1-2. Hikwalaho ka yini Yehovha a hi pfulele ndlela yo va swirho swa ndyangu wakwe naswona u swi endle njhani sweswo?

 YEHOVHA u hi rhambile leswaku hi joyina ndyangu wa vagandzeri vakwe. Mayana xirhambo xo tsakisa swonghasi! Ndyangu wa hina wu vumbiwa hi vanhu lava tinyiketeleke eka Xikwembu ni lava nga ni ripfumelo eka gandzelo ra nkutsulo ra N’wana wa xona. Ndyangu wa hina wu tsakile. Ha tiphina hi vutomi sweswi naswona hi ni ntshembo wo hanya hilaha ku nga heriki enkarhini lowu taka, swi nga ri na mhaka leswaku hi ta hanya etilweni kumbe eParadeyisini laha misaveni.

² Hikwalaho ka leswi Yehovha a hi rhandzaka, u hi pfulele ndlela yo va swirho swa ndyangu wakwe naswona sweswo swi n’wi koxe swo tala. (Yoh. 3:16) Hi “[xaviwe] hi nxavo.” (1 Kor. 6:20) Hikwalaho ka nkutsulo, Yehovha u endle swi koteka leswaku hi va ni vuxaka lebyinene na yena. Hi ni nkateko lowukulu wa ku vitana N’wini wa vuako hinkwabyo Tatana. Hilaha hi swi voneke hakona eka nhlokomhaka leyi hundzeke, Yehovha i Tatana lonene.

3. Hi swihi swivutiso leswi hi nga tivutisaka swona? (Vona bokisi leri nge: “ Xana Yehovha Wa Ndzi Tiva?”)

³ Ku fana ni mutsari un’wana wa Bibele, hi nga tivutisa: “Xana ndzi ta tlherisela yini eka Yehovha hikwalaho ka hinkwaswo leswi pfunaka leswi a ndzi endleleke swona?” (Ps. 116:12) Nhlamulo hileswaku a swi nge koteki ku hakela Tata wa hina wa le tilweni. Kambe ndlela leyi a hi rhandzaka ha yona yi endla leswaku hi n’wi rhandza. Muapostola Yohane u te: “Hi ni rirhandzu, hikuva hi xona xi nga sungula xi hi rhandza.” (1 Yoh. 4:19) Hi nga n’wi komba njhani Tata wa hina wa le tilweni leswaku ha n’wi rhandza?

4. Hi ku ya hi Yakobo 4:8, hikwalaho ka yini hi fanele hi endla matshalatshala yo tshinela eka Yehovha?

⁴ Yehovha u lava leswaku hi tshinela eka yena hi tlhela hi vulavurisana na yena. (Hlaya Yakobo 4:8.) U hi khutaza leswaku hi “phikelela exikhongelweni” naswona wa hi yingisa mikarhi hinkwawo. (Rhom. 12:12) A nga tshami a khomekile kumbe ku karhala lerova a nga tsandzeka ku hi yingisa. Hi kombisa leswaku ha n’wi yingisa hi ku hlaya Bibele ni tibuku leti hi pfunaka ku yi twisisa. Nakambe hi kombisa leswaku ha n’wi yingisa hi ku rhiya ndleve loko hi ri etinhlengeletanweni ta vandlha. Tanihi leswi ku vulavurisana swi endlaka vana ni vatswari va va ni vuxaka lebyinene, hilaha ku fanaka loko hi vulavurisana na Yehovha nkarhi ni nkarhi hi ta va ni vuxaka lebyinene na yena.

5. Hi nga swi antswisa njhani swikhongelo swa hina?

⁵ Ehleketa hi ndlela leyi u vulavulaka na Yehovha ha yona. Yehovha u lava hi chulula leswi nga etimbilwini ta hina eka yena hi xikhongelo. (Ps. 62:8) Hi fanele hi tivutisa xivutiso lexi: ‘Xana loko ndzi khongela ndzi vula swilo swin’we nkarhi ni nkarhi kumbe ndzi khongela swi huma embilwini?’ A swi kanakanisi leswaku wa n’wi rhandza swinene Yehovha naswona u lava ku tshama u ri ni vuxaka lebyinene na yena. Sweswo swi ta endleka ntsena loko u vulavurisana na yena nkarhi ni nkarhi. N’wi phofulele ta le mbilwini. N’wi byele swilo leswi ku tsakisaka ni leswi ku twisaka ku vava. Tiyiseka leswaku loko u kombela mpfuno eka yena u ta ku pfuna.

6. Hi fanele hi endla yini leswaku hi tshama hi ri ni vuxaka lebyinene ni Tata wa hina wa le tilweni?

⁶ Leswaku hi tshama hi ri ni vuxaka lebyinene ni Tata wa hina wa le tilweni, hi fanele hi va ni moya wo khensa. Hi pfumelelana ni mupisalema loyi a tsaleke a ku: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina; a nga kona la nga fanisiwaka na wena. Loko a ndzi lava ku vulavula ha yona, yi tele swinene lerova a ndzi nge yi runguli.” (Ps. 40:5) A ho vula hi nomu ntsena leswaku ha khensa kambe hi komba Yehovha leswaku ha khensa hi marito ni hi swiendlo. Leswi swi hi endla hi hambana ni vanhu vo tala namuntlha. Hi hanya emisaveni leyi vanhu vo tala va nga khensiki leswi Xikwembu xi va endlelaka swona. Xin’wana lexi kombisaka leswaku hi hanya “emasikwini yo hetelela” hileswi vanhu va nga khensiki. (2 Tim. 3:1, 2) Hi nga pfumeli ku ngheniwa hi moya wo tano!

7. Yehovha u lava leswaku hi endla yini naswona hikwalaho ka yini?

⁷ Vatswari a va swi lavi leswaku vana va vona va holova kambe va lava leswaku va tlanga swin’we hi vun’we. Hilaha ku fanaka, Yehovha u lava leswaku vana vakwe hinkwavo va hanyisana kahle hi ku rhula. Ndlela leyi hi rhandzanaka ha yona yi kombisa leswaku hi Vakreste va ntiyiso. (Yoh. 13:35) Hi pfumelelana ni mupisalema loyi a nga te: “Mawaku ndlela leyi swi nga swinene ha yona ni ku tsakisa ha yona loko vamakwavo va tshama swin’we hi vun’we!” (Ps. 133:1) Loko hi rhandza vamakwerhu, hi komba Yehovha leswaku ha n’wi rhandza. (1 Yoh. 4:20) Mayana ku tsakisa ka swona ku va swirho swa ndyangu wa vamakwerhu lava ‘kombanaka musa ni ku tsetselelana swinene’!—Efe. 4:32.

8. Hi ku ya hi 1 Yohane 5:3, hi xihi xivangelonkulu lexi endlaka hi yingisa Yehovha?

⁸ Yehovha u lava vana va yingisa vatswari va vona naswona u lava leswaku hina hi n’wi yingisa. (Efe. 6:1) Swa fanela ku va hi n’wi yingisa hikuva i Muvumbi wa hina ni Muhlayisi wa vutomi bya hina naswona u tlharihe ku tlula  vatswari hinkwavo. Kambe xivangelonkulu lexi endlaka hi n’wi yingisa hileswi hi n’wi rhandzaka. (Hlaya 1 Yohane 5:3.) Hambileswi hi nga ni swivangelo swo tala swo va hi yingisa Yehovha kambe a nga hi sindzisi ku endla tano. Yehovha u hi nyike ntshunxeko wo tihlawulela, hikwalaho wa tsaka loko hi n’wi yingisa hileswi hi n’wi rhandzaka.

9-10. Hikwalaho ka yini swi ri swa nkoka ku tiva milawu ya Xikwembu ni ku hanya hi yona?

⁹ Vatswari va lava leswaku vana va vona va hlayiseka. Hi yona mhaka va va vekelaka milawu leswaku va ta sirheleleka. Loko vana va yingisa milawu yoleyo, va kombisa leswaku va tshemba vatswari va vona ni ku va xixima. Hikwalaho, i swa nkoka ku tiva milawu ya Tata wa hina wa le tilweni hi tlhela hi hanya ha yona. Loko hi endla tano, hi komba Yehovha leswaku ha n’wi rhandza ni ku n’wi xixima naswona ku pfuneka hina. (Esa. 48:17, 18) Kambe lava nga hanyiki hi milawu ya Yehovha va hetelela va tinghenise ekhombyeni.—Gal. 6:7, 8.

¹⁰ Loko hi hanya hi ndlela leyi tsakisaka Yehovha, ha sirheleleka eka swilo leswi nga hi vangelaka mbitsi ni ku onha vuxaka bya hina na Yehovha. Yehovha wa swi tiva leswi nga swinene eka hina. Aurora wa le United States, u ri: “Ndza swi tiva leswaku ku yingisa Yehovha swa vuyerisa swinene.” Hinkwerhu ha swi tiva sweswo. Xana wena u vuyeriwe njhani hikwalaho ko yingisa milawu ya Yehovha?

11. Xikhongelo xi hi pfuna njhani?

¹¹ Xikhongelo xa hi pfuna leswaku hi kota ku yingisa hambiloko xiyimo xi tika. Mikarhi yin’wana  swi nga hi tikela ku yingisa Yehovha kambe hi fanele hi tikarhatela ku n’wi yingisa. Mupisalema u kombele Yehovha a ku: “Onge u nga ndzi seketela hi moya wa ku swi rhandza.” (Ps. 51:12) Denise loyi a nga phayona u ri: “Loko ku ri ni nawu wa Yehovha lowu swi ndzi tikela ku wu yingisa, ndza khongela ndzi kombela matimba ya ku endla swilo leswinene.” Hi nga tiyiseka leswaku mikarhi hinkwayo Yehovha u ta swi hlamula swikhongelo swo tano.—Luka 11:9-13.

12. Hi ku ya hi Vaefesa 5:1, i yini leswi hi faneleke hi swi endla?

¹² Hlaya Vaefesa 5:1. Leswi hi nga “vana lava rhandzekaka” va Yehovha, hi tikarhatela ku n’wi tekelela. Hi endla tano hi ku komba van’wana rirhandzu, musa ni ku va rivalela loko va hi dyoherile. Loko vanhu lava nga xi tiviki Xikwembu va vona mahanyelo ya hina lamanene, va ta tsakela ku dyondza hi Yehovha. (1 Pet. 2:12) Vatswari lava nga Vakreste va ni swivangelo leswi twalaka swo tekelela Yehovha, loko swi ta emhakeni ya ndlela leyi va va khomaka ha yona vana va vona. Loko va endla tano, vana va vona va ta tsakela ku va ni vuxaka ni Tata wa hina la nga ni rirhandzu.

13. I yini leswi hi faneleke hi swi endla?

¹³ N’wana wa tinyungubyisa hi tata wakwe naswona wa tsaka loko a vulavula hi yena. Hilaha ku fanaka, na hina ha tinyungubyisa hi Yehovha Tata wa hina wa le tilweni naswona hi lava leswaku vanhu van’wana na vona va  n’wi tiva. Hi titwa ku fana na Hosi Davhida, loyi a nga te: “Moyaxiviri wa mina wu ta tibuma eka Yehovha.” (Ps. 34:2) Ku vuriwa yini loko hi ri ni tingana? Hi nga xi kuma njhani xivindzi? Hi ku ehleketa hi ndlela leyi Yehovha a nga ta tsaka ha yona loko hi vulavula hi yena ni hi ndlela leyi vanhu va nga ta vuyeriwa ha yona loko va dyondza hi yena. Yehovha u ta hi nyika xivindzi. U pfune Vakreste va le nkarhini wa vaapostola leswaku va va ni xivindzi, na hina u ta hi pfuna.—1 Tes. 2:2.

14. Hi swihi swivangelo swin’wana swa nkoka leswi endlaka hi katseka entirhweni wo endla vadyondzisiwa?

¹⁴ Yehovha a nga yi hi nghohe naswona wa tsaka loko a hi vona hi komba van’wana rirhandzu, ku nga khathariseki swiyimo swa vona. (Mint. 10:34, 35) Ndlela yin’wana leyi hi nga swi kombisaka ha yona leswaku hi rhandza vanhu, i ku va byela mahungu lamanene. (Mat. 28:19, 20) Vuyelo byi ta va byihi? Lava va nga ta hi yingisa, va ta cinca mahanyelo ya vona ni ku va ni ntshembo wo kuma vutomi lebyi nga heriki enkarhini lowu taka.—1 Tim. 4:16.

15-16. Hi swihi swivangelo leswi hi nga na swona leswi endlaka hi tsaka?

¹⁵ Yehovha i Tatana loyi a rhandzaka vana vakwe naswona u lava va tshama va tsakile. (Esa. 65:14) Hi ni swivangelo swo tala leswi endlaka hi tsaka hambiloko hi pfa hi langutana ni swiyimo swo tika. Hi xikombiso, ha tiyiseka leswaku Tata wa hina wa le tilweni wa hi rhandza swinene. Hi ri tiva kahle Rito rakwe, ku nga Bibele. (Yer. 15:16) Hi swirho swa ndyangu wo hlawuleka lowu vumbiwaka hi vanhu lava rhandzanaka, lava rhandzaka Yehovha swin’we ni milawu yakwe.—Ps. 106:4, 5.

¹⁶ Hi tshama hi tsakile hikuva ha tiyiseka leswaku vutomi bya ha to tsakisa enkarhini lowu taka. Ha swi tiva leswaku ku nga ri khale Yehovha u ta herisa vuhomboloki hinkwabyo naswona ehansi ka Mfumo wakwe, misava hinkwayo yi ta va Paradeyisi. Nakambe hi ni ntshembo wa leswaku lava feke, va ta pfuxiwa kutani va hlangana ni maxaka ya vona. (Yoh. 5:28, 29) Mayana ndlela leyi sweswo swi nga ta tsakisa ha yona! Xa nkoka swinene, ha tiyiseka leswaku ku nga ri khale, vanhu hinkwavo etilweni ni laha misaveni, va ta gandzela Tata wa hina wa rirhandzu hi ndlela leyi n’wi faneleke.