1-2. Haʼátʼíí biniyé áádóó haitʼéego éí Jiihóvah baʼáłchíní diidleełgo nihá ąą áyiilaa?

JIIHÓVAH éí wóshdę́ę́ʼ shaʼáłchíní dashidósinii bidiinááh nihidííniid. Díí ayóó átʼéego baa hózhǫ́! Nihí éí Diyin baa ádaʼdeetʼánígíí ádeiitʼı̨́, áádóó biYeʼ nááʼádiisʼniiʼgi deiniidlą́ągo bikʼehgóó ádaniitʼé. Índa nihił dahózhǫ́ǫgo dah yiikah. Azhą́ yáʼąąshdi doodaiiʼ nahasdzáán bikáaʼgi iiná doo ninítʼiʼii nihá bee chohooʼı̨́ı̨́ shı̨́į ndi, nihił dahózhǫ́.

² Jiihóvah éí ayóóʼóʼóʼníigo áádóó ayóó átʼéego ílı̨́įgo bitsʼáʼnídéelgo éí baʼáłchíní diidleeł yiniyé átʼı̨́. (John 3:16) Éí “ayóó átʼéego ílı̨́įgo nihikʼé” nináʼílyáago binahjįʼ Jiihóvah bił kʼéʼahidiiʼníigi nihá bohónéedzą́ągo áyiilaa. (1 Cor. 6:20) Áko yá biiʼ adahwiisʼáágóó ayóó átʼéii nilíinii Shizhéʼé dabidiiʼníigo baa hózhǫ́. Baa nídasíitʼįįdgo Jiihóvah éí Azhéʼé tsʼídá yáʼátʼéehii nilı̨́.

3. Haʼátʼíí bínaʼádíilkid doo? (“ Jiihóvaásh Shaa Ákonízin?” níníłʼı̨́.)

³ Diyin Bizaad yikʼeʼashchínígíí łaʼ ání: Jiihóvah “tʼáá ałtsoní shaa yiiznilii haʼátʼíishąʼ bee bichʼįʼ kʼéédideeshʼnííł?” (Ps. 116:12) Jiihóvah bee bichʼįʼ kʼéédidííʼníiłii ádin. Ákondi ayóóʼííníiʼní. Yilʼaadii John ání, “Diyin God átsé ayóóʼánihóʼníigo bąą ayóóʼádeíníiʼní.” (1 John 4:19) Áko yáʼąąshdę́ę́ʼ Nihizhéʼé nilíinii haitʼéego ayóóʼádeíníiʼníi doo?

4. James 4:8 bikʼehgo haʼátʼíí biniyé Jiihóvah tʼáá ahánígo bił nílı̨́į doo?

⁴ Jiihóvah éí ahánígo shił nílı̨́ áádóó shichʼįʼ yáníłtiʼ  nihóʼní. (James 4:8 yíníłtaʼ, NW.) * “Tʼáá áłahjįʼ sodadołzin” nihiłní. (Rom. 12:12) Doo ádanihideeláa da, háálá tʼáá áłahjįʼ nihíísístsʼą́ą́ʼ nihiłní. Áádóó nihídóó éí Bizaad yiiniiltaʼ doo, índa publications ádaalyaagi yíníiltaʼgo binahjįʼ Diyin Bizaad bikʼidiʼyítįįh doo. Áádóó Kingdom Hallgi áłah néidleehgi ałdóʼ hazhóʼó íísíníłtsʼą́ąʼ doo. Áłchíní yázhí éí bizhéʼé dóó bimá nizhónígo yił ałchʼįʼ yádaałtiʼígi átʼéego tʼáá ahą́ą́h Jiihóvah bił ałchʼįʼ yádeiiltiʼgo éí ahánígo bił honiidlǫ́ǫ doo.

5. Nihisodizin haitʼéhígíí Jiihóvah bił yáʼátʼééh?

⁵ Diyin haitʼéego bichʼįʼ sodílzingi hazhóʼó baa nitsíníkees. Jiihóvah éí nihijéí tłʼááhdę́ę́ʼ nihidaʼdiiłʼáii bee shił dahołneʼ nihiłní. (Ps. 62:8) Áko díí baa nitsíikees doo: ‘Tʼáásh aaníí, tʼóósh beʼelyaa, doodaiiʼ tʼóósh ádíshníigo sodiszin?’ Bééhózinígo Jiihóvah éí ayóóʼííníʼní, áádóó bił kʼéʼahidiʼníigi bidziilgo íínísin doo nínízin. Ákótʼée doo nínízingo éí tʼáá áłahjįʼ bichʼįʼ sodílzin doo. Łaʼda doo bee bił hojólneʼii ádaatʼéii bee bił hólneʼ. Baa nihił hózhóonii índa doo baa nihił hózhóonii bee bił hwiilneʼ doo. Áádóó tʼáá aaníí shíká adoolwoł nínízingo bichʼįʼ díníʼı̨́ı̨́ʼ.

6. Yáʼąąshdę́ę́ʼ Nihizhéʼé éí haitʼéego ahánígo bił honiidlǫ́ǫ doo?

⁶ Yáʼąąshdę́ę́ʼ Nihizhéʼé ahánígo bił honiidlǫ́ǫ doogo éí ahééh niidzin doo. Psalmist ánínígi átʼéego: Jiihóvah “shiDiyin God nílíinii, dooládóʼ ayóó ádaatʼéii tʼóó ahayóí łaʼ yinilaa da lá, áádóó bee nihaa nitsíníkeesígíí tʼóó ahayóí lá, áko éí baa hashneʼii doo bee nił ahozhʼnoolnííh átʼée da, áádóó baa ahoʼniishneʼgo doo jóołtaʼ ánéelą́ąʼ da doo.” (Ps. 40:5) Doo éí tʼóó ahééh niidzin da doo, ndi nihizaad índa íiʼníiłgi bee ííshjání íilʼı̨́į doo. Ląʼí diné éí Diyin bá áátʼįįdgi doo yaa ahééh danízin da, ndi nihí éí doo ákóniitʼée da. Háálá “nihoogháahjįʼ yoołkáałgo” kéédahwiitʼı̨́, áko diné doo ahééh danízin da. (2 Tim. 3:​1, 2) Tsʼídá tʼááká ákódaniitʼéé yíilaʼ!

7. Jiihóvah éí haʼátʼíí nihił nayólí áádóó éí haʼátʼíí biniyé?

⁷ Azhéʼé dóó amá éí baʼáłchíní ałkʼis dajílı̨́į doo, tʼáadoo ałkʼijįʼ saad nijisʼání doo yóʼníi łeh. Tʼáá ákótʼéego Jiihóvah éí baʼáłchíní ahił dajílı̨́į doo yóʼní. Háálá ayóóʼóʼóʼní éí Oodlání bee bééhoʼdílzin. (John 13:35) Psalmist łaʼ íʼiilaago ání: “Ałkʼisóó danilíinii tʼáá łaʼ bizhiʼee kééhatʼı̨́įgo dooládóʼ yáʼátʼéeh da índa dooládóʼ baa hózhǫ́ǫ da!” (Ps. 133:1) Nihibrothers dóó nihisisters ayóóʼííníiʼníigo éí Jiihóvah ałdóʼ ayóóʼííníiʼníigo átʼé. (1 John 4:20) Nihibrothers dóó nihisisters éí ‘ahidiníłnáago ahaa dajoobaʼ, índa ahaa aʼááh’ danízingo bitahgi honiidlǫ́ǫgo baa hózhǫ́!—Eph. 4:32.

8. 1 John 5:3 bikʼehgo haʼátʼíí íiyisíí biniyé Jiihóvah bikʼeh honiilʼı̨́?

⁸ Jiihóvah éí áłchíní bizhéʼé dóó bimá yikʼeh dahółʼı̨́į doo yóʼní. Áko nihí ałdóʼ bikʼeh dahoniilʼı̨́į doo nihóʼní. (Eph. 6:1) Háálá binahjįʼ iináanii Ánihiilaii nilı̨́. Áádóó azhéʼé dóó amá danilíinii tsʼídá yiláahdi hóyą́. Íiyisíí biniyé bikʼeh dahoniilʼínígíí éí ayóóʼííníiʼní. (1 John 5:3 yíníłtaʼ.) Ndi doo éí yínihiniłchéehgo bikʼeh honiilʼı̨́į da. Éí free will wolyéhígíí nihainílá. Áko tʼáá nihí bikʼeh honiilʼı̨́įgo ayóóʼííníiʼníigo yaa bił hózhǫ́.

9-10. Jiihóvah yee hasʼáanii nihił bééhózin doogi áádóó bikʼehgo yiidáałgo haʼátʼíí biniyé ílíinii átʼé?

 ⁹ Azhéʼé dóó amá éí baʼáłchíní doo atídooníił da nízin łeh. Áko áłchíní bá yáʼátʼéeh doogo yee hasʼáanii yisłá. Díí shá yáʼátʼééh nízingo bizhéʼé dóó bimá yikʼeh hółʼı̨́įgo bił nilı̨́į łeh. Áko Nihizhéʼé Jiihóvah kótʼéego yee hasʼáanii nihá yisłáago bikʼehgóó yiidáał doo. Ákwíitʼı̨́įgo éí Jiihóvah ayóóʼííníiʼní índa nihił nilı̨́, áádóó nihá yáʼátʼééh. (Isa. 48:​17, 18) Ákondi Jiihóvah índa yee hasʼáanii doo deinízinii tʼáá bí atíʼádaʼdoolnííł.—Gal. 6:​7, 8.

¹⁰ Jiihóvah bił honiishǫ́ǫgo yiidáałgo éí atsʼíís dóó yíní siláagi, índa Jiihóvah bił kʼé haʼníigi nihá yaa áhályą́. Jiihóvah éí haʼátʼíí shı̨́ı̨́ nihá yáʼádaatʼéehii bił bééhózin. Aurora United States biiʼ haghan éí ájíní: “Shił bééhózingo Jiihóvah bikʼeh hóʼı̨́įgo tsʼídá yáʼátʼéehgo iiná bił nítʼiʼ.” Díí tʼáá aaníí ákótʼé. Jiihóvah bibee ayóóʼóʼóʼniʼ yee hasʼáanii nihá yisłáhígíí bikʼeh honíłʼı̨́įgo haitʼéego níká eelwod?

11. Sodizin haitʼéego nihíká adoolwoł?

¹¹ Jiihóvah bikʼeh hóʼı̨́įgi nihá nantłʼa ndi, sodizin nihíká análwoʼgo átʼé. Tʼáá áníiltso nidaʼiyiilzííh, áko wołí bee ájítʼı̨́įgo tʼéiyá bikʼeh jididleeh. Psalmist łaʼ Diyin náyookąąhgo ání: “Íinisingo nikʼeh honishʼı̨́įgo bee de áshíínísin.” (Ps. 51:​12, NW) Denise, pioneer nilı̨́įgo ání: “Jiihóvah bibee hazʼáanii łaʼ bikʼeh honishʼı̨́į dooleełgi shá nantłʼa yileehgo, éí bichʼįʼ shidziilgo yaʼátʼééhjí ádeeshnííł dishníigo  sodíszįįh.” Áko tʼáá aaníí Jiihóvah éí kótʼéego sodizin bee néiniikąąhgo nihíká adoolwoł.—Luke 11:​9-13.

12. Ephesians 5:1 éí haʼátʼíí ádadiiʼnííł nihiłní?

¹² Ephesians 5:1 yíníłtaʼ. Jiihóvah “baʼáłchíní ayóóʼáyóʼnínígíí” daniidlı̨́įgi wołí bee ádeitʼı̨́įgo Jiihóvah bedaʼiilʼı̨́. Éí bibee ayóóʼóʼóʼniʼ, bibee ajoobaʼ, índa aa neidiyiiʼaahgi bedaʼiilʼı̨́. Diyin doo yéédahósinii éí yáʼátʼéehgo oodáałgi yee hadanihisííd áádóó éí binahjįʼ Jiihóvah baa íhwiideeshʼááł daniizįįh. (1 Pet. 2:12) Azhéʼé dóó amá Oodlání danilíinii éí Jiihóvah bedaʼjiłʼı̨́įgo haʼáłchíní daznisée doo. Ákódajitʼı̨́įgo éí haʼáłchíní tʼáá bí Jiihóvah Nihizhéʼé ayóóʼóʼóʼníinii nizhónígo bikʼis ádeidoolííł.

13. Haitʼéego éí doo siitiʼ da doo?

¹³ Áłchíní yázhí éí bizhéʼé yaa bił hózhǫ́ǫgo nizhónígo yaa yáłtiʼ łeh. Nihí ałdóʼ tʼáá ákótʼéego yáʼąąshdę́ę́ʼ Nihizhéʼé Jiihóvah baa nihił dahózhǫ́ǫgo diné béédahodoosįįł biniyé bee bił dahwiilneʼ doo. Naatʼáanii David ádííniid yę́ęgi átʼéego nidanihiiłná, éí ání: “Shí éí Jiihóvah baa hashniih.” (Ps. 34:2) Ákoshąʼ ayóó yániidzingo, haitʼéego éí doo siitiʼgo yéiiltiʼ doo? Jiihóvah bił honiilzhǫ́ǫgo índa łaʼda yíhwiidoołʼáałgi bíká adiilwołgi baa nitsíikeesgo éí doo siitiʼgóó baa hwiilneʼ doo. Jiihóvah éí doo  siitiʼgóó ániitʼée dooleełgi yee nihíká análwoʼ doo. Tʼáá ałkʼidą́ą́ʼ nihibrothers yę́ę doo daastiʼ dago Jiihóvah bíká aalwod, nihí ałdóʼ nihíká adoolwoł.—1 Thess. 2:2.

14. Íhoołʼaahii álnéehgi atah bineilnish dooleełgi haʼátʼíí biniyé ílı̨́?

¹⁴ Jiihóvah éí diné aheełtʼéego yaa nitsikees. Háádę́ę́ʼ shı̨́ı̨́ diné yigáał ndi, éí ayóóʼííníiʼníigo Jiihóvah yaa bił hózhǫ́. (Acts 10:​34, 35) Diné ayóóʼííníʼníigo éí nizhónígo baa haneʼii bee bił hwiilneʼ doo. (Matt. 28:​19, 20) Díí átʼéego nahaneʼgo haʼátʼíí łaʼyidoolííł? Jó éí, danihíistsʼą́ʼígíí beʼiinaʼ yáʼátʼéehgo chʼídeiidoołtʼiʼ. Áádóó náasdi iiná doo ninítʼiʼ bá silá.—1 Tim. 4:16.

15-16. Haʼátʼíí biniyé nihił dahózhǫ́?

¹⁵ Jiihóvah éí azhéʼé dóó amá ayóóʼóʼóʼnínígi átʼé. Áko baʼáłchíní bił dahózhǫ́ǫ doo nízin. (Isa. 65:14) Azhą́ shı̨́ı̨́ nihichʼįʼ nidahwiiʼnáa ndi, baa nihił dahózhǫ́ǫ dooleełii tʼóó ahayóí.  Éí yáʼąąshdę́ę́ʼ Nihizhéʼé nilíinii ayóóʼánihóʼníigo deiniidlą́. Bizaad tsʼídá tʼáá aaníí átʼéii yee naʼnitingi nihił béédahózin. (Jer. 15:16) Áádóó bidineʼé dah yikahdóó bitah honiidlǫ́ǫgo éí Jiihóvah índa bibee hazʼáanii ayóóʼádeiyóʼní, áádóó ahidiníłnáago ayóóʼádaʼahóʼní.—Ps. 106:​4, 5.

¹⁶ Tʼáá nihił dahózhǫ́ǫ doo, háálá nihił béédahózingo iiná tsʼídá yáʼátʼééh nídadoodleeł. Jiihóvah éí tʼáá ałtso baaʼihgo baa ooldáhígíí ałtxsoh nahjįʼ kwíidoolííł. Áádóó biNahatʼaʼ biyaadóó nahasdzáán tʼáá siʼą́ą́ ńtʼééʼ tsʼídá honóoshónígo ánéidoodlííł. Áádóó ádaadin yę́ę iiná yaa néidíyoodlééł, áko bikʼéí yił ahinéiidookah. (John 5:​28, 29) Díidi ayóó átʼéego baa hózhǫ́ǫ dooleeł! Tsʼídá aláahdiígíí éí tʼáá ałtso yáʼąąshdi índa nahasdzáán bikááʼ dahináanii éí Nihizhéʼé ayóóʼóʼóʼníinii baa dahojiniih doo, áádóó bichʼįʼ dahozhdóhsin doo, háálá tʼáá bí tʼéiyá yą́ą́h nilı̨́.