1-2. Nagnino ty Jehovah ro nanao raha mba hahavy antika ho agnisa ty keleia’e? Le ino ty natao’e?

NITAONE i Jehovah mba ho agnisa ty keleia’e naho hanompo aze tikagne. Tombotsoa tsy misy hoe’e zay! Agnisa o keleiagne iohoe ze nanokan-tegna hoahy i Jehovah naho maneho finoagne ty sorogne natao i Ana-dahi’ey. Sambatse tika agnisa o keleiagne iohoe satria manjare misy dika’e ty fiaignantika sady mitamà hiaigne nainai’e ka. Va’e ho an-dagnitse agne zay, ndra amy ty Paradisa an-tane etoy.

² Tena tea antikagne ty Jehovah. Namoe raha tena sarobily reke mba hahavy antika ho agnisa ty keleia’e. Nafoe’e i Ana’ey mba hisolovoigne antika. (Jaona 3:16) Io ty ‘niviliana i Jehovah’ antikagne mba hahafahantika hifandrambe maifitse ama’e. (1 Kor. 6:20) Ndra tie ambone bey ty Jehovah, le afake mitoka aze tihoe Baba tikagne. Tombotsoa lahibey zay! Sady fa nianarantikagne tamy i lahatsoratse taloha itoỳ tie tsy misy Rae fanjaka mihoatse i Jehovah.

3. Ino ty fagnonteneagne va’e hoeretseretentikagne? (Henteo ka ty efajoro tihoe “ Mba Vazohoe i Jehovah Avao vao Raho?”)

³ Va’e hagnontane manahake ty mpanoratse Baiboly raike toy tikagne: “Ino ty havaleko azo Jehovah amy ty raha soa iaby nanoe’o tamako?” (Sal. 116:12) Naho ty maregne, le tsy ho voavalentika ty raha soa nanoe’e ho antika. Faie mahavy antika ho tena tea aze zay. Hoe ty apostoly Jaona: “Tea aze tikagne, satria ireke ro nitea antikagne voaloha’e.” (1 Jaona 4:19) Akore ty ampisehoantika tie tea i Raentikagne an-dagnitse agney ka tikagne?

4. Nagnino tikagne ro toko’e hikezake hiharine i Jehovah, arake ty Jakoba 4:8?

⁴ Tea i Jehovah hiharine aze naho hifampirehake ama’e tikagne. (Vakio ty Jakoba 4:8.) Afake mijanjigne antikagne avao reke kanao mandrisike antika tie “mahareta amy ty vavake.” (Rom. 12:12) Tsy ombia hisaontsy amantika reke tie ‘mbe rempotse raho’ ndra ‘mbe rokake raho.’ Faie mba afake mitsanogne i Jehovah ka vao tika? Manao izay tika naho fa mamaky Baiboly naho i boke aman-gazete magnampe antika hahazo ty hevetse agnate’e ao rey. Mitsanogne aze ka tikagne naho mifantoke soa naho fa mivory. Mila mifampirehake mateteke ty rae aman-drene naho ty ana’e. Hoe izay ka fa mila mirehake mateteke naho mitsanogne i Jehovah ka tikagne naho te hifandrambe soa ama’e.

5. Ino ty azontikagne atao mba hagnasoagne ty vavake ataontikagne?

⁵ Trea’o amy ty vavake atao’o vao fa mifandrambe soa amy i Jehovah rehe? Tea i Jehovah naho ze raha tena am-pontikagne ao ro vorahentikagne ama’e naho fa mivavake. (Sal. 62:8) Dineho tie: ‘Voaomagne soa vao ty vavake ataoko, le ze tena am-poko ao ro voraheko ama’e, sa ataoko memeke avao ndra fahazaragne avao? Azo antoke tie tena tea’o ty Jehovah, le te hifandrambe maifitse ama’e rehe. Tsy maintsy mivavake ama’e mateteke areke rehe mba hahavita’o izay. Zarao ama’e ze raha mahafale azo, naho ze raha mampanahelo azo, ndra ze raha mampinekoneko azo, ndra ty raha tsy vani’o rehafegne amo o ndatio aza. Matokia areke fa tena vognogne hagnampe azo reke.

6. Ino ty toe-tsaigne tsy maintsy anagnantikagne naho te hifandrambe maifitse amy i Jehovah tika?

⁶ Toko’e hanagne toe-tsaigne tea mankasitrake ka tikagne naho te hifandrambe maifitse amy i Raentikagne an-dagnitse agney. Akore ty ampisehoantikagne izay? Hoe ty mpanao salamo raike: “O Jehovah Andrianagnahareko, maro ty raha natao’o, eka, maro ty asa’o mahaveregne naho ty raha safirie’o miomba anay. Tsy misy ty mitovy ama’o. Te hitalily naho hirehake miomba izay raho, faie lako loatse rey le tsy hay iahegne.” (Sal. 40:5) Tsy ampe areke ty mankasitrake i Jehovah am-pontikagne ao avao fa mila asehontika amy ty raha rehafentika naho ataontikagne zay. Izay ka ty ampisehoantika tie tsy manahake ty ndaty amy ty tontolo toy tika. Tsy mba trea tie mankasitrake i Jehovah iareo ie amy izao maro ty raha natao’e hoahy iareo. Faie toe tsy mahalatsa antika zay satria mirehake ty Baiboly tie tsy hahay hisaotse o ndatio amy ty “andro fara’e.” (2 Tim. 3:1, 2) Lonike tika mba tsy hanjare hanahake iareo!

7. Ino ty tea i Jehovah hataontikagne, le ino ty anto’e?

⁷ Tea ty rae aman-drene naho mifankatea ty ana’e fa tsy mialialy. Hoe izay ka fa tea i Jehovah hifankatea naho hilongo soa tikagne. Naho ty maregne, le ty hatea ro amantaragne tie tena Kristiana tikagne. (Jaona 13:35) Mitovy hevetse amy ty mpanao salamo raike toy tika. Hoe reke: “Fanjaka sady mahafinaritse naho fa ty mpirahalahy ro miara-monegne amim-piraisan-tsaigne!” (Sal. 133:1) Asehontikagne fa tena teantikagne ty Jehovah naho teantika o rahalahio naho o rahavaveo. (1 Jaona 4:20) ‘Tena soa fagnahy naho mifampitrétré’ iareo. Tena sambatse tikagne agnisa o keleiagne iohoe!—Efes. 4:32.

8. Ino ty anto’e lahibey mahavy antikagne hankatò i Jehovah, arake ty 1 Jaona 5:3?

⁸ Asae i Jehovah mankatò rae aman-drene ty anake. Hoe izay ka, fa tea i Jehovah hankatò aze tikagne. (Efes. 6:1) Fagneva izay reke satria Mpamorogne, magnomey ze raha iaby hahavelogne antika sady tsy misy managne  hilala mitovy ama’e. Faie ino ty anto’e lahibey mahavy antika hankatò i Jehovah? Ty hateantikagne aze. (Vakio ty 1 Jaona 5:3.) Maro ty anto’e mahavy antika toko’e hankatò i Jehovah. Faie tsy mamoresé antika reke. Ho fale areke ty Jehovah naho mijobogne ty hankatò aze tikagne noho itikagne tea aze.

9-10. Nagnino ro tena ilaegne ty mahafantatse naho mankatò ty fitsipy i Jehovah?

⁹ Tea ty rae aman-drene ho voaro ty ana’e, le izay ty mahavy iareo mametrake fitsipike miomba ty findesam-batagne. Aseho ty anake areke fa tena matoky naho magnaja ty rae aman-drene’e iareo naho fa mankatò izay. Te hiaro antikagne ka ty Jehovah kanao nagnomey fitsipike naho toro lalagne antikagne. Mila mahafantatse naho mankatò ireo areke tika mba hanoroantika tie tea i Jehovah naho magnaja aze tikagne. Handrambe soa ka tika naho manao izay. (Isaia 48:17, 18) Faie tsy hoe izay ze tsy mankatò i Jehovah satria tsy maintsy hisy loza hanjò iareo.—Gal. 6:7, 8.

¹⁰ Mila mankatò aze avao areke tikagne. Naho manao izay tikagne, le ho salama soa, hilamin-tsaigne sady ho voaro ty fifandrambesantikagne ama’e. Toe fa hay i Jehovah fa mahasoa antika ty mankatò aze. Hoe ty Aurora boake a Etazonia agne: “Haiko tie naho fa mankatò i Jehovah avao tika vaho izay tena ho sambatse amy ty fiaignagne.” Magneke izay tikagne iaby. Ino iaby zao ty soa fa nirambese’o noho irehe nankatò ty fitsipy i Jehovah?

11. Magnampe antika hahavita hanao inogne ty vavake?

¹¹ Misy fotoagne va’e ho sarotse amantika ty mankatò i Jehovah. Tsy voririke tikagne, le ty  fagniriagne tsy hankatò aze ro tena manjaka agnatentikagne ao. Mila mikezake mafe areke tikagne. Magnampe antika hahavita izay ty vavake. Nihalale mafe tamy i Jehovah hoe izao ty mpanao salamo toy: “Ampeo raho hagniry hankatò azo.” (Sal. 51:12) Hoe ty Denise, mpisava lalagne raike zay: “Isake tie sarotse amako ty mankatò ty lily i Jehovah, le mangatake hery ama’e raho.” Tena afake matoky tika fa hamale ty vavake hoe izay reke.—Lioka 11:9-13.

12. Ino ty toko’e hataontikagne, arake ty Efesianina 5:1?

¹² Vakio ty Efesianina 5:1. Mandrisike antika hanahake aze ty Jehovah satria ‘anakiso’e’ tikagne. Manao izay tika naho mikezake ho bey hatea, soa fagnahy naho hamela heloke. Naho fa mahatrea antika maneho o toetse soa rehoe ty ndaty tsy mahafantatse i Jehovah, le va’e handrisike iareo hianatse ty miomba aze zay. (1 Pet. 2:12) Toko’e hikezake mafe hampiseho ty toetse i Jehovah amy ty ana’e ty rae aman-drene. Naho manao izay iareo, le hahavy ty ana’e hanompo i Raentikagne bey hateay zay.

13. Ino ty hagnampe antika hanagne herim-po?

¹³ Mirehareha miomba ty raha nataon-drae’e o ajajao sady tena fale reke naho fa mirehake izay. Tena mirehareha ka tika managne i Raentikagne an-dagnitsey, le teantikagne hahafantatse aze o ndatio. Mitovy hevetse amy i Davida Mpanjaka tika. Hoe reke: “I Jehovah ro ho reharehako.” (Sal. 34:2) Faie akore naho saro-kegnatse tika? Ino ty hagnampe antika ho sahy hirehake ty miomba i Jehovah? Mila tadidientika tie tena fale ty Jehovah naho fa itika  mirehake miomba aze. Mila tadidientikagne ka ty soa ho azo o ndatio naho fa mianatse ty miomba aze iareo. Fa nagnomey herim-po i Kristiana tamy ty taonjato voaloha’e rey ty Jehovah, le azo antoke areke fa hanao izay amantikagne ka reke.—1 Tes. 2:2.

14. Nagnino tika ro tena toko’e hazoto hirehake miomba i Jehovah?

¹⁴ Tsy magnavakavake ty Jehovah. Tena fale reke naho fa mahavazoho antikagne maneho hatea ty karaza o ndaty iaby. (Asa. 10:34, 35) Ty firehafantikagne amy iareo ty miomba aze ty fomba lahibey anoroantikagne izay. (Mat. 28:19, 20) Ino ty voka’e? Mihasoa ty fiaigna ze ndaty tso-po, sady mitamà ka iareo fa hiaigne nainai’e amy ty hoavy.—1 Tim. 4:16.

15-16. Inogne iaby ty anto’e mahafale antikagne?

¹⁵ Rae bey hatea ty Jehovah, le tena tea’e ho fale tikagne. (Isaia 65:14) Va’e ho maro ty raha sarotse atrehentikagne amy hinane zao faie afake ty ho fale avao tikagne. Fa nagnino? Satria matoky tikagne tie tena tea antikagne i Raentikagne an-dagnitse agney. Mahafantatse soa ty hamarenagne agnate Baiboly ao ka tikagne. (Jer. 15:16) Tsy izay avao, fa agnisa ty keleia i Jehovah tikagne. Ndaty tea i Jehovah naho ty fitsipi’e sady tena mifankatea iaby ty agnate o keleiagne iohoe.—Sal. 106:4, 5.

¹⁶ Mahafale antikagne ka ty mahafantatse tie tena ho soa ty fiaignantikagne amy ty hoavy. Tsy ho ela, le hofoagna i Jehovah o haratiagneo naho ze ndaty raty fagnahy. I Fanjakà’ey ty hampiasae’e mba hanoagne izay naho hagneregnagne ty tane toy ho Paradisa indraike. Mitamà ka tikagne tie hovelomegne indraike ze ndaty nimate, le ho treantikagne indraike iareo. (Jaona 5:28, 29) Hanao akore koahe ty hafaleantikagne amy izay! Faie ty tena hahafale, le tihoe hanao ty zoton’arofo i Jehovah naho hidera aze sady hagnomey voninahitse aze iaby ze kila o ndaty an-tane etoy naho ze miaigne an-dagnitse agne amy ze fotoagne zay. Tena fagneva izay i Raentikagne bey hateay.