1, 2. ¿Kʼu yuʼun tskʼan ti xijkʼot ta skerem stseb li Jeovae, xchiʼuk kʼuxi laj yut?

LI Jeovae ta slekil yoʼonton xi chalbutike: «Ta jkʼan ti xakʼot ta jkerem jtsebe». ¡Jaʼ jun mukʼta matanal taje! Li yutsʼ yalal Jeovae jaʼik krixchanoetik ti yakʼoj xkuxlejalik ta stojolale, ep sbalil chilik ti ay yakʼ xkuxlejal li Jesuse xchiʼuk xmuyubajik tajek. Jaʼ yuʼun, li voʼotike oy smelol li jkuxlejaltike xchiʼuk jmalaojtik jun kʼupil sba kuxlejal ti muʼyuk slajebe, xuʼ van ta vinajel o li ta Paraiso balumile.

² Ta skoj ti solel skʼanojutik li Jtotik Jeovae, oy kʼusi tsots skʼoplal la spas yoʼ xijkʼot ta skerem stsebe (Juan 3:16). Xi chalbutik li Vivliae: «Tojbil ti laj avichʼik manele» (1 Kor. 6:20). Li kʼusi la spas ta jtojolaltik li Diose jaʼ sventa xkamigointik lek. Akʼo mi jaʼ li buchʼu mas tsots skʼoplal ta sjunul vinajel balumile, xuʼ xi xkalbetik ta sjunul koʼontontike: «Tot». Li echʼ xchanobile, laj kiltik xtok ti jaʼ jun lekil Totil li Jeovae.

3. ¿Kʼusitik van xuʼ jakʼbe jbatik? (Kʼelo li rekuadro « ¿Mi tete sat ta jtojolal li Jeovae?»).

³ Oy jun jtsʼibajom yuʼun salmo ti xi laj yale: «¿Kʼusi xa onoʼox ta jtojbe-o Jeova skotol li kʼusitik lek spasoj ta jtojolale?» (Sal. 116:12). Xuʼ van oy jech jakʼojbe jbatik ek. Ti melel xkaltike, yuʼun onoʼox muʼyuk kʼusi xuʼ jtojbetik-o li Jtotik ta vinajele. Pe ta skoj ti kʼuxutik tajek ta yoʼontone, jaʼ tstij koʼontontik yoʼ jkʼantik eke. Xi laj yal li jtakbol Juane: «Li voʼotike chijkʼanvanutik, yuʼun jaʼ la skʼanutik baʼyel li stuke» (1 Juan 4:19). Vaʼun chaʼa, ¿kʼuxi xuʼ xkakʼbetik yil Jtotik Jeova ti jkʼanojtike?

4. ¿Kʼu yuʼun skʼan xkakʼtik persa yoʼ xijnopaj ta stojolal Jeova jech kʼuchaʼal chal Santiago 4:8?

⁴ Li Jeovae oy ta yoʼonton ti xijnopaj ta stojolale xchiʼuk ti jchiʼintik ta loʼile (kʼelo Santiago 4:8). Li stuke tsʼetel lek xchikin kʼalal ta jkʼopontike, jaʼ yuʼun tskʼanbutik vokol ti nopolikuk noʼox jkʼopontike (Rom. 12:12). Li Jtotik ta vinajele mu snaʼ xlub kʼuchaʼal li krixchanoetike, jech oxal chchikinta kaʼyejtik akʼo mi tsinil tajek yabtel. Pe ¿kʼuxi xuʼ jchikintatik ek li kʼusi chalbutike? Jaʼ ti jchanbetik li Skʼope, li vunetik ti tskoltautik ta yaʼibel smelolal li kʼusi chale xchiʼuk ti jtsʼetan lek jchikintik li ta tsobajeletike. Kʼalal nopolik noʼox chchiʼin sbaik ta loʼil li jun totil xchiʼuk yuni kereme, jmoj noʼox tsobolik. Jaʼ me jech chkʼot ta pasel ek mi nopolik noʼox ta jkʼopontik li Jtotik ta vinajele, yuʼun tskoltautik yoʼ nopoluk oyutik ta stojolale.

5. ¿Kʼusi xuʼ jpastik yoʼ masuk to lek jchiʼintik ta loʼil li Jeovae?

⁵ Jnopbetik skʼoplal kʼu yelan ta jchiʼintik ta loʼil li Jeovae. Yuʼun tskʼan ti mu jmak koʼontontik kʼalal ta jkʼopontike (Sal. 62:8). Lek me ti xiuk jakʼbe jbatike: «¿Mi jaʼ noʼox ta jchaʼalilan li kʼusi chkal ta j-orasione? ¿O mi jaʼ jech ta jpas jech kʼuchaʼal kʼalal chbat jkʼopon junuk kamigo ti chlokʼ ta koʼonton li kʼusi chkalbee?». Jkʼanojtik tajek li Jeovae xchiʼuk mu jkʼantik ti xijnamaj ta stojolale, jaʼ yuʼun skʼan nopolikuk noʼox jkʼopontik yoʼ jechuk xkakʼbetik yile. Teuk ta joltik ti xuʼ jkʼanbetik vokol yoʼ skoltautike. Jech oxal, jambetik li koʼontontike, kalbetik li kʼusi chkat-o koʼontontike xchiʼuk kʼalal xijmuyubaj noʼoxe.

6. ¿Kʼusi skʼan jpastik yoʼ nopol oyutik-o ta stojolal li Jeovae?

⁶ Sventa nopol oyutik-o ta stojolal li Jtotik Jeovae, skʼan jnaʼuk jtojtik ta vokol xtok. Jech chkaʼi jbatik kʼuchaʼal li jtsʼibajom yuʼun salmo ti xi laj yale: «Mu xa noʼox albajuk li kʼusitik apasoje, Kajval Jeova, Dios kuʼun, toj labalik sba li avabteltake xchiʼuk li kʼusitik anopoj ta jtojolalkutike. Muʼyuk buchʼu yan kʼuchaʼal voʼote; ¡ti xkalbeuk xchiʼuk ti jloʼiltabeuk skʼoplal li kʼusitik taje, mi jaʼuk onoʼox xlaj kuʼun ta albel skʼoplal!» (Sal. 40:5). Pe ¿mi bal noʼox van ti oy ta koʼontontik stojbel ta vokole? Moʼoj. Yuʼun chkakʼbetik yil ta jkʼopojeltik xchiʼuk kʼalal oy kʼusi ta jpastike. Li krixchanoetik avie mi jaʼuk snaʼ stojbeik ta vokol Dios li kʼusi ch-akʼbatike. Jech onoʼox yaloj Vivlia ti «mu kʼusi snaʼ stojik ta vokol» «li ta slajebal xa kʼakʼale» (2 Tim. 3:1, 2). Pe li voʼotike jelelutik ta skoj ti jnaʼ jtojtik ta vokole, jaʼ yuʼun mu me jchanbetik stalelalik.

7. ¿Kʼusi tskʼan Jeova ti akʼo jpastike, xchiʼuk kʼu yuʼun?

⁷ ¿Mi xmuyubaj xa van totil meʼiletik kʼalal chilik ti tstsak sbaik ta kʼop li yalab xnichʼnabike? Muʼyuk, yuʼun jaʼ tskʼanik ti lekuk xil sbaike. Jaʼ me jech tskʼanbutik ek li Jtotik Jeovae. Yuʼun kʼalal jkʼanoj jbatik ta jujuntale, te chvinaj ti jaʼutik li melel yajtsʼaklom Kristoe (Juan 13:35). Xi laj yal jun jtsʼibajom yuʼun salmoe: «¡Kʼelavilik! Toj lek xchiʼuk toj kʼupil sba ti jmoj oyik li steklumal Diose» (Sal. 133:1). Ta melel, ¡jaʼ jech chkaʼi jbatik ek kʼuchaʼal li jtsʼibajom taje! Kʼalal jkʼanoj jbatik ta jujuntale, chkakʼbetik yil Jeova ti jkʼanojtik eke (1 Juan 4:20). Stuk xa noʼox jech li kutsʼ kalaltik ta mantale, yuʼun oy slekil yoʼontonik xchiʼuk ch-ichʼvanik ta kʼux (Efes. 4:32).

8. Jech kʼuchaʼal chal 1 Juan 5:3, ¿kʼu yuʼun ta jchʼunbetik smantal li Jeovae?

⁸ Li Jeovae tskʼan ti xchʼunbe smantal stot smeʼik li alab nichʼnabiletike. Li voʼotik  eke tskʼanbutik ti akʼo jchʼunbetik smantale (Efes. 6:1). Sta-o ti jech jpastike, yuʼun jaʼ la spasutik, chakʼ li kʼusi chtun kuʼuntik yoʼ xijkuxie xchiʼuk jaʼ jun Totil ti mu tabajuk spʼijile. Pe li srasonal mas tsots skʼoplale jaʼ ti jkʼanojtik tajeke (kʼelo 1 Juan 5:3). Ta melel, mu xlaj ta alel ti kʼu yuʼun skʼan jchʼunbetik smantale, pe jnaʼojtik lek xtok ti muʼyuk tsujutike. Yakʼoj jnop jtuktik li kʼusi ta jpastike, jaʼ yuʼun xkuxet yoʼonton kʼalal ta jchʼunbetik smantal ta skoj ti jkʼanojtike.

9, 10. ¿Kʼu yuʼun skʼan xkojtikinbetik smantal li Jeovae xchiʼuk ti xkakʼ ta jkuxlejaltike?

⁹ Ta skoj ti oy ta yoʼonton totil meʼiletik ti lekuk xbat xkuxlejal li yalab xnichʼnabike, chalbeik kʼu yelan skʼan spas stalelalik. ¿Kʼusi chakʼik ta ilel alab nichʼnabiletik kʼalal chchʼunik mantale? Jaʼ ti spatoj yoʼontonik ta stojolal li stot smeʼike xchiʼuk ti chichʼik ta mukʼe. Pe jaʼ mas to tsots skʼoplal ti xkojtikinbetik smantal li Jtotik ta vinajele xchiʼuk ti xkakʼ ta jkuxlejaltike. ¿Kʼu yuʼun? Yuʼun jaʼ jech chkakʼbetik yil ti jkʼanojtike, ti kichʼojtik ta mukʼe xchiʼuk lek chbat jkuxlejaltik (Is. 48:17, 18). Pe mi ta jtoy jbatike xchiʼuk mi muʼyuk ta jtsaktik ta venta li smantal Diose, ta jsaʼ jvokol jtuktik (Gal. 6:7, 8).

¹⁰ Li Jeovae snaʼoj lek li kʼusi jaʼ sventa jlekilaltike. Jaʼ yuʼun, kʼalal jaʼ ta jpastik li kʼusi lek chile, muʼyuk chkil jvokol ta jkuxlejaltik, ta jnopbentik xchiʼuk lek-o chkil jbatik xchiʼuk. Xi chal jun ermana ta Estados Unidos ti Aurora sbie: «Jnaʼoj ti lek chbat jkuxlejal mi ta  jchʼunbe smantal li Jeovae». Jaʼ melel li kʼusi laj yal li ermanae. Lek me ti xiuk jakʼbe jbatike: «¿Kʼuxi jtaojbe sbalil kʼalal ta jchʼun li beiltasel yuʼun Jeovae?».

11. ¿Kʼuxi tskoltautik li orasione?

¹¹ Li orasione xuʼ skoltautik sventa jchʼuntik mantal akʼo mi vokol chkaʼitik. Ta skoj ti jpasmulilutike, vokol chkaʼitik bakʼintik sventa jchʼunbetik smantal li Jeovae. Pe skʼan jech-o xkakʼtik persa xchʼunel. Xi la skʼanbe vokol Dios jun jtsʼibajom yuʼun salmoe: «Tijbun koʼonton sventa oyuk ta koʼonton jchʼunbot amantal» (Sal. 51:12). Xi chal sloʼil jun prekursora ti Denise sbie: «Kʼalal vokol chkaʼi xchʼunbel smantal Jeovae, chkalbe ta orasion ti akʼo yakʼbun kipal yoʼ jaʼuk jpas li kʼusi leke». Teuk ta joltik ti ta onoʼox stakʼ j-orasiontik Jeova kʼalal jech ta jkʼanbetik vokole (Luk. 11:9-13).

12. ¿Kʼusi skʼan jpastik jech kʼuchaʼal chal Efesios 5:1?

¹² (Kʼelo Efesios 5:1). Oy ta koʼontontik xchanbel stalelal li Jtotik Jeovae, yuʼun jaʼutik skʼanbil nichʼnab. Pe ¿kʼuxi xuʼ jchanbetik stalelal? Jaʼ mi oy xkʼuxul koʼontontik, slekil koʼontontik xchiʼuk mi jnaʼ xkakʼtik pertone. Kʼalal chil krixchanoetik ti lek jtalelaltike, xuʼ van jaʼ xtijbat-o yoʼontonik sventa xojtikinik mas li Diose (1 Ped. 2:12). Li Jeovae toj lek yoʼonton ta jtojolaltik, lek me ti jechuk spas li totil meʼiletik ta stojolal li yalab xnichʼnabike. Yuʼun mi jech tspasike,  xuʼ van xtijbat-o yoʼonton yalab xnichʼnabik yoʼ xamigoinik ek li jkʼanvanej Totil kuʼuntike.

13. ¿Kʼusi skʼan jnopbetik skʼoplal mi xijtsʼijet noʼoxe?

¹³ Stalel onoʼox ti xmuyubaj ta stojolal stotik li ololetike xchiʼuk ti jun yoʼonton chalbeik batel skʼoplale. Jaʼ jech chkaʼitik ek ta stojolal li Jeovae, yuʼun xijmuyubaj ti jaʼ Jtotike xchiʼuk oy ta koʼontontik ti xojtikinik li yantike. Jaʼ jech chkaʼi jbatik kʼuchaʼal li jtsʼibajom yuʼun salmo liʼe: «Mukʼ jkʼoplal chkaʼi jba ta stojolal li Jeovae» (Sal. 34:2). Pe xuʼ van xijtsʼijet noʼox, vaʼun vokol chkaʼitik ti xkalbetik batel skʼoplal li Jtotik ta vinajele. Li kʼusi xuʼ skoltautike jaʼ ti jnopbetik skʼoplal ti chmuyubaj kuʼuntik Jeova mi jech ta jpastike xchiʼuk ti xuʼ stabeik sbalil li yantike. Koltaatik yuʼun Jeova li ermanoetik ta baʼyel sigloe. Jaʼ me jech tspas ta jtojolaltik ek, yuʼun chakʼ stsatsal koʼontontik (1 Tes. 2:2).

14. ¿Kʼu yuʼun tsots skʼoplal ti xkaltik batel li lekil aʼyejetike?

¹⁴ Mu snaʼ xtʼujvan li Jeovae, jech oxal lek tajek chil kʼalal ta jkʼan jbatik ta jujuntal akʼo mi jelajtik jlumaltike (Ech. 10:34, 35). Li kʼusi mas lek xuʼ jpastik yoʼ xkakʼtik ta ilel ti jkʼanojtik li yantike jaʼ mi chkaltik batel li lekil aʼyejetike (Mat. 28:19, 20). Kʼalal jech ta jpastike, xuʼ xlekub xkuxlejal li buchʼutik chchikintaik mantale xchiʼuk xuʼ sta-o xkuxlejalik sbatel osil ta mas jelavel (1 Tim. 4:16).

15, 16. ¿Kʼu yuʼun xuʼ xijmuyubaj akʼo mi chkil jvokoltike?

¹⁵ Kʼuxutik tajek ta yoʼonton li Jtotik Jeovae xchiʼuk tskʼan ti junuk noʼox koʼontontike (Is. 65:14). Xuʼ xijmuyubaj noʼox akʼo mi chkil jvokoltik. ¿Kʼu yuʼun ti jech chkaltike? Yuʼun te ta joltik ti solel skʼanojutik tajek li Jtotik ta vinajele. Xkojtikintik xa lek kʼusi chal li Skʼope (Jer. 15:16). Jech xtok, stuk xa noʼox jech li kutsʼ kalaltik ta mantale, yuʼun skʼanojik Jeova, tstsakbeik ta mukʼ li smantaltake xchiʼuk skʼanoj sbaik ta komon (Sal. 106:4, 5).

¹⁶ Oy to yan kʼusitik ti chakʼbutik jmuyubajeltike: jnaʼojtik ti chlekub ta jelavel li jkuxlejaltike, jutuk xa skʼan sventa xchʼaybe stsʼunubal chopol krixchanoetik li Diose xchiʼuk li Ajvalilal yuʼune chkoltavan yoʼ skʼatajes ta Paraiso li balumile. Maʼuk noʼox, yuʼun oy kʼusi kʼupil sba chkʼot ta stojolal li buchʼutik chamemike: chchaʼkuxiik tal, vaʼun ta jkʼelbetik satik yan velta (Juan 5:28, 29). ¡Stuk xa noʼox jech li kʼusi jmalaojtike! Pe li kʼusi mas tsots skʼoplale jaʼ ti poʼot xa xalbeik smukʼulal Jtotik Jeova skotol li kʼusitik kuxajtik ta vinajel balumile xchiʼuk chichʼik ta mukʼ jech kʼuchaʼal sta-oe.