NHLOKOMHAKA YA DJONDZO 7
Yehovha, Papayi wa Hina Hamu Rhandza Hintamu
“Hina hamurhandza, hikuva hi yena arhangeke ahirhandza kusungula.” — 1 YOH. 4:19.
LISIMU 3 Matimba ya Hina, Ntshembo wa Hina
LESWI HINGATASWI DJONDZA *
1-2. Hi mhaka muni Yehovha a yendle swi koteka kuva hi lumba ndjangu wa yena naswona aswi yendlise kuyini?
YEHOVHA ahi rhamba swaku hi lumba ndjangu wa vagandzeli va yena. Leswo swi tsakisa hintamu! Ndjangu wa hina wu vumbiwa hi vanhu lavanga tinyikela ka Xikwembu ni lava kombisaka lipfumelo ka nkutsulo wa N’wana wa xona. Hi ndjangu lowunga ni kutsaka. Hi ni wutomi la kahle swoswi naswona hi tshembisiwe kukuma wutomi la kukala linga heli, amatilweni kumbe kola misaveni.
2 Yehovha a yendle swi koteka kuva hiva ndjangu wa yena hikusa ahi rhandza hintamu. Kambe aswimu wolovelanga kuyendla leswo. (Yoh. 3:16) ‘Hixaviwile hi nxavu lowukulu’. (1 Kor. 6:20) Hi kutirhisa nkutsulo, Yehovha a yendle swaku swi koteka kuva hiva ni wuxaka leli kulu na yena. Swoswi swa koteka kuva hi vitana Xikwembu hi ku Papayi. Naswona hilaha hingaswi vona hakona ka djondzo leyinga hundza, aku na Papayi wa kuyampsa kutlula Yehovha.
3. Hi swihi swivutiso leswi hingaha tivutisaka swona? (Vona ni kwadro lelinge: “ Yehovha Wani Tiva Hikakunene?”)
3 Kufana ni mutsali mun’wana wa Bibele, hingaha vutisa leswi: “Ningamu tlhelisela yini Yehovha Hi mhaka ya hinkwaswu leswi angani yendlela swona?” (Pis. 116:12) Nhlamulo hi leswaku aswinge koteki akuva hi hakela Papayi wa hina wa le matilweni. Kambe leswi ahi rhandzaka na hina hamu rhandza hintamu. Mupostola Yohane a te: “Hina hamurhandza, hikuva hi yena arhangeke ahirhandza kusungula.” (1 Yoh. 4:19) Hingaswi kombisa kuyini swaku hamu rhandza Papayi wa hina wa matilweni?
VANA NI WUXAKA LALI KULU NA YEHOVHA
Hi kombisa swaku himu rhandza hintamu Yehovha, Papayi wa hina wa matilweni hi kutshama na hi ni wuxaka lali kulu na yena hi kukhongela, himu yingisa ni kupfuna van’wana akuva vamu rhandza (Vona maparagrafu 4-14)
4. Hi kuya hi Yakobo 4:8, hi mhaka muni hi fanele hi va ni wunghanu na Yehovha?
4 Yehovha a lava swaku hiva vanghanu va yena ni kutlhela hi bulisana na yena. (Lerha Yakobo 4:8.) Ahi byela swaku hi ‘hiteka kukhongeleni’ hikusa minkama hinkwayu wahi yingisa. (Rhom. 12:12) Anga tshuki a pfumala nkama wa kuhi yingisa, hambi hi kukarhala anga karhali hi kuhi yingisa. Na hina hingamu yingisa hi kulerha Bibele ni mabuku ya nhlengeletanu lawa mahi pfunaka kuli twisisa kahle Bibele. Nakambe hingamu yingisa hi kuyingisela kahle mintlhanganu. Loko vapsali ni vana va bulisana, wunghanu la vona la kula. Hi kufanana, loko hi bulisana na Yehovha swihi pfuna swaku hi tama hiva ni wuxaka lalinene na yena.
Vona paragrafu 5
5. Hinga swi yampsisisa kuyini swikhongelo swa hina?
5 Pimisa hi leswi swikhongelo swa wena ka Yehovha swinga tshamisa xiswona. Yehovha a lava swaku himu byela leswi hiswi pimisaka ni leswi hi titwisaka xiswona hi xikhongelo. (Pis. 62:8) Hi fanele hi tivutisa leswi: ‘Loko ni khongela, ni phindaphinda marito wolawo ya man’we kumbe ni sungula hi kupimisa ni gama ni vula leswinga mbilwini ya mina?’ Aswi kanakanisi swaku wamu rhandza Yehovha naswona u lava kutama u hlayisa wunghanu la wena na yena. Leswaku u yendla leswo, u fanele u bulisana na yena nkama ni nkama. Mu byeli swihundla swa wena. Mu byeli leswiku tsakisaka ni leswi swiku vilelisaka kumbe kuku kwatisa. Tiyiseka swaku ungamu kombela aku pfuna.
6. Hi fanele hi yendla yini kuva hi tiyisa wunghanu la hina ni Papayi wa hina wa matilweni?
6 Leswaku hi tiyisa wunghanu la hina ni Papayi wa hina wa matilweni, hi fanele hiva vanhu lava tlangelaka. Ha twanana na mupisalema lweyi anga ku: “Oh Yehovha, Xikwembu xa mina, U yendle minchumu yayinyingi, mintirho ya wena ya kuhlamalisa ni mimpimiso ya wena ka hina, swi tele. Anga kona lweyi anga fanisiwaka na wena. Loko a nho rungulela ni kuvulavula hi mintirho ya wena, aningatayi kota kuyi rungulela hi kutala ka yona.” (Pis. 40:5) Ahi gameli ka kutlangela hi ndzeni ka mbilu ntsena, kambe hi tlhela hi kombisa swaku hamu tlangela Yehovha hi marito ya hina ni hi leswi hiswi yendlaka. Leswi swihi yendla hinga fani ni vanhu van’wana namuntlha. Hi hanya ka misava leyi vanhu va kalaka vanga tlangeli nchumu ka leswi Xikwembu xiva yendlelaka. Leswi swi komba swaku hi hanya “masikwini ya makumu” laha vanhu va kona va kalaka vanga tlangeli nchumu. (2 Tim. 3:1, 2) Hina ahiswi lavi kufana na vona!
7. Yehovha a lava swaku hi yendla yini, naswona hi mhaka muni?
7 Vapsali avaswi rhandzi swaku vana va vona va tshama hi kuholova, kambe va lava swaku va rhandzana. Na yena Yehovha, a lava swaku vagandzeli va yena hinkwavu va hanyisana. Loko hi hanyisana hi lirhandzu hi kombisa swaku hi Vakreste va ntiyiso. (Yoh. 13:35) Hiva hi pfumelelana ni mupisalema lweyi anga te: “Mawaku ndlela leyi swinga swinene ha yona ni kutsakisa loko vamakwavu va tshama swin’we hi vun’we!” (Pis. 133:1) Loko hi rhandza vamakwerhu hi kombisa swaku hamu rhandza Yehovha. (1 Yoh. 4:20) Swi tsakisa hintamu kulumba ndjangu lowunga ni vamakwerhu lava ‘twelanaka vusiwana,’ va tlhela va ‘tsetselelana’! — Efe. 4:32.
KOMBISA SWAKU WAMU RHANDZA YEHOVHA HI KUMU YINGISA
Vona paragrafu 8
8. Hi kuya hi 1 Yohane 5:3, hi xihi xivangelo xa xikulu lexihi yendlaka yingisa Yehovha?
8 Yehovha a lava swaku a vana va yingisa vapsali ni swaku hina himu yingisa. (Efe. 6:1) Swa fanela kuva himu yingisa hikusa hi yena angahi vumba, hi yena ahi nyikaka wutomi ni kutlhela ava ni wutlharhi kutlula vapsali hinkwavu. Kambe a xaxikulu kutlula hinkwaswu, himu yingisa hi mhaka ya leswi himu rhandzaka. (Lerha 1 Yohane 5:3.) Hambi leswi kunga ni swivangelo swa swinyingi leswihi yendlaka himu yingisa, Yehovha angahi sindzisi. Yehovha ahi nyike chunseko wa kutilangela, hi mhaka leyo, wa tsaka loko hi langa kumu yingisa hi leswi himu rhandzaka.
9-10. Hayini swi li swa lisima kutiva minawu ya Yehovha hi tlhela hi hanya hi yona?
9 Vapsali va lava swaku vana va vona va hlayiseka. Hi mhaka leyo vapsali va veka minawu leyi pfunaka vana. Loko vana va yingisa minawu leyo, va komba vapsali swaku vava tshemba ni kuva hlonipha. Leswi swi komba swaku i swa lisima hintamu kuva hi tiva minawu ya Yehovha hi tlhela hiyi yingisa. Loko hi yingisa minawu ya Yehovha hi komba swaku hamu rhandza hi tlhela himu hlonipha naswona ha pfuneka hi kuyendla leswo. (Esa. 48:17, 18) Lava yalaka kuyingisa minawu ya Yehovha va hakela kuvava. — Gal. 6:7, 8.
10 Loko hi hanya hi ndlela leyi tsakisaka Yehovha, switahi vhikela ka swilo swinyingi leswingahi vavisaka awuton’wini ni kuwonha wuxaka la hina na Yehovha. Yehovha waswi tiva leswinga swinene ka hina. Aurora lweyi a tshamaka a Estados Unidos a li: “Naswi tiva swaku kuhanya hi kuyingisa Yehovha swi yampsa kutlula hinkwaswu.” Leswi i ntiyiso. Wena awu se tshama u pfuneka hi kuyingisa nkongomiso wa Yehovha?
11. Xikhongelo xingahi pfunisa kuyini?
11 Kukhongela swihi pfuna kuva vanhu lava yingisaka hambiloko swihi karhatela. Minkama yin’wana swahi karhatela kuyingisa Yehovha hi mhaka ya leswi hinkwerhu hinga vadjohi, kambe hi lwela kumu yingisa minkama hinkwayu. Mupisalema a kombele Xikwembu a ku: “Yendla leswaku ni lava kuku yingisa.” (Pis. 51:12) Mupfuli wa ndlela mun’wana lweyi a vitaniwaka Denise a li: “Loko swini karhatela kuyingisa yin’wana ya minawu ya Yehovha, ni kombela ka Yehovha hi xikhongelo kuva ani nyika ntamu wa kuyendla leswinga swinene.” Hinga tiyiseka swaku Yehovha waswi hlamula swikhongelo swa kutshamisa xileswi. — Luk. 11:9-13.
PFUNA VAN’WANA AKUVA VA RHANDZA YEHOVHA
12. Hi kuya hi Vaefesa 5:1, hi fanele hi yendla yini?
12 Lerha Vaefesa 5:1. Leswi hinga “vana va Xikwembu lavarhandzekaka”, hi lwela kuxi tekelela. Hi tekelela wumunhu la Yehovha loko hi kombisa lirhandzu, timpsalu ni loko hi rivalela van’wana. Loko lava kalaka vangaxi tivi Xikwembu va vona mahanyela ya hina lamanene, vangaha sungula kutsakela kudjondza hi xona. (1 Pet. 2:12) Vapsali va fanele va tekelela Yehovha loko va kulisa vana va vona. Loko vapsali va tekelela Yehovha, vana va vona vangaha tsakela kuva vanghanu va yena.
Vona paragrafu 13
13. Hi fanele hi yendla yini akuva hi va ni xivindzi?
13 Swivanana swa tibuma hi vapsali va swona naswona swaswi rhandza kubula hi vona. Na hina ha tibuma hi Yehovha, Papayi wa hina wa matilweni naswona hi lava swaku van’wana vamu tiva. Ka timbilu ta hina hi titwa kufana na Hosi Davhida lweyi anga tsala a ku: “Nita tibuma hi Yehovha”. (Pis. 34:2) Kambe swingahahi danisa kubyela van’wana hi Yehovha. Hinga yendla yini akuva hiva ni xivindzi? Hi fanele hi pimisa hi leswi Yehovha angata tsakisa xiswona loko hi byela van’wana hi yena ni leswi va pfunekisaka xiswona loko va sungula kumu tiva. Yehovha atahi nyika xivindzi lexi hixi lavaka. Leswi anga pfuna Vakreste va nkameni wa vapostola kuva va va ni xivindzi, na hina atahi pfuna. — 1 Tes. 2:2.
14. Ha yini swi li swa lisima kuchumayela mahungu yotsakisa ka van’wana?
14 Yehovha anga na xihlawuhlawu, hi mhaka leyo wa tsaka loko hi kombisa lirhandzu ka van’wana hambiloko hingaswi tivi swaku vata hi kwihi. (Mint. 10:34, 35) Hinga kombisa swaku hava rhandza van’wana hi kuva chumayela mahungu yotsakisa. (Mat. 28:19, 20) Switava pfunisa kuyini loko hiva chumayela? Lava yingisaka mahungu yotsakisa vanga va ni wutomi lalinene swoswi va tlhela va va ni ntshembo wa wutomi lelinga heliki ankameni lowu taka. — 1 Tim. 4:16.
RHANDZA PAPAYI WA HINA U TLHELA U TSAKA
15-16. Hi swihi swivangelo leswihi yendlaka hi tsaka?
15 Yehovha a lava swaku ndjangu wa yena wu tsaka hikusa yena i Papayi wa lirhandzu. (Esa. 65:14) Hi ni swivangelo swa swinyingi leswihi yendlaka hi tsaka swoswi hambi leswi hi kumanaka ni swikarhato swa kutala. Hi xikombiso, haswi tiva swaku Papayi wa hina wa matilweni ahi rhandza hintamu. Hi ni wutivi la ntiyiso wa Bibele. (Yer. 15:16) Naswona hi lumba ndjangu wa kuhlawuleka lowunga ni vanhu lava rhandzaka Yehovha, va hanya hi matshinya ya minawu ya yena va tlhela va rhandzana. — Pis. 106:4, 5.
16 Hinga tshama na hi tsakile hikusa haswi tiva swaku hita hanya wutomi la linene ankameni lowu taka. Haswi tiva swaku ko kiyela nkama nyana akuva Yehovha a helisa wubihi hinkwalu. Ni swaku hi kutirhisa Mfumu wa yena ata yendla misava hinkwayu yiva Paradeyisi. Naswona hi ni ntshembo wa kutsakisa wa leswaku lavanga fa vata tlhela va hanya ivi hi tlhela hi kumana na vona. (Yoh. 5:28, 29) Swita tsakisa njhani! Naswona ha tiyiseka swaku ko kiyela nkama nyana akuva hinkwavu lavangata va matilweni ni laha misaveni va nyika Yehovha leswimu fanelaka, kunga kumu dzunisa, kumu hlonipha ni kumu gandzela hilaha swi fanelaka ha kona.
LISIMU 52 Kutinyiketela ka Xikwembu
^ par. 5 Haswi tiva swaku Yehovha Papayi wa hina wahi rhandza hintamu naswona ahi rhamba akuva hi lumba ndjangu wa vagandzeli va yena. Hi mhaka leyo, na hina hamu rhandza. Kambe hingaswi kombisa kuyini swaku hamu rhandza hikakunene? Ka djondzo leyi hita vona leswi hi faneleke hiswi yendla akuva hi kombisa swaku hamu rhandza.
