ATIKARA APII 7
Akaperepere Tatou ia Iehova, to Tatou Metua
“Te anoano nei tatou iaia, no te mea koia ana tei anoano mai ia tatou nei.”—1 IOA. 4:19.
IMENE 3 To Tatou Maroiroi, Manakonakoanga, Irinakianga
I ROTO I TEIA APII *
1-2. No teaa e akapeea a Iehova i te akariro anga ia tatou ei aronga no tona ngutuare?
KUA pati mai a Iehova ia tatou kia riro ei aronga akamori i roto i tona ngutuare. E patianga manea tikai teia! Te au tangata i roto i teia ngutuare e aronga kua akatapu ia ratou ki te Atua e kua tuku i to ratou akarongo ki roto i te atinga oko o tana Tamaiti. E ngutuare mataora tikai to tatou. Te mataora nei tatou i tetai oraanga meitaki i teianei e te tapapa nei i te oraanga mutu kore a te tuatau ki mua—i te rangi me kore i te enua Parataito.
2 No tona inangaro maata ia tatou, kua akatuera a Iehova i te mataara no tatou kia riro ei aronga no tona ngutuare. (Ioa. 3:16) Kua ‘okoia tatou i te oko.’ (1 Kori. 6:20) Na roto i te oko, kua rauka ia tatou te tikaanga manea kia akavaitata atu kia Iehova. Kua akameitakiia tatou kia kapiki i Tei Teitei i te ao katoa ei Metua. E mei ta tatou i apii mai i te atikara i mua ake, ko Iehova rai to tatou Metua.
3. Eaa te au uianga ka ui tatou? (Akara katoa i te pia “ Kua Kite Ainei a Iehova Iaku?”)
3 Mei tetai tata Pipiria, penei ka ui tatou e: “Eaa ra taku e apai atu na Iehova, i te au takinga-meitaki katoa nona iaku nei?” (Sala. 116:12) Te pauanga kare e rauka ia tatou i te tutaki i to tatou Metua i te rangi. Kua akakeuia tatou kia inangaro iaia. Kua tata te apotetoro ko Ioane e: “Te anoano nei tatou iaia, no te mea koia ana tei anoano mai ia tatou nei.” (1 Ioa. 4:19) Na teea mataara ka akaari tatou i te aroa ki to tatou Metua i te rangi?
AKAVAITATA KIA IEHOVA
4. Ia Iakobo 4:8, eaa ra tatou ka akavaitata atu ei kia Iehova?
4 Inangaro a Iehova ia tatou kia akavaitata atu e kia tuatua kiaia. (E tatau ia Iakobo 4:8.) Kua akamaroiroi aia ia tatou kia “tamou marie tikai i te pure,” e te akarongo maira aia ia tatou. (Roma 12:12) Ka akarongo ua mai aia e kare e iu ia tatou. Aru mai, ka akarongo tatou kiaia na te tatauanga i tana Tuatua te Pipiria, e tetai atu au puka te ka tauturu ia tatou. Ka akarongo katoa tatou iaia i te au uipaanga Kerititiano. Mei te tamariki ka tuatua putuputu e ka akavaitata ratou ki to ratou metua, ka riro katoa ta tatou tuatua putuputu kia Iehova i te akavaitata ia tatou kiaia.
5. Akapeea tatou me akameitaki i ta tatou pure?
5 Akamanako ana i toou tu me pure ki te Atua. Inangaro a Iehova ia tatou kia riringi i to tatou ngakau kiaia, na roto i te pure. (Sala. 62:8) Ka ui tatou i teia uianga: ‘Te akaari maira ainei taku pure i te au manako taokioki e te puapinga kore, me kare te au manako ngakau tae?’ Kare e ekoko ana ka inangaro maata koe ia Iehova, e ka tauta kia ngaueue kore toou pirianga kiaia. Ka anoanoia koe kia tuatua putuputu kiaia. Akakite i toou manako oonu. Akakite kiaia taau e mataora ana e taau e mareka kore ana. Ka irinaki tatou e ka tauturu mai aia ia tatou.
6. Eaa ta tatou ka rave kia akavaitata ki to tatou Metua i te rangi?
6 Kia akavaitata ki to tatou Metua i te rangi, ka akaari ua rai tatou i te au tu akameitaki. Āriki tatou i ta te tata taramo e: “E manganui, e taku Atua, e Iehova, te au angaanga taka ke i raveia e koe ra, e toou ra manako ia matou nei: kare e tika kia tatau ua atu ki mua ia koe na; e akakite au, e tuatua oki au i te reira; kare ra e tika kia tatau atu i te maata.” (Sala. 40:5) Ka maata ta tatou ka rave i te akaari ua i te tu akameitaki; ka akaari tatou na roto i ta tatou tuatua e ta tatou angaanga. Te akaari maira teia e tuke tatou mei te katoatoa i teia tuatau. Te noo nei tatou i te tuatau kare te manganui e akameitaki ana i ta te Atua i rave no ratou. Tetai akairo e te noo nei tatou i te “tuatau openga” te tu mareka kore. (2 Timo. 3:1, 2) Auraka rava tatou e akaari i teia tu!
7. Eaa ta Iehova e inangaro ra ia tatou kia rave e no teaa ra?
7 Kare te au metua e inangaro i ta ratou tamariki kia tauetono, mari ra kia oaoa ratou. Pera katoa, te inangaro maira a Iehova i tana au tamariki kia oaoa ratou tetai e tetai. Akaari maira to ratou aroa e e Kerititiano mou ratou. (Ioa. 13:35) Āriki tatou i ta te tata taramo e: “Te meitaki e te mataora, kia noo katoa te au taeake ma te tau tikai!” (Sala. 133:1) Me aroa tatou i to tatou au taeake e te au tuaine, akapapu tatou kia Iehova e te inangaro ra tatou iaia. (1 Ioa. 4:20) Kia takinga meitaki tatou i to tatou au taeake e te au tuaine “ma te ngakau maru aroa ua!”—Ephe. 4:32.
AKAARI I TE AROA MA TE AKARONGO
8. Ia 1 Ioane 5:3, eaa te tumu ka akarongo ei tatou kia Iehova?
8 Inangaro a Iehova i te au tamariki kia akarongo ki to ratou au metua, e te tapapa maira aia ia tatou kia akarongo. (Ephe. 6:1) Ka tau rai e kia akarongo tatou no te mea koia Tei Anga ia tatou, te Tumu o te ora, e te metua pakari. Inara, te tumu ka akarongo tatou kia Iehova no to tatou inangaro iaia. (E tatau ia 1 Ioane 5:3.) Noatu e maata te au tumu ka akarongo tatou ia Iehova, kare aia e māro ia tatou kia pera. Oronga mai a Iehova i te tu rangatira kia tatou, no reira aia i mataora ai me iki tatou i te akarongo kiaia.
9-10. Eaa i puapinga ai kia kite i te kaveinga a te Atua e te rave i te reira?
9 Inangaro te au metua i ta ratou tamariki kia paruru meitaki ia. No reira ratou i maani ei i te au ture kia puapingaia ta ratou tamariki. Me aru te tamariki i teia, te akaari ra ratou e te irinaki ra i to ratou au metua. E mea puapinga no tatou kia kite, kia akarongo e kia akono i te au kaveinga ta to tatou Metua i te rangi i oronga mai. Me pera tatou, te inangaro ra tatou ia Iehova e te akangateitei ra iaia e ka puapinga tatou. (Isa. 48:17, 18) Kareka, te aronga tei kopae ia Iehova e tana au kaveinga, kua kokoti ratou i te kino.—Gala. 6:7, 8.
10 Me aru tatou i ta Iehova au kaveinga, ka paruruia tatou i te pae kopapa, pae ngakau, e te pae vaerua. Kua kite a Iehova i te meitaki no tatou. Karanga a Aurora, e noo ana i Marike e, “Kua kite au me akarongo au kia Iehova ka meitaki toku oraanga.” Akapeea koe i puapingaia ai me akarongo ki ta Iehova au kaveinga?
11. Akapeea te pure me tauturu ia tatou?
11 Tauturu te pure ia tatou kia akarongo, noatu e ka ngata te reira i tetai taime. Ka ngata i te akarongo ia Iehova Sala. 51:12) Karanga a Denise, e painia tamou e, “Me ngata iaku i te rave i ta Iehova akauenga, ka pure au no te maroiroi kia rave i te reira.” Papu ia tatou e ka pau ua rai a Iehova i ta tatou patianga.—Luka 11:9-13.
no to tatou tu ara, inara ka aruaru tatou i te akarongo ua rai kiaia. Kua pati akatenga te tata taramo ki te Atua e: “Kia tauturuia mai au e te ngakau oronga ra.” (TAUTURU I TETAI KIA INANGARO I TO TATOU METUA
12. Ia Ephesia 5:1, eaa ta tatou ka rave?
12 E tatau ia Ephesia 5:1. Ei au “tamariki akaperepere” na Iehova, ka aruaru tatou i te aru iaia. Ka akaari tatou i tona tu aroa, takinga meitaki e te akakore i te ara a tetai ke. Me akara mai te aronga kare i kite i te Atua i to tatou au tu meitaki, penei ka akakeuia ratou kia apii no runga iaia. (1 Pete. 2:12) E tumu meitaki to te au metua Kerititiano no te aru ia Iehova me akono i ta ratou tamariki. Me rave ratou i te reira, penei ka akakeuia ta ratou tamariki kia akariro i to tatou Metua aroa ei oa no ratou.
13. Eaa ta tatou ka akamanako?
13 Ka rekareka tetai tamaiti i tona metua tane e ka mataora aia i te tuatua no runga iaia. Pera katoa, ka rekareka tatou i to tatou Metua i te rangi, ko Iehova, e te inangaro ra aia i tetai kia kite iaia. I roto i to tatou ngakau, aite to tatou tu mei te Sala. 34:2) Akapeea me akama tatou? Akapeea e rauka ai ia tatou te tu mataku kore? Me mataku kore tatou ka akamou to tatou manako ki runga i te akamarekaanga ia Iehova e ka puapingaia tetai pae me apii no runga iaia. Oronga mai a Iehova i te tu mataku kore kia tatou. Kua tauturu aia i te au taeake i te anere mataiti mua e ka tauturu katoa aia ia tatou i teianei.—1 Tesa. 2:2.
Ariki ko Davida, tei tata e: “E akapaapaa toku vaerua ia Iehova.” (14. Eaa tetai tumu ka piri tatou ki te angaanga no te akariro anga i te tangata ei pipi?
14 Kare a Iehova e papakitai ana, e te mataora ua ra aia me kite mai ia tatou me akaari i te aroa ki tetai, noatu noea mai ratou. (Anga. 10:34, 35) Tetai mataara no te akaari i te aroa ki tetai, koia oki na roto i te angaanga tutu aere. (Mata. 28:19, 20) Eaa ta teia ka akatupu? Te aronga ka akarongo mai, ka rauka ia ratou te oraanga meitaki i teianei e te oraanga mutu kore a te tuatau ki mua.—1 Timo. 4:16.
INANGARO I TO TATOU METUA E KIA MATAORA
15-16. Eaa te au tumu no tatou kia mataora?
15 E metua aroa a Iehova, no reira inangaro aia i tona ngutuare kia mataora. (Isa. 65:14) E maata te au tumu ka rekareka ai tatou i teianei, noatu ka na roto tatou i te au manamanata. Ei akaraanga, kua papu ia tatou e te aroa maira to tatou Metua i te rangi ia tatou. Kua apii tatou i te tuatua mou no roto i te Tuatua a te Atua, te Pipiria. (Iere. 15:16) E iti tangata manea tatou tei inangaro ia Iehova, tana au kaveinga meitaki e te aroa i tetai e tetai.—Sala. 106:4, 5.
16 Ka mataora ua tatou no te mea e manakonakoanga papu to tatou e ka meitaki ua atu to tatou oraanga a te tuatau ki mua. Kite tatou kare e roa atu ana ka takore a Iehova i te aronga kino, e i raro ake i tona Patireia ka akariro akaouia te enua ei Parataito. E manakonakoanga manea katoa to tatou no te aronga tei mate ka akatuia mai e ka kapiti akaou ratou ki to ratou aronga akaperepere. (Ioa. 5:28, 29) E tuatau mataora tikai! Te mea puapinga maata, papu ia tatou ka akakaka e ka akapaapaa te katoatoa, to te rangi e te enua i to tatou Metua aroa i te rangi.
IMENE 12 Te Atua Ngateitei ko Iehova
^ para. 5 Kite tatou e te aroa maira to tatou Metua ko Iehova ia tatou, e kua kapiti mai ia tatou ki tona ngutuare akamori. No reira, ka akakeu ia tatou kia akaperepere iaia. Akapeea tatou me akaari i te inangaro ki to tatou Metua aroa? Ka uriuri teia atikara i tetai au tumu ka rave tatou i teia.