1. Modi ki invéja prujudika família di Juzé?

JAKÓ ta amaba tudu se fidjus. Má, el gostaba más txeu di Juzé, ki éra un di se fidjus ki tinha 17 anu. Kuzê ki irmons di Juzé ta pensaba sobri kel-li? Es fika ku invéja di el, pur isu es kumesa ta odia-l. Juzé ka faze nada pa se irmons odiaba el. Má simé, es bende Juzé pa ba ser skravu i es konta ses pai mintira ma un animal brabu, mata se fidju ki el gostaba más txeu. Invéja poi irmons di Juzé ta kaba ku pas di kel família i poi ses pai ta sufri txeu. — Gén. 37:3, 4, 27-34.

2. Di akordu ku Gálatas 5:19-21, pamodi ki invéja é prigozu dimás?

² Na Bíblia, invéja * ta parse na kel lista di ‘óbras di karni’ ki pode mata i ka dexa un algen ganha Reinu di Deus. (Lé Gálatas 5:19-21.) Invéja txeu bês ta traze dizamizadi, briga i raiba diskontroladu.

3. Kuzê ki nu sta ben odja na kel studu li?

³ Kuzê ki irmons di Juzé faze, ta mostra modi ki invéja pode kaba ku amizadi i pas di un família. É klaru ki nunka nu ka ta fazeba kuzê ki irmons di Juzé faze. Má nos tudu é inperfetu i nos korason ta ngana-nu. (Jer. 17:9) É pur isu ki alvês nu pode xinti invéja di otus algen. Nu ben odja alguns izénplu na Bíblia ki ta sirbi di avizu pa nos. Es ta ben djuda-nu ntende modi ki invéja pode kria na nos korason. Tanbê nu sta ben odja kuzê ki nu pode faze pa nu luta kóntra invéja i npenha pa pas.

4. Pamodi ki filisteus xinti invéja di Izaki?

⁴ Óras ki un algen é riku. Izaki éra un ómi riku, i filisteus xinti invéja di se rikéza. (Gén. 26:12-14) I ti es tapa kes posu ki Izaki ta uzaba pa daba se animal agu. (Gén. 26:15, 16, 27) Sima kes filisteu, alguns algen oji ta xinti invéja di kes algen ki ten dinheru más ki es. Kes algen ka ta krê sô ten kuzas ki otus algen ten, má tanbê es ta krê pa kes algen perde kuzê ki es ten.

5. Pamodi ki kes xéfi di relijion tinha invéja di Jizus?

⁵ Óras ki un algen gostadu di el. Kes xéfi di relijion di judeus tinha invéja di Jizus pamodi txeu algen gostaba di el. (Mat. 7:28, 29) Jizus éra reprizentanti di Deus, i el ta inxinaba verdadi. Má simé, kes xéfi di relijion spadja mintira gravi sobri Jizus pa suja se nómi. (Mar. 15:10; João 11:47, 48; 12:12, 13, 19 ) Kuzê ki nu pode prende ku kel-li? Na kongregason, ten irmons ki ten bons kualidadi i ki tudu algen gosta di es. Nu ten ki luta kóntra kalker sinal di invéja ki talvês nu pode xinti di es. Envês di kel-li, pamodi ki nu ka ta tenta imita ses bons kualidadi? — 1 Cor. 11:1; 3 João 11.

6. Modi ki Diótrifis mostra ma el tinha invéja?

⁶ Óras ki un algen ten responsabilidadi na kongregason. Na ténpu di apóstlus, Diótrifis tinha invéja di kes ki ta tomaba kónta di kongregason. El ta krê staba ‘na primeru lugar entri’ irmons na kongregason. Pur isu, el spadja alguns mintira pa el poba otus algen ta perdeba ruspetu pa apóstlu Juan i kes otu irmon ki tinha responsabilidadi. (3 João 9, 10 ) Nbóra nunka nu ka ta fazeba kel ki Diótrifis faze, nos tanbê nu pode kumesa ta xinti invéja di un irmon ki resebe un diziginason ki nu ta gostaba di ten. Inda más si nu ta atxa ma nu pode kuida di kel diziginason sima kel irmon ô más midjór di ki el.

7. Kuzê ki invéja pode faze ku nos?

⁷ Invéja é sima padja brabu. Basta simenti di invéja kria raís na nos korason, pode ser difísil kaba ku el. Otus sentimentu mariadu sima siumis, orgulhu ô tendénsia di pensa sô na nos kabésa, ta poi invéja ta bira más fórti. Invéja pode ka dexa-nu dizenvolve kes bon kualidadi sima amor, konpaxon i bondadi. Lógu ki nu da kónta ma invéja sta ta kria na nos korason, nu debe rinka-l. Modi ki nu pode luta kóntra invéja?

8. Ki kualidadis ta djuda-nu luta kóntra invéja?

⁸ Nu pode luta kóntra invéja óras ki nos é umildi i nu sta kontenti ku kuzas ki nu ten. Si nos korason sta xeiu di kes bon kualidadi, invéja ka ta atxa lugar pa kria na nos. Umildadi ta djuda-nu ka pensa ma nos é más inportanti di ki otus ô ma nu merese más di ki tudu algen. (Gál. 6:3, 4) Un algen ki sta kontenti ku kuza ki el ten, ka ta fika ta konpara se kabésa ku otus algen. (1 Tim. 6:7, 8) Óras ki un algen é umildi i el sta kontenti ku kuza ki el ten, el ta fika filís di odja otus ta resebe algun kuza dretu.

9. Di akordu ku Gálatas 5:16 i Filipenses 2:3, 4, kuzê ki spritu santu ta djuda-nu faze?

⁹ Nu meste ajuda di spritu santu pa nu ka ser invejozu, má pa nu ser umildi i sta kontenti ku kuzê ki nu ten. (Lé Gálatas 5:16; Filipenses 2:3, 4.) Spritu santu di  Jeová pode djuda-nu djobe modi ki sta nos pensamentus i nos sentimentus. Si kes pensamentu i sentimentus ka sta dretu, Jeová pode djuda-nu troka-s pa kes ki é dretu. (Sal. 26:2; 51:10) Nu sta ben odja izénplu di Muizés ku apóstlu Polu. Es konsigi luta dretu kóntra invéja.

10. Ki situason pode poba Muizés na próva? (Odja dizenhu na kapa.)

¹⁰ Muizés tinha txeu autoridadi na povu di Jeová. Má el ka tenta inpidi otus di ten kel autoridadi la. Pur izénplu, un bês Jeová tra un poku di Se spritu santu na Muizés i el da pa un grupu di ansions di Israel ki staba sakédu pértu di ténda di runion. Poku ténpu dipôs, Muizés obi ma dôs ansion ki ka staba na ténda di runion, tanbê resebe spritu santu i es kumesa ta konporta sima profétas. Modi ki el reaji kantu Juzué pidi-l pa el para kes dôs ansion? Muizés ka fika ku invéja pamodi Jeová da atenson pa kes dôs ansion. Envês di kel-li, Muizés foi umildi i el fika kontenti ku priviléjiu ki es resebe. (Núm. 11:24-29) Kuzê ki nu pode prende ku izénplu di Muizés?

11. Modi ki ansions pode imita Muizés?

¹¹ Si bo é un ansion, dja bu kustuma pididu pa bu trena un otu algen pa kuida di un responsabilidadi na kongregason ki bu gosta txeu? Pur izénplu, talvês bu gosta txeu di priviléjiu ki bu ten di faze Studu di Sentinéla tudu simana na kongregason. Má si bo é umildi sima Muizés, bu ka ta fika ku medu si bu pididu pa trena un otu irmon, pa ben kuida di kel priviléjiu. Má bu ta xinti kontenti di djuda bu irmon.

12. Modi ki txeu irmon ku irmans sta ta mostra ma es é umildi i ma es sta kontenti ku ses priviléjiu?

¹² Pensa na un otu situason ki irmons di más idadi sta ta pasa pa el. Txeu di es dja ten monti un anu ta sirbi kómu kordenador di grupu di ansion. Má óras ki es faze 80 anu, es ta pasa ses diziginason di korason pa otus irmon. Enkaregadus di grupu di kongregason tanbê ta mostra umildadi. Óras ki es faze 70 anu, es ta dexa ses trabadju di vizita kongregason i es ta seta un novu diziginason. I na kes últimu anu, txeu betelita na mundu interu resebe un novu diziginason fóra di Betel. Kes irmon ku irmans fiel ka fika ku rankor di kes algen ki gósi sta ta faze kel trabadju ki es ta fazeba antis.

13. Kuzê ki pode poba Polu ku invéja di kes 12 apóstlu?

¹³ Apóstlu Polu tanbê é un bon izénplu di algen ki mostra umildadi i prende sta kontenti ku kuzê ki el tinha. Polu ka dexa invéja kria na se korason. El trabadja duru na pregason, má el mostra umildadi kantu el fla: ‘Ami é kel apóstlu ménus inportanti, i N ka merese pa N txomadu di apóstlu’. (1 Cor. 15:9, 10) Kes 12 apóstlu staba ku Jizus duránti se trabadju di pregason li na Téra, má Polu bira un kriston sô dipôs di mórti i resureison di Jizus. Nbóra el skodjedu pa ser ‘apóstlu pa nasons,’ Polu nunka ka resebe kel priviléjiu spesial di ser un di kes 12 apóstlu. (Rom. 11:13; Atos 1:21-26 ) Envês di xinti invéja di kes 12 ómi i di konvivénsia ki es tevi ku Jizus, Polu staba kontenti ku kel ki el tinha.

14. Si nos é umildi i nu prende sta kontenti ku kel ki nu ten, kuzê ki nu ta faze?

¹⁴ Si nu prende sta kontenti ku kel ki nu ten i nu ser umildi, nu ta ser sima Polu i nu ta mostra ruspetu pa autoridadi ki Jeová da otus irmon. (Atos 21:20-26 ) El skodje ómis pa toma kónta di kongregason. Nbóra es é ka perfetu, Jeová ta atxa  ma es é ‘prezentis na fórma di ómis.’ (Efé. 4:8, 11) Óras ki nu ta ruspeta kes ómi ki Jeová skodje i sigi ses orientason ku umildadi, nu ta ser más amigu di Jeová i nu ta ten pas ku nos irmons na kongregason.

15. Kuzê ki nu meste faze?

¹⁵ Si nu dexa invéja kria na nos, nu ka ta pode sta na pas ku kunpanheru. Nu meste rinka simenti di invéja na nos korason, i toma kuidadu pa nu ka planta invéja na korason di otus. Nu meste faze kes kuza inportanti li, si nu krê sigi kel mandamentu di Jeová sobri ‘npenha pa kes kuza ki ta traze pas i pa kes kuza ki ta djuda-nu fortalese kunpanheru.’ (Rom. 14:19) Kuzê ki nu meste faze pa nu djuda otus luta kóntra invéja, i modi ki nu pode npenha pa pas?

16. Modi ki nu pode djuda otus luta kóntra invéja?

¹⁶ Nos atitudi i kuzas ki nu ta faze pode mexe txeu ku otus algen. Mundu krê pa nu ‘izibi’ kuzas ki nu ten. (1 João 2:16 ) Má kel atitudi li ta poi otus algen ta xinti invéja. Pa nu ka faze kel-li, nu debe ivita fika ta pâpia tudu óra di kuzas ki nu ten ô ki nu sta pensa kunpra. Tanbê nu ta faze kel-li, na manera ki nu ta konporta óras ki nu ta resebe priviléjiu na kongregason. Si nu fika sénpri ta pâpia di nos priviléjiu, nu sta ta pripara un txon ki invéja pode kria faxi. Má, óras ki nu mostra  interesi di korason pa otus i ilojia-s pa kuzas dretu ki es ta faze, nu sta djuda-s xinti kontenti ku kel ki es ten, djuda ten pas i union na kongregason.

17. Kuzê ki irmons di Juzé konsigi faze i pamodi?

¹⁷ Nu pode ganha géra kóntra invéja! Pensa otu bês na izénplu di irmons di Juzé. Dipôs di txeu anu ki es maltrata Juzé, es nkontra ku el na Ijitu. Antis di Juzé fla-s ken ki el éra, el sprimenta-s pa el odja si dja es mudaba. El konvida-s pa es bai kume ku el, i el da kumida más txeu pa Benjamin, ki éra ses irmon más pikinoti. (Gén. 43:33, 34) Má ka ten nada ki ta mostra ma se irmons fika ku invéja di Benjamin. Envês di kel-li, es mostra ma es ta preokupaba di korason ku ses irmon i ku ses pai, Jakó. (Gén. 44:30-34) Dja ki irmons di Juzé para di ser invejozu, es konsigi torna poi pas na ses família. (Gén. 45:4, 15) Di mésmu manera, si nu rinka kalker sentimentu di invéja na nos korason, nu ta mante pas na nos família i na nos kongregason.

18. Di akordu ku Tiago 3:17, 18, kuzê ki ta kontise si nu djuda ten un anbienti di pas?

¹⁸ Jeová krê pa nu luta kónta invéja i pa nu npenha pa pas. Nu meste sforsa txeu pa nu faze kes dôs kuza la. Sima nu odja na kel studu li, nu ten tendénsia di xinti invéja. (Tia. 4:5) I nu sta ta vive na un mundu ki ta poi algen ta xinti invéja. Má si nu ser umildi, nu prende sta kontenti ku kel ki nu ten i nu da valor pa kuzas ki otus algen ta faze, invéja ka ta atxa lugar pa kria déntu nos. Asi, nu ta djuda ten un anbienti di pas pa nu pode dizenvolve bons kualidadi. — Lé Tiago 3:17, 18.