1-2. Mang fan ni ke bing Jehovah e kanawo’ ngodad nrayog ni ngad manged bang ko tabinaw rok, ma uw rogon ni ke rin’ e re n’ey?

KE PININGDAD Jehovah ni ngad manged boch i girdien e tabinaw rok ni yad be pigpig ngak. Rib manigil e re n’ey! Girdien e re tabinaw ney e ba muun ngay e piin kar ognaged yad ngak Got mab mich u wan’rad fare biyul ni maligach ni pi’ Fak. Biney e tabinaw e ba felfelan’ girdien. Ke yib fan e yafos rodad e chiney, maku gad ba felfelan’ ni bochan e bay e athap rodad ko yafos ni manemus u tharmiy ara u Paradis u fayleng.

² Ke bing Jehovah e kanawo’ ngodad nrayog ni ngad manged bang ko tabinaw rok ni bochan e ri gad ba t’uf rok. Machane bay ban’en ni ke pag fan ya nge yag ni rin’ e re n’ey. (John 3:16) Ke ‘chuw’iydad nib tolang puluwdad ni pi’.’ (1 Kor. 6:20) Bochan fare biyul ma ke bing Jehovah e kanawo’ ngodad nrayog ni nge chugur e tha’ u thildad. Ku rayog ni ngad pininged e En th’abi tolang u ga’ngin e palpalth’ib ni Chitamangidad. Kud weliyed ko fa binem e article ni Jehovah e ir e bin th’abi fel’ e Matam ni bay.

3. Mang boch e deer nrayog ni ngad fithed? (Kum guy fare kahol ni kenggin e “ Ma Guyeg Jehovah, Fa?”)

³ Sana rayog ni ngad fithed fare deer ni fith be’ ni yoloy reb e babyor u Bible ni be gaar: “Be mang e rayog ni gu pi’ ngak Somol nge yan nga puluwon urngin e pi n’en nib fel’ ni ke rin’ ngog?” (Ps. 116:12) Fulweg riy e dariy ba ngiyal’ nrayog ni ngad sulweged puluwon urngin ban’en ni ke rin’ e Chitamangidad ni bay u tharmiy ni fan ngodad. Machane bochan e t’ufeg rok ngodad, ma aram e n’en ni be k’aringdad ni ngkud t’ufeged. I yoloy apostal John ni gaar: “Ba t’uf Got rodad nge girdi’ ni bochan e Got e som’on ni at’ufegdad.” (1 John 4:19) Mang boch e kanawo’ nrayog ni ngad daged riy ngak e Chitamangidad ni bay u tharmiy nib t’uf rodad?

4. Mang fan nsusun e ngad guyed rogon ni ngad chugurgad ngak Jehovah nrogon ni bay ko James 4:8?

⁴ Baadag Jehovah ni ngad chugurgad ngak, mu ud nonad ngak. (Mu beeg e James 4:8.) Be pi’ e athamgil ngodad ni ngaud “meybilgad ni gubin ngiyal’,” ma gubin ngiyal’ ni ma motoyil ngodad. (Rom. 12:12) Dariy ba ngiyal’ ni kaygi yoor pa’ nga puluwon ara ke aw parawon ndabkiyog ni nge motoyil ngodad. Ma rogon ni gad ma motoyil ngak e aram e gad ma beeg e Bible nge boch e babyor rodad ni ma ayuwegdad ni ngad nanged fan e n’en bay ko Thin rok. Ku gad ma motoyil ngak ni aram e gad ma fal’eg e motoyil ko pi n’en yima fil ngodad u nap’an e muulung. Faan gad ra non ngak Jehovah ni gubin ngiyal’, ma aram e ra chugur e tha’ u thildad ni bod e piin bitir nrayog ni nge chugur thilrad e gallabthir rorad ni faanra ur nonad ngorad ni gubin ngiyal’.

5. Uw rogon ni ngad mon’ognaged rogon e meybil ni gad ma tay?

⁵ Am lemnag rogon ni ga ma meybil ngak Got. Baadag Jehovah ni ngad weliyed urngin ban’en ni bay u lanin’dad ngak u daken e meybil. (Ps. 62:8) Ere ba fel’ ni ngad fithed gadad ni nge lungudad: ‘Meybil rog e bod bangi babyor ni gu be abweg e thin rok be’ ngay ni gathi ban’en ni ke sum u gum’irchaeg, fa bod bangi babyor ni gu be yoloy e thin ngay ni ke yib u gum’irchaeg?’ Dariy e maruwar riy nrib t’uf Jehovah rom, ma ga baadag ni nge par e tha’ u thilmew nib fel’. Machane faanra nge par e tha’ u thilmew ni aray rogon, ma thingar um non ngak ni gubin ngiyal’. Mu weliy ngak e tin bay u lanin’um ndariy be’ ni manang nge pi n’en ma k’aring e felfelan’ nge kireban’ ngom. Ma nge pagan’um ngay ndemtrug e ngiyal’ nrayog ni ngam ning e ayuw ngak.

6. Mang e thingar da rin’ed ni faanra ngad pared ni gad ba chugur ko Chitamangidad ni bay u tharmiy?

⁶ Ra ngad pared ni gad ba chugur ko Chitamangidad ni bay u tharmiy, ma gubin ngiyal’ nthingar ud pininged e magar ngak. Ba puluw u wan’dad fapi thin ni yog e en ni yoloy e Psalm ni gaar: “Somol ni Got rog, pire’ ban’en ni yira ngat ngay ni kam ngongliy ni fan ngomad; dariy be’ ni bod gur! Boor ban’en nib fel’ ni ke m’ay i lemnag rom ni fan ngomad. Ra nggu weliy murung’agen ni gubin, ma ra yan i aw ndabiyog rog ya kayigi pire’.” (Ps. 40:5) Gathi kemus ni gad ma pining e magar ngak Jehovah u lanin’dad, ya ku gad ma yog maku gad ma rin’ boch ban’en ni be dag ni gad be pining e magar ngak. Re n’ey e ma taydad ni gad ba thil ngak yooren e girdi’ e ngiyal’ ney. Gad be par u ba fayleng ni girdi’ riy e dariy fan u wan’rad e pi n’en be rin’ Got ni fan ngorad. Bin riyul’ riy e, reb e pow ni be dag ni gad be par ko “tin tomren e rran” e aram e dakir pining e girdi’ e magar. (2 Tim. 3:1, 2) Dubdad ni nge af e biney e lem ngodad!

7. Mang e baadag Jehovah ni ngad rin’ed, ma mang fan?

⁷ Piin gallabthir e dubrad ni nga i cham pi fakrad, ya yad baadag ni ngaur pared nib fel’ thilrad. Ere ku arrogon Jehovah ni baadag ni nga i par gubin pi fak nib fel’ thilrad. Bin riyul’ riy e, t’ufeg ni bay u thildad e aram e pow riy ni gadad e tin riyul’ e Kristiano. (John 13:35) Ba puluw u wan’dad fapi thin ni yog e en ni yoloy e Psalm ni gaar: “Rib fel’ ma ba manigil, ni ngi i par e girdi’ rok Got u taabang nib taareb lungurad!” (Ps. 133:1, BT) Faanra ud t’ufeged pi walagdad, ma aram e gad be micheg ngak Jehovah nib t’uf rodad. (1 John 4:20) Ri gad ba felfelan’ ni kad manged girdien ba tabinaw ni bay e pi walag riy ni yad ba ‘gol ngorad, ma ra bagayad mab munguy ngak bagayad’!​—Efe. 4:32.

8. Mang e bin th’abi ga’ i fan ni gad ma fol rok Jehovah nrogon ni bay ko 1 John 5:3?

⁸ Baadag Jehovah ni nga i fol e piin bitir ko gallabthir rorad, maku baadag ni ngaud folgad rok. (Efe. 6:1) Bay rogon ni ngad folgad rok ni bochan e ir e En Ke Sunmiydad, maku Ir e Be Ayuweg e yafos rodad, ma kab ga’ e gonop rok ngak urngin e gallabthir. Machane bin th’abi ga’ i fan ni gad ma fol rok Jehovah e bochan nib t’uf rodad.  (Mu beeg e 1 John 5:3.) Der ma towasariydad ni ngad folgad rok ni yugu aram rogon ni boor fan nsusun e ngad folgad rok. Ke pi’ Jehovah e puf rogon ngodad nib tow’ath, ere ma felfelan’ u nap’an ni gad ra dugliy ni ngad folgad rok ni bochan e ba t’uf rodad.

9-10. Mang nib ga’ fan ni ngad nanged e pi motochiyel rok Got ma gad fol riy?

⁹ Piin gallabthir e yad baadag ni nge par pi fakrad ndabi buch ban’en rorad. Aram fan ni yad ma ngongliy boch e motochiyel ni nge fol pi fakrad riy nra yib angin ngorad. Faanra fol pi fakrad ko pi motochiyel nem, ma aram e yad be dag ni be pagan’rad ko gallabthir rorad maku yad be tay farad. Ere ri kab ga’ fan ni ngad nanged ma gad fol ko pi motochiyel ni ke ngongliy e Chitamangidad ni bay u tharmiy. Faan gad ra fol riy, ma aram e gad be dag ngak Jehovah nib t’uf rodad, ma gad be tayfan, maku gadad e ra yib angin ngodad. (Isa. 48:17, 18) Machane piin ndarur folgad rok Jehovah nge pi motochiyel rok e yad ma rin’ boch ban’en ni yad e yad ma gafgow riy ko tomur.​—Gal. 6:7, 8.

¹⁰ Faan gad ra ngongol u rogon nib m’agan’ Jehovah ngay, ma rayog ni ngad siyeged boch ban’en nra kirebnag fithik’ i dowdad, nge lanin’dad, ara tha’ u thildad Jehovah. Manang Jehovah e tin nib fel’ ni fan ngodad. Aurora ni ma par u Meriken e gaar, “Gu manang ni faan gad ra fol rok Jehovah, ma rayog ni nge fel’ e par rodad.” Riyul’ e re n’ey. Ere mang boch i angin ni ke yib ngom ni bochan e ga ma fol u rogon ni ma pow’iyem Jehovah u fithik’ e t’ufeg?

11. Uw rogon ni ma ayuwegdad e meybil?

¹¹ Meybil e ma ayuwegdad ni ngad folgad ni yugu aram rogon nib mo’maw’ ngodad. Bay yu  ngiyal’ nra mo’maw’ ngodad ni ngad folgad rok Jehovah ni bochan e gad bogi tadenen. Machane gubin ngiyal’ nthingar da athamgilgad ni nge dab da rin’ed ban’en nde m’agan’ ngay. I wenig e en ni yoloy e Psalm ngak Got ni gaar: “[Mu] ayuweg lanin’ug ngi i fol rom.” (Ps. 51:12) Denise ni ir reb e regular pioneer e gaar, “Nap’an nra gu nang ni be mo’maw’ ngog ni nggu fol u reb e motochiyel rok Jehovah, ma gu ma meybil ngak ni nge pi’ gelngig ni nggu rin’ e tin nib fel’.” Rayog ni nge pagan’dad ni gubin ngiyal’ nra sulweg Jehovah taban e meybil ni aray rogon.​—Luke 11:9-13.

12. Mang e susun ni ngad rin’ed nrogon ni bay ko Efesus 5:1?

¹² Mu beeg e Efesus 5:1. Bochan ni gadad “pi fak” Got ni gad ba t’uf rok, ma aram fan ni gad ma athamgil u rogon nrayog rodad ni ngad folwokgad rok. Gad ma guy rogon ni ngad folwokgad rok ni aram e gad ma dag e t’ufeg, nge sumunguy, ma gad ma n’ag fan e kireb ko girdi’. Nap’an nra guy e piin ndawor nanged Got e ngongol rodad nib fel’, ma rayog ni nge k’aringrad ni ngar adaged ni ngar filed boch ban’en u murung’agen. (1 Pet. 2:12) Pi gallabthir ni Kristiano e susun e ngar athamgilgad ni ngaur ngongolgad ngak pi fakrad ni bod rogon ni ma ngongol Jehovah ngodad. Faan yad ra rin’ e re n’ey, ma aram e rayog ni ngki adag pi fakrad ni nge fel’ e tha’ u thilrad e Chitamangidad ni ma t’ufegdad.

13. Mang e ba t’uf ni ngad rin’ed ya nge dab kud rusgad?

¹³ Piin bitir e ba ga’ ni yad ma uf ko chitamangirad, maku yad ma felfelan’ ngay ni ngar weliyed murung’agen. Ku arrogodad ni gad ma  uf ko Chitamangidad ni bay u tharmiy ni aram Jehovah, ma gad baadag ni nge nang e girdi’ murung’agen. Taareb rogon e lem rodad ngak David ni Pilung ni yoloy ni gaar: “Nggu uf ni bochan Jehovah.” (Ps. 34:2, NW) Machane, uw rogon ni faanra gad ba tamra’? Uw rogon ni nge dab kud rusgad? Rayog ni nge dab kud rusgad ni faan gad ra lemnag rogon nra felfelan’ Jehovah ni faan gad ra weliy murung’agen, nge rogon angin nra yib ko girdi’ ni faan yad ra nang murung’agen. Ra ayuwegdad Jehovah ni nge dab kud rusgad. I ayuweg pi walagdad ko bin som’on e chibog ni nge dab kur rusgad, ere ku ra ayuwegdad.​—1 Thess. 2:2.

14. Mang boch i fan nib ga’ fan ni ngad ayuweged e girdi’ ngar manged boch i gachalpen Jesus?

¹⁴ Jehovah e der ma laniyan’, ma ma felfelan’ ni ma guydad ni gad be dag e t’ufeg ko girdi’ ndemtrug e nam ni kar bad riy. (Acts 10:34, 35) Reb e kanawo’ nib fel’ nrayog ni ngad daged e t’ufeg riy ko girdi’ e aram e ngad weliyed fare thin nib fel’ ngorad. (Matt. 28:19, 20) Mang angin e re maruwel ney nrayog ni nge yib ngodad? Piin yad ra motoyil ngodad e rayog ni ngar mon’ognaged e par rorad e chiney me yag e athap ngorad ko yafos ni manemus boch nga m’on.​—1 Tim. 4:16.

15-16. Mang boch i fan ni ngad felfelan’gad?

¹⁵ Jehovah e ir reb e Matam ni ma t’ufegey, ere baadag ni nge felfelan’ girdien e tabinaw rok. (Isa. 65:14) Boor fan nrayog ni ngad felfelan’gad e ngiyal’ ney ni yugu aram rogon ni gad be mada’nag e magawon. Bod nib mich u wan’dad nri gad ba t’uf ko Chitamangidad ni bay u tharmiy. Ku bay e bin riyul’ e tamilangan’ rodad ko Thin rok Got u lan e Bible. (Jer. 15:16) Maku reb e, gad boch i girdien ba tabinaw ni yugu ba thil ni urngin e girdi’ riy nib t’uf Jehovah rorad nge pi motochiyel rok, maku yad ma t’ufeged yad.​—Ps. 106:4, 5.

¹⁶ Rayog ni ngad pared ni gad ba felfelan’ ni bochan e ba mich u wan’dad nra boch nga m’on ma ra fel’ e par rodad. Gad manang ndab ki n’uw nap’an ma ra chuweg Jehovah urngin e kireb, me fanay Gil’ilungun ni nge Paradisnag e fayleng ni ga’ngin. Ku bay e athap rodad nib manigil ni aram e ngad mada’naged bayay e piin nib t’uf rodad ni kan fasegrad ko yam’. (John 5:28, 29) Rib gel e felfelan’ ni gad ra tay e ngiyal’ nem! Ma bin th’abi ga’ fan riy e ba mich u wan’dad ndab ki n’uw nap’an ma urngin e piin yad bay u tharmiy ngu fayleng e yad ra tayfan, mar n’ufed, mar liyorgad ngak e Chitamangidad u rogon kanawoen nsusun e ngan rin’.