1, 2. a) ¿Jehová Diosca imamantataj paipaj familia ucupi cachun invitashca? b) ¿Diosca paipaj familia ucupi cachunca imatataj rurashca?

JEHOVÁ DIOSCA paipaj familia ucupi cachunmi ñucanchijta invitashca. Chaimantami Diospaj familia ucupi cangapajca paiman mingarishcanchij. Jesús ñucanchijmanta huañushcatapishmi crishcanchij. Chashnami tucuicuna shuj shinalla cushilla Yayitu Diosta sirvicunchij. Cai Allpapi causanata shuyajcunapish jahua pachapi causanata shuyajcunapish huiñai causaita chasquinatami shuyacunchij.

² Jehová Diosca ñucanchijta cꞌuyashcamantami paipaj cꞌuyashca Churita curca. Chaimantami ñucanchijca paipaj familia ucupi cai tucunchij (Juan 3:16). Bibliapica: “Achca valijhuan randishcacunami canguichij” ninmi (1 Corintios 6:20). Jesús huañushcamantami Jehová Dioshuanca alli apanacui tucunchij. Chaimantami tucuita ruraj Jehová Diostapish “Yaya” ni tucunchij. Pasaj yachaipi ricushca shinaca Jehová Diosllami tucuicunamanta yalli alli Yaya can.

3. ¿Jehová Dios allicunata rurashcata yuyarishpaca imatataj tapurishcanchij? ( ¿Jehová Diosca ñucamanta preocuparinchu? nishca recuadrota ricui).

³ Salmota quillcaj runa shinallatajmi mai ratoca cashna nishpa tapurishcanchij: “Ñucapaj tucui allicunata rurashcamantaca, Mandaj Diosmanca ¿imatataj cushari?” (Salmo 116:12). Chashna tapurishpaca Yayitu Diosman imata mana pagai tucushcatami cuentata cunchij. Shinapish Jehová Dios ñucanchijta cꞌuyashcamantami paitaca cꞌuyanchij. Apóstol Juanpish: “Ñucanchijca pairaj cꞌuyashcamantami, paitaca cꞌuyanchij” nircami (1 Juan 4:19). ¿Yayitu Diosta cꞌuyashcataca ima shinallataj ricuchinchij?

4. Santiago 4:8-pi nishca shinaca ¿Jehová Dioshuan alli apanacungapajca imatataj rurana canchij?

⁴ Jehová Diosca paipajman cꞌuchuyachun, paihuan parlachunmi munan (Santiago 4:8-ta liyipai). Chaimantami paica cutin cutin mañaichij nin. Diosta mañajpica paica siempremi uyan (Romanos 12:12). Ñucanchij mañashcacunata uyangapajpish mana ocupadochu can. Cutin ¿ñucanchijca Diosta uyangapajca imatataj rurana canchij? Bibliata, publicacioncunatami alli estudiana canchij. Shinallataj tandanacuicunapipish allimi uyana canchij. Huahuacunaca paicunapaj yayacunahuan siempre parlashpaca allimi apanacuncuna. Ñucanchijpish Yaya Diosta mañashpa, paita uyashpaca paihuanmi alli apanacushun.

5. ¿Yayitu Diostaca ima shinataj mañana canchij?

⁵ ¿Diosca ima shinataj mañachun munan? Paica shungumanta ima shina sintirishcata parlachunmi munan (Salmo 62:8). Chaimantami cashna nishpa tapurina canchij. ¿Shuj mensajepi chaillatataj chaillatataj cachacuj shinachu Diostaca mañanchij? O ¿shuj cartata escribicuj shinachu shungumanta Diostaca mañanchij? Yayitu Diosta cꞌuyashcamantami paimantaca manataj caruyasha ninchij. Pero chaipajca paita mañanatami manataj saquina canchij. Cushilla sintirishpapish llaquilla sintirishpapish Diosmanca tucuitami parlana canchij. Paica ñucanchijta ayudangapajmi siempre listo can.

6. ¿Jehová Diosmanta amataj caruyangapajca imatataj rurana canchij?

⁶ Diosmanta amataj caruyangapajca agradicinatami yachana canchij. Chaimantami ñucanchijpish salmota quillcaj runa shina yuyana canchij. Paica: “Ñuca Mandaj Dioslla, mancharinacunata quiquin rurashcaca ashtahuan ashtahuanmari mirashca. Ñucanchijpaj allita rurana yuyaillami cangui. Can rurashca allicunaca mana yupai tucuipajmari. Can imalla allicunata rurashcata yupashpa huillasha nishpapish, mana tucuita yupashpa huillai tucunichu” nircami (Salmo 40:5). Chaimantami ñucanchij nishcacunahuan, rurashcacunahuan Diosta agradicishcataca ricuchina canchij. Tucuri punllacunapi causacushcamantami Diosta mana agradicij gentecuna tiyan (2 Timoteo 3:1, 2). Ñucanchijca paicuna shinaca mana casha ninchijchu.

7. a) ¿Jehová Diosca imata rurachuntaj munan? b) ¿Imamantataj cꞌuyanacushpa causachun munan?

⁷ Yaya mamacunaca paicunapaj huahuacuna alli apanacushpa causachunmi munancuna. Jehová Diospish chashnallatajmi paipaj huahuacuna cꞌuyanacushpa causachun munan. Caishuj chaishuj cꞌuyanacushpaca Diosta sirvijcuna cashcatami ricuchinchij (Juan 13:35). Salmota quillcajca: “Riquichij, ¡Huauquindijcuna tandalla, shuj shinalla causanaca yallitaj alli, yallitaj sumajmari!” nircami (Salmo 133:1). Huauqui panicunata cꞌuyashpaca Jehová Diosta cꞌuyashcatami ricuchinchij (1 Juan 4:20). Cꞌuyaj, llaquij huauqui panicunahuan tandalla Diosta sirvishcamantami contento sintirinchij (Efesios 4:32).

8. 1 Juan 5:3-pi nishca shinaca ¿imamantataj Diosta cazuna canchij?

⁸ Jehová Diosca huahuacuna yaya mamata cazuchunmi munan. Ñucanchijpish paita cazuchunmi munan (Efesios 6:1).  Jehová Dios ñucanchijta rurashcamanta, causaita cushcamanta, yachaj Yaya cashcamantami paita cazuna canchij. Pero tucuimanta yallica paita cꞌuyashcamantami cazuna canchij (1 Juan 5:3-ta liyipai). Yayitu Diosca paita cazuchunca mana obliganchu. Ashtahuanpish cada uno imata decidichunmi saquin. Cꞌuyaimanta Diosta cazujpica paica cushillami sintirin.

9, 10. ¿Dios mandashcacunataca imamantataj rijsina, cazuna canchij?

⁹ Yaya mamacunaca paicunapaj huahuacuna alli causachunmi munan. Chaimantami paicunamanca caitami rurana cangui, caitaca mana ruranachu cangui nishpa yachachincuna. Huahuacunaca yaya mamata cazushpaca paicunata respetashcata, paicunapi confiashcatami ricuchincuna. Ñucanchijpish alli causasha nishpaca Yayitu Dios mandashcacunatami rijsina, cazuna canchij. Chashnami paita cꞌuyashcata, respetashcata ricuchinchij (Isaías 48:17, 18). Diospaj mandashcacunata mana cazushpaca ñucanchijllatajmi llaquipi urmashun (Gálatas 6:7, 8).

¹⁰ Dios munashca shina causashpaca tucuipimi alli causashun. Shinallataj paimantapish manataj caruyashunchu. Diosca ñucanchij imalla minishtishcataca allimi yachan. Estados Unidos llajtapi causaj pani Auroraca: “Jehová Diosta tucuipi cazushpaca alli causaitami charishun” ninmi. Chaica  ciertomi can. ¿Diosta cazushcamantaca ima bendicioncunatataj chasquishcanchij?

11. ¿Imamantataj Diostaca mañana canchij?

¹¹ Juchayujcuna cashcamantami Diosta cazungapajca tucui pudishcata rurana canchij. Jehová Diosta cazuna sinchi ricurijpica pai ayudachunmi mañana canchij. Salmista runaca: “Cambaj espirituhuan cazuna yuyaita cuhuangui” nircami (Salmo 51:12, QC, 1989). Denise shuti panica precursorami can. Paica: “Diosta cazuna sinchi ricurijpica chai ratomi allita rurangapaj Yayitu Diosta ayudachun mañani” ninmi. Ñucanchijpish cai pani shina Diosta mañajpica paica siempremi ayudanga (Lucas 11:9-13).

12. Efesios 5:1-pi nishca shinaca ¿imatataj rurana canchij?

¹² (Efesios 5:1-ta liyipai). Jehovapaj huahuacuna cashcamantami pai laya cꞌuyaj, llaquij, perdonaj cana canchij. Allita rurajta ricushpami gentecunaca Diosta rijsisha ningacuna (1 Pedro 2:12). Diosta sirvij yaya mamacunaca Jehová cuidashca shinallatajmi huahuacunataca cuidana can. Chashna rurajpimi huahuacunaca Diosta sirvisha ningacuna.

13. ¿Ama manchaita charingapajca imatataj yuyarina canchij?

¹³ Huahuacunaca yaya mamata cꞌuyashcamantami paicunamanta shujtajcunaman  parlanata munancuna. Ñucanchijpish Yayitu Diosta cꞌuyashcamantami shujtajcunamanca paimanta yachachinchij. Rey David shinami ñucanchijca “Jehová Diosmantaca cushicuihuan huillasha” ninchij (Salmo 34:2, NWT ). Maijancunaca manchaimantami Diosmantaca mana parlasha nincuna. ¿Ama manchaita charingapajca imatataj yuyarina canchij? Predicashpa Yaya Diosta cushichinata, gentecunapish Diosmanta yachanata minishtishcatami yuyarina canchij. Apostolcuna causashca punllacunapi ayudashca shinallatajmi ñucanchijtapish Jehová Diosca paita sirvichun ayudanga (1 Tesalonicenses 2:2).

14. ¿Shujtajcunamanca imamantataj alli huillaicunataca yachachina canchij?

¹⁴ Jehová Diosca maimanta cajpi, ima shimita parlajpipish tucuicunamanmi cꞌuyaita ricuchichun munan (Hechos 10:34, 35). Alli huillaicunata yachachishpami gentecunataca cꞌuyashcata ricuchinchij (Mateo 28:19, 20). ¿Paicunaman huillajpica ima shinataj causangacuna? Gentecunaca alli huillaita uyashpaca cunan punllacunapipish alli causaitami charingacuna. Shinallataj shamuj punllacunapicarin huiñaitami causangacuna (1 Timoteo 4:16).

15, 16. ¿Imamantataj cushilla sintirinchij?

¹⁵ Jehová Diosca cꞌuyaj Yaya cashcamantami paipaj huahuacunapish cushilla causachun munan (Isaías 65:14). Llaquicunahuan cashpapish cushillami causai tucunchij. Por ejemplo, Jehová Dios ñucanchijta cꞌuyashcata yachashcamanta, paita alli rijsishcamantami cushilla sintirinchij (Jeremías 15:16). Shinallataj shuj shinalla Diosta sirvicushcamanta, paipaj mandashcacunata cazushcamanta, caishuj chaishuj cꞌuyanacushcamantami paipaj pueblo ucupi cushilla sirvicunchij (Salmo 106:4, 5).

¹⁶ Jehová Diosca ñallami millai gentecunata tucuchinga. Shinallataj pai mandacujpimi cai Allpaca shuj sumaj paraíso tucunga. Huañushcacunapish paraisopi causarishpami paicunapaj familiacunahuan cushilla causangacuna (Juan 5:28, 29). Shamuj punllacunapi alli causai tiyanata yachashpami cushilla sintirinchij. Ashtahuancarin cai Allpapi causajcunapish jahua pachapi causajcunapish ñallami Yayitu Diostaca shuj shinalla adorangacuna.