1-2. Akin et nanggaway paraan si Jehova pian sarag tayoy magmaliw a kabiangan na pamilya to, tan panon ton ginawa itan?

INIMBITAAN itayo nen Jehova ya magmaliw a kabiangan na pamilya to. Talagan balibali itan ya imbitasyon! Amin ya kabiangan na sayan pamilya et dedikado ed Dios tan ipapatnag day pananisia ra ed dondon bagat na Anak to. Maliket so pamilya tayo. Natan ni labat et wala lay kabaliksan na bilay tayo, tan maliket tayo lapud walay ilalo tayon manbilay na andi-anggaan, balanglan diad tawen odino diad Paraison dalin.

² Inar-aro itayo nen Jehova kanian nanggaway paraan pian magmaliw itayon kabiangan na pamilya to. Balbaleg so insakripisyo to pian nagawa itan. (Juan 3:16) “Mabli imbayar to.” (1 Cor. 6:20) Intarya nen Jehova so dondon pian makaasingger tayod sikato. Bilang resulta, baleg a kagalangan tayo a tawagen ya Ama so Sankatagyan a Persona ed uniberso. Tan singa apantongtongan tayo ed apalabas ya artikulo, si Jehova so sankaabigan ya Ama.

3. Anto ray nayarin nitepet tayo? (Nengnengen so kahon ya “ Kasin Kabat tan Iimanoen Ak nen Jehova?”)

³ Nayarin naisip tayo met imay intepet na sakey ya nansulat na Biblia: “Antoy ibales kod si Jehova ed amin a maabig a ginawa to parad siak?” (Sal. 116:12) Diad tua et agtayon balot sarag ya balesen iray ginawa nen Aman Jehova parad sikatayo. Balet sarag tayon ipanengneng so panangaro tayo ed sikato. Insulat nen apostol Juan: “Mangaaro itayo, lapud say Dios so inmunan  angaro ed sikatayo.” (1 Juan 4:19) Anto ray paraan ya nipanengneng tayo ya inar-aro tayoy Aman Jehova?

4. Base ed Santiago 4:8, akin et kaukolan tayon pansagpotan ya onapit ed si Jehova?

⁴ Labay nen Jehova ya lanang tayon mitongtong ed sikato tan pansagpotan tayoy onapit ed sikato. (Basaen so Santiago 4:8.) Papasesegen to tayo ya ‘manseet ed pikakasi’ lapud sikatoy akaparaan ya ondengel. (Roma 12:12) Agbalot nakekesawan si Jehova ya ondengel ed saray pikakasi tayo. Kanian, manepeg labat ya sikatoy dengelen tayo met diad pambasa tayoy Salita to, say Biblia, tan ed saray publikasyon ya makatulong ed sikatayon talosan itan. Dedengelen tayo met si Jehova no ontatalineng tayon maong diad saray aral. Mansiansian maapit so anak ed atateng to no lanang iran mantotongtong. Mipadpara, mansiansia tayon maapit ed si Jehova no lanang tayon mitongtong tan ondengel ed sikato.

5. Panon tayon napaaligwas iray pikakasi tayo?

⁵ Isip mo pa iray pikakasim ed Dios. Labay nen Jehova ya ibalikas tayod sikato so amin ya walad puso tayo. (Sal. 62:8) Kanian maabig no tepetan tayoy sarili tayo: ‘Kasin saray pikakasik et ataptapew ya singa kinopyak labat, odino talagan nanlapu iratan ed pusok ya singa sulat a siak ya mismo so nanggawa?’ Seguradon inar-arom si Jehova tan labay mo ya mansiansian malet so relasyon mod sikato. Kanian lanang kan mitongtong ed sikato, ibagam so amin ya naliliknam, tan istoryam no anto ray mamapaliket ed sika tan saray panaaburidoan mo. Agka nababaingan ya onkerew na tulong ed si Aman Jehova.

6. Antoy nepeg tayon gawaen pian mansiansia tayon maapit ed si Aman Jehova?

⁶ Pian mansiansia tayon maapit ed si Aman Jehova, nepeg ya lanang tayon pisalamatan. Mipara so liknaan tayo ed samay insulat na salmista: “Agaylay karakel na ginawam, O Jehova a Dios ko, saray makapakelaw a kimey mo tan saray nononoten mo nipaakar ed sikami. Anggapoy makapipara ed sika; no salien kon ibaga tan itongtong iratan, agaylay karakel da ya agko nisalaysay ya amin!” (Sal. 40:5) Agtayo labat nalilikna so pisasalamat tayo ed si Jehova; ibabalikas tayoy pisasalamat tayo ed sikato diad salita tan gawa. Diad ontan et nipanengneng tayo ya duma tayo ed saray totoo ed mundo. Agda aapresyaen iray gagawaen na Dios parad sikara. Diad tua, dakdakel ya totoo natan so agda amtay misalamat tan pakapatnagan itan ya manbibilay tayo lad “kaunoran iran agew.” (2 Tim. 3:1, 2) Agtayo labay ya aligen so ugali da!

7. Antoy labay nen Jehova ya gawaen tayo, tan akin?

⁷ Labay na atateng ya maong so ulopan na ananak da tan ag-ira mankokolkol. Ontan met si Jehova, labay to ya maong so ulopan na amin ya ananak to. Diad tua, say panangaro tayo ed balang sakey so pakabidbiran ya tuan Kristiano itayo. (Juan 13:35) Mipara so liknaan tayo ed samay insulat na salmista: “Agaylay abig tan makapaliket a saray sanaagi et saniiban manaayam a walay pankakasakey!” (Sal. 133:1) No inaro tayo ray agagi tayo, papaneknekan tayo ed si Jehova ya sikatoy inaro tayo. (1 Juan 4:20) Talagan makapaliket so magmaliw a kabiangan na pamilya ya saray sanaagi et ‘ipapanengneng day kaabigan tan panangabagey ed sakey tan sakey.’​—Efe. 4:32.

8. Base ed 1 Juan 5:3, anto so manunan rason no akin ya uunoren tayoy Jehova?

⁸ Labay nen Jehova ya unoren na ananak iray atateng da, tan labay to met ya sikatoy unoren tayo. (Efe. 6:1) Manepeg labat ya  sikatoy unoren tayo ta sikato so Manamalsa, Manusustuni na bilay tayo, tan sankarunongan ya Ama. Balet say manunan rason no akin ya uunoren tayoy Jehova et lapud sikatoy inaro tayo. (Basaen so 1 Juan 5:3.) Anggano dakel so rason no akin ya nepeg tayon unoren si Jehova, agto tayo pipiliten ya gawaen itan. Inikdan itayo nen Jehova na abilidad ya mandesisyon a bukor kanian sikatoy maliket no unoren tayo lapud panangaro tayo ed sikato.

9-10. Akin ya importantin amtaen tan unoren tayo ray totontonen ya inter na Dios?

⁹ Labay na atateng ya protektaan iray ananak da. Kanian manggagawa ira na saray totontonen ya parad pankaabigan na ananak da. No unoren iratan na ananak, ipapanengneng da ya panmamatalekan tan rerespetoen da iray atateng da. Nagkalalo lan importante sirin ya amtaen tan unoren tayo ray totontonen ya inter nen Aman Jehova. No ontan so gawaen tayo, ipapanengneng tayo ya sikatoy inar-aro tan rerespetoen tayo. Tan parad pankaabigan tayo lanlamang iratan. (Isa. 48:17, 18) Balet, saramay agmanguunor ed si Jehova tan ed saray ganggan to et mauges so pansumpalan da.​—Gal. 6:7, 8.

¹⁰ No say kabibilay tayo et makapaliket ed si Jehova, nipaliis itayo ed saray posiblin pakasakitan tayo ed pisikal, emosyonal, tan ed espiritual. Amta nen Jehova no antoy sankaabigan parad sikatayo. Oniay imbaga nen Aurora ya tagad United States: “Amtak ya no unoren tayoy Jehova, segurado ya maliket so bilay tayo.” Apaneknekan tayo lan amin ya tua itan.  Sika ey, anto ray maabig ya resulta na panguunor mo ed saray maaron ganggan nen Jehova?

11. Antoy nitulong na pikakasi?

¹¹ Natulongan itayo na pikakasi ya magmaliw a matulok, anggan sano mairap itan ya gawaen. No maminsan, mairap tayon unoren si Jehova lapud makasalanan itayo, balet nepeg tayon labanan so tendensia tayon manggaway aliwa. Oniay impikasi na salmista: “Pakiwas mo ak pan mabulos ya ontulok ed sika.” (Sal. 51:12) Oniay imbaga nen Denise ya sakey a regular payunir: “No nanairapan ak ya unoren so sakey a ganggan nen Jehova, manpipikasi ak ya ikdan to ak na biskeg ya gawaen so duga.” Makaseguro tayo ya ebatan nen Jehova iray ontan ya pikakasi.​—Luc. 11:9-13.

12. Base ed Efeso 5:1, antoy nepeg tayon gawaen?

¹² Basaen so Efeso 5:1. Bilang ‘inad-aron ananak’ nen Jehova, gagawaen tayoy anggaay nayarian tayo ya aligen so Ama tayo. Sikatoy aaligen tayo no maaro tan maong so panagtrato tayo ed arum, tan no peperdonaen tayo ray lingo ra. No saramay agda ni kabat so Dios et nanengneng da ya maong so ugali tayo, ompan nasagyat met ira ya kabaten so Dios. (1 Ped. 2:12) Maabig no saray Kristianon atateng et aligen day Jehova diad panagtrato da ed saray ananak da pian napakiwas iran onapit ed si Jehova.

13. Antoy nepeg tayon tandaan pian magmaliw tayon makpel?

¹³ Maslak ed saray ugugaw et proud ira ed  tatay da tan labalabay dan istoryaen ed arum. Ontan tayo met, proud tayo ya Ama tayo si Jehova tan labalabay tayon ipakabat ed arum. Say liknaan tayo et singa samay insulat nen Arin David: “Ipasirayew ko so nipaakar ed si Jehova.” (Sal. 34:2) Panon to balet no mabaing ka? Antoy gawaen mo pian magmaliw kan makpel? Tandaan tayo ya napaliket tayoy Jehova no sikatoy ipakabat tayo tan nagunggonaan so arum no sikatoy nakabat da. Ikdan itayo nen Jehova na pakpel. Tinulongan to ray Kristiano nen inmunan siglo ya manpakpel, tan seguradon tulongan to tayo met.​—1 Tes. 2:2.

14. Anto ray pigaran rason no akin ya importante so pibiang ed kimey ya panagbangat?

¹⁴ Anggapoy lalabien nen Jehova, kanian sikatoy maliket no nanengneng to ya inaro tayoy kapara tayon too anggan antoy lahi o kipapasen na bilay da. (Gawa 10:34, 35) Say sakey ya sankaabigan a paraan ya nipanengneng tayoy panangaro ed arum et no ipaamta tayo ed sikara so maong a balita. (Mat. 28:19, 20) Antoy resulta na satan? Saramay ondengel ed sikatayo et nawalaan na mas maliket ya bilay natan tan ilalon bilay ya andi-anggaan diad arapen.​—1 Tim. 4:16.

15-16. Anto ray rason no akin ya maliket tayo?

¹⁵ Si Jehova et maaron ateng, kanian labay to ya maliket so pamilya to. (Isa. 65:14) Dakel so rason tayon manliket natan anggano wala ray dadalanen tayon problema. Singa bilang, segurado itayo ya inar-aro itayo nen Aman Jehova. Duga so pakatalos tayo ed Salita na Dios, say Biblia. (Jer. 15:16) Tan kabiangan itayo na espisyal a pamilya​—amin tayo et inaro tayoy Jehova, inaro tayo iray atagey ya estandarte to ed moral, tan inaro tayoy sakey tan sakey.​—Sal. 106:4, 5.

¹⁶ Walay rason tayon manliket lapud segurado tayo ya mas maabig so magmaliw ya bilay diad arapen. Amta tayo ya asingger lan deralen nen Jehova so amin ya mauges, tan diad uley na Panarian to et ipawil toy Paraison dalin. Segurado tayo met ya paolien nen Jehova iray inaatey tan nakaiba da lamet iray inad-aro da. (Juan 5:28, 29) Malikeliket itan ya panaon! Tan manuna ed amin, segurado tayo ya magano lan iter na amin a walad tawen tan dalin so galang, dayew, tan debosyon ya kanepegan na maaron Ama tayo!