1, 2. ¿Imanasqataq Jehova Diosqa tukuyta ruwarqa runankuna kananchikpaq, hinaspa imatam chaypaqqa ruwarqa?

JEHOVA DIOSMI akllaykuwarqanchik paypa runankuna kananchikpaq. Chaymi payllapaqña kawsakunchik. Manataqmi iskayrayanchikchu Jesus ñuqanchikrayku wañukusqanmantapas. Diospa runankuna kasqanchikraykutaqmi iñiqmasinchikkunawanpas huk sunqulla hinaspa kusisqa kawsakunchik. Chaymantapas manam iskayrayanchikchu hamuq punchawkunapi kay allpa pachapi kaspa utaq hanaq pachapi kaspapas wiñaypaq kusisqa kawsakunanchikmantaqa.

² Jehova Diosqa kuyawasqanchikraykum tukuyta ruwarqa runankuna kananchikpaq (Juan 3:16;1 Cor. 6:20). Bibliapas niwanchikmi ñuqanchikrayku wañunanpaq kuyasqan churinta kay allpa pachaman kachamusqanmanta. Jesuspa wañukusqanwantaqmi Dioswan kuyachikuytapas atinchik, atinchiktaqmi kuyakuq taytanchikta hina qawaytapas. Arí, qayna yachamusqanchikman hinam Jehova Diosqa pimantapas aswan kuyakuq taytanchik.

3. Bibliata huk kaqnin qillqaq hina, ¿imatam sunqunchikpi nikunchikman? (Qaway “ Diosqa, ¿kuyawanchikchu?” niqta).

³ Yaqapaschá ñuqanchikpas bibliata huk kaqnin qillqaq hina sunqunchikpi nikunchikman: ‘Tukuy ima quwasqanmantaqa, ¿imatataq tayta Diosman kutichipusaq?’, nispa (Sal. 116:12). Tukuy ima Jehova Diospa kasqanraykum paymanqa mana imatapas kutichipuchwanchu. Chaywanpas payta kuyasqanchikrayku hinaspa kusisqa kananta munasqanchikraykum tukuyta ruwanchik. Apostol Juanpas nirqam: “Ñuqanchikqa kuyakuq kanchik Dios puntata kuyawasqanchikraykum”, nispa (1 Juan 4:19). Chaynaqa, ¿imakunatam ruwananchik Jehova Diosta kuyasqanchikrayku?

4. Santiago 4:8 nisqanman hinaqa, ¿imanasqataq kallpanchakunanchik Diosman asuykunanchikpaq?

⁴ Jehova Diosqa munanmi sunqumanta payman asuykunanchikta. Chaypaqqa paytam mañakunanchik (qaway Santiago 4:8). Paytaqa mañakuchwanmi imay horapas hinaspa maypi kaspanchikpas. Jehova Diosqa mañakusqanchiktaqa uyarinpunim. Ñuqanchikpas Jehova Dios uyariytaqa atinchiktaqmi. ¿Imaynata? Bibliata hinaspa qillqanchikkunata ñawinchaspanchikmi chaynataq sapa huñunakuykunapi yachachikuykunata sumaqta uyarispanchikmi. Imaynam warmachakunapas mana imatapas pakaykuspanku tukuy imata taytanman willakunku, chaynam ñuqanchikpas taytanchik Jehova Diosman mana imatapas pakaykuspanchik tukuy imamanta willakunanchik.

5. ¿Imaynatam Diosta mañakunanchik?

⁵ Chaynaqa, ¿imaynatam Diosta mañakunanchik? Tukuy sunqumantam, hinaspapas mana imatapas pakaykuspam paymanqa willakunanchik (Sal. 62:8). Chaymi sapakama sunqunchikpi tapurikunanchik: “Diosta mañakuspayqa, ¿tukuy sunquymantachu mana pakaykuspay mañakuni icha hawa sunqullachu yanqa-yanqallata?”, nispa. Ñuqanchikqa Diosmanta karunchakuytaqa manamá munanchikchu. Chaymi paytaqa tuta-punchaw mañakunanchik. Paymanqa tukuy llakinchikkunatawan imapas kusichiwasqanchiktam willakunanchik. Chaynaqa amayá iskayrayasunchu Diosninchikta mañakuptinchik yanapaykuwananchikmantaqa.

6. Diosmanta mana karunchakunanchikpaqqa, ¿imaynam kananchik?

⁶ Jehova Diosmanta mana karunchakunanchikpaqqa sunqumantam riqsikunanchik tukuy ima quwasqanchikmanta. Yaqapaschá ñuqanchikpas Salmosta qillqaq hina niyta munanchik. Paymi nirqa: “[Diosnilláy], achkallañam admirakuypaq kaqkuna ruwasqaykiqa, achkallañam allinniykupaq ruwasqaykiqa, yupayta munaspaypas manam atiymanchu, willakuyta munaspapas manam tukuymanchu”, nispa (Sal. 40:5). Arí, Jehova Diostaqa rimasqanchikkunawan hinaspa tukuy ima ruwasqanchikkunawanmi agradecekunanchik. Ñuqanchikqa manamá hawa runakuna hina kaytaqa munanchikchu. Bibliapa nisqanman hinam kay ‘tukupay punchawkunapi’ runakunaqa mana agradecekuqllaña kanku. Paykunaqa manam riqsikunkuchu Jehova Dios tukuy ima qusqanmantaqa (2 Tim. 3:1, 2). Chaynaqa ñuqanchikpas amayá paykuna hinaqa kasunchu.

7. ¿Imatam Jehova Diosqa mana munanchu,  hinaspa imanasqa?

⁷ Tayta-mamakunaqa manamá munankuchu warmankuna chiqninakunankutaqa. Chaynallataqmi taytanchik Jehova Diospas, payqa manam munanchu runankuna imawanpas sientichinakunanchiktaqa. Aswanqa munanmi sunqumanta llapallanchik kuyanakunanchikta, chayta qawaspankum runakunapas yachanqaku Diospa runankuna kasqanchikta (Juan 13:35). Salmos qillqaqpas nirqam: ‘¡Mayna sumaqmi, mayna munayllapaqmi, wawqi-panikunapa huk sunqulla kawsakuyninkuqa!’, nispa (Sal. 133:1). Ñuqanchikpas kay Salmos qillqaq hinam iñiqmasinchikkunawan huk sunqulla kaspanchik kusisqa tarikunchik. Iñiqmasinchikkunata kuyaspanchikqa Jehova Diosta kuyasqanchiktam qawachichkanchik (1 Juan 4:20). Arí, Jehova Diospa runankunaqa maymantaña kaspapas kuyakuqllañam kanchik, ¡chayqa mayna sumaqmi! (Efes. 4:32).

8. 1 Juan 5:3 nisqanman hinaqa, ¿imanasqataq Jehova Diosta kasukunchik?

⁸ Jehova Diosqa tayta-mamanchikta kasukunanchiktam munan, astawanraqmi munan payta kasukunanchiktaqa (Efes. 6:1). Ichaqa, ¿imanasqataq Diostaqa kasunanchik? Unanchawasqanchikraykum hinaspapas kawsakunapaq  tukuy ima quwasqanchikraykum. Astawanraqmi kasukuytaqa munanchik sunqumanta kuyasqanchikrayku (qaway 1 Juan 5:3). Manamá Jehova Diosqa hikutawanchikchu payta kasukunanchikpaqqa. Payqa munanmi kikinchikmanta kasukunanchikta. Sunqumanta kasukuptinchikqa Jehova Diosqa anchatam kusikun.

9, 10. ¿Imaynam kawsakunchik Diosta kasukuspanchikqa?

⁹ Tayta-mamakunaqa warmankuna kusisqa kawsakunankutam munanku. Chaymi warmankuta ninku: “Kaytam-waktam ruwanayki”, nispa. Taytanpa utaq mamanpa nisqanta kasukuq warmakunaqa kusisqam kawsakunku, tayta-mamanpas kusisqataqmi tarikunku. Taytanchik Jehova Diospas kusisqa kawsakunanchikta munasqanraykum kamachikuyninkunata kasukunanchikpaq niwanchik. Niwasqanchikta kasukuspanchikqa kusisqam kawsakunchik, Diosninchikpas kusikuntaqmi kasukuq kasqanchikwan (Is. 48:17, 18). Diosta mana kasukuqkunam ichaqa mana kusisqachu kawsanku (Gal. 6:7, 8).

¹⁰ Jehova Diosta kasukusqanchikraykutaqmi haykalla kawsakunchik. Manataqmi ima sasachakuywanpas llumpaytaqa hukmanyanchikchu. Chaymantapas kasukuq kasqanchikqa yanapawanchiktaqmi mana allinkunaman mana wichiykunanchikpaq. Estados Unidospi yachaq iñiqmasinchik Aurorapas ninmi: “Diosta kasukuyqa mana allinkunamantam harkawanchik hinaspapas kusisqa kawsakunanchikpaqmi yanapawanchik”, nispa. Arí, nisqanqa chiqapmi. Chaymi allin kanman sapakamata Jehova Dios imayna yanapawasqanchikmanta yuyaymanayninchik.

11. ¿Imam yanapawasun Diosta kasukunapaq?

¹¹ Pantaq runa kasqanchikraykum wakinpiqa  sasachakunchikman Diosta kasukunapaq. Ichaqa, ¿imam yanapawasun? Sapa punchaw Diosta mañakuyninchikmi. Salmos qillqaqpas Diostam kaynata mañakullarqa: ‘Kasukuq sunquyuqtañayá ñuqallaytaqa uywakullaway’, nispa (Sal. 51:12). Diosmanta 70 horata willakuq iñiqmasinchik Denispas ninmi: “Wakinpiqa pantaq kasqayraykum sasachakuni Jehova Diosta kasukunaypaq, chaymi yanapaykuwananpaq sunqumanta mañakullani”, nispa. Ñuqanchiktapas Jehova Diosqa uyariwasunmi kasukuq kanapaq sunqumanta mañakuptinchikqa (Luc. 11:9-13).

12. Efesios 5:1 nisqanqa, ¿imapaqmi kallpanchawanchik?

¹² (Qaway Efesios 5:1). Jehova Diosta kuyasqanchikraykum pay qatipakuyta munanchik. Chaymi kallpanchakunchik pay hina kuyakuq, llakipayakuq hinaspa pampachakuq kananchikpaq. Chayna kasqanchikta qawaspankum runamasinchikkunapas Jehova Diosmanta yachayta munanqaku (1 Ped. 2:12). Tayta-mamakunapas Jehova Dios hina kuyakuywan warmankunata uywaptinkuqa paykunapas Jehova Dios kasukuytam munanqaku.

13. ¿Imam yanapawasun mana manchapakuspa Diosmanta willakunapaq?

¹³ Warmachakunaqa taytankuwan kuska kaspankum kusisqa tarikunku. Chaymi taytanmanta pipas tapuykuptinqa kusikuywan  taytan kuyasqanmanta willakunku. Chaynallataqmi ñuqanchikpas kusisqa tarikunchik Diospa runankuna kasqanchikrayku. Runamasinchikkunamanpas willakunchikmi Jehova Dios kuyakuq kasqanmanta, chaynapim paykunapas riqsiyta qallaykuspanku kusisqa kawsakunqaku. Kamachiq David hinam ñuqanchikpas  Jehova Diosmanta kusikuywan runamasinchikkunaman willakunchik (Sal. 34:2). Ichaqa manchapakuq kasqanchikraykum wakinpiqa sasachakuchwan pimanpas Diosmanta willakuyta. Chaynaqa, ¿imam yanapawasun mana manchapakunapaq? Yanapawasunqa runakunaman paymanta willakuptinchik kusisqa tarikusqanmanta yuyaymanayninchikmi. Yanapawasuntaqmi runakuna Diosta riqsispanku kusisqa tarikunankumanta yuyaymanayninchikpas. Diospas atiyninwanmi yanapawasun ñawpaqta yupaychaqninkunata yanapasqanman hina (1 Tes. 2:2).

14. ¿Imakunaraykum tukuyta ruwanchik runamasinchikkunaman taytanchikmanta yachachinapaq?

¹⁴ Taytanchik Jehova Diosqa manam pimanpas sayapakunchu. Chaymi payqa kusikun ñuqanchikpas pay hina mana pimanpas sayapakuptinchikqa (Hech. 10:34, 35). Runamasinchikkunata kuyasqanchikraykutaqmi tukuyta ruwanchik taytanchik Jehova Diosmanta yachachinapaq (Mat. 28:19, 20). Ichaqa, ¿imanasqaraqtaq tukuyta ruwanchik runamasinchikkunaman taytanchikmanta yachachinapaq? Ñuqanchik hina sumaqta kawsakunankuta munasqanchikraykum. Chaymantapas hamuq punchawkunapi wiñaypaq kawsakunankuta munasqanchikraykum (1 Tim. 4:16).

15, 16. ¿Imanasqataq kusisqa kanchik?

¹⁵ Kuyakuq taytanchik Jehova Diosqa munanmi kusisqa kawsakunanchikta (Is. 65:14). Chaymi kusisqa kayta atinchik ima sasachakuypiña tarikuspapas. ¿Imanasqa? Jehova Dios anchata kuyawasqanchikmanta mana iskayrayasqanchikraykum, hinaspapas paymanta imam kaqta bibliapi yachasqanchikraykum (Jer. 15:16). Kusisqataqmi kanchik sunqunmanta Jehova Diosta kuyaq chaynataq kasukuq iñiqmasinchikkunawan kuska kasqanchikrayku (Sal. 106:4, 5).

¹⁶ Astawanraqmi kusisqa kanchik hamuq punchawkunapi taytanchik Jehova Dios wiñay kawsakunapaq niwasqanchikmanta yachaspanchik. Chaypaqqa puntataraqmi tukuy mana allinkunata chinkachinqa hinaspañam kay allpa pachanchikta huertayachinqa. Chaymantapas taytanchikqa kuyawasqanchikraykum wañukuq ayllunchikkunatapas kaqmanta kawsarichimunqa kuska kawsakunanchikpaq (Juan 5:28, 29). Chaymanta yachayqa anchatam kusichiwanchik, ¿aw? Manapas unaymantam kay pachapi kaqkunapas hinaspa hanaq pachapi kaqkunapas kuyakuq taytanchik Jehova Diosta wiña-wiñaypaq hatunchasunchik hinaspapas payllatañam yupaychasunchik.