1-2. Nkaambo nzi alimwi muunzila nzi Jehova mwaakapa kuti cikonzyeke kulindiswe kuba cibeela camukwasyi wakwe?

JEHOVA wakatutamba kuti tusangane mukwasyi wabakombi bakwe. Eelo kaka kutambwa ooku kulakkomanisya kapati! Mukwasyi wesu upangidwe aabantu bakalyaaba kuli Leza alimwi ibatondezya lusyomo mucinunuzyo cacipaizyo ca Mwanaakwe. Tuli mukwasyi uukkomene ncobeni. Tupona buumi bulaampindu lino, alimwi tuyookkomana abuumi butamani nkokuti, kujulu naa mu Paradaiso anyika.

² Jehova wakapa kuti cikonzyeke kulindiswe kuba cibeela camukwasyi wakwe akaambo kakuti ulatuyanda kapati. Aboobo kutegwa acite oobo, Jehova wakali kuyandika kulyaaba kapati. (Joh. 3:16) ‘Twakaulwa amuulo waatala.’ (1Kor. 6:20) Kwiinda mucinunuzyo, Jehova wakapa kuti cikonzyeke kulindiswe kuba acilongwe anguwe. Tulakonzya kwiita Mupatikampatila mububumbo boonse kuti Taata. Alimwi, mbubwenya mbotwakabona mucibalo cainda, Jehova ngu Taata wiinda kubota.

3. Mibuzyo nzi njotukonzya kulibuzya? (Alimwi amubone kabbokesi kakuti “ Sena Jehova Ulandibikkila Maano?”)

³ Mbubwenya mbuli mulembi wa Bbaibbele umwi, tulakonzya kulibuzya kuti: “Ino inga ndamupilusyila nzi Jehova kububotu boonse mbwaandicitila?” (Int. 116:12) Bwiinguzi mbwakuti kunyina ncotukonzya kumupilusyila Taateesu wakujulu. Nokuba boobo, tulamuyanda kapati. Mwaapostolo Johane wakalemba kuti: “Swebo tulatondezya luyando, nkaambo walo nguwakasaanguna kutuyanda.” (1Joh. 4:19) Muunzila nzi motukonzya kumutondezya Taateesu wakujulu kuti tulamuyanda?

4. Kweelana alugwalo lwa Jakobo 4:8, nkaambo nzi ncotweelede kusolekesya kuyumya cilongwe cesu a Jehova?

⁴ Jehova uyanda kuti muciyumye cilongwe canu anguwe kwiinda mukubandika anguwe. (Amubale Jakobo 4:8.) Utwaambila kuti ‘tujatisye kupaila,’ alimwi ulatuswiilila lyoonse. (Rom. 12:12) Kunyina najata bubi naa kukatala kutuswiilila. Andiswe tulamuswiilila kwiinda mukubala Jwi lyakwe Bbaibbele alimwi amabbuku aatugwasya kulimvwisya Bbaibbele. Alimwi tulamuswiilila kwiinda mukubikkila maano ciindi notuli kumiswaangano ya Bunakristo. Mbubwenya kubandika ciindi aciindi mbokugwasya bana kuba acilongwe ciyumu abazyali babo, akwalo kubandika a Jehova ciindi aciindi kulatugwasya kuyumya cilongwe cesu anguwe.

5. Ncinzi ncotweelede kucita kutegwa mipailo yesu kaitambulwa kuli Jehova?

⁵ Amuyeeye kujatikizya mipailo njomupaila kuli Leza. Jehova uyanda kuti katupaila kulinguwe kuzwa ansi aamoyo. (Int. 62:8) Aboobo tweelede kulibuzya kuti: ‘Sena mipailo yangu njaatala-tala buyo mbuli mameseji aakukkopa naa izwa ansi aamoyo mbuli magwalo aakulilembela buya?’ Tacidoonekwi buya kuti mulamuyanda kapati Jehova, alimwi muyanda kuti cilongwe canu anguwe cizumanane kuyuma. Kutegwa mucite oobo, mweelede kunoobandika anguwe ciindi aciindi. Amumwaambile mbomulimvwa. Amumwaambile zintu izimupa kukkomana alimwi azimupa kulibilika. Amube alusyomo lwakuti mulakonzya kulomba lugwasyo kulinguwe.

6. Ncinzi ncotweelede kucita kutegwa tuzumanane kuba acilongwe a Taateesu wakujulu?

⁶ Kutegwa tube acilongwe a Taateesu wakujulu, tweelede kuzumanana kuba amuuya wakulumba. Tulaazumina majwi ngaakalemba sintembauzyo aakuti: “Nzinji kapati zintu nzyoocita, O Jehova Leza wangu, milimo yako iigambya amakanze ngojisi kulindiswe. Kunyina uukonzya kweelanisyigwa anduwe; ikuti naa ndati ndiziluule akuzyaamba, nzinji kapati cakuti tandikonzyi kuzibandauka zyoonse!” (Int. 40:5) Tatweelede buyo kulimvwa kuti tulalumba; pele tweelede kutondezya kulumba kwesu kuli Jehova kwiinda mumajwi alimwi amumilimo. Eeci citupa kuti katwiindene kapati abantu banji mazuba aano. Tupona munyika oomo bantu mobatalumbi kuzintu zyoonse nzyabacitila Leza. Alimwi buya, citondezyo cimwi icitondezya kuti tupona “kumazuba aamamanino” ncakuti bantu tabalumbi. (2Tim. 3:1, 2) Inga cabija kaka kuba amuuya ooyu!

7. Ino ncinzi Jehova ncayanda kuti tucite alimwi nkaambo nzi ncayandila kuti tucite boobo?

⁷ Bazyali tabayandi kuti bana babo kabazwangana, muciindi caboobo bayanda kuti kabamvwana. Mbubwenya buyo, Jehova awalo uyanda kuti bana bakwe boonse kabamvwana. Luyando ndotutondezya kuli umwi aumwi, ndolutuzyibya kuti tuli Banakristo bakasimpe. (Joh. 13:35) Tulaazumina majwi ngaakalemba sintembauzyo aakuti: “Eelo kaka ncibotu alimwi cilakondelezya kuti babunyina kabakkede antoomwe calukamantano!” (Int. 133:1) Ciindi notubayanda bakwesu alimwi abacizyi, tutondezya kuti tulamuyanda Jehova. (1Joh. 4:20) Eelo kaka cilakkomanisya kuba cibeela camukwasyi wabakwesu abacizyi ‘ibafwidilana luzyalo, ibajisi myoyo mitete yalubomba’!—Ef. 4:32.

8. Kweelana alugwalo lwa 1 Johane 5:3, nkaambo nzi kapati ikatupa kumumvwida Jehova?

⁸ Jehova uyanda kuti bana kabamvwida bazyali babo, alimwi uyanda kuti andiswe  katumumvwida. (Ef. 6:1) Cileelela kuti katumumvwida nkaambo Mulengi wesu, Nguutupa buumi alimwi muzyali iwiinda kubota. Nokuba boobo, kaambo kapati ikatupa kumumvwida Jehova nkakuti tulamuyanda. (Amubale 1Johane 5:3.) Nokuba kuti kuli twaambo tunji itweelede kutupa kumumvwida Jehova, walo kunyina natusinikizya kuti katumumvwida. Wakatupa nguzu zyakulisalila, aboobo ciindi notusala kumumvwida akaambo kakuti tulamuyanda, ulakkomana.

9-10. Nkaambo nzi ncociyandika kwiizyiba milawo ya Leza alimwi akwiitobela?

⁹ Bazyali bayanda kuti bana babo kabakwabilidwe. Nkakaambo kaako balabikka milawo iikwabilila bana babo. Ciindi bana nobaitobela milawo eeyo, batondezya kuti balabasyoma alimwi akubalemeka bazyali babo. Aboobo cilayandika kapati kwiizyiba milawo njatupede Taateesu wakujulu alimwi akwiitobela. Ciindi notucita boobo, tutondezya kuti tulamuyanda akumulemeka Jehova alimwi tulagwasyigwa. (Is. 48:17, 18) Mukwiimpana, aabo ibamukaka Jehova alimwi ibatatobeli milawo yakwe balapenga.—Gal. 6:7, 8.

¹⁰ Ciindi notupona munzila iimukkomanisya Jehova, tulakwabililwa kumubili, mumizeezo alimwi akumuuya. Jehova ulizizyi kabotu zintu izikonzya kutugwasya. Ba Aurora ibakkala ku United States bakati, “Ndilizyi kuti kumvwida Jehova lyoonse kupa kupona buumi bwiinda kubota.” Toonse tulakazumina kaambo aaka. Ino mwagwasyigwa buti  akaambo kakutobela milawo ya Jehova yaluyando?

11. Ino mupailo utugwasya buti?

¹¹ Mupailo ulatugwasya kuba bantu bamvwida, nociba ciindi nocikatazya kucita boobo. Zimwi ziindi cilakatazya kumvwida Jehova akaambo kakuti toonse tulabisya, pele lyoonse tweelede kusolekesya kumumvwida. Sintembauzyo wakakombelezya Leza kuti: “Kondigwasya kuba amoyo uulisungwide kukumvwida.” (Int. 51:12) Mucizyi Denise, painiya waciindi coonse wakaamba kuti, “Ciindi nocindikatazya kumvwida umwi wamilawo ya Jehova, ndilapaila kulomba nguzu zyakuti ndicikonzye kucita ciluzi.” Tuli masimpe kuti Jehova lyoonse ulayiingula mipailo iili boobo.—Lk. 11:9-13.

12. Kweelana alugwalo lwa Baefeso 5:1, ncinzi ncotweelede kucita?

¹² Amubale Baefeso 5:1. Akaambo kakuti tuli ‘bana ba Jehova bayandwa,’ tulasoleka kusikila mpotugolela kumumvwida. Tulabwiiya bube bwakwe kwiinda mukuba aluyando, luzyalo alimwi akubalekelela bamwi. Ciindi aabo batamuzyi Leza nobabona mbotulilemeka kabotu, balakonzya kuba aluyandisisyo lwakumwiiya. (1Pet. 2:12) Bazyali Banakristo beelede kusolekesya kweendelezya bana babo mbubwenya Jehova mbwatweendelezya. Ciindi bazyali nobacita oobo, bana babo balakonzya kuyanda kuba acilongwe a Taateesu siluyando.

13. Ino ncinzi ncotweelede kubikkila maano kuti katuyanda kuba basicamba?

 ¹³ Mwana ulabakkomanina kapati bausyi alimwi ulayandisya kubandika kujatikizya mbabo. Mbubwenya buyo, tulamukkomanina kapati Taateesu wakujulu, Jehova alimwi tuyanda kuti bamwi bamuzyibe. Mumoyo wesu, toonse tulimvwa mbwaakalimvwa Mwami Davida iwakalemba kuti: “Ndinoolidunda muli Jehova.” (Int. 34:2) Pele ino mbuti kuti naa tulaansoni? Mbuti mbotukonzya kuba basicamba? Tulakonzya kuba basicamba ikuti naa twabikkila maano kuyeeya mbotukonzya kumukkomanisya Jehova alimwi ambobakonzya kugwasyigwa bamwi kwiinda mukwiiya kujatikizya nguwe. Jehova uyootupa busicamba mbotuyandika. Wakabagwasya bakwesu bamumwaanda wamyaka wakusaanguna kuba basicamba, aboobo andiswe uyootugwasya.—1Tes. 2:2.

14. Nkaambo nzi ncociyandika kapati kugwasya bantu kuba basikwiiya?

¹⁴ Jehova tasalululi, aboobo ulakkomana ciindi natubona katutondezya luyando kuli bamwi, tacikwe makani abukkale bwabo. (Mil. 10:34, 35) Inzila imwi yiinda kubota mbotukonzya kutondezya luyando kuli bamwi nkwiinda mukubakambaukila. (Mt. 28:19, 20) Ino mulimo ooyu inga wabagwasya buti? Aabo ibatuswiilila balakonzya kutalika kupona buumi buli kabotu lino alimwi akuba abulangizi bwakuyoopona buumi butamani kumbele.—1Tim. 4:16.

15-16. Ntwaambo nzi itutupa kukkomana?

¹⁵ Jehova muzyali siluyando, aboobo uyanda kuti mukwasyi wakwe kaukkomene. (Is. 65:14) Kuli twaambo tunji itukonzya kutupa kukkomana noliba lino, nokuba kuti ambweni inga katujisi mapenzi. Mucikozyanyo, tulijisi lusyomo lwakuti Taateesu wakujulu ulatuyanda kapati. Tulijisi luzyibo lwini-lwini lwa Jwi lya Leza, Bbaibbele. (Jer. 15:16) Alimwi tuli cibeela camukwasyi uulibedelede uujisi bantu bamuyanda Jehova, ibaziyanda zyeelelo zyakwe zyakulilemeka alimwi ibayandana.—Int. 106:4, 5.

¹⁶ Tulakonzya kukkomana lyoonse akaambo kakuti tulijisi bulangizi businizyide bwakuti buumi buyoobota kapati kumbele. Tulizyi kuti lino-lino Jehova uyoobugwisya bubi boonse alimwi akuti uyoobelesya Bwami bwakwe kucinca nyika yoonse kuba Paradaiso. Kuyungizya waawo, tulijisi bulangizi bukkomanisya kapati bwakuti boonse aabo ibakafwa bayoobusyigwa akuyanzana alimwi abayandwa babo. (Joh. 5:28, 29) Eelo kaka eeco ciyookkomanisya! Alimwi kwiinda zyoonse, tulaalusyomo lwakuti ino-ino boonse kujulu alimwi aanyika bayoopa Taateesu siluyando bulemu ibumweelede.