1. ¿Envidiasiñajj kuna jan walinaksa Josean familiapan utjayäna?

 JACOB chachajj taqpach wawanakaparuw munasïna, ukampis 17 marani José sat yoqaparuw jukʼamp munasïna. ¿Uk yatisajj mayni yoqanakapajj kamachapjjänsa? Walpun Joseat envidiasipjjäna, ukatwa wal uñisjjapjjarakïna. Joseajj janis kuna jan walsa lurkchïnjja, esclavotwa aljapjjäna. Ukatsti montenkir mä animalaw wali munat wawamar jiwayatayna sasaw tatapar sapjjäna. Envidiasiñ utjatap laykuw sumankañajj uka familian jan utj-jjänti, tataparus walpun llakisiyapjjäna (Gén. 37:3, 4, 27-34).

2. Gálatas 5:19-21 textorjamajja, ¿kunatsa envidiasiñajj sinti jan walïki?

² Bibliarjamajja envidiasiñajj * ‘jañchin lurañanakapat’ maynïriwa. Envidiasirinakajj janiw Diosan Reinop katoqapkaniti (Gálatas 5:19-21 liytʼañataki). Cheqas envidiasiñatwa uñisisiñanakasa, chʼajjwañanakasa, colerampi atipayasiñanakasa jilapartejj utji.

3. ¿Kunanaksa aka yatichäwin yatjjataskañäni?

³ Kuntï Josean jilanakapajj lurapkäna ukajja, kunjamsa envidiasiñajj mayninakampi jan waltʼayasiñar apaspa, familiarus jan waltʼayaspa ukwa uñachtʼayistu. Jiwasajj janis Josean jilanakapjam lurkchiñänejja, wal amuyasiñasawa, taqeniw pantjasiri engañjiri chuymanïtanjja (Jer. 17:9, TNM). Ukatwa awisajj envidiassna. Diosan yaqhep nayra servirinakapat yatjjatañäni, ukaw kunatsa envidiasiñat amuyasiñasa, kunatsa envidiasiñajj chuymasan jiltaspa uk amuytʼañatak yanaptʼistani. Ukatsti kunjamsa envidiasiñ apanukuñatak chʼamachassna, kunjamsa sumankañ thaqsna ukanakwa yatjjataskarakiñäni.

4. ¿Kunatsa filisteonakajj Isaac chachat envidiasipjjäna?

⁴ Yaqhepajj wali utjirinïpjjewa. Isaac chachajj wali utjirinïnwa, ukatwa filisteonakajj jupat envidiasipjjäna (Gén. 26:12-14). Envidiasiñatjja Isaacan uywanakapatak utjkäna uka uma pozopsa laqʼampiw phoqantapjjäna (Gén. 26:15, 16, 27). Jichhürunakanjja yaqhepajj uka filisteonakjamäpjjewa, jukʼamp utjirinïpki ukanakat wal envidiasipjje. Janiw kunatï mayninakan utjki ukak wal munapkiti, jan ukasti mayninakajj jan kunanïpjjaspa ukwa munapjjaraki.

5. ¿Kunatsa religión pʼeqtʼirinakajj Jesusat envidiasipjjäna?

⁵ Yaqhepajj jukʼamp munatäpjjewa. Jesusajj jaqenakampi wali munatänwa, ukatwa judionakan religionap pʼeqtʼirinakajj jupat envidiasipjjäna (Mat. 7:28, 29). Jesusajj Diosan sutipjjaruw jutäna, kunatï cheqäki ukwa yaticharakïna. Ukhampachasa religión pʼeqtʼirinakajj jan wali jaqet uñjayañatakiw Jesusat jan walinak parlapjjäna (Mar. 15:10; Juan 11:47, 48; 12:12, 13, 19). ¿Kunsa ukajj yatichistu? Congregacionan khitinakatï suma chuymanïpjjatap laykojj wali munatäpki ukanakat jan envidiasiñatakiw chʼamachasiñasa. Envidiasiñat sipansa jupanakatwa suma jaqëñ yateqasiñasa (1 Cor. 11:1; 3 Juan 11).

6. ¿Kunjamsa Diótrefes chachajj envidiasirïtap uñachtʼayäna?

⁶ Yaqhepajj privilegionakwa congregacionan katoqapjje. Nayrïr patak maranakanjja, Diótrefes chachajj congregación pʼeqtʼirinakatwa envidiasïna. Diotrefesajj jupaw congregacionan “nayrankañ” munäna, ukatwa jan walit uñjayañatakejj apóstol Juanatsa mayni pʼeqtʼir jilatanakatsa jan walinak parläna (3 Juan 9, 10). Jiwasajj janis Diótrefes chachjam jan walinak lurkchiñänejja, munkayätan uka privilegio yaqha jilatan katoqatap uñjasajj jupat envidiassnawa, yamas jiwasas jukʼamp sum lurañ yatksna ukham amuyasisajj jukʼampwa envidiassna.

7. ¿Kunjam jaqerus envidiasiñajj tukuyistaspa?

⁷ Envidiasiñajj jan wali qorampi sasiwa. Kunapachatï envidiasiñajj chuymar saphintjje ukhajja, chuymat apsuñajj chʼamäjjewa. Jachʼa jachʼa tukuñasa, maynitakik taqe kun munañasa, jukʼamp envidiasiñaruw apistaspa. Envidiasiñ utjaspa ukhajja, janiw munasiñasa, sinttʼasiñasa, khuyaptʼayasiñas chuymasan utj-jjaspati. Ukatwa envidiasiñajj chuymasan jiltañ munki ukhajj jankʼak apanukuñasa. ¿Kunjamsa envidiasiñar atipjsna?

8. ¿Kunas envidiasiñar atipjañ yanaptʼistaspa?

⁸ Humilde chuymanïñäni ukhamarak kunatï utjkistu ukanakampejj kusisitakïñäni ukhajja, envidiasiñarojj atipjañäniwa. Ukham suma chuymanïñäni ukhajja, envidiasiñajj janiw chuymasan jiltkaniti. Jiwasatï humilde chuymanïstanjja janiw jukʼampi suma jaqëksnas ukham pienskañäniti, ni jiwasas privilegionak mayninakat sipan katoqañasäkaspa ukhamsa amuykañäniti (Gál. 6:3, 4). Kunanaktï katoqapki ukamp kusisitakïpjje ukanakajja, janiw yaqhanakampi comparasipkiti (1 Tim. 6:7, 8). Humilde chuymanïki, ukhamarak kunatï jupan utjki ukamp kusisitäki ukajja, yaqhanakajj kuns katoqapjje ukhajj envidiasiñat sipansa kusisiwa.

9. Gálatas 5:16; Filipenses 2:3, 4 textonakarjamajja, ¿kunatakis espíritu santojj yanaptʼistu?

⁹ Jehová Diosan espíritu santopaw jan envidiasirïñatakisa, humilde chuymanïñatakisa, kunatï utjkistu ukanakamp kusisitakïñatakis yanaptʼistu (Gálatas 5:16; Filipenses 2:3, 4 liytʼañataki). Jehová Diosan espíritu santoparakiw kunjam jaqëtansa kunjam chuymanïtansa uk amuyasiñasatak yanaptʼistu. Cheqas  Diosan yanaptʼapampiw jan wali amuyunak chuymasat apsusajj kunatï sumäki uka amuyunak pʼeqesar apantsna (Sal. 26:2; 51:10). Kunsa Moisesampit apóstol Pablompit yateqassna uk jichhajj uñjañäni, jupanakajj envidiasiñar atipjapjjänwa.

10. ¿Kunapachas Moisesajj yantʼat uñjasïna? (Nayrïr paginankir dibujo uñjjattʼäta).

¹⁰ Moisesajja Diosan markapan jilïr pʼeqtʼirïnwa, ukhamäkchïnsa janiw jupakis ukham jilïrïñapäkaspa ukham amuyaskänti. Mä kutinjja Jehová Diosajj Moisesat espíritu santo mä jukʼwa apaqäna, apaqasajj Tatitumpi Jikisiñ Carpa jakʼankapkäna uka jilïrinakaruw churäna. Mä jukʼa tiempotjja, jan ukar sarir pä jilïrinakan espíritu santo katoqapjjatapwa Moisesajj yatïna, uka pä jilïrinakajj profetanakjamaw parlapjjäna. Josué chachajj jupanakar jarktʼañap maykäna ukhajja, ¿Moisesajj kuns luräna? Moisesajja uka paninejj Jehová Diosat espíritu santo katoqapjjatapat janiw envidiaskänti, antisas profecianak parlapjjatapat wal kusisïna (Núm. 11:24-29). ¿Kunsa Moisesat yateqassna?

11. ¿Kunjamsa jilïr irpirinakajj Moisesat yateqasipjjaspa?

¹¹ Mä jilïr irpirit parltʼañäni, jupajj Yatiyañataki Revistat Yatjjatañataki tantachäwi sarayiriwa, ukajj wal jupar gusti. Juparojja uka tantachäwi sarayañapatak yaqha jilatar wakichtʼañapwa mayipjje, ukhamat jutïrinjja uka jilatan sarayjjañapataki. Jilïr irpir jilatatï Moisesjam humilde chuymanïchejja, “privilegiojwa aparapjjetani” sasin janiw llakiskaniti, jan ukasti kusisitaw uka jilatar wakichtʼani.

12. ¿Kunjamsa walja jilat kullakanakajj humilde chuymanïpjjatapsa, kuna asignacionantï Diosar servisipki ukanakamp kusisitäpjjatapsa uñachtʼayapjje?

¹² Edadani jilatanakat parltʼarakiñäni. Jupanakat waljanejj walja maranakaw coordinador del cuerpo de ancianos ukham serviwayapjje. Ukampis 80 maranëjjasajj uka asignacionap jaytjjapjjewa. Congregacionanak tumptʼir jilatanakajj ukhamarakiw 70 maranëjjasajj jaytjjapjje, ukatsti yaqha asignación katoqjjapjjaraki, ukhamatwa humilde chuymanïpjjatap uñachtʼayapjje. Aka qhepa maranakanjja, ukhamarakiw walja jilat kullakanakajj Betelat mistjjasin yaqha asignacionan servisipki. Diosar taqe chuyma serviri uka jilat kullakanakajja, nayra asignacionapana yaqha jilat kullakanakan yanaptʼapjjatapat janiw envidiasipkiti.

13. ¿Kunatsa Pablojj 12 apostolonakat envidiasispäna?

¹³ Apóstol Pablotwa yateqasiraksna, kunatï jupan utjkän ukampejj kusisitakïnwa humilde chuymanirakïnwa. Envidiasiñajj chuymapan jan utjañapatakiw Pablojj wal chʼamachasïna. Diosan arunakap yatiyañatakis ukhamarakiw chʼamachasïna, humilde chuymampiw akham säna: “Nayajj apostolonak taypitjja jukʼamp jiskʼätwa, janirakiw apóstol satäñatakis walïkti” sasa (1 Cor. 15:9, 10). Jesusajj aka oraqen Diosan arunakap yatiykäna ukhajja, 12 apostolonakajj jupamp chikaw sarnaqapjjäna, ukampis Pablojj janiw ukham lurkänti. Pablojja Jesusajj jiwatat jaktasin alajjpachar sarjjäna uka qhepatwa cristianor tukuskäna. Tiempompejj ‘yaqha markanakar khitat apóstol’ satäkchïnsa, Pablojj janiw 12 apostolonakat maynïrïkänti (Rom. 11:13; Hech. 1:21-26). Ukampis Pablojj kuna privilegionïkänti ukampejj kusisitakïnwa, janiw 12 apostolonakat envidiaskänti, ni jupanakan Jesusampi sarnaqerïpjjatap yatisas envidiaskänti.

14. Jiwasatï humilde chuymanïstan, kuntï Diosan markapan katoqktan ukampis kusisitarakïstan ukhajja, ¿kunsa lurañäni?

¹⁴ Jiwasatï humilde chuymanïstan, kuntï Diosan markapan katoqktan ukampis kusisitarakïstan ukhajja, apóstol Pabljamaw jilïr irpirinakarojj respetompi uñjañäni (Hech. 21:20-26). Jehová Diosaw jilïr irpirinakarojj congregacionan pʼeqtʼapjjañapatak uttʼayi.  Pantjasirïpkchisa, Diosajj “mä bendicionar uñtatwa” jupanakar uñji (Efes. 4:8, 11). Jilïr irpirinakar respetompi uñjtan, humilde chuymamp istʼaraktan ukhajja, Jehová Diosan amigopätanwa, jilat kullakanakampis sum apastanjja.

15. ¿Kun lurañasas wakisi?

¹⁵ Jiwasatï maynit maynikam envidiassna ukhajja, janiw sum apasjjsnati. Ukatwa 1) envidiasiñjja chuymasat apsuñasa, 2) mayninakarus janipuniw envidiasirïpjjañapatak nuktʼañasäkiti. Ukham lurañäni ukhajja, Jehová Diosan mayitapar istʼaskataswa uñachtʼayañäni. Biblian akham siwa: “Kunanakatï mayninakamp sumankañataki ukhamarak maynit maynikam chʼamañchtʼasiñatak yanaptʼkistu ukanak lurañatakejj chʼamachasiskakiñäni” sasa (Rom. 14:19). ¿Kunjamsa yaqhanakarojj jan envidiasirïpjjañapatak yanaptʼsna, sumankañ utjañapatakis yanaptʼaraksna?

16. ¿Kunjamsa mayninakarojj jan envidiasirïpjjañapatak yanaptʼsna?

¹⁶ Kunjam chuymanïktantï ukasa, kunanaktï lurktan ukasa, walina jan ukajj jan walinwa mayninakar uñjasiyaspa. Akapachajj ‘kunanakatï utjkistu ukanakat jachʼañchasiñaswa’ muni (1 Juan 2:16). Ukampis ukham jachʼañchasiñajj envidiasiñwa utjayaspa. ¿Kunas jan ukham pasañapatak yanaptʼistaspa? Mä toqetjja, janiw kunanakatï utjkistu ukanakatsa ni kuntï alasiñ munktan ukanakatsa sapa kuti parlañasäkiti. Maysa toqetsti, humilde chuymanïñasawa, janiw kuna lurañanaktï congregacionan katoqktan ukanakat jachʼañchasiñasäkiti.  Ukanakat sapa kuti parlasajj envidiasiñaruw yaqhanakar nuktʼsna. Ukampis kunapachatï yaqhanakat llakistan, suma luratanakapatsa yuspärtan ukhajja, jupanakpachpa kusisitäpjjañapataki, congregacionan sumankañ utjañapataki, ukhamarak mayachtʼatäñapatakiw yanaptʼtanjja.

17. Josean jilanakapajj ¿familiapan kun utjañapatakis yanaptʼapjjäna, kunjamsa uk lurapjjäna?

¹⁷ Envidiasiñarojj atipjsnawa. Josean jilanakapat parltʼaskakiñäni. Esclavot aljapkäna ukhat walja maranak qhepatjja, Egiptonwa Joseampejj jikisipjjäna. Joseajj janiw jilanakaparojj jupätap jankʼak yatiykänti, jan ukasti nayraqatajj kunjam chuymanëjjapjjänsa uk yatiñatakiw jilanakapar yantʼäna. Ukatakejj manqʼwa jupanakatak wakichayäna. Benjamín sat sullkaparojj mayninakat sipansa jukʼampi jilwa manqʼa churayäna (Gén. 43:33, 34). Uk uñjasinjja mayni jilanakapajj janiw Benjaminat envidiasipkänti. Antisas Benjaminatsa Jacob tatapatsa cheqpachapun llakisipjjatapwa uñachtʼayapjjäna (Gén. 44:30-34). Josean jilanakapajj janiw nayrjam envidiasirëjjapjjänti, ukhamatwa sumankañajj familiapan wasitat utjañapatak yanaptʼapjjäna (Gén. 45:4, 15). Jiwasatï chuymasat envidiasiñ qʼal apsuñäni ukhajja, ukhamarakiw familiasansa congregacionansa sumankañ utjañapatakejj yanaptʼañäni.

18. Santiago 3:17, 18 textorjamajja, ¿kunas sumankañ utjañapatak chʼamachasiñäni ukhajj pasani?

¹⁸ Jehová Diosajj envidiasiñ apanukuñatak chʼamachassna, sumankañ utjañapatakis chʼamachasiraksna ukwa muni. Kunjamtï aka yatichäwin uñjawayktanjja, envidiasiñar apir chuymanïtanwa, ukatwa wal chʼamachasiñasajj wakisi (Sant. 4:5). Envidiasiñar chʼamañchir jaqenak taypinwa jakaraktanjja. Ukampis jiwasatï humilde chuymanïñataki, yuspärasirïñataki, kunatï utjkistu ukanakampi kusisitakïñataki chʼamachasiñäni ukhajja, janiw envidiasiñajj chuymasan utjkaniti. Jan ukasti sumankañ utjañapatakiw yanaptʼañäni, ukhamatwa cheqaparjam sarnaqañajj utjani (Santiago 3:17, 18 liytʼañataki).