1-2. Soske hem ko kova način o Jehova dengja amen prilika te ova delo tari leskiri familija?

O JEHOVA vikingja amen te ova delo tari leskiri familija taro verna sluge. Adalea sikavgja amenge bari čest! Ki amari familija isi manuša kola so dengje lafi kaj ka služinen e Devleske hem kola so sikavena vera ki otkupno žrtva leskere Čhaveskiri. Amen siem delo tari jekh bahtali familija. Panda akana isi amen smislovno životo, hem edvaj adžikeraja te živina večno — bizi razlika dali ko nebo ili ko raj ki Phuv.

² Adaleske so mangela amen, o Jehova platingja but bari cena baši amende, hem adalea dengja amen prilika te ova delo tari leskiri familija (Jovan 3:16). I Biblija vakerela: „Skupo sien kinde“ (1. Kor. 6:20). Preku i otkupnina, o Jehova dela amen prilika te ova lea paše. Isi amen čest te vikina le „mo Dad“ iako ov tano i najbari ličnost ko univerzum. Sar so dikhlem ki angluni statija, o Jehova tano o najšukar Dad so postojnela.

3. Kola pučiba šaj te puča amen? (Dikh i ramka „ Dali o Jehova dikhela man?“)

³ Isto sar jekh biblisko pisateli, amen da šaj pučaja amen: „Solea te iranav e Jehovaske bašo sa o šukar bukja so kergja len mange?“ (Ps. 116:12). O odgovor tano kaj amen nikogaš našti te irana amare Dadeske soj ko nebo. Ama, leskoro mangipe terinela amen te irana leske mangipaja. O apostol Jovan pišingja: „Amen sikavaja mangipe, adaleske so prvo ov sikavgja mangipe sprema amende“ (1. Jov. 4:19). Ko save načinija šaj te  sikava amare Dadeske soj ko nebo kaj mangaja le?

4. Sprema Jakov 4:8, soske valjani te trudina amen te ova paše e Jehovaja?

⁴ O Jehova mangela te ova lea paše hem redovno te molina amen leske. (Čitin Jakov 4:8.) Ov pottikninela amen te istrajna ki molitva, hem sekogaš tano spremno te šunel amen (Rim. 12:12). O Devel nikogaš nane previše zafatimo te šaj te šunel amen, hem nikogaš na umorinela pe. A amen šunaja le keda čitinaja leskoro Lafi, i Biblija, hem o publikacie so pomožinena amenge te haljova la. Isto agjaar, šunaja le keda šukar šunaja ko sostanokija. Isto sar jekh šukar komunikacija so pomožinela e čhavenge te oven paše ple roditelencar, agjaar i redovno komunikacija e Jehovaja ka pomožinel amenge te ačhova lea paše.

5. Sar šaj te kera amare molitve te oven pošukar?

⁵ Razmislin save tane tle molitve. O Jehova mangela te vakera leske sa adava so isi amen ko vilo (Ps. 62:8). Šukar tano te puča amen: „Dali ko mle molitve samo mehanički vakerava sa jekh ista lafija ili lafija so šungjum len javerestar? Ili, trudinava man te molinav man e Jehovaske mle lafencar hem iskreno taro vilo?“ Tu sigurno but mangea e Jehova, hem mangea te ove lea paše. Adaleske mora redovno te kere lea lafi. Vaker leske tle najiskrena čuvstvija. Vaker leske so kerela tut bahtalo hem so kerela tut tažno. Ov sigurno kaj sekogaš šaj te rode lestar pomoš.

6. So mora te kera te šaj te ačhova paše amare Dadea soj ko nebo?

⁶ Te šaj te ačhova paše amare Dadea soj ko nebo, mora sekogaš te ova leske blagodarna. Složinaja amen e psalmistea kova so pišingja: „Tu kergjan but čudesna bukja, o Jehova, Devla, hem but bukja isi tut namera te kere amenge — nikoj našti te sporedinel pe tuja. Te probinav sine te raskažinav hem te kerav lafi baši lende, ka našti sine, soske ola tane but poviše nego so šaj te gejnav len“(Ps. 40:5). Amen na samo so osetinaja blagodarnost, nego isto agjaar trudinaja amen amare lafencar hem postapkencar te sikava e Jehovaske kobor siem leske blagodarna. Agjaar dikhela pe kaj razlikujnaja amen taro javera. O manuša ko sveto nane blagodarna bašo sa adava so kerela lenge o Devel. Ustvari, jekh taro dokazija kaj živinaja „ko posledna dive“ tano kaj o manuša „nane te oven blagodarna“ (2. Tim. 3:1, 2). Nikogaš te na dozvolina te ova asavke!

7. So mangela o Jehova te kera, hem soske?

⁷ O roditelija na mangena lengere čhave te rasprajnen pe, nego te oven ko mir hem te pomožinen pe. Slično, o Jehova mangela sa leskere čhave te oven ko mir maškar peste. Ustvari, o mangipe so isi maškar amende tano jasno dokaz kaj siem čačutne hristijanja (Jovan 13:35). Složinaja amen e psalmistea kova so pišingja: „Kobor tano šukar hem prijatno keda o phralja živinena zaedno ko jekhipe!“ (Ps. 133:1). Keda mangaja amare phralen hem phenjen sikavaja e Jehovaske kaj mangaja le (1. Jov. 4:20). Kobor tano šukar so siem delo tari jekh familija ki koja so sarine tane milostiva hem sočuvstvitelna jekh jekhea! (Ef. 4:32).

8. Sprema 1. Jovanovo 5:3, soske siem poslušna e Jehovaske?

⁸ O Jehova rodela amendar te ova leske poslušna isto sar so rodela e čhavendar te oven poslušna ple roditelenge (Ef. 6:1). Ov zaslužinela te šuna le soske tano amaro Stvoriteli kova so ikerela amen ko životo  hem soske tano o najmudro Dad so postojnela. Ama, i glavno pričina soske siem poslušna e Jehovaske tani adaja so mangaja le. (Čitin 1. Jovanovo 5:3.) Ov na čhivela amen silaja te ova leske poslušna iako isi le pravo te rodel amendar adava. O Jehova dengja amen slobodno volja, adaleske tano bahtalo keda siem leske poslušna taro mangipe.

9-10. Soske tano važno te džana e Devleskere merilija hem te živina sprema lende?

⁹ O roditelija mangena lengere čhave te oven bezbedna. Adaleske čhivena pravilija kola tane bašo lengoro šukaripe. Keda o čhave šunena akala pravilija, sikavena kaj isi len doverba ko ple roditelija hem kaj poštujnena len. Kobor tano považno te džana hem te šuna o merilija so dela len amaro Dad soj ko nebo. Agjaar ka sikava e Jehovaske kaj mangaja le hem kaj poštujnaja le, a adava ka ovel amare šukaripaske (Isa. 48:17, 18). Ama okola so otfrlinena e Devle hem leskere merilija ko krajo isi len lošna posledice (Gal. 6:7, 8).

¹⁰ Keda živinaja sar so mangela o Jehova, amen siem zaštitime taro bukja kola so šaj te uništinen amaro sastipe, te keren amen tažna ili te ruminen amaro amalipe e Jehovaja. O Jehova džanela soj amenge najšukar. I Aurora, koja so živinela ko SAD, vakerela: „Džanava kaj, ako sium poslušno e Jehovaske, ka ovel man o najšukar životo so postojnela“. Akava važinela sarinenge. Šukar tano te odvojna vreme te razmislina sar lično amenge koristinena o merilija kola so o Jehova mangipaja dengja len.

11. Sar pomožinela amenge i molitva?

 ¹¹ I molitva pomožinela amenge te ova poslušna e Devleske, čak keda adava nane lokho. Adaleske so siem grešnikija, ponekogaš šaj te ovel amenge but pharo te ikera e Devleskere merilija. Sepak, mora sekogaš te borina amen te šaj te postapina agjaar sar so mangela o Jehova. O psalmisti taro vilo molingja e Jehova: „Bajrar ki mande želba te kerav tli volja“ (Ps. 51:12). I Deniza, koja so služinela sar opšto pioneri, vakerela: „Keda mange pharo te šunav nesavi zapoved taro Jehova, molinava man baši sila te šaj te kerav adava soj ispravno“. Šaj te ova sigurna kaj o Jehova sekogaš ka odgovorinel amenge ko asavke molitve (Luka 11:9-13).

12. Sprema Efešanite 5:1, so valjani te kera?

¹² Čitin Efešanite 5:1. Adaleske so siem e Jehovaskere „mangle čhave“, amen daja sa amendar te šaj te ova sar leste. Trudinaja amen te razvina sar leskere osobine agjaar so siem obzirna hem šukar sprema o javera, hem agjaar so spremno prostinaja. Keda dikhena kaj šukar ponašinaja amen, okola so na pendžarena e Devle šaj te oven pottiknime te doznajnen nešto poviše baši leste (1. Pet. 2:12). E roditelen isi len šukar pričine te postapinen ple čhavencar isto sar o Jehova so postapinela amencar. Ako kerena adava, o čhave šaj te oven pottiknime te oven paše amare Dadea soj ko nebo.

13. So ka pomožinel amenge te ova hrabra?

 ¹³ Jekh čhavo dičinela pe ple dadea hem bahtalo tano keda kerela lafi baši leste. Amen da dičinaja amen amare Dadea, e Jehovaja, hem mangaja te kera lafi e javerencar baši leste. Sarine osetinaja amen sar o cari o David, kova so pišingja: „E Jehovaja ka dičinel pe mi duša“ (Ps. 34:2). Ama, so ako siem ladžutne? Sar šaj te ova hrabra? Ovaja hrabra keda razmislinaja kobor bahtalo ka ovel o Jehova ako keraja lafi baši leste hem kobor ka koristinel e javerenge adava so ka pendžaren le. O Jehova ka del amen i hrabrost so valjanela amenge. Ov pomožingja amare phralenge ko prvo veko te oven hrabra, a ka pomožinel amenge da (1. Sol. 2:2).

14. Soske tano važno te propovedina?

¹⁴ O Jehova nane pristrasno hem ov tano bahtalo keda dikhela kaj sikavaja mangipe e manušenge, bizi razlika kotar avena ili save okolnostija isi len (Dela 10:34, 35). Jekh taro najšukar načinija te sikava kaj mangaja e javeren tano agjaar so ka vakera lenge o šukar haberi (Mat. 28:19, 20). So šaj te uspejna e propovedibaja? Šaj te pomožina okolenge so šunena amen te ovel len pošukar životo panda akana hem te ovel len prilika te živinen večno ko raj (1. Tim. 4:16).

15-16. Taro kola pričine šaj te ova bahtale?

¹⁵ Sar roditeli pherdo mangipaja, o Jehova mangela leskiri familija te ovel bahtali (Isa. 65:14). Isi amen but pričine te ova bahtale panda akana, iako šaj soočinaja amen pharipaja. Na primer, sigurna siem kaj amaro Dad soj ko nebo mangela amen but. Džanaja o čačipe taro e Devleskoro Lafi (Erem. 15:16). Hem sarine siem delo tari jekh posebno familija kolate so isi manuša so mangena e Jehova, mangena leskere uče moralna merilija hem mangena pe jekh jekhea (Ps. 106:4, 5).

¹⁶ Šaj te ačhova bahtale adaleske so siem sigurna kaj o životo ka ovel panda pošukar ki idnina. Džanaja kaj panda hari o Jehova ka cidel sa o lošnipe, hem keda ka vladinel e Devleskoro Carstvo i Phuv ka ovel raj. Osven adava, isi amen but šuži nadež kaj okola so mule ka ušten hem palem ka oven zaedno ple najmanglencar (Jovan 5:28, 29). Adava ka anel amenge baro bahtalipe! A soj najvažno, sigurna siem kaj panda hari sarine — hem ko nebo hem ki Phuv — ka služinen amare Dadeske hem ka den le i slava hem i čest koja so zaslužinela la.