ALATIKE AKO 7
ʼE Tou ʼOʼofa Mamahi Ia Sehova, Tatatou Tamai
“ ʼE tou ʼoʼofa, koteʼuhi neʼe ʼuluaki ʼofa ia ia tatou.”—1 SOA. 4:19.
KATIKO 3 Ko Toku Malohiʼaga, Taku ʼAmanakiʼaga, Toku Falanakiʼaga
TE ʼU MANATU FAKANOUNOU *
1-2. He ko ʼe neʼe fakafealagia e Sehova ke tou kau ki tona famili? Pea kotea ʼae neʼe ina fai moʼo fakahoko ʼo te faʼahi ʼaia?
NEʼE fakaafe tatou e Sehova ke tou kau ki tona famili. ʼI toe pilivilesio leva! Ko te famili ʼaia ʼe faʼufaʼu e he hahaʼi kua foaki tonatou maʼuli ki te ʼAtua pea ʼe natou tui ki te sakilifisio faitotogi ʼae neʼe momoli e tona ʼAlo. ʼE tou kau ki he famili fiafia. Pea ʼi te temi nei kua tou iloʼi te fakaʼuhiga ʼo te maʼuli, pea kua tou fiafia ʼi tatatou iloʼi ʼae ʼe feala ke tou maʼuli heʼe gata, tatau aipe pe ʼe ʼi te lagi peʼe ʼi te Palatiso ʼi te kele.
2 Neʼe fakafealagia e Sehova ke tou kau ki tona famili koteʼuhi neʼe lahi tona ʼofa ʼae kia tatou. Kae moʼo fakahoko te faʼahi ʼaia neʼe maʼua ke ina fai he toe sakilifisio lahi. (Soa. 3:16) Neʼe totogi tatou ʼaki “he totogi lahi.” (1 Ko. 6:20) Pea ʼaki te totogi ʼae neʼe foaki e Sehova kua feala ai ke tou maʼu he ʼu felogoi lelei pea mo ia. ʼE tou maʼu te pilivilesio ʼae ke tou ui Tamai kia ia ʼae ʼe maʼuhiga tokotahi ʼi te ʼatulaulau. Pea ohage pe ko tatatou kua vakaʼi ʼi te alatike kua hili, ko Sehova te Tamai ʼae ʼe lelei tukupau.
3. Kotea te fehuʼi ʼae ʼe feala ke tou fai? (Vaka’i mo te fakamatala ʼae ’i te ’a takai “ ʼE Tokagaʼi Koa Au e Sehova?”)
3 ʼE feala pe ke tou fai te fehuʼi ʼaeni neʼe fai e te tagata faipesalemo: “Pe e feafeai anai ke au liufaki [kia Sehova] ana mea lelei fuli kia au?” (Pes. 116:12) ʼE mole feala anai ke tou liufaki ʼi he ʼaho ki tatatou Tamai ʼae ʼi selo te ʼu meʼa fuli ʼae neʼe ina fai maʼa tatou. Kae ko tona ʼofa kia tatou ʼe ina ʼekenaki ke tou toe ʼofa mo tatou kia te ia. Neʼe tohi fenei e te apositolo ko Soane: “ ʼE tou ʼoʼofa, koteʼuhi neʼe ʼuluaki ʼofa ia ia tatou.” (1 Soa. 4:19) ʼE feala ke tou fakaha feafeaʼi ki tatatou Tamai ʼae ʼi selo ʼe tou ʼofa ia te ia?
NOFO OVI KIA SEHOVA
4. Ka tou lau ia Sakopo 4:8, he koʼe ʼe tonu ke tou faiga malohi ke tou nonofo ovi kia Sehova?
4 ʼE loto e Sehova ke tou fakaovi age kia te ia pea ke tou felogoi mo ia. (Lau ia Sakopo 4:8.) ʼE ina fakalotomalohiʼi tatou ke tou “kataki ʼi te faikole” pea ʼe fakalogo mai anai ʼi te temi fuli. (Loma 12:12) ʼE mole maʼumaʼua fau peʼe piko ia Sehova ʼi te fakalogo mai ki ʼatatou faikole. Pea ʼe tou fakalogo kia te ia ʼaki te lau ʼo tana Folafola, te Tohi-Tapu, feia ki ʼatatou tohi ʼae ʼe tokoni mai ke tou mahino ki tana Folafola. ʼE tou toe fakalogo kia Sehova moka tou fagono lelei ki te ʼu akonaki ʼae ʼe fai ʼi ʼatatou fono Fakakilisitiano. ʼE tou nonofo ovi anai kia Sehova mo kapau ʼe tou felogoi tuʼumaʼu mo ia. ʼE hage pe ko he ʼu fanau ʼe nonofo ovi ki ʼanatou matuʼā koteʼuhi ʼe natou felogoi tuʼumaʼu mo natou.
5. ʼE tonu ke feafeaʼi ʼau faikole?
5 Fakakaukauʼi pe ʼe feafeaʼi ʼau faikole. ʼE loto e Sehova ke tou fakaha age kia te ia meʼa fuli ʼae ʼi ʼotatou loto. (Pes. 62:9) Koia ʼe feala pe ke ke fai te ʼu fehuʼi ʼaeni: ‘ ʼE au fai koa ʼi ʼaku faikole he ʼu palalau mole au fakakaukauʼi? Peʼe au fakaha fuli koa te ʼu meʼa ʼae ʼi toku loto kia Sehova?’ ʼE mahino papau ʼe ke ʼofa fakamalotoloto kia Sehova pea ʼe ke fia taupau he ʼu felogoi malohi pea mo ia. Ke ke lava fakahoko te faʼahi ʼaia ʼe tonu ke ke palalau tuʼumaʼu kia te ia. Fakaha fuli kia te ia te ʼu meʼa ʼae ʼi tou loto. Toe fakaha ki ai ʼou fiafia mo ʼou mamahi. ʼE tonu ke ke tui papau ʼe feala ke ke kole kia Sehova ke tokoni atu.
6. Kotea ʼae ʼe tonu ke tou fai ke tou nonofo ovi ai ki tatatou Tamai ʼae ʼi selo?
6 Ke tou nonofo ovi ki tatatou Tamai ʼae ʼi selo, ʼe tonu ke tou lotofakafetaʼi tuʼumaʼu kia te ia. ʼE lagi tou manatu tahi mo te tagata faipesalemo ʼae neʼe ina tohi fenei: “[Sehova] toku Atua! Nee ke liuliuga au gaue fakatalakitupua mo au fakatuutuu kia matou. E mole he tahi e tatau mo koe: E au fia fakaha pea e au fia fakamatala au gaue, kae e natou lahi fau ke au fakamatala fuli natou.” (Pes. 40:6) Kae ʼe mole tonu pe ke tou logoʼi te lotofakafetaʼi kia Sehova, ʼe feala pe ke tou toe fai he ʼu palalau peʼe ko he ʼu gaue. Kapau ʼe tou fai feia, pea ʼe tou fakaha ai ʼe tou kehekehe mo te toe hahaʼi tokolahi ia ʼaho nei. ʼE tou maʼuli nei ʼi he malama ʼe mole lotofakafetaʼi ai te hahaʼi ki te ʼAtua ʼo ʼuhiga mo te ʼu meʼa ʼae ʼe ina fai maʼa natou. Neʼe kua fakaha fakatomuʼa ʼi te Tohi-Tapu ʼe “maʼuli galo” anai te hahaʼi ʼi “te ʼu ʼaho fakamuli.” (2 Tim. 3:1, 2) ʼE mole tou fia hage anai ko natou!
7. Kotea ʼae ʼe loto e Sehova ke tou fai? Pea kotea tona tupuʼaga?
7 ʼE loto e te ʼu matuʼā ke mole fekēʼaki ʼanatou fanau, kae ke natou felogoi lelei ohage ko he ʼu kaumeʼa. ʼO toe feia pe ʼe loto e Sehova ke maʼu e ʼana fanau he ʼu felogoi lelei ia natou. Ko te ʼofa ʼae ʼe tou femaʼuʼaki ko he fakamoʼoni ko tatou ko he kau Kilisitiano moʼoni. (Soa. 13:35) ʼE tou manatu tahi mo te tagata faipesalemo ʼae neʼe ina tohi fenei: “Koeni, io! e lelei aupito, e fakafimalie osi ki ni tehina ke nonofo fakatahi!” (Pes. 133:1) Ka tou ʼoʼofa ki ʼotatou tehina mo tuagaʼane, ʼe tou fakaha ai totatou ʼofa ʼae kia Sehova. (1 Soa. 4:20) ʼE ko he meʼa lelei tatatou kau ki he fale tau tehina mo fale tau tuagaʼane ʼe natou “feagaleleiʼaki, mo fonu ʼi te manavaʼofa.”—Efe. 4:32.
KE KE FAKALOGO
8. Ka tou lau ia 1 Soane 5:3, he koʼe ʼe tou fakalogo kia Sehova?
8 ʼE loto e Sehova ke fakalogo te ʼu fanau ki ʼanatou matuʼā. Koia ʼae ʼe ina loto ai ke tou fakalogo age kia te ia. (Efe. 6:1) ʼE tuha mo ia ke tou fakalogo age koteʼuhi ko ia totatou Tupuʼaga. ʼE toe tokaga foki ki ʼotatou maʼuli pea ʼe poto age ia ʼi te ʼu tamai fuli. Kae ʼe tou fakalogo tafito kia Sehova koteʼuhi he ʼe tou ʼoʼofa ia te ia. (Lau ia 1 Soane 5:3.) Tatau aipe pe ʼe lahi te ʼu tupuʼaga ʼae ke tou fakalogo ai kia Sehova kae mole ina fakamalohiʼi tatou ke tou fakalogo age. Neʼe foaki mai e Sehova te loto faʼitaliha. Koia ʼae ʼe fiafia ai moka tou filifili ke tou fakalogo he ʼe tou ʼoʼofa ia te ia.
9-10. He koʼe ʼe maʼuhiga ke tou iloʼi pea mo maʼuliʼi te ʼu lao ʼa te ʼAtua?
9 ʼE fia puipui e te ʼu matuʼā ʼanatou fanau. Ko te tupuʼaga la ʼaia ʼo tanatou fai he ʼu lekula ke fua lelei kia natou. Ka fakalogo te ʼu fanau ki te ʼu lekula ʼaia, ʼe natou fakaha ai ʼe natou falala pea mo fakaʼapaʼapa ki ʼanatou matuʼā. ʼE maʼuhiga ʼaupito ke tou iloʼi pea mo maʼuliʼi te ʼu lao ʼa tatatou Tamai ʼae ’e ’i selo. ʼI tatatou fai te faʼahi ʼaia, ʼe tou fakaha ai ʼe tou ʼoʼofa pea mo fakaʼapaʼapa kia te ia. Pea tahi, ʼe fua lelei anai kia tatou. (Esa. 48:17, 18) Kae ko natou ʼae ʼe fehiʼa kia Sehova mo ʼana lao, ʼe fua kovi anai kia natou.—Kal. 6:7, 8.
10 Kapau ʼe tou fai te ʼu meʼa ʼae ʼe leleiʼia e Sehova ʼi totatou maʼuli, ʼe puipui anai tatou ʼi te faʼahi fakasino, mo fakalaumalie pea mo totatou loto. ʼE iloʼi e Sehova te meʼa ʼae ʼe lelei kia tatou. Ko Aurora, ʼae ʼe maʼuli ʼi Amelika, ʼe ina ui fenei: “ ʼE au iloʼi ka tou fakalogo kia Sehova pea ʼe lelei age anai totatou maʼuli.” ʼE moʼoni te aluʼaga ʼaia kia tatou takitokotahi. Kotea te ʼu fua lelei neʼe ke maʼu ʼi tau fakalogo ki te ʼu fakatotonu ʼofa ʼa Sehova?
11. ʼE tokoni feafeaʼi mai te faikole?
Pes. 51:12, MN) ʼE fakamatala fenei e Denise ʼae ʼe pionie katoa: “Ka faigataʼa haku fakalogo ki he fakatotonu ʼa Sehova, ʼe au faikole ke au maʼu te malohi moʼo fai ʼo te meʼa ʼae ʼe lelei.” ʼE feala ke tou tui papau ʼe tali tuʼumaʼu anai e Sehova te faʼahiga faikole ʼaia.—Luka 11:9-13.
11 ʼE tokoni mai te faikole ke tou talagafua kia Sehova, tatau aipe pe ʼe faigataʼa tona fakahoko. ʼI ʼihi temi, ʼe faigataʼa hatatou fakalogo ʼuhi ko totatou ʼuhiga agahala. Kae ʼe tonu ke tou tauʼi tuʼumaʼu tatatou fia fai te meʼa ʼae ʼe kovi. Neʼe kole fenei e te tagata faipesalemo ki te ʼAtua: “Fakatupu ia au he loto fia fakalogo kia te koe.” (TOKONI KI ʼIHI KE NATOU ʼOʼOFA KI TATATOU TAMAI
12. Ka tou lau ia Efeso 5:1, kotea ʼae ʼe tonu ke tou fai?
12 Lau ia Efeso 5:1. Ko tatou ko he ʼu “fanau ʼofaina” ʼa te ʼAtua. Koia ʼe tou faiga fakamalotoloto ai ke tou faʼifaʼitakiʼi ia ia. ʼE tou faʼifaʼitakiʼi ʼona kalitate ʼo tou ʼofa ki te hahaʼi, mo tou agalelei pea mo fakamolemole tuʼumaʼu kia natou. Ka sisio ia natou ʼae ʼe mole natou iloʼi te ʼAtua ki tatatou aga ʼae ʼe lelei, ʼe feala ai ke natou fia kumi pe ʼe ko ai te ʼAtua. (1 Pet. 2:12) ʼE maʼu e te ʼu matuʼā Kilisitiano he tahi tupuʼaga lelei ke natou faʼifaʼitakiʼi ai te faʼahiga aga ʼa Sehova ki ʼana kaugana. ʼE feala ai hanatou ʼekenaki ʼanatou fanau ke natou tahi maʼu he felogoi lelei mo tatatou Tamai ʼofa.
13. Kotea ʼae ʼe tonu ke tou fai moka tou umiuminoa?
13 ʼI te agamahani ʼe vikiʼi e he kiʼi fanau tana tamai. ʼE toe feia mo tatou ʼe tou vikiʼi tatatou Tamai ʼae ʼi selo, ia Sehova, pea ʼe tou loto ke Pes. 34:2, MN) Kae kotea ʼae ʼe tonu ke tou fai moka tou umiuminoa? ʼE feafeaʼi hatatou liliu ʼo lotomalohi? ʼE feala ke tou lotomalohi mo kapau ʼe tou fakakaukauʼi te fiafia ʼa Sehova moka tou palalau ʼo ʼuhiga mo ia ki te hahaʼi. Pea tou toe manatuʼi te ʼu fua lelei ʼae ka natou maʼu anai. ʼE foaki mai anai e Sehova te lotomalohi ʼae ʼe ʼaoga kia tatou. Neʼe tokoni ki ʼotatou tehina ʼi te ʼuluaki sekulo ke natou palalau ʼaki te lototoʼa ʼo ʼuhiga mo ia. Pea ʼe toe tokoni mai anai kia tatou.—1 Tes. 2:2.
iloʼi ia ia e te hahaʼi fuli. ʼE tatau te ʼu meʼa ʼae ʼe tou logoʼi mo te Hau ko Tavite. Neʼe ina tohi fenei: “ ʼE au fakakololiaʼi ia Sehova.” (14. He koʼe ʼe maʼuhiga ke tou fai ni tisipulo?
14 Ko Sehova ʼe mole fakapalatahi. Koia ʼe fiafia moka tou fakaha te ʼofa ki te hahaʼi, tatau aipe tonatou aluʼaga mo tonatou lanu. (Gaue 10:34, 35) Ko tatatou faʼahiga fakaha kia natou te ʼofa, ko tatatou fakamafola kia natou te logo lelei. (Mat. 28:19, 20) Kotea anai te fua ʼo te gaue ʼaia? Ko natou ʼae ʼe fakalogo mai ʼe feala anai hanatou fetogi tonatou maʼuli ʼi te temi nei. Pea ʼe natou toe maʼu te ʼamanaki ki te maʼuli heʼe gata ʼi te Palatiso.—1 Tim. 4:16.
KE KE ʼOFA KI TATATOU TAMAI PEA KE KE FIAFIA
15-16. Kotea la he ʼu tupuʼaga ke tou fiafia ai?
15 Ko Sehova ko te Tamai ʼofa pea ʼe ina loto ke fiafia tona famili. (Esa. 65:14) ʼE lahi te ʼu tupuʼaga ke tou fiafia ai ʼi te temi nei tatau aipe pe ʼe tou tau mo ni ʼu fihifihia. Ohage la ʼe tou tui papau ʼe ʼofa mamahi tatatou Tamai ʼae ʼi selo ia tatou. ʼE tou toe maʼu te ʼatamai malama totonu ʼo ʼuhiga mo tana Folafola, te Tohi-Tapu. (Sel. 15:16) Pea ʼe tou kau ki te foʼi famili pe ʼe tahi ʼae ʼe ʼofa kia Sehova mo ʼana lao pea mo natou feʼofaʼofaniʼaki.—Pes. 106:4, 5.
16 Pea tahi, ʼe feala ke tou taupau totatou fiafia he ʼe tou tui papau ʼe fetogi anai te maʼuli ʼi te ka haʼu. ʼE tou iloʼi kua vave pulihi pe e Sehova te agakovi kae ina fakaliliu te kele ko he Palatiso ʼaki tona Puleʼaga. ʼE tou toe maʼu te ʼamanaki taulekaleka ʼae ko tatatou sisio ki te fakatuʼuake ʼo natou ʼae kua mamate, pea mo tou toe fakatahi mo natou. (Soa. 5:28, 29) Ko he toe fiafia lahi ʼaupito anai! Kae ko te faʼahi ʼae ʼe maʼuhiga age, ko tatatou tui papau ʼae kua vave pe te foaki e te hahaʼi katoa te fakaʼapaʼapa, mo te kololia pea mo te tauhi ʼae ʼe tuha mo Sehova. Pea ʼe hoko anai te aluʼaga ʼaia ʼi te lagi mo te kele.
KATIKO 12 Ko Sehova Te ʼAtua Lahi
^ pal. 5 ʼE tou iloʼi ko tatatou Tamai ko Sehova ʼe ʼofa mamahi ia tatou, pea neʼe ina fakaafe tatou ki tona famili ʼae ʼe kau ki ai tana kau atolasio. Pea koia ʼae ʼe tou ʼoʼofa ai kia te ia. ʼE tou fakaha feafeaʼi anai totatou ʼofa kia te ia? ʼE tou vakaʼi anai ʼi te alatike ʼaeni aluʼaga kehekehe moʼo fakaha ʼo totatou ʼofa ʼaia.