XOOK 7
Jach k-yaabiltmaj k-kiʼichkelem Taata Jéeoba
«Toʼoneʼ k-eʼesik yaabilaj tumen Dios yáax eʼestoʼon yaabilaj» (1 JUAN 4:19).
KʼAAY 3 Maʼ saajkeniʼ tumen Jéeoba in muukʼ
TIʼ BAʼAX KUN TʼAAN *
1, 2. ¿Baʼaxten Jéeobaeʼ u kʼáat ka ookkoʼon ichil u familia, yéetel baʼax tsʼoʼok u beetik utiaʼal u béeytal?
JÉEOBAEʼ u kʼáat ka yanakoʼon ichil u familia. Le máaxoʼob yanoʼob ichiloʼ u kʼubmaj u kuxtaloʼob tiʼ letiʼ yéetel ku tsʼáaik u fejoʼob tiʼ u kuxtal Jesús tu kʼuboʼ. Tsʼoʼoleʼ jach táaj kiʼimak u yóoloʼob tumen u yojloʼob baʼax oʼolal kuxaʼanoʼob yéetel u yojloʼob jeʼel u yantaltiʼob kuxtal minaʼan u xuul teʼ kaʼanoʼ wa tiʼ junpʼéel Paraíso way Luʼumeʼ.
2 Tumen jach nojoch u yaabilajeʼ, Jéeobaeʼ tu tsʼáaj u kuxtal u Paal utiaʼal ka páajchajak k-okol ichil u familia (Juan 3:16). Le oʼolal le Bibliaoʼ ku yaʼalikeʼ ‹koʼoj úuchik k-maʼanal› (1 Cor. 6:20). Yoʼolal le boʼol tu tsʼáaj Jéeobaoʼ jeʼel u páajtal k-bisikba tu yéeteleʼ. Tsʼoʼoleʼ jach ku kiʼimaktal k-óol tumen tiʼ le máax maas yaan u poderoʼ jeʼel u páajtal k-aʼaliktiʼ: kiʼichkelem Taata. Jeʼex t-ilaj teʼ xook máanikoʼ minaʼan uláakʼ Taatatsil eʼesik yaabilaj jeʼex Jéeobaeʼ.
3. ¿Baʼax kʼáatchiʼiloʼob jeʼel u beetik máakeʼ? (Ilawil xan le cuadro « ¿Jach wa tu jaajil ku chʼaʼiken en cuenta Jéeoba?»).
3 Maʼ xaaneʼ techeʼ jeʼel a beetik le kʼáatchiʼ tu beetaj juntúul tiʼ le máaxoʼob tsʼíibt le Bibliaoʼ, letiʼeʼ tu kʼáataj: «¿Bix jeʼel in boʼotik tiʼ Jéeoba tuláakal le baʼaxoʼob tsʼoʼok u beetik tin woʼolaloʼ?» (Sal. 116:12). U jaajileʼ maʼ tu páajtal k-boʼotik tiʼ k-Taata tuláakal le baʼax ku tsʼáaiktoʼonoʼ. Chéen baʼaleʼ le yaabilaj ku yeʼesiktoʼonoʼ ku péeksikoʼon xan k-yaabilte. Bey tu yaʼalil apóstol Juanoʼ: «Toʼoneʼ k-eʼesik yaabilaj tumen Dios yáax eʼestoʼon yaabilaj» (1 Juan 4:19). Chéen baʼaleʼ, ¿bix jeʼel k-eʼesik tiʼ k-Taata k-yaabiltmeʼ?
MAʼ A NÁACHTAL TIʼ JÉEOBA
K-eʼesik k-yaabiltmaj k-Taata Jéeoba wa k-orar mantatsʼ, k-beetik baʼax ku yaʼalik yéetel k-áantik u maasil ka u yaabiltoʼob xan (Ilawil xóotʼol 4 tak 14)
4. Jeʼex u yaʼalik Santiago 4:8, ¿baʼaxten kʼaʼabéet k-ilik k-náatsʼal tiʼ Jéeoba?
4 Jéeobaeʼ u kʼáat ka náatsʼkoʼon tu yiknal yéetel ka suukak k-tsikbal tu yéetel (xok Santiago 4:8). Ku yaʼaliktoʼon «maʼ u xuʼulul [k-orar]» tumen letiʼeʼ mantatsʼ ken u chʼenxikintoʼon (Rom. 12:12). Mix juntéen ken u yaʼaltoʼon maʼ tu páajtal u yuʼubikoʼon tumen jach kaʼanaʼan wa tumen jach yaʼab baʼax ku beetik. Kux túun toʼon, ¿bix jeʼel k-uʼuyik baʼax ku yaʼalikeʼ? Letiʼe kéen k-xok le Bibliaoʼ bey xan le publicaciónoʼob tsʼaʼan utiaʼal k-naʼatik baʼax u kʼáat u kaʼanstoʼonoʼ. Kéen xiʼikoʼon teʼ muchʼtáambaloʼoboʼ k-chʼenxikintik xan baʼax ku yaʼaliktoʼon. Wa juntúul taatatsil jach suuk u tsikbal yéetel u paalaleʼ jach maʼalob u biskubaʼob. Toʼon xaneʼ wa ku suuktal k-orar tiʼ Jéeobaeʼ yaan k-uʼuyik naatsʼ yaniloʼon tiʼ letiʼ.
Ilawil xóotʼol 5
5. ¿Bix le oraciónoʼob unaj k-beetik tiʼ Jéeobaoʼ?
5 ¿Suuk wa a tsikbal yéetel Jéeoba? ¿Bix le oraciónoʼob ka beetiktiʼoʼ? Letiʼeʼ u kʼáat ka k-aʼaltiʼ baʼax ku yúuchultoʼon yéetel jach bix k-uʼuyikba (Sal. 62:8). Le oʼolal maʼalob ka k-tukle, ¿chéen wa juntakáaliliʼ baʼax kin waʼalik tiʼ Jéeoba kéen orarnaken, wa kin waʼaliktiʼ jach bix in wuʼuyikinba jeʼex le kéen tsikbalnaken yéetel juntúul in amigoeʼ? Toʼoneʼ jach k-yaabiltmaj Jéeoba yéetel maʼ k-kʼáat náachtal tiʼiʼ. Le oʼolal mantatsʼ unaj k-orar tiʼ letiʼ. Maʼ a sajaktal a waʼal tiʼ Jéeoba baʼaxoʼob beetik u kiʼimaktal a wóol yéetel baʼaxoʼob chiʼichnakkúuntikech. K-ojleʼ wa k-tsikbaltiktiʼ bix k-uʼuyikbaeʼ yaan u yáantkoʼon.
6. ¿Baʼax unaj k-beetik utiaʼal maʼ k-náachtal tiʼ Jéeoba?
6 Uláakʼ baʼax jeʼel u páajtal k-beetik utiaʼal maʼ k-náachtal tiʼ Jéeobaeʼ letiʼe u suuktal k-tsʼáaik u graciasil tiʼ yoʼolal le baʼaxoʼob ku beetik t-oʼolaloʼ. Le oʼolal k-tuukul jeʼex le salmistaaʼ, letiʼeʼ tu yaʼalaj: «Yuum Jéeoba in Dios, yaʼab nukuch baʼaloʼob a beetmaj t-oʼolal, tsʼoʼok a béeykuntik tuláakal baʼax a tukultmaj. Mix máak jeʼel u páajtal u compararkuba ta wéeteleʼ, wa ka káajak in tʼaan tiʼ baʼaxoʼob a beetmeʼ maʼ kin tsʼoʼokol, tumen jach táaj yaʼab» (Sal. 40:5). Baʼaleʼ maʼ chéen k-ojel kʼaʼabéet k-tsʼáaik u graciasil tiʼiʼ, baʼaxeʼ k-ilik k-eʼesik yoʼolal baʼaxoʼob k-aʼalik bey xan yoʼolal baʼaxoʼob k-beetik. Kéen k-beet beyoʼ k-eʼesik maʼ beyoʼon jeʼex u maasil máakoʼoboʼ. Letiʼobeʼ maʼatech u tsʼáaikoʼob u graciasil tiʼ Dios. Lelaʼ ku yeʼesik kuxaʼanoʼon «tu tsʼook kʼiinoʼob», tumen le máakoʼoboʼ maʼ suuk u tsʼáaikoʼob u diosboʼotikil tu yoʼolal mix baʼaliʼ (2 Tim. 3:1, 2). Unaj k-kanáantik maʼ u páakʼaltoʼon le bix u tuukuloʼoboʼ.
7. ¿Bix u kʼáat Jéeoba ka k-bisba yéetel u maasil, yéetel baʼaxten?
7 Le taatatsiloʼoboʼ maʼ u kʼáat ka baʼatelnak u paalaloʼobiʼ, baʼaxeʼ ka u bisubaʼob maʼalob. Jéeoba xaneʼ bey u kʼáat ka u bisuba u paalaloʼoboʼ. Wa ku yaabiltikubaʼobeʼ yaan u yilaʼal jach tu jaajil ku meyajtikoʼob Dios (Juan 13:35). Juntúul máax meyajt Jéeoba úuchjeakileʼ, tu yaʼalaj: «¡Jach táaj maʼalob yéetel jatsʼuts u yilaʼal u muchʼkuba yéetel u biskuba le máaxoʼob yanoʼob ichil u kaajal Diosoʼ!» (Sal. 133:1). ¿Máasaʼ k-uʼuyikba jeʼex le salmistaoʼ? Toʼon xaneʼ wa k-yaabiltik k-sukuʼunoʼobeʼ k-eʼesik tiʼ Jéeoba k-yaabiltmaj xan (1 Juan 4:20). Jach jatsʼuts k-antal ichil junpʼéel familia ku yeʼesik u yutsil yéetel ku chʼaʼik óotsilil tiʼ u maasil (Efe. 4:32).
WA K-YAABILTMAJ DIOSEʼ YAAN K-BEETIK BAʼAX KU YAʼALIK
Ilawil xóotʼol 8
8. Yoʼolal le baʼax ku yaʼalik u Yáax Tsʼíib Juan 5:3, ¿baʼax péeksikoʼon k-beet baʼax ku yaʼalik Jéeoba?
8 Le paalaloʼoboʼ unaj u yuʼubikoʼob u tʼaan u taataʼob, k-Taata Jéeobaeʼ u kʼáat xan ka k-beet baʼax ku yaʼalik (Efe. 6:1). Unaj k-beetik baʼax ku yaʼalik tumen letiʼ beetoʼon, ku tsʼáaik baʼaxoʼob kʼaʼabéet utiaʼal k-kuxtal yéetel minaʼan uláakʼ Taata jach yaan u naʼat jeʼex letiʼeʼ. Baʼaleʼ tumen k-yaabiltmeʼ k-beetik baʼax ku yaʼalik (xok 1 Juan 5:3). U jaajileʼ yaʼab baʼax oʼolal unaj k-uʼuyik u tʼaan, baʼaleʼ maʼatech u obligarkoʼon ka k-beete. Baʼaxeʼ u tsʼaamajtoʼon u páajtalil k-yéeyik baʼax ken k-beete. Kéen k-beet baʼax ku yaʼaliktoʼon tumen k-yaabiltmeʼ, letiʼeʼ jach ku kiʼimaktal u yóol.
9, 10. 1) ¿Baʼaxten unaj k-ojéeltik máakalmáak u tsolnuʼukoʼob Jéeoba? 2) ¿Baʼaxten maas maʼalob ka k-beet baʼax ku yaʼaliktoʼon Jéeoba?
9 Le taatatsiloʼoboʼ u kʼáatoʼob ka xiʼik utsil tiʼ u paalaloʼob. Le oʼolal ku tsʼáaikoʼob maʼalob tsolnuʼuk tiʼob. Le mejen paalal beetik baʼax ku yaʼalaʼaltiʼoboʼ ku yeʼeskoʼob ku respetarkoʼob u taataʼob yéetel ku confiaroʼob tiʼ letiʼob. Le oʼolal toʼoneʼ, ¿maʼ wa maas unaj k-beetik baʼax ku yaʼaliktoʼon Jéeoba yéetel k-chaʼik u nuʼuktikoʼoniʼ? Utiaʼal k-beetik baʼax ku yaʼalikeʼ unaj k-ojéeltik máakalmáak u tsolnuʼukoʼob yéetel k-tsʼáaik ichil k-kuxtal. Kéen k-beet beyoʼ k-eʼesik k-yaabiltmaj yéetel k-jach respetartik. Tsʼoʼoleʼ wa k-beetkeʼ jach yaan u bintoʼon utsil (Isa. 48:17, 18). Baʼaleʼ le máaxoʼob maʼatech u chaʼik u nuʼuktaʼaloʼob tumen Diosoʼ jach kʼaas u bintiʼob (Gál. 6:7, 8).
10 K-beetik baʼax ku yaʼalik Jéeobaeʼ ku kanáantkoʼon tiʼ baʼaloʼob jeʼel u beetiktoʼon loobeʼ, tiʼ baʼaloʼob jeʼel u beetik u yaatal k-óoleʼ yéetel tiʼ baʼaloʼob jeʼel u náachkuntkoʼon tiʼ letiʼeʼ. Chéen Jéeoba u yojel baʼax kʼaʼabéettoʼon utiaʼal u bintoʼon maʼalobil. Bey u yeʼesik le baʼax tu yaʼalaj Aurora, juntúul kiik kajaʼan Estados Unidos. Letiʼeʼ tu yaʼalaj: «In wojleʼ wa kin beetik mantatsʼ baʼax ku yaʼalikten Jéeobaeʼ yaan u binten utsil». Le baʼax tu yaʼalaj le kiikaʼ jach jaaj. Le beetkeʼ maʼalob ka k-tukle: «¿Baʼax utsiloʼob tsʼoʼok in kʼamik ikil in beetik baʼax ku yaʼalikten Jéeoba?».
11. ¿Bix u yáantkoʼon le oraciónoʼ?
11 Le oraciónoʼ ku yáantkoʼon k-beet baʼax ku yaʼalik Jéeoba tak teʼ súutukiloʼob maʼ chéen chʼaʼabiloʼ. Tumen kʼebanoʼoneʼ yaan kʼiineʼ maʼ chéen chʼaʼabil k-beetik baʼax ku yaʼaliktoʼon Jéeobaiʼ. Pero maʼ unaj u xuʼulul k-tsʼáaik k-óol k-beet baʼax ku yaʼaliktoʼoniʼ. Juntúul salmistaeʼ tu kʼáat óoltaj tiʼ Dios ka áantaʼak, tu yaʼalaj: «Beet in tsʼíiboltik in wuʼuyik a tʼaan» (Sal. 51:12). Denise, juntúul precursora regulareʼ ku yaʼalik: «Wa kin wuʼuyik istikyaj in beetik baʼax ku yaʼalikten Jéeobaeʼ kin kʼáatiktiʼ ka u yáanten in beet baʼax maʼalob». Wa k-kʼáatik tiʼ Jéeoba ka u yáantoʼoneʼ letiʼeʼ yaan u beetik (Luc. 11:9-13).
UNAJ K-ÁANTIK U MAASIL U YAABILTOʼOB K-TAATA JÉEOBA
12. ¿Baʼax ku yaʼalik Efesios 5:1 ka k-beete?
12 (Xok Efesios 5:1). Tumen ‹u paalaloʼon Dioseʼ› k-kʼáat eʼes le jatsʼuts modos yaantiʼoʼ. Wa k-yaabiltik u maasil, k-eʼesik utsil yéetel k-perdonartik le baʼaxoʼob ku beetaʼaltoʼonoʼ k-eʼesik yaantoʼon u jatsʼuts modos Dios. Le máaxoʼob maʼatech u meyajtikoʼob Jéeobaoʼ kéen u yiloʼob le jatsʼuts modos k-eʼesikoʼ jeʼel u taaktal u kaanbaloʼob tiʼ letiʼeʼ (1 Ped. 2:12). Le taatatsiloʼob meyajtik Jéeobaoʼ unaj u tratartik u paalaloʼob jeʼex u tratarkoʼon Jéeobaoʼ. Wa ku beetkoʼobeʼ u paalaloʼobeʼ yaan u taaktal u natsʼkubaʼob tiʼ Jéeoba, le Taatatsil jach u yaabiltmoʼonoʼ.
Ilawil xóotʼol 13
13. ¿Baʼax unaj k-beetik wa k-suʼlaktal tʼaan yoʼolal Jéeoba?
13 U suukileʼ le mejen paalaloʼoboʼ ku tuklikoʼobeʼ minaʼan uláakʼ máak jeʼex u taataʼobeʼ. Toʼoneʼ bey k-ilik xan k-kiʼichkelem Taata Jéeobaoʼ, le oʼolal k-kʼáat ka kʼaj óoltaʼak tumen uláakʼ máakoʼob. K-uʼuyikba jeʼex le rey Davidoʼ. Letiʼeʼ tu yaʼalaj: «Teneʼ yaan in alabartik Jéeoba» (Sal. 34:2). Chéen baʼaleʼ maʼ xaaneʼ jujuntúul tiʼ toʼoneʼ suʼlakoʼon, le oʼolal ku talamtal k-tsikbaltik tiʼ uláakʼ máakoʼob u jatsʼuts modos. Wa bey u yúuchultoʼonoʼ, ¿baʼax jeʼel u yáantkoʼoneʼ? Letiʼe k-tuklik bukaʼaj kun kiʼimaktal u yóol Jéeoba wa k-beetik baʼax ku yaʼaliktoʼoneʼ yéetel bukaʼaj utsil jeʼel u kʼamik le máakoʼob wa ka kʼuchuk u kʼaj óoltoʼobeʼ. Letiʼeʼ jach jeʼel u yáantkoʼon utiaʼal maʼ k-sajaktal tʼaan tu yoʼolaleʼ. Jeʼex tu yáantil le sukuʼunoʼob teʼ yáax siglooʼ bey xan ken u yáantiloʼonoʼ (1 Tes. 2:2).
14. ¿Baʼaxten jach kʼaʼanaʼan k-ilik k-kaʼansik le máakoʼoboʼ?
14 Jéeobaeʼ ku kʼamik tuláakal máak yéetel ku kiʼimaktal u yóol kéen u yil k-eʼesik yaabilaj tiʼ u maasil kex jeʼel tuʼuxak u taaloʼobeʼ (Hech. 10:34, 35). Uláakʼ bix k-eʼesik k-yaabiltmaj le máakoʼoboʼ letiʼe k-tsikbaltiktiʼob le baʼaloʼob maʼalobtak ken u beet Diosoʼ (Mat. 28:19, 20). ¿Baʼax utsil ku taasik? Yaan u bin maʼalobil tiʼob yéetel jeʼel u yantal kuxtal minaʼan u xuul tiʼob teʼ Paraísooʼ, chéen baʼaleʼ unaj u chʼenxikintikoʼob baʼax k-tsikbaltik tiʼob (1 Tim. 4:16).
WA K-YAABILTIK K-TAATA JÉEOBAEʼ JACH YAAN U KIʼIMAKTAL K-ÓOL
15, 16. ¿Baʼax eʼesik jeʼel u páajtal u kiʼimaktal k-óoleʼ?
15 Jéeobaeʼ juntúul Taatatsil jach ku yeʼesik yaabilaj yéetel u kʼáat ka kiʼimakchaj u yóol le máaxoʼob yanoʼob ichil u familiaoʼ (Isa. 65:14). Kex yaj baʼax ku yúuchultoʼon yaan horaeʼ jeʼel u páajtal u kiʼimaktal k-óol teʼ kʼiinoʼobaʼ, tumen tsʼoʼok k-ilik jach tu jaajil u sen yaabiltmoʼon Jéeoba. Tsʼoʼok xan k-ojéeltik baʼax ku kaʼansiktoʼon u Tʼaan, le Bibliaoʼ (Jer. 15:16). Tiaʼanoʼon xan ichil junpʼéel familia jach u yaabiltmaj Jéeoba, u kʼáat u beet baʼax ku yaʼalik yéetel ku yeʼesik yaabilaj (Sal. 106:4, 5).
16 Bejlaʼeʼ kiʼimak k-óol xan tumen k-ojel yaan u kʼuchul u kʼiinil u xuʼulul k-muʼyaj. Tsʼoʼok k-kanik xaneʼ jach taʼaytak u xuʼulsaʼal le kʼasaʼan máakoʼoboʼ yéetel u Reino Dioseʼ yaan u sutik Paraísoil le Luʼumaʼ. Tsʼoʼoleʼ yaan u béeytal k-ilik bix kun kuxkíintbil le máaxoʼob kimenoʼob utiaʼal u kaʼa antaloʼob yéetel u láakʼtsiloʼoboʼ (Juan 5:28, 29). ¿Máasaʼ jach jatsʼuts le baʼax kun úuchlaʼ? Tsʼoʼoleʼ tsʼoʼok k-kanik xaneʼ ichil junpʼíit kʼiineʼ le máaxoʼob yanoʼob teʼ kaʼan yéetel le máaxoʼob kun pʼáatloʼob teʼ Luʼumaʼ yaan u múul alabarkoʼob k-Taata Jéeoba yéetel yaan u yeʼeskoʼob chéen letiʼ unaj u adorartaʼal.
KʼAAY 12 K-nojbeʼenkúunsikech, Jéeoba
^ xóot’ol 5 Jéeobaeʼ tsʼoʼok u yeʼesiktoʼon jach u yaabiltmoʼon, le oʼolal tsʼoʼok u natsʼkoʼon ichil u kaajal wa ichil u familia. Yoʼolal baʼax tsʼoʼok u beetik t-oʼolaleʼ k-yaabiltik xan. Chéen baʼaleʼ, ¿bix jeʼel k-eʼesiktiʼ jach k-yaabiltmeʼ? Teʼ xookaʼ yaan k-ilik jujunpʼéel baʼaxoʼob jeʼel u páajtal k-beetik utiaʼal k-eʼesiktiʼeʼ.
