1-2. Yehova eerinhe hai okhala wooweryeya wa hiyo opaka makupa a emusi awe, nave ntakhara heeni?

YEHOVA onnaniwopa wi nikhale mu emusi ya alapeli awe. Ola nwopelo woohakalalihaxa! Achu a emusi ahu ti yaale ivelenle wa Muluku nave yaawo anooniherya nroromelo mmukucho waawoopola wa Mwanawe. Emusi ahu ti yoohakalala. Ninnapuha ekumi yoohakalaliha hiihaano, nave tho nnahaala opuha ekumi yoohimala, moohipwacha waari wirimu naari mu Parataiso veelaponi yavathi.

² Aceenyeryeyaka ni osivela moorweela wa mukucho, Yehova oohula ephiro wi nipake makupa a emusi awe. (Yoh. 3:16) ‘Noothummwa ni esisapo.’ (1 Kor. 6:20) Moorweela wa mukucho, Yehova oheeriha okhala wooweryeya wa hiyo okhaleno onthamwene wawaacameleya ni yene. Nnanwerya omwiichana Mutokweene a ichu soothene ntoko Tiithi. Nave, hiiha ntoko nthokoronryaahu mmwaha ovirale, Yehova tori Tiithi oophwanelela.

3. Makoho taani nnaphwanelaahu wiipakela? (Moone tho ekaaxa “ Apwanne Yehova Onnakisuwela?”)

³ Hiiha ntoko namarepa mmoha a Piipiliya, nnaphwanela wiikoha: “Vano Apwiya kini kaakookiheryeni mwa nthowa na okeerela waya saphaama soothene?” (Sal. 116:12) Naakhulo ti nawi haniwerya omukookiherya echu Tiithiihu awirimu. Nyenya nthowa na onisivela wawe onnaneeriha tho omusivela yene. Murummwa Yohani oorepa: “Ninnamusivela, ntakhara Yowo tápachenrye onsivela.” (1 Yoh. 4:19, NN) Mmikhalelo taani nneeraahu nooniherye wi ninnamusivela Tiithiihu awirimu?

4. Mwawiiwanana ni Tiyako 4:8, ntakhara heeni nnaphwanelaahu wiilipixerya okhala asinthamwene a Yehova?

⁴ Yehova onachuna wi nikhale asinthamwene awe nave wi nloceke ni yoowo. (Mwaalakhanye Tiyako 4:8.) Owo onnanceenyerya ‘otitelela ovekela,’ nave onnaniwiriyana elukuluku eri yoothene. (Aro. 12:12) Owo hanakhala awaaceliwaxa naari hanaphweeleya vaavaa onaniwiriyaneiye. Navetho hiyo ninnamuwiriyana orweela wa waalakhanya Masu awe Piipiliya, vamoha ni soolaleeryiwa seiyo sinanikhaviherya omwiiwexexa phaama Piipiliya. Ninnanwiriyana tho moorweela wa okhala oomaaleleya mmithukumano Seekristu. Hiiha ntoko olocihana phaama onaweerihaaya anamwane owaacamela asitiithi aya, olocihana moohihiyererya ni Yehova, onnaneeriha okhala awaacameleya wa yoowo.

5. Nni neerihe hai mavekelo ahu okhala aweemereryeya wa Yehova?

⁵ Muupuwele vooloca sa mukhalelo munavekelaanyu wa Yehova. Yehova onachuna wi nooniherye muupuwelo ahu woothene vaavaa nnavekelaahu wa yoowo. (Sal. 62:8) Nnaphwanela wiipakela nikoho nla: ‘Apwanne mavekelo aka anakhala wi tawiimuleeliwa, ntoko muchaka wawimpirimiriwa, naari wi ari ntoko echu yookhumela vamurimani, ntoko ekaarata yoorempwa ni mata?’ Moohikhwa minikwa, nyuwo munnamusivela Yehova nave munnachuna weeriha onthamwene anyu ni yoowo okhala woolipa. Wi mweereno yeela, munaphwanela olocaka ni yoowo moohihiyererya. Mmuleele moonelo anyu wa weephiini. Mmuleele yeeyo enaweerihaani okhala oohakalala ni yeeyo enawuukhulaani. Muroromele wi munanwerya omveka nikhaviheryo.

6. Tiheeni nnaphwanelaahu weera wi ntitelele omwaacamela Tiithiihu awirimu?

⁶ Wi niikhalele awaacameleya wa Tiithiihu awirimu, nnaphwanela otitelela omuthamala. Ninneemererya yeeyo mulipa a masalmo yoowo orempe ariki: “Apwiya Muluku aka sootikhiniha sanyu mwenraanyu ti sincipale miteko munaneerelaanyu ti mincipale. Haavo onalikana ni nyuwo! Kaachunne olokoha soothene nkaawenre.” (Sal. 40:5) Ninnapaka sincipale opwaha othamalela; ninnooniherya omuthamalela Yehova mmasu ahu ni saweera. Ela ennooniherya wi naachu oohiyana ni akina olelo. Nnakhala mu elapo mummo arimo achu ahinathamalela soothene Muluku onaweereleiye. Mweeparipari, echu emoha enathoonyerya wi nnakhala “mmahiku ookuchula” ti yawi, achu toohithamalela. (2 Tim. 3:1, 2) Hannaphwanela okhala ntoko achu yaawo!

7. Tiheeni Yehova onachuneiye wi neere, nave ntakhara heeni?

⁷ Alipa ooyara hanachuna wi anaaya ewaneke nto wi ekhale asinthamwene. Moolikana, Yehova onachuna wi alapeli awe oothene ekhale asinthamwene. Mweeparipari, osivela yoowo nnooniheryaahu mukina ni mukhwaawe onnanisuwanyeiha ntoko Akristu eeparipari. (Yoh. 13:35) Ninneemererya yeeyo mulipa masalmo orempeiye: “Ti waphaama ni woohakalaliha chiri wi anna ekhaleke vamoha [mwawiiwanana].” (Sal. 133:1) Vaavaa nnaasivelaahu anna ni arokora ahu, ninnamooniherya Yehova wi ninnamusivela. (1 Yoh. 4:20) Ti yoohakalalihaxa opaka makupa a emusi ya anna ni arokora yaawo ari “ooreera murima, oomorelana ikharari”!—Éfe. 4:32.

8. Mwawiiwanana ni 1 Yohani 5:3, nthowa taani noochuneya nnaneeriha omwiiwelela Yehova?

⁸ Yehova onachuna wi anamwane ewiiweleleke makholo aya, navetho owo onachuna wi nimwiiweleleke. (Éfe. 6:1) Ninnaphwanela omwiiwelela Yehova nthowa nawi ti Mpatuxa ahu, Mulipa Ookhapelela okumi ahu, navetho owo  tamiruku ompwaha tiithi vyakala oomuchu. Nyenya, nthowa noochuneyaxa nnaneeriha omwiiwelela ti nawi hiyo ninnamusivela. (Mwaalakhanye 1 Yohani 5:3.) Naamwi erivo mathowa mancipale ananeeriha omwiiwelela Yehova, owo hananikhinyererya omwiiwelela. Yehova oonivaha yamahala ya othanla woochuna, mwawiihiiha owo onnahakalala vaavaa nnathanlaahu omwiiwelela nthowa na omusivela.

9-10. Ntakhara heeni oryaaya waphaama osuwela malamulo a Muluku ni wiiwelela yaawo?

⁹ Alipa ooyara anachuna wi anaaya ekhale ookhapeleleya. Ti nthowa nene awo anatikitheryaaya malamulo wi yaakhapelela anaaya. Vaavaa anamwane aniiwelelaaya malamulo yaawo, awo annooniherya wi annaaroromela makholo aya nave annaacicimiha. Mwawiihiiha, ti woochuneya osuwela ni wiiwelela malamulo a Tiithiihu a wirimu. Vaavaa nneeraahuno eyo, ninnooniherya wi ninnamusivela ni omucicimiha Yehova, navetho wi nnahaala ophura. (Isa. 48:17, 18) Moohiyana, yaale anamukhooca Yehova nave ahiniiwelela malamulo awe, annoona mwiixi.—Gal. 6:7, 8.

¹⁰ Vaavaa nnakhalaahu mwawiiwanana ni yeeyo enamuhakalaliha Yehova, ninnakhapeleleya wa ichu seiyo saahaala onipahula omwiilini mmuupuweloni naari saahaala onanariha onthamwene ahu ni Yehova. Yehova onnasuwela echu eri yoophwanelela wa hiyo. Aurora, yoowo onakhala o Estatu Unitu, ooloca: “Kinnasuwela wi omwiiwelela Yehova ilukuluku soothene onnakumiherya ekumi yaphaama.” Ela eparipari wa oothene ahu. Mphurelo taani mphwannyaanyu  orweela wa wiiwelela ohoolela woosivela wa Yehova?

11. Mmukhalelo taani ovekela onanikhaviheryaaya?

¹¹ Ovekela onnanikhaviherya okhala awiiwelela, naamwi weerano eyo okhalaka woovila. Ilukuluku ikina, onakhala woovila omwiiwelela Yehova woona wi naachu oocheka, nyenya nnaphwanela wiilipixerya omwiiwelela. Mulipa masalmo aahimveka Muluku ariki: “Mukivahe miruku sookhapelela mahusiheryo anyu, kiiweleleke ni murima woothene.” (Sal. 119:34) Tinise, yoowo ori piyoneero ookilaatheya, ooloca, “Wakhala wi kinnoona okhala woovila wiiwelela nimoha na malamulo a Yehova, kinnaveka ikuru wi keere echu eri yoophwanelela.” Nnaphwanela ororomela wi Yehova onnaakhula mavekelo a mukhalelo yoowo.—Luka 11:9-13.

12. Mwawiiwanana ni Éfeso 5:1, tiheeni nnaphwanelaahu weera?

¹² Mwaalakhanye Éfeso 5:1. Woona wi na “anamwane awe oosiveliwa” a Yehova, ninnawetha wi nimutakiherye yoowo. Ninnatakiherya mikhalelo sawe moorweela wa okhala oosivela, ooreera murima, ni oolevelelana mukina ni mukhweiye. Vaavaa yaale ahinamusuwela Muluku anoonaaya meecelo ahu aphaama, ananwerya oceenyeryeya ohuserya sincipale vooloca sa yoowo. (1 Ped. 2:12) Alipa ooyara ari Akristu anaphwanela waakhalihaka anaaya mmukhalelo yoowo Yehova onanikhaliheiye. Vaavaa aneeraayano yeela, anaaya anampacerya ochuna otikitherya onthamwene aya ni Tiithiihu oosivela.

13. Tiheeni nnaphwanelaahu opaka wi nikhale oolipa murima?

 ¹³ Mwaana onakhala ootaphuwa ni tiithi awe nave onnasiveliwa waaleela akina vooloca sa yaawo. Mmukhalelo woolikana, ninnakhala ootaphuwa ni Tiithiihu awirimu, Yehova, nave ninnachuna waaleela akina vooloca sa yoowo. Mmurimani mwahu ninnoona hiiha ntoko Mwene Tavite, yoowo aarempe wi: “Apwiya ti ncicimiho naka.” (Sal. 34:2) Vano, hanka wakhala wi ninnuuliwa muru oloca sa Yehova? Nni niwerye hai okhala oolipa murima? Wuupuwelela mukhalelo Yehova onakhaleiye oohakalala vaavaa nnalocaahu sa yoowo, onamuneeriha wunnuwiha olipa murima. Yehova onamunivaha olipa murima yoowo nnachunaahu. Owo aahaakhaviherya annihu a nsana noopacerya okhala oolipa murima, nave owo onamunikhaviherya tho hiyo.—1 Tes. 2:2.

14. Mathowa taani ananeeriha wiilipixerya mmuteko wa waapaka oohuserya?

¹⁴ Yehova tahi a nthalu, nave onnahakalala vaavaa onanooneiye naasivelaka akina, moohipwacha elapo anakhumaayawo. (Saw. 10:34, 35) Mukhalelo mmoha woophwanelela nnooniheryaahu waasivela akina, ori moorweela wa waalaleerya michaka saphaama. (Mat. 28:19, 20) Mphurelo taani muteko yoola onaruuhaaya? Yaale ananiwiriyana ananwerya otoroka ekumi aya hiihaano ni ophwanya ewehereryo ya opuha mareeliho a ekumi yoohimala muhoolo.—1 Tim. 4:16.

15-16. Mathowa taani nryaahuno ananeeriha okhala oohakalala?

¹⁵ Yehova Tiithi oosivela, mwa yeeyo owo onachuna wi emusi awe ekhale yoohakalala. (Isa. 65:14) Aakhalavo mathowa mancipale yaawo ananeeriha okhala oohakalala hiihaano, naamwi nihoolelaka makacamiho. Ntoko yootakiherya, ninnaroromela wi Tiithiihu awirimu onnatepa onisivela. Nookhalano masuwelelo awaakhwanela a Masu a Muluku, Piipiliya. (Yer. 15:16) Nave ninnapaka makupa a emusi ya achu anamusivela Yehova, anasivela malamulo awe, nave anasivelana mukina ni mukhwaawe.—Sal. 106:4, 5.

¹⁶ Nnanwerya okhala oohakalala ilukuluku soothene nthowa nawi noosuwela wi nnamukhalano ekumi yaphaama muhoolo. Noosuwela wi moohilekela Yehova onahaala oviihavo soonanara soothene elukuluku nnahaalaahu olamuleliwaka ni Omwene awe, elapo enahaala orehereryiwa wi ekhale Parataiso. Nookhalano tho ewehereryo yoohakalaliha yawi yaale akhwile anamviihiwa wi ekookele okhalaka vamoha ni oosiveliwa aya. (Yoh. 5:28, 29) Enamukhala echu yoohakalalihaxa! Nave echu yoochuneyaxa, ninnaroromela wi voohilekela muchu ti muchu wirimu naari veelaponi yavathi onahaala omvaha Tiithiihu oosivela ncicimiho, ovuwa ni malapelo yaawo onaphwaneleleiye.