1. Ala mangiburu akka abang ni si Josep, aha ma na masa di keluarga ni nasida?

HOLONG do roha ni si Jakkob tu sude ianakkonna. Alai humolong do rohana tu si Josep na marumur 17 taon dope tikki i. Ala mamboto i, songon dia do pakkilalaan ni akka abang ni si Josep? Gabe mangiburu ma nasida jala muruk tu si Josep. Sasittongna, dang adong na sala na diulahon si Josep. Alai gabe sogo do roha ni akka abangna tu ibana. Digadis nasida ma si Josep gabe hatoban jala didok ma tu bapakna naung mate si Josep dibunu binatang liar. Ala mangiburu, gabe dang adong be hadameon di keluarga i. Dibahen nasida do mandele roha ni bapakna.​—1 Mus. 37:3, 4, 27-34.

2. Hombar tu Galatia 5:19-21, aha do bahaya ni mangiburu?

² Di Bibel, didok do molo mangiburu * i termasuk sian akka “parniulaon ni daging”. Boi do i mambahen sasahalak dang parsidohot tu Harajaon ni Debata. (Jaha Galatia 5:19-21.) Mangiburu, jotjot do i mambahen akka halak gabe marmusu, marbada, jala mura muruk.

3. Aha do na lao taulas di parsiajaran on?

³ Contoh sian akka abang ni si Josep patuduhon songon dia roha mangiburu boi manegai parale-aleon dohot hadameon na adong di keluarga. Nang pe dang taulahon songon na diulahon nasida, alai sude hita dang sempurna jala akkal do roha i. (Jer. 17:9) I do alana, olo do sipata hita gabe mangiburu tu halak na asing. Taulas ma akka  sipasingot na adong di Bibel, asa taboto aha do na mambahen hita gabe mangiburu. Taulas ma muse piga-piga cara asa pasidikkon roha mangiburu jala gabe siboan dame.

4. Boasa halak Palistim mangiburu tu si Isak?

⁴ Hamoraon ni halak. Halak na mamora do si Isak. I do alana gabe mangiburu do halak Palistim tu ibana. (1 Mus. 26:12-14) Alani i, gabe ditutup nasida ma sude sumur ni si Isak. Hape sian i do ibana mangalehon minum akka biru-biru dohot lombuna. (1 Mus. 26:15, 16, 27) Songon halak Palistim, piga-piga halak saonari gabe mangiburu tu hamoraon ni halak na asing. Nasida dang holan makkalomohon hamoraon ni halak na asing, alai didok rohana sai mago ma nian hamoraonna i.

5. Boasa mangiburu akka pemimpin agama tu Jesus?

⁵ Tikki adong na dipasangap. Mangiburu do akka pemimpin agama Jahudi tu Jesus ala dipasangap godang halak do ibana. (Mat. 7:28, 29) Na sinuru ni Debata do Jesus, jala diajarhon ibana do hasittongan. Alai, dipaboa akka pemimpin agama i ma gabus lao mambahen roa goar ni Jesus. (Mrk. 15:10; Joh. 11:47, 48; 12:12, 13, 19) Aha ma na boi taparsiajari? Ikkon marsitutu do hita asa unang mangiburu tu akka dongan na dihaholongi di huria ala parange ni nasida na denggan. Gariada, ikkon tatiru do parange ni nasida i.​—1 Kor. 11:1; 3 Joh. 11.

6. Ala mangiburu, aha do na diulahon si Diotrepes?

⁶ Tikki sasahalak mandapot tanggung jawab di huria. Di abad na parjolo, sahalak na margoar si Diotrepes mangiburu tu akka na manguluhon di huria. Lomo rohana “patimbohon dirina” di huria. Alani i, diparoa-roa ibana ma apostel Johannes dohot akka dongan na martanggung jawab di huria. (3 Joh. 9, 10) Nang pe dang songon si Diotrepes, alai boi do hita gabe mangiburu tu dongatta na mandapot tugas na tahalomohon di huria, tarlumobi molo tahilala dumenggan do hita na mangulahon tugas i.

7. Aha do pengaruh ni roha mangiburu tu diritta?

⁷ Mangiburu, dos do songon suan-suanan na marasun. Molo nungnga marurat roha mangiburu i di rohatta, maol do i dicabut. Pikkiran na roa songon late ni roha, ginjang ni roha, dohot makkarikotton diri sandiri boi mambahen hita gabe lam mangiburu. Jala roha mangiburu boi mangambati hita patuduhon akka parange na denggan, songon holong, asi ni roha, dohot haburjuon. Molo tahilala adong tubu roha mangiburu di diritta, pittor hatop ma i tacabut. Songon dia carana pasidikkon roha mangiburu?

8. Parange aha do na mangurupi hita pasidikkon roha mangiburu?

⁸ Boi do tapasiding roha mangiburu marhite patuduhon serep ni roha jala marlas ni roha di akka na adong. Molo sai tapatudu akka parange i, gabe dang olo be hita mangiburu. Serep ni roha mangurupi hita asa dang patimbohon diri. Halak na marserep ni roha dang marpikkir unjago do dirina sian na asing. (Gal. 6:3, 4) Sasahalak na marlas ni roha di akka na adong di ibana dang olo mambandikkon dirina tu na asing. (1 Tim. 6:7, 8) Tikki diida ibana halak na asing mandapot akka na denggan, dohot do ibana marlas ni roha.

9. Hombar tu Galatia 5:16 dohot Pilippi 2:3, 4, songon dia do tondi parbadia boi mangurupi hita?

 ⁹ Porlu do hita diurupi tondi parbadia ni Debata lao pasidikkon roha mangiburu jala patuduhon serep ni roha dohot marlas ni roha di akka na adong di hita. (Jaha Galatia 5:16; Pilippi 2:3, 4.) Tondi parbadia ni Jahowa mangurupi hita mamareso aha na adong di pikkiran dohot rohatta. Diurupi do hita lao pasidikkon pikkiran na roa jala sai mamikkirhon akka na denggan. (Ps. 26:2; 51:12) Taulas ma contoh ni si Musa dohot si Paulus na marhasil pasidikkon roha mangiburu.

10. Aha do situasi na diadopi si Musa? (Ida gambar sampul.)

¹⁰ Godang do tanggung jawab ni si Musa tu akka naposo ni Debata. Alai dang diambati ibana halak na asing lao mandapot tanggung jawab. Umpamana, sada tikki, dibuat Jahowa ma deba sian tondi parbadia na adong di si Musa jala dilehon ma i tu piga-piga sintua na jongjong di lambung ni kemah parpunguan. Dang leleng dukkon i, dibege si Musa ma adong dua sintua na so dohot tu kemah parpunguan alai mandapot tondi parbadia jala manurirangi. Aha do na diulahon si Musa tikki didok si Josua asa diorai ibana dua sintua i? Dang mangiburu si Musa tikki dilehon Jahowa tondi parbadia tu dua sintua i. Gariada, toktong do serep rohana jala marlas ni roha ala boi nasida manurirangi. (4 Mus. 11:24-29) Aha do na boi taparsiajari sian si Musa?

11. Songon dia do akka sintua boi maniru si Musa?

¹¹ Molo sintua hamu, hea do dipangido tu hamu asa mangalatik sasahalak lao mangulahon tugas na dihalomohon hamu di huria? Umpamana, ra lomo do rohamuna mandapot tugas lao manguluhon Joujou Paboahon ganup minggu. Alai molo serep rohamuna songon si Musa, dang gabe jut rohamuna molo dipangido asa mangalatik dongan na asing na lao mangulahon tugas i. Gariada, ikkon las do rohamuna mangurupi ibana.

12. Songon dia akka dongatta saonari patuduhon serep ni roha jala marlas ni roha di akka na adong di nasida?

¹² Pikkirhon ma situasi na asing na diadopi akka dongatta naung matua. Saleleng martaon-taon, adong do sian nasida na gabe koordinator punguan ni akka sintua. Alai dung marumur 80 taon, ikkon rade do nasida mangalehon tugasna i tu na asing. Jala akka pengawas wilayah naung marumur 70 taon pe, ikkon rade mangalehon tugasna tu na asing jala mandapot penugasan na baru. Di piga-piga taon na parpudi on, godang akka dongatta na karejo di Betel ditugashon tu lapangan. Dang hea jut roha ni akka dongatta na setia on mangida akka dongan na mangulahon tugas ni nasida najolo.

13. Sasittongna, aha do na boi mambahen si Paulus mangiburu tu 12 apostel?

¹³ Apostel Paulus ma sitiruon na asing taringot patuduhon serep ni roha jala marlas ni roha di akka na adong. Dang olo ibana mangiburu. Ringgas situtu do ibana di ulaon marbarita. Alai toktong do serep rohana. Didok ibana, “Ahu do na ummetmet sian sude apostel, jala ndang tama ahu didok apostel.” (1 Kor. 15:9, 10) Saleleng di tano on Jesus, sai diihuthon 12 siseanna do ibana. Alai di tikki i, dang halak Kristen dope si Paulus sahat tu na mate Jesus jala dipahehe. Nang pe si Paulus na ditugashon “gabe apostel tu angka bangso na asing”, alai dang  dohot ibana gabe bagian sian 12 apostel ni Jesus. (Rom 11:13; Ul. 1:21-26) Dang mangiburu ibana tu 12 apostel na solhot dohot Jesus. Alai toktong do marlas ni roha si Paulus di akka na adong di ibana.

14. Molo serep rohatta jala marlas ni roha di akka na adong, aha do na taulahon?

¹⁴ Na maniru si Paulus do hita molo serep rohatta jala marlas ni roha di akka na adong. Gabe taargai ma akka dongan na mandapot tanggung jawab sian Jahowa. (Ul. 21:20-26) Dipillit Jahowa do akka sintua lao manguluhon akka huria. Nang pe dang sempurna, alai ‘silehon-lehon’ sian Jahowa do nasida. (Eps. 4:8, 11) Molo taargai nasida jala serep rohatta mangihutton tudu-tudu na dilehon, gabe toktong ma jonok hita tu Jahowa jala mardame dohot akka dongan.

15. Aha do na ikkon taulahon?

¹⁵ Molo sai mangiburu hita, dang boi hita mardame dohot halak na asing. Ikkon tabolokkon do roha mangiburu sian diritta. Jala pasiding ma akka na boi mambahen hita mangiburu tu na asing. Rikkot do i taulahon asa boi mangoloi paretta ni Jahowa, i ma “mangulahon manang aha pe asa mambahen dame jala masipatoguan”. (Rom 14:19) Aha do na boi taulahon lao mangurupi na asing asa pasidikkon roha mangiburu jala gabe siboan dame?

16. Songon dia hita mangurupi na asing asa unang mangiburu?

¹⁶ Balga do pengaruh ni na tahatahon dohot na taulahon tu na asing. Dijujui portibi on do hita asa “manganggarhon”  akka na adong di hita. (1 Joh. 2:16) Alai pangalaho sisongon i, boi mambahen halak gabe mangiburu. Boi do hita mangurupi akka halak asa unang mangiburu molo dang sai tahatahon taringot akka na adong di hita manang akka na lao tatuhor. Asing ni i, ikkon serep do rohatta taringot hak istimewa na taulahon di huria. Unang ma sai tahatahon akka tugas na taulahon di huria. Alana boi do i mambahen halak na asing gabe mangiburu. Alai, sai parrohahon ma aha na rikkot di na asing dohot akka parange ni nasida na denggan. On boi mangurupi nasida marlas ni roha di akka na adong. Gabe marsada ma hita jala mardame di huria.

17. Aha do na patuduhon dang mangiburu be akka abang ni si Josep, jala aha do hasilna?

¹⁷ Boi do hita marhasil pasidikkon roha mangiburu! Pikkirhon ma muse contoh sian akka abang ni si Josep. Martaon-taon dung dibahen nasida na jahat tu si Josep, pajumpang ma muse nasida dohot si Josep di Mesir. Andorang so dipaboa ibana taringot dirina, diuji si Josep ma akka abangna lao mamboto naung marhamubaon do nasida manang na dang. Ditogihon ibana ma nasida sude mangan. Alai gumodang ma dilehon ibana sipanganon tu anggina si Benjamin sian tu akka abangna. (1 Mus. 43:32, 33) Alai dang mangiburu akka abangna tu si Benjamin. Gariada, dipatudu nasida do holong ni roha tu anggina i dohot tu bapakna si Jakkob. (1 Mus. 44:30-34) Ala dang mangiburu be akka abang ni si Josep, gabe boi ma mardame muse keluarga ni nasida. (1 Mus. 45:4, 15) Suang songon i ma, molo tapasiding do roha mangiburu, boi ma tajaga keluarga dohot huria asa toktong dame.

18. Hombar tu Jakobus 3:17, 18, aha do labana molo gabe siboan dame hita?

¹⁸ Lomo do roha ni Jahowa asa tapasiding roha mangiburu jala gabe siboan dame. Ikkon marsitutu do hita lao mangulahon i. Songon naung taulas di parsiajaran on, sipata olo do hita mangiburu. (Jak. 4:5) Jala dijujui portibi on do hita asa mangiburu. Alai molo sai tapatudu serep ni roha, marlas ni roha di akka na adong, jala taargai halak na asing, gabe dang olo be hita mangiburu. Gariada, gabe siboan dame do hita jala boi patuduhon akka parange na denggan.​—Jaha Jakobus 3:17, 18.