1-2. Mukunda natshi nu luholo lutshi Yehowa gatunginyishile mu fami yenji?

YEHOWA watutamegele ha gungina mu fami ya akombeledi enji. Idi diago ndaga yabonga! Enya fami yetu akhala athu adihanele gale gudi Nzambi, nu ana monesa gutshigina gu gibawu giahanele Mun’enji. Tudi diago mukatshi dia fami ya gusuanguluga. Tuana khala nu lujingu luabonga mangino, nu mbatukhala nu lujingu luabalega gubonga ivo nu ivo ha mavu mu Phaladiso, nga gosa mu dilu.

² Yehowa watunginyishile mu fami yenji handaga watuzumba muavula. Uvi ha gutunginyisa, wafutshile ndando yakola. (Yone 3:16) Tuakudiwe “nu ndando yakola.” (1 Kol. 6:20) Yehowa watukuatesele ha gukhala nu ufuta wakola n’enji mu njila ya gibawu. Tudi diago nu lutumbu lua gutamega muthu wabalega gukoma gosa nu hashi egi Tata wetu. Gifua luholo tuayimonyi mu longo diabalega, Yehowa udi tata wabalega gubonga.

3. Mihu tshi tuajiya gudihula? (Tala galuanda “ Yehowa Wana Gungumona Ba?”)

³ Tudi naye gudihula gifua muadihudile musonegi mumoshi wa Biblia egi: ‘Itshi ngajiya guhana Yehowa mukunda nu ndaga jiabonga jiangutshitshile muene?’ (Ngi. 116:12) Tushigo nga gima gia guhana Sh’etu wa mu dilu. Tudi naye phamba gumuzumba. Mupostolo Yone wasonegele egi: ‘Tuana zumba, handaga muene wadiangele gutuzumba.’ (1 Yone 4:19) Mu maluholo tshi tuajiya gumonesa egi tuana zumba Tata wetu wa mu dilu?

4. Ha gutadila Yakoba 4:8, mukunda natshi tudi naye gukalagala ngolo ha gusala ya gujinginyina gudi Yehowa?

⁴ Yehowa wana tshigina egi tusuene hehi n’enji, nu tukhale muta n’enji maga mu njila ya gisambu. (Tanga Yakoba 4:8.) Muene udi gututoga ha ‘gufubidila mu gisambu,’ nu wakhala hehi ha gututegelela tangua diagasue. (Lomo 12:12) Gana huila ndo, nu gushigo nga gima giajiya gumukanga njila ha gututegelela. Tuana gumutegelela tangua tuana tanga Biblia, nu mikanda iko yajiya gutukuatesa ha gukotelesa Biblia. Tuana gumutegelela nji tangua tuana landula muabonga malongo a mu gudibungisa gua mu hungu. Gula mvuaji jidi muta maga muavula nu an’awo, ana bua mafuta akola; luholo lumoshi nji, guta maga muavula nu Yehowa mbagutukuatesa ha gusala yagujinginyina gudi muene.

5. Itshi tuajiya gutshita hagula Yehowa ategelele isambu yetu?

⁵ Kamba gujiya gula gisambu giaye giakhala gia luholo lutshi. Yehowa wana tshigina egi tumuwambele mu gisambu ndaga jiagasue tudi najio mu mutshima. (Ngi. 62:8) Tudi naye gudihula egi: ‘Isambu yami yakhala ya holu-holu, nu ngana vutugila ima imoshi-imoshi ba? Ndaga ngana zuela jiana katuga mu mutshima, nga jiakhala gifua mukanda wasonegewa nu mago?’ Idi yadiago egi wana zumba Yehowa muavula, nu wana tshigina egi ufuta waye n’enji ukhale wakola. Ha gukolesa ufuta wene, udi naye guta n’enji maga muavula. Mudijige ndaga jiagasue jia mu mutshima waye. Muwambele ndaga jidi gugusuanguluisa nu jinyi jidi gugusagesa. Jiya egi wajiya gumutoga ukuateshi.

6. Itshi tudi naye gutshita ha gusala yagujinginyina gudi Tata wetu wa mu dilu?

⁶ Ha gusala ya gujinginyina gudi Tata wetu wa mu dilu, tudi naye gukhala nu khadilo dia gumuhana mersi. Tuajiya guzuela gifua muazuelele muyimbi wa ngimbo egi: ‘Ô Yehowa Nzambi wami, aye watutshitshile ndaga jiavula, nu midimo ya gushimana mukunda nu esue. Gushigo nga muthu muko gifua aye, gula ngalola guzuelela midimo yaye nu guyitanga, mbayikhala yavula diago!’ (Ngi. 40:5) Tushigo naye phamba guhana mersi, uvi tudi naye gumonesa mu mbimbi nu makalegelo etu egi tudi musuanguluga nu ndaga jiana tshita Yehowa. Ndaga eyi yana monesa egi tudi yagudisha nu athu avula mangino. Ha mavu tudi mujinga, athu avula ana hana ndo mersi gu ima yagasue yana tshita Nzambi mukunda nu ene. Ndaga yana monesa egi tudi diago mujinga mu “masugu a gisugishilo” idi egi, athu avula ashigo muhana mersi. (2 Tim. 3:1, 2) Tuajiyilego gulandula khadilo edi diabola!

7. Yehowa wana tshigina egi tutshite itshi, nu mukunda natshi?

⁷ Mvuaji jiana tshigina ndo egi an’awo akhale mulua, uvi jiana tshigina egi akhale mafuta. Luholo lumoshi nji, Yehowa wana tshigina egi akombeledi enji agasue ajinge hamoshi. Hene, gumonesa guzumba gudi athu ako guana monesa diago egi, tudi Aklisto a giamatshidia. (Yone 13:35) Muyimbi wa ngimbo wasonegele egi: ‘Idi ndaga yabonga gudi aphangi ha gujinga hamoshi!’ (Ngi. 133:1) Gula tudi muzumba aphangi etu a mala nu a akhetu, tudi mumonesa Yehowa egi tuamuzumba diago. (1 Yone 4:20) Idi diago ndaga ya bonga ha gukhala mukatshi dia fami ya aphangi a mala nu a akhetu anyi adi nu ‘gisemo gudi ako nu adi muvila athu ako khenda’!—Ef. 4:32.

8. Ha gutadila 1 Yone 5:3, ndaga tshi ya thomo yana gututuma ha gutumagela Yehowa?

⁸ Yehowa wana tshigina egi ana atumagele mvuaji jiawo, nu wana tshigina nji egi esue tumutumagele. (Ef. 6:1) Tudi naye diago gumutumagela handaga muene wakhala mufugi wetu, muene wana gutubamba, nu wakhala watema muavula gubalega a tata agasue. Uvi,  ndaga ya thomo idi gututuma ha gumutumagela idi egi, tuana gumuzumba. (Tanga 1 Yone 5:3.) Ngatshima tudi nu ndaga jiavula jidi gututuma ha gumutumagela, uvi muene gana gutushinjiga ndo egi tumutumagele. Yehowa watuhanele luendu lua guditombela ndaga tuatshigina, hene wana suanguluga tangua tuana tomba ha gumutumagela handaga tuamuzumba.

9-10. Mukunda natshi idi nu ndando ha gujiya mikhuala ya Nzambi nu guyitumagela?

⁹ Mvuaji jiana tshigina egi an’awo akhale mu ubambi. Gishina giene ana haga mikhuala mu fami ha gubamba ana. Gula ana atumagela mikhuala yene, yana monesa egi adi muhaga mutshima gudi mvuaji jiawo nu adi guanemesa. Idi diago ndaga ya gubalega ndando ha gujiya mikhuala ya Tata wetu wa mu dilu nu ha guyitumagela. Gula tuayitumagela, mbatumonesa Yehowa egi tuamuzumba nu tuana gumunemesa, ngenyi mbatuheta gubonga. (Yesh. 48:17, 18) Uvi, athu anyi ana tuna Yehowa nu mikhuala yenji, ana heta malamba gu gisugishilo.—Gal. 6:7, 8.

¹⁰ Gula tuajinga mu luholo luana suanguluisa Yehowa, mbatukhala mu ubambi mu muila, mu matangi nu mu nyuma. Yehowa wana jiya ndaga idi yabonga mukunda nu esue. Phangi Aurora yonu wana jinga gu États-Unis, udi muzuela egi: “Ngana jiya egi gutumagela Yehowa guana gutubatela gubonga mu lujingu tangua diagasue.” Idi diago ndaga ya giamatshidia. Gubonga tshi wahetele tangua walanduile utuameji wa Yehowa?

11. Luholo lutshi gisambu giana gutukuatesa?

 ¹¹ Gisambu giana gutukuatesa ha gutumaga, ngatshima matangua ako idi lamba ha gutshita ngenyi. Yajiya gukhala lamba ha gutumagela Yehowa, handaga tushigo athu atagana, uvi tudi naye gukalagala ngolo hagula tumulumbugilago. Muyimbi wa ngimbo wawambelele Nzambi egi: ‘Nguhane matangi abonga ha gugutumagela.’ (Ngi. 51:12) Phangi Denise yonu udi muvundji wa muhola, udi muzuela egi: “Gula idi lamba gudi ame ha gutumagela mukhuala wa Yehowa, ngana samba ha guheta ngolo jia gutshita ndaga jiabonga.” Tudi naye gujiya egi Yehowa mbawukhala hehi ha guhana mvutu gu isambu ya luholo elu.—Luka 11:9-13.

12. Ha gutadila Efeso 5:1, ndaga tshi tudi naye gutshita?

¹² Tanga Efeso 5:1. Luholo tudi ‘ana azumbiwa’ gudi Yehowa, tudi naye gutshita yagasue ha gumulandula. Ha gulandula makalegelo enji, tudi naye gukhala nu guzumba, nu gisemo, nu gutotesela athu ako gubola. Tangua athu anyi ashigo mujiya Nzambi adi mumona makalegelo etu abonga, ajiya gukamba gulonguga ndaga jiavula jiatadila Nzambi. (1 Phet. 2:12) Aklisto anyi adi mvuaji, adi naye gulandula gifezegeselo gia Yehowa mu luholo ana kalegela an’awo ndaga. Gula adi mutshita ngenyi, an’awo mbaakuata ufuta wabonga nu Tata wetu wa guzumba.

13. Itshi tudi naye gutshita ha guheta gikhesa?

¹³ Mona wagasue wazonda wana gudihala nu  sh’enji nu wana suanguluga guta n’enji maga. Luholo lumoshi nji nu esue, tuana suanguluga nu Yehowa Tata wetu wa mu dilu, nu tuana tshigina egi athu ako amujiye. Mu mitshima yetu, tuana gudivua gifua Fumu Davidi, wago wasonegele egi: ‘Mbangutumbuisa Yehowa.’ (Ngi. 34:2) Uvi itshi tuajiya gutshita gula tuakhala enya musonyi? Luholo tshi tuajiya guheta gikhesa? Tuajiya guheta gikhesa gula tuajiya egi Yehowa mbawusuanguluga muavula luholo tudi mulongesa athu ako mbimbi yenji, nu gubonga athu mbaaheta gula alonguga ha gumujiya. Yehowa mbawutuhana gikhesa tudi nagio funu. Wakuatesele Aklisto a mu siekle ya thomo ha gukhala nu gikhesa, nu mbawutukuatesa nji esue.—1 Tes. 2:2.

14. Ndaga tshi jidi mumonesa funu ya gutshita mudimo wa gubuisa athu alongeshi?

¹⁴ Yehowa gana tomba-tomba ndo, wana suanguluga gula tudi muzumba athu ako, ngatshima adi zuelelo diko nga a gifutshi giko. (Makal. 10:34, 35) Luholo lumoshi tuajiya gumonesa guzumba gudi athu ako ludi, gualongesa lukuma luabonga. (Mat. 28:19, 20) Felela tshi mudimo owu wana tagenesa? Athu anyi adi mutegelela ajiya gulondega lujingu luawo mangino, nu ajiya guheta lujingu lua ivo nu ivo mu masugu adi muza.—1 Tim. 4:16.

15-16. Ndaga tshi jidi gututuma ha gukhala nu gusuanguluga?

¹⁵ Yehowa udi Tata wa guzumba, hene gana tshigina egi fami yenji ikhale mu gusuanguluga. (Yesh. 65:14) Gudi nu ndaga jiavula jidi gututuma ha gukhala nu gusuanguluga mangino, ngatshima tudi mutagana nu malamba. Ha gufezegesa, tudi diago mujiya egi Tata wetu wa mu dilu watuzumba muavula. Tuakhala nu ujiyi wa giamatshidia wa Mbimbi ya Nzambi, Biblia. (Yel. 15:16) Tuakhala mu fami imoshi yawaha idi nu athu ana zumba Yehowa, ana zumba mikhuala yenji, nu ana zumba athu ako.—Ngi. 106:4, 5.

¹⁶ Tuajiya gukhala nu gusuanguluga handaga tudi nu felela dia giamatshidia egi, lujingu mbalukhala luabonga mu masugu adi muza. Tudi mujiya egi, Yehowa mbawukatula gubola guagasue ha mavu, nu mbawubuisa mavu Phaladiso mu njila ya Ufumu wenji. Tudi luko nu felela egi, athu a gufua mbafuzumuga ha gujinga hamoshi nu athu akhalele ene muzumba. (Yone 5:28, 29) Mbayikhala ndaga ya gusuanguluga diago! Uvi ndaga ya gubalega ndando idi egi, tumujiya egi gualeha ndo, athu agasue mu dilu nu ha mavu mbaahana Tata wetu wa guzumba ginemua, lutumbu nu mbaamukombelela phamba muene.