1-2. Kubayini uJehova asenze saba yingcenye yomndenakhe begodu ukwenze njani lokho?

UJEHOVA usimeme bona sibe yingcenye yomndeni wabakhulekeli bakhe. Leso simemo esiqakatheke kwamambala. Umndenethu wakhiwa babantu abazinikele kuZimu begodu abakholelwa emhlatjelweni wesihlengo seNdodanakhe. Simndeni othabileko. Siyakuthabela ukuphila begodu sithabela nethemba lokufumana ukuphila okungapheliko, kungakhathaliseki bona ngelokuphila ezulwini namkha ephasini ePharadesi.

² UJehova ukwenze kwabalula ukuthi sibe yingcenye yomndenakhe ngombana usithanda kwamambala, ukuze asitjengise ukuthi usithanda kangangani usenzele isihlengo. (Jwa. 3:16) ‘Sathengwa ngentengo.’ (1 Kor. 6:20) Ngebanga lesihlengo, uJehova wenze kwakghoneka ngathi ukuthi sibe nobuhlobo obuhle naye. Sinelungelo lokubiza uMuntu omkhulu kunabo boke ephasini ngokuthi Baba. Njengombana sifundile esihlokweni esidlulileko, uJehova unguBaba ophuma phambili.

3. Ngimiphi imibuzo esingazibuza yona? (Qala nebhoksi elinesihloko esithi, “ Kghani UJehova Uyangazi?”)

³ Njengomunye umtloli weBhayibheli, singazibuza: “Yini lokho engingakhokhela ngakho uSomnini, ngalokho okuhle angenzele khona na?” (Rhu. 116:12) Ipendulo kukuthi angekhe sakghona ukubhadela uBabethu wezulwini. Nanyana kunjalo, sizizwa simthanda. Umpostoli uJwanisi wabhala:  “Siyathanda ngombana yena usithande qangi.” (1 Jwa. 4:19) Singamtjengisa ngaziphi iindlela uBabethu wezulwini ukuthi siyamthanda?

4. Ngokomtlolo kaJakopo 4:8, kubayini kufuze senze umzamo wokuhlala sitjhidele kuJehova?

⁴ UJehova ufuna sitjhidele kuye begodu sikhulume naye. (Funda uJakopo 4:8.) Usincenga bona ‘siphikelele emthandazweni’ begodu uhlala asilalele ngaso soke isikhathi. (Rom. 12:12) Akadinwa kusilalela. Nathi simlalela ngokufunda iBhayibheli neencwadi ezisekelwe kilo ezisisiza bona silizwisise. Simlalela nangokuthi silalelisise nasisesifundweni. Njengombana ukukhulumisana okuhle kwenza abantwana batjhidelane nababelethi babo, nokukhuluma qobe noJehova kusisiza bona sihlale sitjhidele kuye.

5. Imithandazwethu nayizakwamukeleka kuJehova kufuze sithandaze njani?

⁵ Zibuze ukuthi imithandazwakho injani. UJehova ufuna simtjele koke okuseenhliziyweni zethu nasithandazako. (Rhu. 62:9) Yeke senza kuhle nasizibuza ukuthi: ‘Kghani imithandazwami ngeyokuzenzisa, ifana nomlayezo otlolwe phasi namkha ifana nencwadi etlolwe ngokusuka ehliziyweni?’ Akunakuzaza ukuthi umthanda ngokusuka ehliziyweni uJehova begodu ufuna ubuhlobo bakho naye buhlale buqinile. Nawuzakwenza njalo, kufuze ukhulume naye qobe, umtjele ngendlela ozizwa ngayo, umtjele ngezinto ezikuzwisa ubuhlungu nezinto ezikuthabisako. Qiniseka ngokuthi ungathandaza kuye, ubawe isizo.

6. Kufuze senzeni nasizakuhlala sitjhidele kuBabethu wezulwini?

⁶ Nasizakuhlala sitjhidelene noBabethu wezulwini kufuze simthokoze ngaso soke isikhathi. Kufuze sivumelane noMrhubi owatlola wathi: “Wena Somnini Zimami, akakho ongafaniswa nawe: Uzandisile iimangaliso nemizindlwakho ngathi. Nangifuna ukuyitjho engikhuluma ngayo, iba minengi khulu kobana ingabalwa.” (Rhu. 40:5) Senza okungaphezu kokuthokoza, sitjengisa indlela esithokoza ngayo uJehova ngamezwethu nangezenzo zethu. Lokho kusenza sihluke ebantwini esiphila nabo. Siphila ephasini nabantu abangathokozi ngakho koke uZimu abenzele khona. Kuhlekuhle into etjengisa ukuthi siphila “emihleni yokuphela” kukuthi abantu abasathokozi. (2 Thim. 3:1, 2) Kwangathi singawubalekela umoya loyo!

7. UJehova ufuna senzeni begodu kubayini?

⁷ Ababelethi abafuni abantwana babo balwe, kunalokho bafuna babe bangani. Ngokufanako, uJehova ufuna bona boke abantu abamlotjhako bazwane. Ithando esinalo litjengisa ukuthi simaKrestu weqiniso. (Jwa. 13:35) Sivumelana nomRhubi owatlola wathi: “Maye kuhle, kumnandi kangangani ukuhlalisana kwabafo ndawonye!” (Rhu. 133:1) Nasithanda abafowethu nabodadwethu, sitjengisa uJehova ukuthi siyamthanda. (1 Jwa. 4:20) Qala bona kuthabisa kangangani ukuba yingcenye yomndeni wabafowethu nabodadwethu ‘abanomusa komunye nomunye, nabarhawukelana ngesisa’!—Efe. 4:32.

8. Ngokomtlolo kaJwanisi 5:3, ngiliphi ibanga eliqakathekileko elisenza silalele uJehova?

⁸ UJehova ufuna abantwana balalele ababelethi babo begodu ufuna ukuthi nathi simlalele. (Efe. 6:1) Ufanelwe kukuthi simhloniphe ngombana wasidala, usinikele ukuphila begodu umbelethi ohlakaniphe ukubadlula boke. Nanyana kunjalo, ibanga eliqakathekileko elenza sihloniphe uJehova  kukuthi siyamthanda. (Funda yoku-1 kaJwanisi 5:3.) Ngitjho nanyana kunamabanga amanengi asenza sihloniphe uJehova, akasikateleli bona simhloniphe. UJehova usinikele itjhaphuluko yokuzikhethela, kodwana uyathaba nasikhetha ukumlalela ngombana simthanda.

9-10. Kubayini kuqakathekile ukwazi iinkambiso zakaZimu begodu siphile ngazo?

⁹ Ababelethi bafuna abantwana babo bahlale baphephile. Kungebangelo babekela abantwana babo imithetho ebavikelako. Abantwana nabalalela imithetho le batjengisa ukuthi bayabahlonipha ababelethi babo begodu bayabathemba. Indaba le iqakatheke khulu naziza kuJehova nekulaleleni imithethwakhe begodu siphile ngayo. Nasenza njalo, sizabe sitjengisa ukuthi siyamthanda uJehova begodu siyamhlonipha begodu lokho kuzokuzuzisa thina. (Isa. 48:17, 18) Okuhluke khulu kukuthi labo abangalaleli imithetho neenkambiso zakaJehova bazilimaza bona.—Gal. 6:7, 8.

¹⁰ Nasiphila ngendlela ethabisa uJehova sizokuvikeleka ezintweni ezingasilimaza umkhumbulo, umzimba kunye nobuhlobo bethu noJehova. UJehova uyazi bona khuyini esilungeleko. U-Aurora we-United States uthi: “Ngiyazi ukuthi ukulalela uJehova kunemiphumela emihle khulu ekuphileni.” Mbala amazwi la aliqiniso. Uzuze njani ngokulalela imithetho neenqophiso zakaJehova?

11. Ukuthandaza kusisiza njani?

¹¹ Umthandazo usisiza bona silalele ngitjho  nanyana siqalene neenkhathi ezibudisi. Ngezinye iinkhathi kuzokuba budisi ukulalela uJehova, kodwana kufuze siragele phambili silwisana nesono. Umrhubi wabawa uJehova wathi: ‘Ngivuselele ummoya olalelako ngaphakathi kwami.’ (Rhu. 51:12) UDenise oliphayona lesikhathi esizeleko uthi: “Nangikufumana kubudisi ukulalela uJehova ngiyathandaza bona anginikele amandla wokwenza okulungileko.” Singaqiniseka ngokuthi uJehova uzokuhlala ayiphendula imithandazo enjalo.—Luk. 11:9-13.

12. Ngokomtlolo webe-Efesu 5:1, khuyini okufuze siyenze?

¹² Funda kwebe-Efesu 5:1. “Njengabantwana abathandekako” bakaJehova, senza koke okusemandleni bona simlingise. Silingisa ubuntu bakhe ngokuthi sithande abanye, sibalibalele begodu sibe nomusa kibo. Abantu abangamlotjhiko uZimu nababona indlela esiziphatha ngayo, lokho kuzobenza bona bafune ukwazi okungeziweko ngaye. (1 Pit. 2:12) Ababelethi abamaKrestu kufuze balinge ukwenza koke okusemandleni bona baphathe abantwana babo ngendlela uJehova asiphatha ngayo. Nabenza njalo, abantwana bangafuna ukuba nobuhlobo noZimu uBabethu onethando.

13. Khuyini ekufuze siyenze nasizakuba nesibindi?

¹³ Ngokuvamileko abantwana bayazikhakhazisa ngabobaba babo begodu bayakuthabela ukukhuluma ngabo. Ngendlela efanako nathi siyazikhakhazisa ngoBabethu wezulwini  uJehova begodu sifuna nabantu bazi ngaye. Eenhliziyweni zethu sizizwa njengeKosi uDavida eyatlola yathi: “USomnini ngizomdumisa ngeenkhathi zoke.” (Rhu. 34:2) Kuthiwani nange sisaba ukukhuluma ngoZimu? Singasithathaphi isibindi sokukhuluma ngaye? Nasingacabanga bona kuzomthabisa kangangani uJehova ukusizwa sikhuluma ngaye, lokho kuzosinikela isibindi sokobana sikhulume ngaye. UJehova uzosinikela isibindi. Wakghona ukusiza amaKrestu weenkhathi zekadeni begodu nathi uzosisiza bona sibe nesibindi.—1 Thes. 2:2.

14. Ngimaphi amabanga enza kuqakatheke ukuthi sihlanganyele emsebenzini wokwenza abafundi?

¹⁴ UJehova akakhethi begodu uyakuthabela ukusibona sitjengisa abanye ukuthi siyabathanda, kungakhathaliseki ukuthi isizinda sabo sinjani nokuthi bamhlobobani. (IzE. 10:34, 35) Indlela engcono khulu esingatjengisa ngayo abantu ukuthi siyabathanda kubatjela iindaba ezimnandi zakaZimu. (Mat. 28:19, 20) Umsebenzi lo ungafezani? Labo abasilalelako bangathuthukisa ukuphila kwabo begodu babe nethemba lokuphila epharadesi ephasi.—1 Thim. 4:16.

15-16. Sinamaphi amabanga wokuhlala sithabile?

¹⁵ UJehova mbelethi onethando, yeke ufuna bona umndenakhe uthabe. (Isa. 65:14) Sinamabanga amanengi wokuthaba ngitjho nanyana siqalana neenkhathi ezibudisi. Ngokwesibonelo, asinakuzaza ukuthi uBabethu wezulwini uyasithanda. Sinelwazi elinembileko leliZwi lakaZimu iBhayibheli. (Jor. 15:16) Siyingcenye yomndeni ohlukileko othanda uJehova, imithethwakhe nabantu bakhe.—Rhu. 106:4, 5.

¹⁶ Singakghona ukuhlala sithabile ngombana siyazi ukuthi esikhathini esingaphelisi ihliziyo izinto zizokuba ngcono. NgomBuswakhe uJehova uzokuqeda boke ubumbi. Iphaseli lizokuba yiPharadesi godu. Sinethemba lokuthi abahlongakeleko bazokuvuswa begodu sizokuphila nabo godu. (Jwa. 5:28, 29) Leso kuzokuba sikhathi esihle kwamambala. Okuqakatheke kunakho koke kukuthi msinyana woke umuntu ezulwini nephasina uzokunikela uBabethu onethando idumo nehlonipho emfaneleko.