1-2. Ahabw’enki Yehova yaatuteeraireho omuhanda gw’okuba bamwe aha b’eka ye, kandi akakikora ata?

YEHOVA atwetsire kwegaita aha ka ye ey’abarikumuramya. Ogu ka n’omugisha gw’amaani! Eka yaitu erimu abantu abeehaireyo ahari Ruhanga, kandi abarikwikiririza omu kitambo ky’Omwana we. Buri omwe omu ka egi ashemereirwe munonga. Twine embeera nungi hati, kandi twine amatsiko g’okugumaho ebiro byona, abamwe omu iguru kandi abandi omu Paradiso omu nsi.

² Yehova ahabw’okutukunda n’okwefeerereza, akatuteeraho entebeekanisa y’okuba bamwe aha b’eka ye. (Yoh. 3:16) ‘Tukagurwa n’obuguzi bwingi.’ (1 Kor. 6:20) Yehova arikwihirira aha kitambo, akatubaasisa kutunga omukago murungi nawe. Twine ekitiinisa ky’okweta ogwo orikukirayo omu nsi n’omu iguru Tataitwe. Kandi nk’oku tureebire omu kicweka ekihwaire, Yehova niwe Tataitwe orikukirira kimwe abandi boona.

3. Nitubaasa kwebuuza bibuuzo ki? (Reeba n’akabokusi, “Yehova  Buzima Naakumanya Gye?”)

³ Nk’omuhandiiki wa Baibuli omwe, naitwe nitubaasa kwebuuza tuti: ‘Niki eki ndikwija kuzimuurira [Yehova], ahabw’ebirungi bye byona ebi yaankoreire?’ (Zab. 116:12) Eky’okugarukamu kiri ngu tihaine eki turikubaasa kushashura Tataitwe ow’omu iguru. Kwonka, eki yaatukoreire nikituhiga kumukunda. Entumwa Yohaana akahandiika ati: “Itwe nitukunda, ahakuba We akabanza kutukunda.” (1 Yoh. 4:19) Nitubaasa kworeka tuta ngu nitukunda Tataitwe ow’omu iguru?

4. Kurugiirira ahari Yakobo 4:8, ahabw’enki twine kuteeraho kwirira haihi Yehova?

⁴ Yehova naayenda ngu tumwirire haihi kandi tuhurizane nawe. (Shoma Yakobo 4:8.) Naatuhiga ‘kugumizamu nitushaba  tuhamire,’ kandi butoosha naaba ariho obwire bwona. (Rom. 12:12) Tarikubaasa kuburwa obwire nari kuruha kutuhurikiza. N’ahabw’ekyo, nitumuhurikiza turikushoma Ekigambo kye Baibuli, n’ebitabo ebirikutuhwera kukyetegyereza. Kandi nitumuhurikiza turikutaho omutima omu nteerane z’Ekikristaayo. Nk’oku okugaaniira kurungi kurikuhwera abaana kugira omukago murungi n’abazaire baabo, okugaaniira na Yehova butoosha nikituhwera kuguma haihi nawe.

5. Nitubaasa kuboneza tuta omutindo gw’okushaba kwaitu?

⁵ Teekateeka aha mutindo gw’okugaaniira kwawe na Yehova. Yehova naayenda ngu tumugambire ebiteekateeko byaitu n’enyehurira zaitu kurabira omu kushaba. (Zab. 62:8) Twine kwebuuza ekibuuzo eki: ‘Ninshaba kuhitsya omukoro, ndikuguma niinkoresa ebigambo nibyo bimwe, nari okushaba kwangye nikuruga aha mutima nk’obutumwa obu mpandiikiise engaro zangye?’ Hatariho kubangaanisa, nookunda munonga Yehova, kandi nooyenda kuguma oine omukago murungi nawe. Kubaasa kukora otyo, oine kuguma noogaaniira nawe butoosha. Muhindure obuhungiro bwawe. Mugambire okushemererwa kwawe n’obusaasi bwawe. Gira obuhame ngu noobaasa kumushaba obuhwezi obwire bwona.

6. Twine kukora ki kubaasa kuguma turi haihi na Tataitwe ow’omu iguru?

⁶ Kubaasa kuguma haihi na Tataitwe ow’omu iguru, twine kumusiima obutoosha. Nitwikirizana n’omuhandiiki wa Zaaburi owaagizire ngu, ai Yehova “Ruhanga wangye, eby’okutangaaza, ebi waakozire, n’ebiteekateeko ebi otuteekateekaho ka ni bingi! Tihariho orikwingana naiwe. Ku naakwenda kubigamba n’okubitondoora, ni bingi, tibirikubaasa kubarwa.” (Zab. 40:5) Nitukora ekirikukira aha kugira enyehurira y’okusiima, omu mwanya gw’ekyo nitworeka ngu nitusiima Yehova omu bigambo n’omu bikorwa. Eki nikitureetera kuba ab’omutaano aha bantu baingi obunaku obu. Nitutuura omu nsi ahu abantu baingi batarikusiima na kakye ebi Ruhanga arikubakorera. Nangwa, akamanyiso kamwe akarikworeka ngu turi omu ‘biro by’emperu’ n’okugira ngu abantu n’entasiima. (2 Tim. 3:1, 2) Ka tuteereho kutagira emiteekateekyere egyo!

7. Yehova naayenda ngu tukore ki, kandi ahabw’enki?

⁷ Abazaire nibaba batarikwenda abaana baabo kuryana, kureka nibaba nibenda ngu bakundane. Nikyo kimwe, Yehova nawe naayenda ngu abaana be babe nibakwatanisa gye. Buzima, okukundana kwaitu n’akamanyiso akarikworeka ngu turi Abakristaayo abaabuzima. (Yoh. 13:35) Nitwikirizana n’omuhandiiki wa Zaaburi owaahandiikire ati: ‘Ka ni kirungi kandi ekirikushemeza, ab’eishe-emwe kutuura hamwe nibakwatanisa!’ (Zab. 133:1) Twakunda ab’eishe-emwe na banyaanyazi-itwe, nitworeka ngu nitukunda Yehova. (1 Yoh. 4:20) Ka ni kirungi kuba omu ka y’ab’eishe-emwe na banyaanyazi-itwe ‘abarikukorerana gye, bakagirirana n’embabazi’!​—Efe. 4:32.

8. Kurugiirira ahari 1 Yohaana 5:3, ni nshonga ki enkuru erikutureetera kworobera Yehova?

⁸ Yehova naayenda ngu abaana boorobere abazaire baabo, kandi naitwe naayenda ngu tumworobere. (Efe. 6:1) Tushemereire kumworobera ahakuba n’Omuhangi waitu, Orikubaisaho amagara gaitu, kandi n’omunyabwengye kukirira kimwe abazaire baitu. Kwonka enshonga nkuru ahabw’enki nitworobera Yehova, n’ahabw’okugira ngu nitumukunda. (Shoma 1 Yohaana 5:3.) N’obu turaabe twine enshonga nyingi ahabw’enki twine kworobera Yehova, tarikutugyema kumworobera. Yehova akatuha ekiconco ky’okwecweramu, n’ahabw’ekyo  naashemererwa twacwamu kumworobera ahabw’okumukunda.

9-10. Ahabw’enki kiri kikuru kumanya emitindo ya Ruhanga n’okugigyenderaho?

⁹ Abazaire nibaba nibenda abaana baabo kuhurira baine oburinzi. Niyo nshonga ahabw’enki nibataho emitindo y’emitwarize, erikugasira abaana baabo. Abaana baayorobera engyenderwaho egyo, nibooreka ngu nibeesiga abazaire baabo kandi ngu nibabaha ekitiinisa. Ka nikiba kiri kikuru, ngu tumanye emitindo ya Tataitwe ow’omu iguru kandi tugigyendereho. Twakora tutyo, nitworeka ngu nitumukunda, nitumuha ekitiinisa, kandi naitwe nitugasirwa. (Isa. 48:17, 18) Kwonka abo abarikwanga Yehova n’emitindo ye nibahendera beereeteire obusaasi.​—Gal. 6:7, 8.

¹⁰ Twatwaza omu muringo ogurikushemeza Yehova, naija kuturinda kutahikwaho akabi aha mubiri, enyehurira, n’omukago gwaitu nawe. Yehova naamanya ekirikubaasa kutugasira. Aurora, orikutuura omuri United States, naagira ati: “Nimmanya ngu okworobera Yehova butoosha nikirugamu embeera ezirikukirayo oburungi.” Aga n’amazima ahariitwe twena. Ogasiirwe ota ahabw’okworobera obuhabuzi bwa Yehova?

11. Okushaba nikutuhwera kuta?

¹¹ Okushaba nikutuhwera kworobera Yehova, n’obu kirikuba kitoorobi kukikora. Obumwe, nitugumirwa kworobera Yehova, kwonka twine kuguma niturwanisa omuze gw’okukora ekibi. Omuhandiiki wa Zaaburi akeeshengyereza Ruhanga ati: “Ompamye n’omwoyo ogurikukworobera.”  (Zab. 51:12) Payoniya orikwetwa Denise, naagira ati: “Ku ndi kugumirwa kworobera kimwe aha biragiro bya Yehova, ninshaba kutunga amaani g’okukora ekihikire.” Nitubaasa kugira obuhame ngu Yehova butoosha naija kugarukamu okweshengyereza nk’okwo.​—Luk. 11:9-13.

12. Kurugiirira aha Abaefeso 5:1, twine kukora ki?

¹² Shoma Abaefeso 5:1. “Nk’abaana abarikukundwa,” aba Yehova, nituteeraho munonga kumutooreza. Nitumutooreza turikugira emitwarize nk’eye, nka rukundo, embabazi, n’okusaasira twaba nitukoragana n’abandi. Abatarikumanya Ruhanga baareeba emitwarize yaitu, nikibaasa kubahiga kwega baingi ebirikumukwataho. (1 Pet. 2:12) Abazaire Abakristaayo baine kuteeraho kutwariza abaana baabo nk’oku Yehova arikututwariza. Baakora batyo, abaana baabo nibabaasa kwenda kwekorera omukago na Ishebo ow’omu iguru.

13. Niki eki twine kutaho omutima?

¹³ Omwana muto naaba naayesiimisa abazaire be, kandi naaba naashemererwa kubagambaho. Nikyo kimwe, nitwesiimisa Tataitwe ow’omu iguru, Yehova, kandi nitwenda ngu abandi bamumanye. Omu mutima gwaitu, nitwehurira nk’oku Omugabe Daudi yaayehuriire. Akahandiika ngu naija kweratira nari kwesiimira omuri Yehova. (Zab. 34:2) Kandi shi twaba twine enshoni z’okugamba ahari Yehova? Nitubaasa kugira tuta obumanzi? Nitubugira  twateekateeka aha ku kirikushemeza Yehova twamugambaho, n’oku abandi barikugasirwa baayega ebirikumukwataho. Twakora tutyo Yehova naija kutuhwera kuba emanzi. Akahwera Abakristaayo omu kyasha ky’okubanza kugira obumanzi, naitwe naija kutuhwera.​—1 Tes. 2:2.

14. Ahabw’enki okwejumba omu murimo gw’okuhindura abantu abeegi kiri kikuru?

¹⁴ Yehova tarikushoroora, kandi naashemererwa yaareeba nitukunda abandi, n’obu baakuba baakuriire mu mbeera ki. (Byak. 10:34, 35) Omuringo murungi gw’okworeka ngu nitukunda abandi n’okubagana nabo amakuru marungi g’Obukama. (Mat. 28:19, 20) Omurimo ogu nigutwariramu ki? Abo abarikutuhurikiza embeera zaabo nizibaasa kuhinduka hati, kandi bagire n’amatsiko g’okwija kutunga amagara agatahwaho omu biro by’omumaisho.​—1 Tim. 4:16.

15-16. Ni nshonga ki ezishemereire kutureetera kugira okushemererwa?

¹⁵ Yehova n’omuzaire oine rukundo, n’ahabw’ekyo naayenda ngu eka ye eshemererwe. (Isa. 65:14) Hariho enshonga nyingi ahabw’enki turikubaasa kushemererwa hati, n’obu twakuba twine oburemeezi. Nk’eky’okureeberaho, twine obuhame ngu Tataitwe ow’omu iguru naatukunda munonga. Twine okumanya okuhikire okuri omu Kigambo kya Ruhanga Baibuli. (Yer. 15:16) Kandi turi ab’eka y’omutaano erimu abantu abarikukunda Yehova, abarikukunda emitindo y’emicwe, kandi abarikukundana.​—Zab. 106:4, 5.

¹⁶ Nitubaasa kuguma twine okushemererwa ahabw’okugira ngu twine amatsiko gahamire ngu embeera niziija kuba nungi omu biro by’omumaisho. Nitumanya ngu juba Yehova arikukoresa Obukama bwe naija kwihaho ebikorwa bibi byona, kandi ensi agihindure egarukye ebe Paradiso. Kandi twine n’amatsiko g’omuhendo ngu abaafiire nibaija kuzoorwa bagarukye babe n’abakundwa baabo. (Yoh. 5:28, 29) Ekyo ka nikiija kureeta okushemererwa! Kandi ekikuru munonga, twine obuhame ngu buri omwe omu iguru n’omu nsi naija kuha ekitiinisa Tataitwe owa rukundo, amuhimbise, kandi amuhamireho omu muringo ogushemeire.