ARTIKULO YUʼUN ESTUDIO 7
Kʼax kʼux ta koʼtantik te jTatik Jehovae
«Cʼux ya caʼiy ta coʼtantic te Dios como ha nahil cʼux la yaʼiyotic ta yoʼtan stuquel» (1 JUAN 4:19).
KʼAYOJIL 3 sjj-S Tú me das fuerza, confianza y valor
¿BIN YA KILBEYTIK SKʼOPLAL? *
1, 2. ¿Bin yuʼun te la yikʼotik ochel ta sfamilia te Jehovae sok bin-utʼil la spas?
TE Jehová yakʼoj ta jtojoltik jun mukʼul majtanil, jaʼ te ya yikʼotik ochel ta sfamiliae. Te machʼatik ayik ta sfamilia te Jehovae yakʼoj sbaik ta stojol sok yakʼoj schʼuunel yoʼtanik ta swenta te la yakʼ sba ta lajel te sNichʼane. Ay stseʼelil koʼtantik, melel jtaojbeytik swentail te jkuxlejaltik ta ora ini sok ya jmaliytik te kuxinel ta sbajtelkʼinal ta chʼulchan o ta Nichimal Kʼinal liʼ ta Balumilal.
2 Ta swenta te kʼuxotik ta yoʼtan te Jehovae ay bin mukʼ skʼoplal la spas swenta ya xjuʼ ya yikʼotik ochel ta sfamilia (Juan 3:16). Te Biblia ya yal te la smanotike (1 Cor. 6:20). Ta swenta te la yichʼ tojel te jmultike ya xjuʼ lek ya kil jbatik sok te Diose. Jich yuʼun, ay ta jtojoltik te majtanil te ya xjuʼ ya kalbeytik jTatik te machʼa kʼax toyol ay ta Balumilal sok ta chʼulchan. Jich bitʼil la jnopbeytik skʼoplal ta yan tal artikuloe jaʼnax kʼax lekil Tatil stukel te Jehovae.
3. ¿Bin jojkʼoyeletik ya xjuʼ ya jpasbey jbatik? (Ilawil-euk te rekuadro « ¿Aybal jkʼoplal ya yilon te Jehovae?»).
3 Ayniwan jich jojkʼoybeyoj jbatik te bin la sjojkʼoybey sba jtul te machʼa la stsʼibay te Bibliae: «¿Bin utʼil ya xhuʼ ya jtojbe te Jehová yuʼun spisil te bintic lec la spasbon?» (Sal. 116:12). Ta melel, ma xjuʼ ta tojel kuʼuntik te bin yakʼojbotik te jTatik ay ta chʼulchane. Pero te skʼuxul yoʼtan ta jtojoltike jaʼ ya stij koʼtantik yuʼun kʼux ta koʼtantik-euk. Te jpuk-kʼop Juan jich la yal: «Cʼux ya caʼiy ta coʼtantic te Dios como ha nahil cʼux la yaʼiyotic ta yoʼtan stuquel» (1 Juan 4:19). Jich yuʼun, ¿bintik-utʼil ya kakʼtik ta ilel te kʼux ta koʼtantik te Jehovae?
NOPOL AYUKOTIK TA STOJOL TE JEHOVAE
Ya kakʼtik ta ilel te kʼax kʼux ta koʼtantik te jTatik te ay ta chʼulchan kʼalal ya xnoptsajotik ta stojol ta orasion, te ya jchʼuunbeytik te smantal sok te ya jkoltaytik te ants winiketik yuʼun kʼux ta yoʼtanik-euk. (Ilawil te parrafo 4 kʼalal ta 14).
4. Jich bitʼil ya yal Santiago 4:8, ¿bin yuʼun ya skʼan ya jpastik tulan yuʼun nopol ayotik ta stojol te Jehovae?
4 Te Jehová ya skʼan te ya xnoptsajotik ta stojol sok te ya jkʼopontike (kʼopona Santiago 4:8). Ya yalbotik te yakuk jkʼopontik ta spisil-ora, melel chapalnanix yuʼun ya yaʼiybotik-a te jkʼoptike (Rom. 12:12). Yananix yaʼiybotik-a te jkʼoptike, melel maʼyuk bin-ora maʼyuk stiempo o te lujbene. Jaxan te joʼotike, ¿bin-utʼil ya kaʼiybeytik te skʼope? Jun te bitʼil ya jpastike, jaʼ te ya jkʼopontik te Biblia sok te junetik te ya skoltayotik yuʼun ya xkʼot ta koʼtantik te bin ya yale. Jaʼnix jich ya kaʼiybeytik te skʼop kʼalal ya jchʼam kaʼiytik ta lek te tsoblejetike. Jich bitʼil jun-nax ay jtul nichʼanil sok te spapa ta swenta te ya xkʼopojik ta schebalike, jaʼme jich jun ayotik sok te Jehová teme ya xkʼopojotik soke.
Ilawil te parrafo 5
5. ¿Bin-utʼil ya xjuʼ ya jlekubtestik te bitʼil ya jkʼopontik te Diose?
5 ¿Bin ya kalbeytik te kʼalal ya jkʼopontik te Diose? Te Jehovae ya skʼan te yakuk jambeytik koʼtantik te kʼalal ya jkʼopontike (Sal. 62:8). Jaʼ yuʼun lek te jich ya jojkʼoybey jbatike: «¿Jaʼnaxbal ya jchaʼalulan ta j-orasion te bin kʼayemon ta yalele? ¿O jichbal ya jpas te bitʼil kʼalal ya xkʼopojon sok jtul kamigo te ya jambey te koʼtane?». Kʼax kʼux ta koʼtantik te Jehovae sok ya jkʼantik te jun ayotik soke. Swenta jun ayotik sok, ya skʼan te spisiluk-ora ya jkʼopontike. Jambeytik te koʼtantike, kalbeytik yaʼiy te stseʼelil koʼtantik sok te bin ya jmel koʼtantik yuʼune. Ayukme ta koʼtantik te spisil-ora ya xjuʼ ya jkʼanbeytik koltayele.
6. ¿Bin ya skʼan ya jpastik yuʼun nopolxan ayotik ta stojol te Jehovae?
6 Swenta nopolxan ayotik ta stojol te Jehovae, ya skʼan ya jnaʼtik yalel wokol. Jich ya kaltik-euk te bin la yal jtul te machʼa la stsʼibay jun salmo te jich la yale: «Jehová, Dios cuʼun, bayel bintic jelawen yutsil apasoj. Te bintic anopoj ta jtojolcotic ma xhuʼ ta halel ta atojol; te yacuc calbe scʼoblal, ma xhuʼ ta ahtayel» (Sal. 40:5). Pero ma ta koʼtantikuknax te ya kaltik wokole. Ya kakʼbeytik yil ta swenta te bin ya kalbeytik sok te bin ya jpastik ta stojole. Jaʼme jich ya kakʼtik ta ilel te maba pajalotik sok te ants winiketik ta ora ini, melel kuxulotik ta balumilal te ma snaʼik yalel wokol yuʼun spisil te bin ya spas te Dios ta stojolike. Te bitʼil ma snaʼik yalel wokole, jaʼ jun seña te kuxulotikix ta «slajibal cʼahcʼal» (2 Tim. 3:1, 2). Mame ayuk bin-ora ya jkʼayinbeytik te stalelike.
7. ¿Bin ya skʼan Jehová te yakuk jpastike sok bin yuʼun?
7 Te papailetike ma skʼanik te ya yutsʼin sbaik te yal snichʼnabike, jaʼ ya skʼanik te lekuk ya yil sbaike. Jaʼ jich ya skʼan-euk te Jehová ta stojol te yal snichʼnabe. Te bitʼil pajal kʼux ya kaʼiy jbatike jaʼ jich ya kakʼtik ta naʼel te jaʼ smelelil jchʼuunjelotike (Juan 13:35). Jtul j-abat yuʼun Dios jich la yal: «Ilawil, buen lec soc bayel yutsil te jun yoʼtan sbahic te machʼatic yermano sbahique» (Sal. 133:1). ¿Mabal jichuk te jich ya kaʼiy jbatik te bitʼil te salmistae? Kʼalal kʼux ta koʼtantik te kermanotaktike, jich ya kakʼbeytik yil te Jehová te kʼux ta koʼtantik-euke (1 Juan 4:20). Jelawen yutsil te bitʼil ayotik ta jun familia te pajal ya kakʼtik ta ilel yutsil sok slekil koʼtantik (Efes. 4:32).
YA KAKʼTIK TA ILEL SKʼUXUL KOʼTANTIK KʼALAL YA JCHʼUUNTIK MANTAL
Ilawil te parrafo 8
8. Jich bitʼil ya yal 1 Juan 5:3, ¿bin yuʼun te ya jchʼuunbeytik smantal te Jehovae?
8 Te Jehová ya skʼan te yakuk jchʼuunbeytik te smantale, jich bitʼil ya skʼan te yakuk schʼuunbeyik smantal smeʼ statik te alnichʼanetike (Efes. 6:1). Snujpʼ te ya jchʼuunbeytik te smantale, melel jaʼ la spasotik, kuxulotik yuʼun sok jaʼ Tatil te kʼax pʼije. Pero ay yan rason te kʼax mukʼxan skʼoplale, jaʼ te kʼux ta koʼtantike (kʼopona 1 Juan 5:3). Ta melel bayal swentail te bin yuʼun te ya skʼan ya jchʼuunbeytik te smantale, pero ma sujotik ta spasel. Libre la yakʼotik ta snopel teme ya jchʼuunbeytik te smantal o teme maʼuke, jich yuʼun tseʼel yoʼtan te Jehová kʼalal ya jchʼuunbeytik smantal ta swenta te kʼux ta koʼtantike.
9, 10. ¿Bin yuʼun mukʼ skʼoplal te ya jnaʼtik bin mantaliletik yakʼojbotik te Jehová sok te ya jchʼuuntik spasele?
9 Te meʼil tatiletik jaʼ ya skʼanik te lek ya xkʼot ta lokʼel te yal snichʼanike, jaʼ yuʼun ya yakʼbeyik mantaliletik. Te alnichʼanetik te ya schʼuunik te mantaliletik-abi ya yakʼik ta ilel te smukʼulinej yoʼtanik te smeʼ statik sok te ya yichʼik ta mukʼe. Kʼax mukʼ skʼoplal te ya jnaʼtik te bintik mantaliletik ya yakʼbotik te jTatik te ay ta chʼulchane sok te yakuk jchʼuuntik spasele. Jich ya kakʼtik ta ilel te kʼux ta koʼtantik te Jehová sok te ya kichʼtik ta mukʼe. Te kʼalal jich ya jpastike lek ya xkʼootik ta lokʼel ta jkuxlejaltik (Is. 48:17, 18). Yan stukel te machʼatik ya skʼaxuntaybeyik smantal te Diose ya sta swokolik yuʼun (Gál. 6:7, 8).
10 Kʼalal jaʼ ya jpas ta jkuxlejaltik te bin ya yalbotik ta mantal te Jehovae, ma jta jwokoltik, ma jmel koʼtantik sok lek ay te schʼuunel koʼtantike. Te Jehová ya snaʼ te bin lek ya xkʼootik ta lokʼel yuʼune. Jtul ermana te Aurora sbiil te yak ta kuxinel ta Estados Unidos jich la yal: «Jnaʼoj te jaʼ lekxan ya xkʼot jkuxlejaltik te kʼalal ya jchʼuunbeytik smantal te Jehovae». Yuʼun-nix jich ya xkʼot ta pasel-a. Akʼa jnoptik ini: «¿Bin lekilal jtaoj te kʼalal ya jchʼuun spasel te lekil tojobtesel ya yakʼbon te Jehovae?».
11. ¿Bin-utʼil ya skoltayotik te orasione?
11 Te orasion ya skoltayotik te kʼalal ay wokol ya kaʼiytik schʼuunel te mantale. Ta skaj te jmulawilotike yananix skʼan-a te ya jpastik tulan ta schʼuunbeyel smantal te Jehovae. Pero mame skʼan te ya xlujbotike. Jtul salmista jich la skʼanbey te Diose: «Acʼa cʼohtuc ta coʼtan, hich ya jchʼuhun spasel te ley awuʼun, ya jcʼohtes ta pasel ta spisil coʼtan» (Salmo 119:34). Jtul prekursora regular te Denise sbiil jich la yal: «Teme ay wokol ya kaʼiy te ya jchʼuunbey smantal te Jehovae ya jkʼanbey te yakuk yakʼbon yip koʼtan yuʼun jaʼ ya jpas te bin leke». Ayuk ta koʼtantik te Dios yananix sutbey skʼop-a te machʼatik ya skʼanbeyik te yakuk xkoltayotik ta schʼuunbeyel te smantale (Luc. 11:9-13).
JKOLTAYTIK TE YANTIK YUʼUN KʼUX TA YOʼTANIK TE JTATIKE
12. ¿Bin ya yalbotik te yakuk jpastik te Efesios 5:1?
12 (Kʼopona Efesios 5:1). Te bitʼil yal snichʼanotik te kʼuxotik ta yoʼtan te Jehovae, ya jpastik tulan ta stʼunel te ejemplo yuʼune. Ya jnopbeytik stalel te kʼalal ay yutsil koʼtantik, slekil koʼtantik sok te ya jpasbeytik perdon te yantike. Kʼalal te ants winiketik ya yilik te lekil taleliletik kuʼuntike yaniwan xkaj smulanik snopbeyel skʼoplal te Jehovae (1 Ped. 2:12). Te meʼil tatiletik te ya yichʼik ta mukʼ te Diose ya skʼan te lek ya yilik te yal snichʼnabik jich bitʼil ya yilotik te Jehovae, teme jich ya spasike, te alnichʼanetik yaniwan skʼan yamigoin sbaik sok te jTatik te ay skʼuxul yoʼtane.
Ilawil te parrafo 13
13. ¿Bin ya skʼan ya jnop kaʼiytik swenta ma xiwotik ta yalbeyel skʼoplal te Jehovae?
13 Jteb ma spisiluk te alaletik tseʼel yoʼtanik ta stojol te spapaike sok ya smulanik yalbeyel skʼoplal ta stojol te yantike. Jaʼnix jichotik-euk, tseʼel koʼtantik yuʼun te Jehovae sok ya jkʼantik te yakuk xnaʼbot sba yuʼun te yantike. Jich ya kaʼiy jbatik bitʼil te ajwalil David te jich la yale: «Ya xtal calbe scʼoblal te bintic muqʼuic apasoj ta awuʼel, Cajwal Jehová» (Sal. 71:16). Pero ayniwan ya xiwotik ta kʼop, jich yuʼun ma kalbeytik skʼoplal te Jehovae. ¿Bin ya skoltayotik teme jich ya kaʼiy jbatike? Jaʼ te ya jnop kaʼiytik te jich ya kakʼbeytik stseʼelil yoʼtan te Jehová sok te ya staik lekilal te machʼatik ya xnaʼbot sba yuʼune. Te Jehová ya yakʼ yip koʼtantik. Jich bitʼil la skoltay te ermanoetik ta sbabial siglo jaʼnixme jich ya skoltayotik-euk (1 Tes. 2:2).
14. ¿Bin yuʼun te mukʼ skʼoplal te ya kotsestik jnopojeletike?
14 Te Jehová maba ya stsaawan, jaʼ yuʼun ya x-akʼbot stseʼelil yoʼtan kʼalal ya yil te kʼux ta koʼtantik te yantik manchukme yanyantik stsʼumbalik (Hech. 10:34, 35). Jun te bitʼil kʼax lek ya kakʼtik ta ilel skʼuxul koʼtantik ta stojol te jpatxujktike, jaʼ te ya jcholbeytik yaʼiyik te lek yachʼil kʼope (Mat. 28:19, 20). ¿Bin ya xlokʼ-a te kʼalal ya jcholtik te lek yachʼil kʼope? Jaʼ te ya xlekub te skuxlejalik te machʼatik ya yaʼiyik te skʼop Dios sok ya xjuʼ ya smaliyik te kuxinel sbajtelkʼinal ta pajel chaʼbej (1 Tim. 4:16).
KʼUXUK TA KOʼTANTIK TE JTATIKE JICHME AY STSEʼELIL KOʼTANTIK
15, 16. ¿Bintik rason ay kuʼuntik swenta ay stseʼelil koʼtantik?
15 Te jTatik Jehová te ay skʼuxul yoʼtane jaʼ ya skʼan te ayuk stseʼelil yoʼtan te sfamiliae (Is. 65:14). Manchukme ay ya xkʼax jwokoltik, ay bayal bin ya yakʼ stseʼelil koʼtantik ta ora ini. Jich bitʼil, jnaʼojtik ta lek te mero kʼuxotik ta yoʼtan te Jehová sok ya jnaʼtik ta lek te bin ya yalbey skʼoplal te Bibliae (Jer. 15:16). Sok ayotik ta jun lekil familia te mero kʼux ta yoʼtanik te Jehová sok te mantaliletik yuʼune, jaʼnix jich pajal kʼux ya yaʼiy sbaik (Sal. 106:4, 5).
16 Jaʼnix jich tseʼel koʼtantik, melel jnaʼojtik te ya xlekub te jkuxlejaltik ta pajel chaʼbeje. Jnaʼojtik te nopol ya slajin Jehová te machʼatik chopolik sok ta swenta te Wentainel yuʼune ya spas ta Nichimal Kʼinal te Balumilale. Jaʼnix jich ya jmaliytik te ya xchaʼkuxajik te machʼatik lajemik sok ya sjokin yan buelta te sfamiliaike (Juan 5:28, 29). ¿Mabal jichuk te jelawen yutsil te bin ya jmaliytike? Pero te bin mukʼxan skʼoplale jaʼ te spisil te machʼatik ayik ta chʼulchan sok ta Balumilal jaʼnax ya yichʼik ta mukʼ sok ya yalbeyik yutsilal te jTatik Jehová te ay skʼuxul yoʼtane.
KʼAYOJIL 12 sjj-S Jehová, nuestro gran Dios
^ parr. 5 Jnaʼojtik te mero kʼuxotik ta yoʼtan te jTatik Jehová sok te yikʼojotik ochel ta sfamilia te jaʼik j-abatetik yuʼun te jun yoʼtanike. Jaʼ yuʼun kʼux ta koʼtantik-euk, pero ¿bin-utʼil ya kakʼbeytik yil te skʼuxul koʼtantike? Ta artikulo ini ya kilbeytik skʼoplal te bintik-utʼil ya xjuʼ ya kakʼtik ta ilele.
