ARTIKULO BʼA SPAKLAJEL 7
Jelni xyajtaytik ja kala Tatik, ja Jyoba
«Ja Diosi, yaj yabyotic [...], jayuj ja huego, ja quentiqui, ay xa syajal ja jcʼujoltiqui» (1 JUAN 4:19).
TSʼEBʼOJ 3 Weʼnani ja jmajlajeltikon sok ja kiptikon
JA JAS OJ PAKLAXUK *
1, 2. ¿Jas yuj ja Jyoba sjama ja bʼej bʼa ajyel ja bʼa spamilya, sok jastal skʼulan?
JA Jyoba yaʼunejkitik jun tsamal lokjelal: ajyel ja bʼa spamilya. Ja kristyanoʼik it jani matik yaʼuneje ja sakʼanile bʼa yaʼteltajel ja Dyos sok wa skʼuʼane sbʼaja xchamelal ja Yunini. Sok kʼotelotik jun pamilya bʼa gusto ay. Ja jsakʼaniltik ja wego ayni stojol, sok gusto wanotik smajlajel jun jsakʼaniltik bʼa tolabida, ti bʼa satkʼinal ma bʼa Luʼum bʼa jun kʼachinubʼ.
2 Yuja syajalkʼujol, ja Jyoba stupu chaʼan lek ja stsʼakol bʼa oj bʼobʼ ajyukotik ja bʼa spamilya (Juan 3:16). Ja Biblia wa xyala: «Mi cualquierauc ja stzʼacol yauneji» yuja keʼntiki (1 Cor. 6:20). Stsʼakatal ja koltanel yaʼa, ja Dyos sjama ja bʼej bʼa oj bʼobʼ ajyukotik kʼubʼansok. Wa xkabʼtik stsamalil yaljel yabʼ jTatik ja maʼ mas jel chaʼanyabʼal bʼa yibʼanal ja sutsatkʼinali. Sok jastalni kilatik ja bʼa artikulo ekʼi, ¡jani ja Tatal mas lek kiʼonejtiki!
3. ¿Jastik oj bʼobʼ jobʼ jbʼajtik? (Kʼela ja rekwagro « ¿Wan maʼ snaʼa jbʼaj ja Jyoba?»).
3 Bʼobʼta oj jobʼ jbʼajtik ja junxta sjobʼjel yaʼa jun tsʼijbʼuman bʼa Biblia yajni yala: «¿Jastal oj jtupyi ja Jyoba yibʼanal ja jastik lek skʼulunejki?» (Sal. 116:12). Ja smeranili mini oj lajxukujtik stupjelyi ja kala Tatik bʼa satkʼinali. Pe wa snikawotik syajtajel yuja wa xyajtani. Ja jekabʼanum Juan stsʼijbʼan: «Ja Diosi, yaj yabyotic ja quentiqui, jayuj ja huego, ja quentiqui, ay xa syajal ja jcʼujoltiqui» (1 Juan 4:19). Anto, ¿jastal oj bʼobʼ jetik wa xyajtaytik ja kala Tatik tey bʼa satkʼinali?
LA AJYUKOTIK KʼUBʼAN SOKA JYOBA
Wa xjeʼatik wa xyajtaytik ja kala Tatik tey bʼa satkʼinal, ja Jyoba, yajni wala ajyitik kʼubʼan soka yeʼn yajel orasyon, skʼuʼajelyi sok skoltajel ja tuk bʼa oj syajtaye. (Kʼela ja parrapoʼik 4 man 14).
4. Jastalni wa xyala ja Santiago 4:8, ¿jas yuj jel tʼilan oj jkʼujoluktik ajyel kʼubʼan soka Jyoba?
4 Ja Jyoba wa skʼana oj ajyukotik kʼubʼan soka yeʼn sok tʼilan ochel loʼilsok tikʼan (kʼuman ja Santiago 4:8). Wa skʼanakitik mok katikan yajel orasyon, sok ja yeʼn tolabida wa smaklayotik (Rom. 12:12). Mini oj yakan skʼulajel yuj jel latsan ay ma jel yajtik ay. ¿Sok jastal wa xmaklaytik ja keʼntiki? Jun modo jani skʼumajel ja Yabʼali, ja Biblia, sok ja juʼunik eleli bʼa wa skoltayotik yabʼjel stojol. Cha wani xbʼobʼ jmaklaytik ja bʼa tsomjelali. Jastalni wa x-och loʼil jun tatal soka yuntikili, loʼilanel soka Jyoba wa skoltayotik ajyel kʼubʼan soka yeʼn.
Kʼela ja parrapo 5.
5. ¿Jastal oj bʼobʼ jkʼuluktik ja korasyontik bʼa mas lek oj yil ja Dyos?
5 ¿Jastal ja jloʼiltik soka Dyosi? Ja yeʼn wa skʼana oj katikyi orasyon man jkʼujoltik (Sal. 62:8). Ja yuj tʼilan la jobʼ jbʼajtik: «¿Junxta maʼ ja jas wa xkala? ¿Ma jach wa xkʼulan ja jastal wa xkʼuman jun kamigo?». Mini ay duda bʼa jelni xyajtaytik ja Jyoba, sok wa xkʼanatik ajyel kʼubʼansok. Bʼa lajxelkujtik ja it, jel tʼilan oj ochkotik loʼil soka Jyoba jach tikʼan. La jamtikyi ja jkʼujoltik yaljel yabʼ ja jastik wa xya gustoʼaxukotiki sok ja jastik wa xcham jkʼujoltiki. Mok jkʼultik dudar bʼa slejel ja yajni wa xkʼana jkoltajeltiki.
6. ¿Jasa tʼilan oj jkʼuluktik bʼa ajyel kʼubʼan soka Jyoba?
6 Bʼa ajyel kʼubʼan soka Jyoba, cha tʼilan oj katikyi tsʼakatal. Ja yuj akwerdoni aytik soka yaljelik it yala jun tsʼijbʼanum bʼa jun salmo: «¡Janekʼto ja jastik akʼulunej, ah Jyoba kala Dyos! Jel jitsan jawa tsamalik kʼulbʼenik soka wa pensarik bʼa jlekilaltikon, mini maʼ oj bʼobʼ slaja ja weʼn. Ta wa xkʼana oj jchol sok stajel tiʼal bʼa yeʼnle, jeltoni jitsan juntiro sok mi oj xchʼak jchol» (Sal. 40:5). Pe mi kechanta oj kabʼtik, cha jelni tʼilan oj jetik soka jas wa xkalatik soka jas wa xkʼulantik wa xkatikyi tsʼakatal ja Jyoba. Ja it wa sjeʼa tukotik lek yuja jitsan kristyano ja bʼa jtyempotiki. Ja kristyano bʼa tyempoʼik mini xyaʼaweyi tsʼakatal ja Dyos yuja jas wa xkʼulajiyile. Janiʼa, pes jun senya bʼa aytikxa ja bʼa «stza‘anil kʼakʼu jumasa‘» jani ja kristyanoʼiki mini oj yaʼe tsʼakatal (2 Tim. 3:1, 2, Ja yajkʼachil sju‘unil ja dyosi). ¡Mok jnochtik ja smodo ja matik jachuke jastal wa xyala ja Biblia!
7. ¿Jasa wa skʼana oj jkʼuluktik ja Jyoba, sok jas yuj?
7 Ja nantataliki mini skʼana oj kʼeʼuke tiro ja yuntikile, wani skʼana lek ayil sbʼaje. Jachni wa skʼana ja Jyoba soka yuntikili. Janiʼa, ja yuj ja yajtanel wa xjeʼa jbʼajtiki wa sjeʼa meran snochumanotik Kristo (Juan 13:35). Jun yaʼtijum Dyos stsʼijbʼan: «¡Kʼelawik! ¡Jelni lek sok jelni xyaʼa gusto yajni ja jmoj-aljeltik tsoman aye junxta lajan!» (Sal. 133:1). ¿Anke jachni wa xkabʼtik jastal ja tsʼijbʼanum bʼa salmo? Yajni wa xyajtaytik ja kermanotiki, wantik sjejelyi ja Jyoba wa xyajtaytik (1 Juan 4:20). ¡Jeltoni tsamal juntiro yiljel jbʼajtik jastal jun pamilya soka kermanotik bʼa ‹yaj wa xkabʼ jbʼajtik› sok wa xtalnay «jyaujulal jbajtic»! (Efes. 4:32).
WA XJEʼATIK YAJTANEL TA KʼUʼABʼAL AYTIK
Kʼela ja parrapo 8.
8. Jastalni wa xyala ja 1 Juan 5:3, ¿jasa rason mas tʼilan yuja wa xkʼuʼantikyi ja Jyoba?
8 Ja Jyoba wa skʼana ja untiki aʼajyuke kʼuʼabʼal soka snantati, sok jachni wa skʼana kʼuʼabʼal oj ajyukotiksok (Efes. 6:1). Wa sbʼajin yujni yeʼn skʼulanotik, wa xyaʼa ajyukotik sakʼan sok mey jun Tatal mas bibo jastal yeʼn. Pe ja rason mas tʼilan yuja wa xkʼuʼantikyi ja Jyoba jani yuja wa xyajtaytiki (kʼuman ja 1 Juan 5:3). Ama jel juntiro ja rasonik bʼa skʼuʼajel, pe mi stʼenawotik. Yaʼunejkitik bʼa keʼn oj jtsatik, ja yuj wa xgustoʼaxi yajni wa xkʼuʼantik yuja wa xyajtaytik.
9, 10. ¿Jas yuj jel tʼilan snajel ja smandarik ja Dyos sok skʼuʼajel?
9 Ja nantatalik wa skʼana awajyujile lek ja yuntikile. Ja yuj, wa xyaʼawe mandarik bʼa skoltajele. Ja yal untik matik kʼuʼabʼale wa sjeʼawe wa sjipa skʼujole bʼa snantat sok wa skisawe. Pes jelni tʼilan ja keʼntik la jnatik sbʼaj ja smandarik ja jTatik tey bʼa satkʼinal sok la jkʼuʼuktik. Jachuk wa xjeʼatikyi ja Jyoba wa xyajtaytik sok wa xkisatik. Sok lekni oj wajkujtik ja bʼa jsakʼaniltiki (Is. 48:17, 18). Pe ja matik mi skisawe ja Dyos soka smandariki mini lek xwajyujile (Gál. 6:7, 8).
10 Yijel ja jsakʼaniltik ja jastal wa skʼana ja Jyoba wa stalnayotik bʼa yajel jkwidadotik bʼa mok yajbʼukotik, bʼa ajyel gusto sok bʼa mok jas a-spilotik ja jastal lek xkila jbʼajtik soka yeʼn. Ja yeʼn snaʼunej ja jastal mas lek oj wajkujtik. Jun kermanatik tey bʼa Estados Unidos sbʼiʼil Aurora, yala: «Skʼuʼajel tolabida ja Jyoba jani mas lek ja bʼa jsakʼanili». Sok chikan jas xkʼulantik. La jobʼ jbʼajtik: «¿Jastal skoltunejon skʼuʼajel ja tsamal tojelal wa xyaki ja kala Tat Jyoba?».
11. ¿Jastal wa skoltayotik ja orasyon?
11 Ja orasyon wa skoltayotik bʼa kʼuʼabʼal oj ajyukotik ama ayni ekʼele wokol xkabʼtik. Yuja kibʼanaltik mulanumotik, jelni wokol xkabʼtik skʼuʼajel ja Jyoba. Pe jelni tʼilan oj jkʼuluktik. Jun salmista spatayi skʼujol ja Dyos: «Aʼochki ja gana bʼa skʼuʼajelawi» (Sal. 51:12). Jun precursora regular sbʼiʼil Denise yala: «Ta jel wokol xkabʼ skʼuʼajel jun smandar ja Jyoba, wa xkʼanayi kip bʼa skʼulajel ja bʼa toji». Mok jkʼuluktik dudar: Ja Dyos tolabida oj sjakʼ ja tikʼe orasyonik jaw (Luc. 11:9-13).
LA JKOLTAYTIK JA TUK BʼA OJ SYAJTAYE JA JTATIKI
12. ¿Jasa mandar wa xyala oj jkʼuluktik ja bʼa Efesios 5:1?
12 (Kʼuman ja Efesios 5:1). Jastal «yuntiquilotic» ja Jyoba, wani xkʼujolantik ja janekʼ wa xbʼobʼkujtik snochjel ja smodo. Wa xnochotik ja jastal yajxta wa xyilawotik, ta ay jun lekil jmodotik sok wa xkaʼatik perdon ja tuki. Yajni ja kristyano matik mi snaʼawe sbʼaj ja Dyos wa xyilawe ja lekil jmodotik, bʼobʼta oj skʼane snebʼjel sbʼaja yeʼn (1 Ped. 2:12). Ja nantatalik matik kʼotel yaʼtijum Dyos ayni yiʼoje rasonik bʼa oj syajtaye ja yuntikile jastalni wa syajtayotik ja Jyoba. Ta jach wa skʼulane, ja yuntikile bʼobʼta oj kʼot yamigoʼuke ja kala Tatik Jyoba.
Kʼela ja parrapo 13.
13. ¿Jasa tʼilan oj waj jkʼujoltik bʼa mok kʼixwukotik sok stajel tiʼal ja Jyoba?
13 Ja yal untiki mini xkʼixwi yuja state sok gustoxta wa staʼawe tiʼal ja yeʼn. Junxtani soka it, ja keʼntiki mi la kʼixwitik stajel tiʼal ja kala Tatik tey bʼa satkʼinal sok wa xkʼanatik a-snaʼe sbʼaja tuk. Jach wa xkabʼtik jastal mandaranum David, bʼa stsʼijbʼan: «Jtoyxta oj jtaʼ tiʼal ja Jyoba» (Sal. 34:2). Pe bʼobʼta ayni wala kʼixwitik sok mi xtaʼatik tiʼal ja yeʼn. ¿Jasa oj skoltayotik? Jani wajel jkʼujoltik janekʼ yajel gustoʼaxuk ja Jyoba sok janekʼto oj yawe el slekilal ja matik oj snaʼe sbʼaji. Ja yeʼn oj yakitik ja kiptik bʼa mok xiwkotik. Jastalni skoltay ja kermanotik bʼa bʼajtan siglo, cha ojni skoltayotik ja keʼntiki (1 Tes. 2:2).
14. ¿Jastik rason bʼa jas yuj jel tʼilan yajel och nebʼumanil?
14 Ja Jyoba mi tsaʼubʼalxta wa x-ilwani, sok jelni xgustoʼaxi ja wa xyila wa xyajtaytik ja tuk, chikan jastale (Hech. 10:34, 35). June ja bʼa modo wa xjeʼatik wa xyajtaytik ja tuk jani yaljel yabʼye ja lekil notisya (Mat. 28:19, 20). ¿Jasa oj bʼobʼ lajxukyuj ja aʼtel it? Pes ja matik oj smaklayotiki oj ajyukyujile jun lekil sakʼanil ja wego sok smajlajel ajyel sakʼan tolabida ja bʼa tyempo jakumi (1 Tim. 4:16).
LA JYAYTAYTIK JA KALA TATIKI SOK LA AJYUKOTIK GUSTO
15, 16. ¿Jastik rason kiʼojtik bʼa gusto oj ajyukotik?
15 Ja Jyoba jun tatal jel xyajtani sok wa skʼana aʼajyuk gusto ja spamilya (Is. 65:14). Ama xtʼaspuntik wokolik, ay kiʼojtik jitsan rason bʼa gusto oj ajyukotik ja wego. Mey kiʼojtik duda ja kala Tatik tey bʼa satkʼinal jelni syajtayotik. Ay kiʼojtik jun meran snajel bʼa Yabʼal, ja Biblia (Jer. 15:16). Sok kʼotelotik jun pamilya bʼa wa xyajtaytik ja Jyoba, ja smandariki sok wa xyajtay jbʼajtik soka tuk (Sal. 106:4, 5).
16 Cha wa xbʼobʼ ajyukotik gusto yujni wa xkʼuʼantik lek masto oj kabʼtik stsamalil ja jsakʼaniltik ja bʼa tyempo jakumto. Jnaʼunejtik jelxa mojan ja Jyoba oj xchʼaysnajel ja matik malo sok stsʼakatal ja sGobyerno oj pax jun kʼachinubʼ ja Luʼumi. Cha ay kiʼojtik ja tsamal smajlajel ja matik chamele oj sakʼwukejan sok oj cha ajyuke soka spamilyaʼe (Juan 5:28, 29). ¿Anke jel tsamal ja it? Sok ja mas tʼilan jani snajel yibʼanal ja satkʼinal sok ja Luʼumi ojxta yaweyi stoyjel, stsʼebʼantajel sok yaʼteltajel kechanta ja kala Tatik jel xyajtani.
TSʼEBʼOJ 12 Ja niwan Dyos, Jyoba
^ par. 5 Wani xnaʼatik ja kala Tatik Jyoba, jeltoni syajtayotik sok yaʼunejotik ja bʼa yojol ja spamilya bʼa yaʼtijumik toji. Ja yuj, ja keʼntiki jelni xyajtaytik ja yeʼn. ¿Jastal wa xjeʼatik ja yajtanel it? Ja bʼa artikulo it oj jpaklaytik jasunuk oj jkʼuluktik.
