan amatlajkuiloli tlen techpaleuia ma tijkuamachilikaj tlen kiijtoua iTlajtol. Nojkia tijtlakakiliaj kema kuali titlakakij ipan tlanechikoli. Sanse kej kema tetajmej kuali mouikaj ininuaya ininkoneuaj pampa nochipa kamanaltij, tojuantij nojkia timonechkauijtosej ika Jehová tlaj nochipa tikamanaltij iuaya.

5. ¿Kenijkatsa uelis tijchiuasej toTata ma kipakti techtlakakilis?

⁵ ¿Tlake tikijtouaj kema tikamanaltij iuaya toTeotsij? Ya kineki ma tikiljuikaj nochi tlen tijpiaj toyolijtik (Sal. 62:8). Yeka, kualtiaskia ma timotlatsintokikaj: “¿Nochipa nikijtoua sanse tlamantli kema nimomaijtoua? ¿O nijkamanaljuia toTeotsij kej kema nikamanalti iuaya se kuali nouampo?”. Temachtli tijmatij ta tlauel tikiknelia Jehová uan tijneki nochipa kuali timouampojchijtos iuaya. Yeka, moneki nochipa tikamanaltis iuaya. Xikiljui tlen tikajoktok ipan moyolo; xikiljui tlake mitspakilismaka uan tlake mitstekipachoua. Uan temachtli xijmajto ni: nochipa uelis tikiljuis ma mitspaleui.

6. ¿Tlake moneki tijchiuasej tlaj tijnekij nochipa kuali timouikasej iuaya toTata?

⁶ Tlaj tijnekij nochipa kuali timouikasej iuaya Jehová, nojkia moneki tijtlaskamatilisej. Tojuantij timoiljuiaj sanse kej katli kiijkuilok ni salmo: “Ta tinechchiuilijtok miak tlamantli tlen uejueyi. Axaka kiaxilis moueyichikaualis. Ta nochipa tinechpixtok ipan motlalnamikilis. Kena, tlauel miak tlamantli tlen yejyektsi tijsenkajtok tinechchiuilis. Intla nijnekiskia niteyolmelauas sejse tlamantli tlen tinechchiuilijtok, axniueliskia. Pampa nochi tlen kuali tinechchiuilijtok kionpano tlen ueli nijpoua” (Sal. 40:5). Amo san ipan toyolo tijtlaskamatij, tojuantij tijnextiaj nelia tijtlaskamatij ika tlen tikijtouaj uan tijchiuaj. Tojuantij amo tielij kej miakej maseualmej, katli amo kitlaskamatij toTeotsij nochi tlen kinmaka. Tijmatij tiitstokej ipan “itlamia tonali” pampa miakej amo tetlaskamatiskiaj (2 Tim. 3:1, 2). Amo kema ma tijchiuakaj kej inijuantij.

7. ¿Tlake kineki Jehová ma tijchiuakaj, uan kenke kiampa kineki?

⁷ Tetajmej amo kinekij ininkoneuaj ma mokualanikaj o ma moteuikaj, inijuantij kinekij kuali ma mouikakaj. Jehová nojkia ya nopa kineki ma kichiuakaj ikoneuaj. Uan kema timoikneliaj se ika seyok, tijnextiaj nelia tielij Cristo itokilijkauaj (Juan 13:35). Se toTeotsij itekipanojka kiijkuilok: “Xikitakaj, nelia kuali uan yejyektsi nesi para iknimej ma mokauakaj sansejko ika san se ininyolo” (Sal. 133:1). Tojuantij nojkia tijyolmatij kej katli kiijkuilok ni salmo. Kema tikinikneliaj toikniuaj, tijnextiliaj Jehová nelnelia tlauel tikikneliaj (1 Juan 4:20). Nelnelia eli se ueyi tlateochiualistli tiitstosej ika toTeotsij ichampoyouaj, kampa nochi toikniuaj ‘mochiuiliaj tlen kuali’ uan ‘motlasojtlaj’ (Efes. 4:32).

8. Kej kinextia 1 Juan 5:3, ¿kenke tlauel kinamiki tijneltokasej Jehová?

⁸ Jehová kineki konemej ma kinneltokakaj inintatauaj, uan ya nojkia kineki ma tijneltokakaj (Efes. 6:1). Kinamiki tijneltokasej  pampa ya techchijchijki, pampa techmaka tlen techpaleuia ma tiyoltokaj uan pampa san ya eli se teTaj katli tlauel tlalnamiki. Uan moneki tlauel tijneltokasej pampa tikikneliaj (xijpoua 1 Juan 5:3). Maske onka miak tlamantli tlen kinextia kinamiki tijneltokasej, ya amo techchiualtia. Techkaua ma tijtlapejpenikaj tlake tijchiuasej, uan yeka tlauel yolpaki kema kiita tijneltokaj pampa nelia tikikneliaj.

9, 10. ¿Kenke moneki tikixmatisej toTeotsij itlanauatiljuaj uan tijchiuasej tlen technauatia?

⁹ Tetajmej kinekij ininkoneuaj nochipa kuali ma itstokaj. Yeka, kiniljuiaj kenijkatsa moneki monejnemiltisej. Kema konemej kinneltokaj inintatauaj, kinextiaj motemachiaj ipan inijuantij uan kintlepanitaj. Uajka, tojuantij moneki kuali tikixmatisej Jehová itlanauatiljuaj uan tijchiuasej tlen technauatia. Kiampa tijnextilisej Jehová nelia tikikneliaj uan tijtlepanitaj. Nopa techpaleuia kuali ma tiitstokaj (Is. 48:17, 18). Uan katli amo kitlepanitaj toTeotsij yon itlanauatiljuaj, tlauel amo kuali itstokej (Gál. 6:7, 8).

¹⁰ Kema timonejnemiltiaj kej Jehová kipaktia, techpaleuia kuali ma tijyolmatikaj, kuali ma timouikakaj iuaya uan kuali ma tiitstokaj. Ya nochipa kimati tlake tlamantli techpaleuis. Aurora, katli eua Estados Unidos, kiijtoua: “Nijmati nochipa kema tijneltokaj Jehová, techpaleuia kuali ma tiitstokaj”. Nochipa kiampa pano. Yeka, ma timotlajtlanikaj: “¿Kenijkatsa nechpaleuijtok pampa nijchiua tlen Jehová nechiljuia?”.

11. ¿Kenijkatsa techpaleuia kema timomaijtouaj?

¹¹ Kema timomaijtouaj techpaleuia tijneltokasej toTeotsij maske tijmatisej ouij. Nochi titlajtlakolejkej,  yeka kemantika moneki tijchiuasej se ueyi kampeka tijneltokasej Jehová. Uan moneki nochipa kiampa tijchiuasej. Katli kiijkuilok se salmo kiiljuik toTeotsij: “Xinechchiuili para nochipa ma nijnekis nimitstlepanitas” (Sal. 51:12). Denise, katli tlatekipanoua kej precursora regular, kiijtoua: “Kema nijmati ouij nijneltokas Jehová itlanauatil, nikiljuia ma nechpaleui”. ToTeotsij temachtli technankilis kema tikiljuisej ma techpaleui (Luc. 11:9-13).

12. ¿Tlake technauatia ma tijchiuakaj Efesios 5:1?

¹² (Xijpoua Efesios 5:1). Kej tiikoneuaj Jehová, katli tlauel kiniknelia, tijchiuaj kampeka tijchiuasej kej ya. Tijnextiaj ipan tonemilis nopa kuajkuali tlamantli tlen ya kinextia kema titeikneliaj, kema titechiuiliaj tlen kuali uan kema titetlapojpoljuiaj. Kema maseualmej katli amo kiixmatij toTeotsij kiitaj kenijkatsa timonejnemiltiaj, uelis nojkia kinekisej kiixmatisej (1 Ped. 2:12). Uan tlauel kuali tlaj tetajmej kinikneliaj ininkoneuaj kej Jehová techiknelia. Tlaj kiampa kichiuasej, uelis ininkoneuaj kinekisej mouampojchiuasej iuaya toTeotsij.

13. ¿Tlake techpaleuis amo tipinauasej uan kiampa uelis tikamanaltisej tlen Jehová?

¹³ Konemej tlauel kinpaktia kej inintatauaj elij uan yolpakij kema kamanaltij tlen inijuantij. Tojuantij nojkia techpaktia kej eli toTata Jehová uan tijnekij sekinok nojkia ma kiixmatikaj. Tijyolmatij sanse kej tlanauatijketl David: “Nijueyitlalis uan nikiniljuis nochi  tlakamej tlen yajaya nechchiuilijtok” (Sal. 34:2). Uelis sekij tipinauaj tikamanaltisej, yeka amo neltijnekij tikiniljuisej sekinok ajkia eli Jehová. ¿Tlake uelis tijchiuasej? Tlaj timoiljuisej kenijkatsa tijyolpakiltisej Jehová uan kenijkatsa kinpaleuis katli kiixmatisej, uajka amo timajmauisej yon tipinauasej tikamanaltisej tlen toTeotsij. Sanse kej kinpaleuik toikniuaj tlen achtoui siglo, Jehová techpaleuis amo ma timajmauikaj (1 Tes. 2:2).

14. ¿Kenke tlauel moneki tikinpaleuisej sekinok ma elikaj Cristo itokilijkauaj?

¹⁴ Jehová amo techikoita, yeka tlauel yolpaki kema kiita tikinikneliaj nochi maseualmej maske kampa ueli euaj (Hech. 10:34, 35). Uan uelis tijnextisej tikinikneliaj maseualmej tlaj tikinmatiltisej nopa kuali tlamachtili (Mat. 28:19, 20). ¿Kenijkatsa kinpaleuis? Katli kitlakakilisej tlen toTeotsij tlamachtia, kuali itstosej nama, uan teipa uelis itstosej nochipa (1 Tim. 4:16).

15, 16. ¿Tlake tlamantli kichiua ma tiyolpakikaj?

¹⁵ Jehová eli se teTaj katli tlauel teiknelia uan kineki ichampoyouaj ma yolpakikaj (Is. 65:14). Maske tikixnamikisej tlaouijkayotl, onka miak tlamantli tlen kinamiki kichiuas ma tiyolpakikaj. ¿Tlake nopa tlamantli? Tijmatij toTata Jehová nelnelia tlauel techiknelia. Nojkia tijmatij tlen melauak tlamachtia Biblia (Jer. 15:16). Uan tiitstokej ininuaya Jehová ichampoyouaj, kampa itstokej maseualmej katli kiikneliaj Jehová, kitlepanitaj itlanauatiljuaj uan nochi inijuantij kinextiaj moikneliaj (Sal. 106:4, 5).

¹⁶ Nojkia tlauel tiyolpakij pampa timotemachiaj teipa tlauel kuali tiitstosej. Tijmatij Jehová nechka kintsontlamiltis katli kichiuaj tlen amo kuali uan ika iTlanauatijkayo kichiuas se xochimili. Nojkia timotemachiaj teipa moyolkuisej katli miktokej uan itstosej ininuaya ichampoyouaj (Juan 5:28, 29). ¡Tlauel kuali nochi tlen tijchixtokej! Uan nojkia panos se tlamantli tlen tlauel ipati: nochi katli itstosej ipan iluikak uan ipan Tlaltipaktli san toTata kiuejkapantlalisej, kiueyichiuasej uan san ya kitekipanosej kej kinamiki.