1-2. Ko e ha mo e puhala fe ne hafagi e Iehova ki a tautolu ke eke mo magafaoa haana?

KUA uiina e Iehova a tautolu ke fakalataha ke he magafaoa haana he tau tagata tapuaki. Ko e uiina mua ue atu a ia! Ko e magafaoa ha tautolu ko lautolu kua tukulele e tau momoui ke he Atua mo e fakagahuahua e tua ke he poa lukutoto he Tama haana. Ko e magafaoa fiafia a tautolu. Moua e tautolu e moui fai kakano mogonei, ti fiafia a tautolu ke he amaamanakiaga he moui kua nakai fai fakaotiaga​—ki luga he lagi po ke he Parataiso he lalolagi.

² He omoomoi he fakaalofa mua ue atu ha Iehova, kua hafagi e ia e puhala ma tautolu ke eke mo magafaoa haana. (Ioane 3:16) “Kua fakafua a [tautolu] ke he totogi.” (1 Kori. 6:20) Puhala he lukutoto, fakaatā e Iehova a tautolu ke moua e fakafetuiaga mafanatia mo ia. Moua e tautolu e lilifu ke fakahigoa e Atua mua ue atu he lagi mo e lalolagi katoatoa ko e Matua. Ti kua fakatutala a tautolu he vala tala fakamua, ko Iehova ko e Matua mitaki lahi mahaki.

3. Ko e heigoa e tau hūhū ka hūhū e tautolu? (Kikite foki e puha “ Mailoga Nakai e Iehova Au?”)

³ Tuga e taha tagata tohia he Tohi Tapu, liga hūhū a tautolu: ‘Ko e heigoa taha mena ke taui aki e au a Iehova he hana mahani mitaki mai oti kana kia au?’ (Sala. 116:12) Ko e tali kua nakai maeke a tautolu ke taui atu ha mena ke he ha tautolu a Matua he lagi. Ka e omoomoi agaia e logonaaga ha tautolu ke fakaalofa ki a ia. Tohia he aposetolo ko Ioane: “Kua fakaalofa a tautolu, ha ko e mena ne fakamua mai hana fakaalofa kia tautolu.” (1 Ioa. 4:19) He tau puhala fe ka fakakite e tautolu ke he Matua he lagi kua fakaalofa a tautolu ki a ia?

4. Hagaao ke he Iakopo 4:8, kua lata he ha a tautolu ke eketaha ke fakatata atu ki a Iehova?

⁴ Manako a Iehova ki a tautolu ke fakatata ki a ia mo e matutaki mo ia. (Totou Iakopo 4:8.) Tomatoma e ia a tautolu ke “fakamakamaka ke he liogi,” ti fanogonogo tumau a ia ki a tautolu. (Roma 12:12) Nakai lavelave po ke lolelole a ia ke fanogonogo ki a tautolu. Ti fanogonogo a tautolu ki a ia he totou e Kupu haana ko e Tohi Tapu, fakalataha mo e tau tohi kua lagomatai a tautolu ke maama ai. Fanogonogo foki a tautolu ki a ia he hagaaki fakamakutu he tau feleveiaaga Kerisiano. Tuga ni kua lagomatai he matutakiaga mitaki e tau fanau ke pipiki fakatata ke he tau matua ha lautolu, ko e matutaki tumau mo Iehova kua lagomatai a tautolu ke fakatumau e fakatata ki a ia.

5. Maeke fēfē ke fakaholo ki mua e tuaga he tau liogi ha tautolu?

⁵ Manamanatu ke he tuaga he matutakiaga haau mo e Atua. Manako a Iehova ki a tautolu ke liligi atu e tau loto ha tautolu ki a ia he liogi. (Sala. 62:8) Lata a tautolu ke hūhū hifo e hūhū nei: ‘Hihiga kia e tau liogi haaku ke tuga e tau kupu ne fatiaki noa ni kua fakamau, po ke tuga e tau tohi mai he loto ne kua tohilima?’ Nakai fakauaua kua hokulo e fakaalofa haau ki a Iehova, ti manako a koe ke tumau e malolō he fakafetuiaga haau mo ia. Ke taute pihia, lata a koe ke matutaki tumau mo ia. Tutala ki a ia. Tala age e tau fiafia mo e tau mamahi haau ki a ia. Kia mauokafua kua maeke a koe ke ole ki a ia ma e lagomatai.

6. Ko e heigoa kua lata ke taute ke pipiki fakatata ke he ha tautolu a Matua he lagi?

⁶ Ke pipiki fakatata ke he ha tautolu a Matua he lagi, lata a tautolu ke fakatumau e aga fakaaue. Talia a tautolu mo e salamo ne tohia: “Iehova na e, haku Atua, kua loga e tau mena kua eke e koe, ko e hau a tau mana mo e hau a tau manatu kia mautolu, nakai maeke ke talahau atu kia koe; kua fia fakailoa atu e au mo e vagahau ki ai, ka e loga ni, ai maeke he totou.” (Sala. 40:5) He nakai ni logona hifo e tautolu e loto fakaaue; ka e fakakite foki e tautolu e loto fakaaue ki a Iehova ke he tau kupu mo e tau gahua ha tautolu. Taute he mena nei a tautolu ke kehe mai he tokologa he vahā nei. Nonofo a tautolu he lalolagi ne nakai loto fakaaue e tau tagata ke he tau mena oti kua taute he Atua ma lautolu. Ti ko e taha he tau fakakiteaga kua nonofo a tautolu he “tau aho fakamui,” ko e nakai fakaaue e tau tagata. (2 Timo. 3:1, 2) Nakai manako a tautolu ke aga pihia!

7. Ko e heigoa kua manako a Iehova ke taute e tautolu, ti ko e ha?

⁷ Nakai manako e tau matua ke he tau fanau ke taufetoko ka e lata ke kapitiga. Manako foki a Iehova ke he tau fanau oti haana ke femataaki ko e taha ke he taha. Ko e fakaalofa kua moua e tautolu ke he taha mo e taha kua fakakite ko tautolu ko e tau Kerisiano mooli. (Ioane 13:35) Talia a tautolu mo e salamo ne tohia: “Ko e mena mitaki lahi mo e fulufuluola, ke nonofo fakalataha e tau matakainaga.” (Sala. 133:1) Ka fakaalofa a tautolu ke he tau matakainaga, fakakite e tautolu ki a Iehova kua fakaalofa a tautolu ki a ia. (1 Ioa. 4:20) Ko e mena fulufuluola mooli ke fakalataha ke he magafaoa he tau matakainaga taane mo e tau matakainaga fifine kua “totonu ko e taha ke he taha, kia hofihofi [e] fakaalofa”!​—Efeso 4:32.

8. Ia 1 Ioane 5:3, ko e heigoa e kakano ne mua atu e aoga kua omaoma a tautolu ki a Iehova?

⁸ Manako a Iehova ke he tau fanau ke omaoma ke he tau matua ha lautolu, ti manako a Iehova ki a tautolu ke omaoma ki a ia. (Efeso 6:1) Latatonu a ia ke moua e omaoma ha tautolu ha ko ia ko e Tufuga mo e Fakatumau he tau momoui ha tautolu, ti mua atu e iloilo haana ke he tau mamatua oti. Ka ko e kakano ne mua atu e aoga kua omaoma a tautolu ki a Iehova ha kua fakaalofa a tautolu ki a ia. (Totou 1 Ioane 5:3.) Pete  he loga e kakano kua lata a tautolu ke omaoma ki a Iehova, nakai fakaohooho e ia a tautolu ke taute pihia. Foaki mai e Iehova ki a tautolu e mena fakaalofa ko e atāina ke fifili, ti fiafia a ia ka fifili a tautolu ke omaoma ki a ia ha ko e fakaalofa ki a ia.

9-10. Ko e ha kua aoga ke iloa e tau tuaga he Atua mo e momoui fakatatau ki ai?

⁹ Manako e tau matua ke haohao mitaki e tau fanau ha laua. Kakano haia ne fakatoka e laua e tau tuaga he mahani ne puipui e tau fanau ha laua. Ka omaoma e tau fanau ke he tau takitakiaga ia, fakakite e lautolu kua falanaki mo e fakalilifu e lautolu e tau matua. Mua atu e aoga mogoia he iloa e tautolu e tau tuaga he Matua ha tautolu he lagi ti momoui fakatatau ki ai. Ka taute pihia, fakakite e tautolu ki a Iehova kua fakaalofa mo e fakalilifu e tautolu a ia ti aoga foki mogoia ki a tautolu. (Isaia 48:17, 18) Ka ko lautolu ne tiaki a Iehova mo e tau tuaga haana kua fakamamahi e lautolu a lautolu.​—Kala. 6:7, 8.

¹⁰ Ka momoui a tautolu he puhala nukua fakafiafia a Iehova, kua puipui a tautolu mai he hagahaga kelea fakatino, logonaaga, mo e fakaagaaga. Iloa e Iehova e mena ne mua e mitaki ma tautolu. Ko Aurora ne nofo i United States ne pehē, “Iloa e au ko e omaoma ki a Iehova kua moua tumau e moui mitaki.” Mooli tumau e mena ia ki a tautolu oti. Aoga fēfē a koe he omaoma ke he takitakiaga fakaalofa ha Iehova?

11. Lagomatai fēfē he liogi a tautolu?

¹¹ Lagomatai he liogi a tautolu ke omaoma pete ni kua uka ke taute. Falu mogo to taufetului  a tautolu ke omaoma ki a Iehova, ka e lata tumau a tautolu ke totoko e manako ha tautolu ke agahala. Olelalo e salamo ke he Atua: “Kia fakamaama mai kia au, ti omaoma ai e au hāu a fakatufono, mo e fifitaki ki ai ke he loto katoa.” (Sala. 119:34) Ko Denise ko e paionia tumau ne pehē, “Ka uka ia au ke omaoma e taha he tau poakiaga ha Iehova, liogi au ma e malolō ke taute e mena hako.” Iloa tonu e tautolu to tali tumau e Iehova e ole pihia.​—Luka 11:9-13.

12. Ia Efeso 5:1, ko e heigoa kua lata ke taute e tautolu?

¹² Totou Efeso 5:1. Ha ko e “tau fanau fakahelehele” ha Iehova, kua eketaha a tautolu ke fifitaki a ia. Kua fifitaki a tautolu ke he tau mahani haana he fakaalofa, totonu, mo e fakamagalo atu he fakafehagai a tautolu mo e falu. Ka kitia he tau tagata ne nakai iloa e Atua e mahani mitaki ha tautolu, liga omoomoi a lautolu ke fakaako fakalahi hagaao ki a Ia. (1 Pete. 2:12) Ha ha he tau matua Kerisiano e kakano mitaki ke fifitaki a Iehova he puhala kua fehagai a laua mo e tau fanau. Ka taute pihia e laua to manako e tau fanau ke fakatū e fakafetuiaga ni ha lautolu mo e Matua fakaalofa ha tautolu.

13. Ko e heigoa kua lata a tautolu ke hagaaki ki ai?

¹³ Ko e tama tote kua matalahi ke he matua taane haana ti fiafia ke tutala hagaao ke he matua taane. Pihia foki, matalahi a tautolu ke he Matua ha tautolu he lagi ko Iehova, ti manako ke iloa foki he falu a Ia. He tau loto ha tautolu, logona hifo a tautolu oti ke tuga e Patuiki ko Tavita ne tohi: “To fiafia haku agaga kia Iehova.”  (Sala. 34:2) Ka e kua ka mā a tautolu? Maeke fēfē a tautolu ke loto malolō? To tupu e loto malolō ha tautolu ka hagaaki ke he puhala kua fakafiafia e tautolu a Iehova mo e lahi e aoga he falu ne moua mai he fakaako hagaao ki a Ia. To foaki mai e Iehova ki a tautolu e loto malolō kua lata. Lagomatai e Ia e tau matakainaga ha tautolu he senetenari fakamua ke loto malolō, mo e to lagomatai foki e ia a tautolu.​—1 Tesa. 2:2.

14. Ko e heigoa falu kakano ne aoga ke fai vala he gahua taute tutaki?

¹⁴ Nakai fakamailoga tagata a Iehova, ti fiafia a ia ka kitia a tautolu kua fakakite e fakaalofa ke he falu pete e tupumaiaga ha lautolu. (Gahua 10:34, 35) Taha he tau puhala mitaki lahi ka fakakite e tautolu e fakaalofa ke he falu ko e fakamatala e tala mitaki ki a lautolu. (Mata. 28:19, 20) Ko e heigoa ka fakakatoatoa he gahua nei? Ko lautolu kua fanogonogo ki a tautolu ka fakaholo ki mua e tau momoui ha lautolu mogonei mo e moua e amaamanakiaga he moui tukulagi anoiha.​—1 Timo. 4:16.

15-16. Ko e heigoa e tau kakano kua moua e tautolu ke fiafia?

¹⁵ Ko Iehova ko e Matua fakaalofa, ti manako ke he magafaoa haana ke fiafia. (Isaia 65:14) Loga e kakano ka fiafia a tautolu mogonei, pete he liga fehagai mo e tau mena uka. Ma e fakatai, mauokafua ai kua lahi mahaki e fakaalofa he Matua he lagi ki a tautolu. Moua e tautolu e iloilo tonu he Kupu he Atua ko e Tohi Tapu. (Iere. 15:16) Ti fakalataha a tautolu ke he magafaoa pauaki he tau tagata kua fakaalofa ki a Iehova, fiafia ke he mahani mitaki haana, mo e fefakaalofaaki.​—Sala. 106:4, 5.

¹⁶ Fakatumau a tautolu ke fiafia ha kua moua e amaamanakiaga mooli to mua e mitaki he moui anoiha. Iloa e tautolu to nakai leva ti utakehe e Iehova e tau mahani kelea oti kana, mo e i lalo he takitakiaga he Kautu haana to liu e lalolagi ke eke mo Parataiso. Moua foki e tautolu e amaamanakiaga homo ue atu ko lautolu ne mamate to liu fakatū mai ke he moui ti liu fakalataha mo e tau fakahele ha lautolu. (Ioane 5:28, 29) Ko e magaaho fiafia mooli! Mua atu, iloa e tautolu to nakai leva ti foaki e lautolu oti kana he lagi mo e lalolagi e lilifu, fakaheke, mo e tapuakiaga kua latatonu mo e Matua fakaalofa ha tautolu.