1-2. Wuarom muak Jehova daut mäajlich, daut wie to siene Famielje jehieren kunnen, un woo deed hee daut?

JEHOVA muak daut mäajlich, daut wie to siene jeistelje Famielje jehieren un am deenen kjennen. Daut es doch wundascheen! Deejanje, waut to siene Famielje jehieren, haben sikj Gott hanjejäft un jleewen, daut sien Sän fa ons jestorwen es. Wie sent aulatoop eene schaftje Famielje. Ons Läwen haft nu aul eenen Senn un wie kjennen ons doatoo freien, noch mol fa emma em Himmel ooda em Paradies oppe Ieed to läwen.

² Ut Leew muak Jehova daut mäajlich, daut wie Poat von siene Famielje woaren kunnen, wan daut uk nich leicht wia fa am (Joh. 3:16). Wie “sent fa eenen dieren Pries jekoft” (1. Kor. 6:20). Derch daut Leesjelt sorjd Jehova doafäa, daut wie am kunnen no aun sennen. Es daut nich eene groote Iea fa ons, daut wie dän Hechsten äwa Himmel un Ieed onsen Voda nanen kjennen? Un soo aus wie en dän väajen Artikjel jeseenen haben, es Jehova de basta Voda.

3. Äwa woone Froagen kunn wie nodenkjen? (See uk dän Kausten “ Denkjt Jehova aun mie?”)

³ Veleicht jeit ons daut uk soo aus eenen Bibelschriewa, waut mol fruach: “Waut kaun ekj dän HARN trigjtolen fa aul daut goode, daut hee aun mie jedonen haft?” (Psa. 116:12). Rajcht jesajcht kjenn wie dän daut kjeenmol trigjtolen. Oba onsen himlischen Voda siene groote Leew brinjt ons bat doa, daut wie am uk leewen. De Apostel Johanes schreef: “Wie leewe, wiel hee ons tooeascht jeleeft haft” (1. Joh.  4:19, Friesenbibel). Oba woo kjenn wie onsen Voda Jehova daut wiesen, woo väl wie am räakjnen?

4. Wuarom sell wie ons no Jakobus 4:8 no aunstrenjen, Jehova noda to komen?

⁴ Jehova well, daut wie am noda komen un to am räden (läs Jakobus 4:8). Hee sajcht to ons: “Siet . . . aunhoolent em Jebäd”, un hee es aulentiet reed, ons tootohorchen (Reem. 12:12). Hee es kjeenmol too drock ooda too meed doatoo. Un wie horchen am too, wan wie de Schreft läsen un uk Bieekja, waut ons halpen, dee to vestonen. Wie horchen am uk too, wan wie bie onse Toopkomes sea oppmoakjsom sent. Krakjt soo aus Elren met äare Kjinja veeent bliewen, wan dee pinkjlich unjarenaunda vetalen, kjenn wie uk dicht bie Jehova bliewen, wan wie foaken to am räden un am toohorchen.

5. Woo kjenn wie ons doarenn vebätren, woo wie bäden?

⁵ Denkj mol doaräwa no, woo du bäden deist. Jehova well je, daut wie ons Hoat ver am utschedden (Psa. 62:9). Doawäajen kjenn wie mol äwalajen: “Sent miene Jebäda soo, aus wan ekj bloos emma wada dänselwjen Breef aufdachen wudd? Ooda sent dee soo aus een Breef, waut von Hoaten kjemt un dän ekj selfst met miene Haunt schriew?” Secha räakjen wie Jehova väl un wie wellen dicht bie am bliewen. Doawäajen mott wie pinkjlich to am räden. Saj dän, waut du oppem Hoaten hast. Räd met am äwa daut, waut die schaftich ooda truarich moakt. Un velot die doaropp, daut du am emma kaust no Help froagen.

6. Waut mott wie doonen, daut wie kjennen dicht bie onsen himlischen Voda bliewen?

⁶ Daut wie kjennen dicht bie onsen himlischen Voda bliewen, mott wie am emma dankboa sennen. Wie stemmen met dän Psalmenschriewa met, waut doa schreef: “De Wundawoakjen, dee du, mien HAR un Gott, jedonen hast, sent väl, un soo uk diene Jedanken, dee du aun ons bewiesen deist. Doa es kjeena met die to vejlikjen. Wan ekj daut wudd bekauntmoaken un doavon räden, waut du jedonen hast, daut wudd väl mea sennen aus ekj opprieejen kunn” (Psa. 40:6). Wie sent Jehova nich bloos dankboa, oba wie wiesen am daut uk derch onse Wieed un Woakjen. En disen Stekj sent wie gaunz aundasch aus väl Menschen en de Welt. Dee räakjnen aul daut nuscht, waut Gott fa an deit un sent krakjt soo ondankboa, aus de Schreft daut fa “de latste Doag” verutsajcht (2. Tim. 3:1-2). Soo well wie kjeenmol sennen!

7. Waut well Jehova, un wuarom?

⁷ Elren wellen nich, daut äare Kjinja jachten, oba daut dee fein unja sikj foadich woaren. Biejlikj soo well Jehova uk, daut aul siene Kjinja unja sikj fein foadich woaren. Un de Leew, waut wie unjarenaunda haben, wiest je, daut wie woare Christen sent (Joh. 13:35). Wie sent krakjt soo jesonnen aus de Psalmenschriewa, waut säd: “Woo goot un scheen es daut doch, wan Breeda en Eenichkjeit toop läwen!” (Psa. 133:1). Wan wie onse Breeda un Sestren leewen, dan bewies wie Jehova, daut wie uk am leewen (1. Joh. 4:20). Es daut nich waut gaunz besondret, daut wie to eene jeistelje Famielje jehieren kjennen, waut “von Hoaten leeftolich eena toom aundren” sent? (Efs. 4:32).

8. Waut es daut wichtichste, wuarom wie Jehova jehorchen, soo aus 1. Johanes 5:3 sajcht?

⁸ Jehova well haben, daut de Kjinja äare  Elren jehorchen un daut wie am jehorchen (Efs. 6:1). Hee es daut wieet, wiels hee ons Schepfa es un ons aum Läwen helt un mea Weisheit haft aus aule aundre Elren. Oba daut wichtichste, wuarom wie am jehorchen, es, wiels wie am leewen (läs 1. Johanes 5:3). Daut jeft goode Uasoak, Jehova to jehorchen, un doch deit hee ons nich bemotten. Hee haft ons dän frieen Wellen jejäft un freit sikj, wan wie am ut Leew wellen jehuarsom sennen.

9-10. Wuarom mott wie daut weeten, waut Gott fa rajcht talt, un daut uk nokomen?

⁹ Elren wellen äare Kjinja beschitzen. Doawäajen moaken dee Räajlen, waut dee doonen kjennen un waut nich. Wan de Kjinja sikj doaraun hoolen, dan wiest daut, daut dee sikj opp äare Elren veloten un an respakjten. Krakjt soo haft Jehova uk Räajlen oppjestalt. Wudd daut dan nich noch väl wichtja sennen, dee to kjanen un to hoolen? Opp dee Wajch wies wie Jehova, daut wie am leewen un respakjten, un daut kjemt ons uk selfst togood (Jes. 48:17-18). Oba dee, waut doa nuscht om Jehova romjäwen un sikj nich aun siene Räajlen hoolen, dee schoden sikj tolatst bloos selfst (Gal. 6:7-8).

¹⁰ Wan wie soo läwen, aus Jehova daut fa rajcht talt, dan es daut een Schutz fa onse Jesuntheit un fa onsen Gloowen. Un wie feelen ons uk nich soo leicht mootloos. Jehova weet, waut daut baste fa ons es. Aurora, waut en de Stäts wont, sajcht: “Ekj weet, daut et em Läwen emma daut baste utkjemt, wan eena no Jehova horcht.”  Daut es werkjlich soo! Woo es die daut aul togood jekomen, daut to doonen, waut Jehova ut Leew von die velangt?

11. Woo halpt ons daut bäden?

¹¹ Bäden halpt ons, Jehova mau rajcht dan to jehorchen, wan daut nich leicht es. Wäajen wie onvolkomen sent, felt ons daut eenjemol sea schwoa, Jehova to jehorchen. Oba wie motten ons doawäajen aunstrenjen, emma daut rajchte to doonen. De Psalmenschriewa prachad Gott: “Jeff mie eenen Jeist, dee die jehorchen well” (Psa. 51:14). Eene Pionia-Sesta, waut Denise heet, sajcht: “Wan mie daut schwoa es, eent von Jehova siene Jebooten notokomen, dan bäd ekj om Krauft, daut rajchte to doonen.” Wie kjennen ons doaropp veloten, daut Jehova emma no soone Jebäda horchen woat (Luk. 11:9-13).

12. Waut sell wie no Efeesa 5:1 no doonen?

¹² Läs Efeesa 5:1. Aus Jehova “siene leewe Kjinja” doo wie ons bastet, om soo to sennen aus hee. Wie doonen am no, wan wie leeftolich un frintlich sent un aundre wellich vejäwen. Wan deejanje, waut Jehova nich kjanen, ons goodet Benämen seenen, dan wellen dee veleicht mea von am lieren (1. Pet. 2:12). Elren, waut Jehova deenen, sellen met äare Kjinja soo omgonen, aus Jehova met ons omjeit. Daut woat de Kjinja halpen, daut dee uk wellen Frind met Jehova woaren.

13. Aun waut sell wie denkjen, daut wie mea Moot kjrieen?

 ¹³ Een kjlienet Kjint es brow met siene Pape un vetalt wellich von dän. Wie sent krakjt soo brow met onsen himlischen Voda Jehova un wellen, daut aundre dän kjanen lieren. Ons aulem jeit daut soo aus dän Kjennich David, waut doa schreef: “Miene Seel saul vom HARN emma goodet räden” (Psa. 34:3). Oba veleicht sent wie een bät bleed. Waut woat ons dan halpen, brow von Jehova to räden? Wie kjennen doaraun denkjen, woo schaftich wie Jehova moaken un woo sea aundre daut togood kjemt, wan dee am kjennen kjanen lieren. Jehova woat ons dän Moot jäwen, waut ons fält. Hee holp de Christen en de Bibeltiet, äwanäment to sennen, un hee woat uk ons halpen (1. Tess. 2:2).

14. Wuarom es daut soo wichtich, Jinja to moaken?

¹⁴ Jehova moakt kjeenen Unjascheet manke Menschen un hee freit sikj, wan wie aundre Leew wiesen, endoont von wua dee sent (Apj. 10:34-35). Besonda fein kjenn wie aundre Leew wiesen, wan wie dee de goode Norecht prädjen (Mat. 28:19-20). Woo kaun daut utkomen? Wan dee no ons horchen, dan jeit dee daut nu aul scheena un dee kjrieen uk de Hopninj, noch mol eewich to läwen (1. Tim. 4:16).

15-16. Wuarom kjenn wie schaftich sennen?

¹⁵ Ons leeftolja Voda Jehova well, daut siene Famielje schaftich es (Jes. 65:14). Un daut jeft välet, wua wie ons äwa freien kjennen, wan wie uk schwoaret beläwen. Wie weeten biejlikj, daut ons himlischa Voda ons väl räakjent. Un wie kjennen krakjt vestonen, waut sien Wuat sajcht (Jer. 15:16). Un wie jehieren to eene besondre Famielje, waut aula Jehova un siene Jesazen leewen un uk unjarenaunda Leew haben (Psa. 106:4-5).

¹⁶ Wie kjennen emma schaftich sennen, wiels wie ons secha sent, daut ons Läwen lota noch mol väl bäta woaren woat. Wie weeten, daut Jehova boolt aule schlajchte Menschen oppriemen woat un derch sien Kjennichrikj de Ieed wada to een Paradies moaken. Wie haben uk de wundascheene Hopninj, daut de Vestorwne oppstonen woaren un wada met ons toop läwen kjennen (Joh. 5:28-29). Daut woat eene groote Freid sennen! Un daut wichtichste es, daut boolt aule em Himmel un oppe Ieed onsen leeftoljen Voda soo lowen, ieren un jehorchen woaren, aus hee daut vedeent.