1. Yisinke ya horokerere epata lyoJosefa apa vakuru vendi va kere nomfudu?

JAKOPO kwa here vana vendi navenye, nye age kwa here po unene Josefa ogu ga kere nonomvhura 17. Ngapi omu va lizuvhire vakuru vaJosefa? Awo kwa mu zuvhilire mfudu, ntani ayo kwa va ninkisire va kare nehandu. Josefa kapi ga rugene yininke yoyidona eyi ya ninkisire ngano vakuru vendi va mu nyenge. Nampili ngoso, vakuru vendi kwa mu randesere ngomupika ntani awo kwa kumbagerere oguhwe asi sikasama sina mu dipaga. Mfudu ezi va kere nazo vakuru va Josefa kwa ninkisire epata lyawo li dire kukara mombili ntani awo va guvisire guhyawo.—Gen. 37:3, 4, 27-34.

2. Kuliza noVagarata 5:19-21, morwasinke mfudu za karera siponga?

² Kuliza noBibeli, mfudu * kuna kara simwe ‘soyirugana yorutu’ esi nasi vhura kuninkisa muntu a dire kukapinga Uhompa waKarunga. (Resa Vagarata 5:19-21.) Yikara ngwendi unkore, nomutangu ntani esupa kutundilira komfudu.

3. Yisinke natu ka zogera mosirongwa esi?

³ Sihonena sovakuru vaJosefa kulikida asi mfudu kuvhura kugaununa epata ntani nokudonganesa mbili. Nampili ngomu natu dira kurugana eyi va rugene vakuru vaJosefa, nye twa hepa kutakamesa morwa natuvenye kapi twa sikilira mo ntani mutjima gwetu kwa vera. (Jer. 17:9) Eyi yiyo poyiruwo yimwe atu fililire vakwetu mfudu. Tu zeni tu ka tare yihonena yimwe yomoBibeli eyi nayi ka tu vatera tu dimburure omu mfudu a zi tameke kukura momutjima. Natu ka zogera hena yininke yimwe  eyi natu rugana yipo tu nyokere po mfudu nokukondjera mbili.

4. Morwasinke Vafilisiti va fililire Isaka mfudu?

⁴ Nsene gumwe ngawo. Isaka kwa kere mugara gongawo ano Vafilisiti kwa mu fililire mfudu morwa emona lyendi. (Gen. 26:12-14) Awo kwa foferere matope nagenye gaIsaka omu nga gusa mema yipo a pe yimuna yendi. (Gen. 26:15, 16, 27) Ngwendi Vafilisiti, naina vantu vamwe kufira mfudu vakwawo ava va kara noyiweka yoyinzi kuvapitakana. Awo kudowokera yininke eyi va kara nayo vakwawo ntani kapi va harera vakwawo va kare nayo.

5. Morwasinke vampitisili womaukarelikarunga va fililire Jesus mfudu?

⁵ Nsene gumwe va mu hara vantu. Vampitisili womaukarelikarunga goVajuda kwa fililire mfudu Jesus morwa vantu kwa mu here unene. (Mat. 7:28, 29) Karunga yige ga tumine Jesus ntani age nga rongo usili. Nampili ngoso, vampitisili owo kwa hanesere yininke yoyipempa kuhamena Jesus yipo va mu swaukise. (Mar. 15:10; Joh. 11:47, 48; 12:12, 13, 19) Yisinke natu lirongera ko kosihorokwa esi? Twa hepa kunyokera po kufira mfudu vantu ava va kara noyikara eyi ayi ninkisa wopeke mombungakriste va va hare. Mevango lyokuvafira mfudu, twa hepa kuhonena yikara yawo yoyiwa.—1 Kol. 11:1; 3 Joh. 11.

6. Yisinke ga rugene Diwoterefesi morwa ga kere nomfudu?

⁶ Nsene gumwe ga kara noyitumbukira mombungakriste. Mosiruwo sovapositoli, Diwoterefesi kwa fililire mfudu ava ngava pitisire mombungakriste. Age kwa here “kulitura mwene komeho” zovapuli vakwawo, ano eyi kwa mu ninkisire a uyunge yininke yoyipempa kuhamena mupositoli Johanesa navamwe ava ngava pitisire, yipo vakwawo va dire kuvafumadeka. (3 Joh. 9, 10) Nampili ngomu natu dira kurugana eyi ga rugene Diwoterefesi, nye nose kuvhura tu tameke kufira vanavazinyetu mfudu ava ava gwana situmbukira esi twa hara, unene po nsene ose kulizuvha asi nyose sina wapere ndi kuvhura tu si sikise mo nose.

7. Yisinke nayi vhura kuhoroka nsene tu kara nomfudu?

⁷ Mfudu kwa fana ngwendi simeno souhungu. Nsene tu tameka kukara nomfudu momutjima gwetu, ayo udigu kuzigusa mo. Nsene tu ligazara tupu nyamwetu nokukara nelinenepeko, ayo ngayi ninkisa mfudu zi kure. Ngwendi moomu simeno souhungu asi kondere mbya zi dire kukura, mfudu kuvhura kutukondera tu dire kutunga po yikara yoyiwa ngwendi eharo nonkenda. Nsene tuna dimburura asi mfudu kuna kutameka kukura momutjima gwetu, twa hepa kuzinyokera po usimbu. Ngapi omu natu nyokera po mfudu?

8. Yikara musinke nayi tu vatera tu nyokere po mfudu?

⁸ Ose kuvhura kunyokera po mfudu pokutunga po elinunupiko ntani nokulizuvha asi ya tu gwanena po eyi twa kara nayo. Nsene tu tunga po yikara eyi, kapi ngatu kara nomfudu. Elinunupiko ngali tu vatera tu dire kulimona nyamwetu asi ose mulyo. Muntu gokulinunupika kapi a li gazara mwene asi ga hepa kukara neyi yoyinzi kupitakana wopeke. (Gar. 6:3, 4) Muntu ogu a lizuvhu asi ya mu gwanena po, kapi a lihetakanesa novakwawo. (1 Tim. 6:7, 8) Muntu ogu ga linunupika ntani ogu a lizuvhu asi ya mu gwanena po, age kuhafa apa wopeke ava gwana yininke yoyiwa.

9. Kuliza noVagarata 5:16 ntani Vafilipi 2:3, 4, ngapi omu ngazi tu vatera mpepo zokupongoka?

⁹ Twa hepa mpepo zokupongoka nsene tuna hara yi tu tompoke kunyokera po  mfudu ntani yipo tu tunge po elinunupiko nokulizuvha asi ya tu gwanena po. (Resa Vagarata 5:16; Vafilipi 2:3, 4.) Mpepo zokupongoka kuvhura kutuvatera tu konakone magazaro getu neyi twa hara. Nevatero lyaKarunga, ose kuvhura yi tu tompoke kunyokera po magazaro nomalizuvho gomadona yipo tu ga pinganesere po naga gomawa. (Epis. 26:2; 51:10) Koneka sihonena saMosesa naPaurusa, vagara ava ya tompokere mokudira kukara nomfudu.

10. Yisinke ngano ya ninkisire Mosesa a kare nomfudu? (Tara efano lyopontunda.)

¹⁰ Mosesa nga pitisire vantu vaKarunga, nye nampili ngoso age kapi ga lizuvhire asi gelike sa wapera situmbukira oso. Pasihonena, sikando simwe Jehova kwa gusire mpepo zokupongoka zimwe kwaMosesa nokuzigava kokambunga kovagendesi ava va sikeme pepi nonkongoronzugo. Konyima, Mosesa ta zuvhu asi vagara vavali ava va dilire kuza konkongoronzugo nawo kwa gwene mpepo zokupongoka ntani nawo kwa tamekere kuporofeta. Yisinke ga rugene Mosesa apa Josuwa ga mu pulire a ka kave vagara owo vavali? Mosesa kapi ga fililire vagara owo mfudu kweyi Jehova ga va pere mpepo zokupongoka, nye age kwa linunupikire ntani age kwa hefe kweyi nawo va tamekere kuporofeta. (Num. 11:24-29) Yisinke natu lirongera ko kwaMosesa?

11. Ngapi omu vakuronambunga nava honena Mosesa?

¹¹ Nsene o mukuronambunga, va kupura rumwe yipo o deure munazinyetu gumwe ogu nga pakera mbili situmbukira somombungakriste esi wa hara ndi? Pasihonena, nampo ove kwa hara situmbukira sokupitisira elirongo lyoRuhungu nkenye sivike. Nsene wa linunupika ngwendi Mosesa, ove kapi ngo kara nomfudu nsene va ku pura o deure munazinyetu gumwe, yipo nga guse situmbukira oso komeho. Nye ove ngo vatera munazinyetu ogo noruhafo.

12. Ngapi omu Vakriste wovanzi vana kulikida elinunupiko nokulizuvha asi ya va gwanena po eyi va kara nayo?

¹² Koneka hena ukaro umwe ou vana kuligwanekera nawo vanavazinyetu wovanzi wovakurupe. Vanavazinyetu owo kwa kara vawapaiki wovakuronambunga nomvhura dononzi monombungakriste dawo. Nye apa ava siki konomvhura 80, awo kugava situmbukira oso kwagumwe. Vatareli wonombunga apa ava kara nonomvhura 70, nawo kuhageka sirugana sawo ntani kuvapa ko sirugana sapeke. Monomvhura edi dantani, Vabeteli wovanzi mouzuni mudima nawo kwa va hagekesa sirugana sawo sokoBeteli noku va tuma mosirugana sokuzuvhisa. Vanavazinyetu owo kapi ava fire mfudu vapuli vakwawo ava ava rugana yirugana eyi ngava rugana nare.

13. Yisinke ngano ya ninkisire Paurusa a fire mfudu vapositoli 12?

¹³ Mupositoli Paurusa nage kuna kara gumwe ogu ga kere nelinunupiko ntani ogu ya gwanenene po eyi ga kere nayo. Paurusa kapi ga kere nomfudu momutjima gwendi. Age nga rugana unene mosirugana sokuzuvhisa, nye morwa ga kere nelinunupiko age kwa tente asi: “Ame nyame gekuto lyenunu po kovapositoli navenye, ame kapi na fira kutumbura nge asi mupositoli.” (1 Kol. 15:9, 10) Vapositoli 12 ngava kwama Jesus mosirugana sokuzuvhisa, nye Paurusa age kwa ya kere tupu Mukriste konyima zapa Jesus ga vhumbukire koufe. Nampili ngomu Paurusa va mu pere situmbukira sokukara “mupositoli govapagani,” age kapi ga waperere mokukara gumwe govapositoli 12. (Rom. 11:13; Yirug. 1:21-26) Mevango lyokufira mfudu vagara owo 12 kweyi va kere kumwe naJesus, Paurusa kwa lizuvhire asi yina mu gwanene po eyi ga kere nayo.

14. Yisinke ngatu rugana nsene ose twa linunupika ntani kulizuvha asi ya tu gwanena po eyi twa kara nayo?

¹⁴ Nsene twa linunupika ntani ose  kulizuvha asi ya tu gwanena po eyi twa kara nayo, ose ngatu honena Paurusa ntani ngatu fumadeka ava ga pa Jehova yitumbukira. (Yirug. 21:20-26) Jehova kwa horowora vagara vamwe yipo va pitisire mombungakriste. Nampili ngomu va dira kusikilira mo, age kuvatara asi awo “mauhwi” ga gava kovantu. (Efe. 4:8, 11) Nsene tu fumadeka vagara ava ava pitisire nokukwama mavyukiso gawo nelinunupiko, ose ngatu kara pepi naJehova ntani ngatu kara nombili novapuli vakwetu.

15. Yisinke twa hepa kurugana?

¹⁵ Nsene tu kara nomfudu, ose kapi ngatu kara mombili. Twa hepa kunyokera po mfudu monomutjima detu nokunyokera po kuninkisa vakwetu va tu fire mfudu. Twa hepa kuyirugana eyi nsene tuna hara kulimburukwa mpango zaJehova ezi asi: “Atu kondjereni eyi ayi reta mbili neyi ayi tu koraike-koraike.” (Rom. 14:19) Yisinke twa hepa kurugana yipo tu vatere wopeke va nyokere po mfudu ntani ngapi omu natu retesa po mbili?

16. Ngapi omu natu vatera wopeke va nyokere po mfudu?

¹⁶ Nkareso zetu noyirugana yetu kuvhura kukundama wopeke. Uzuni kuna hara tu ‘litumbadekere’ yininke eyi twa kara nayo. (1 Joh. 2:16) Nye nkareso ozo kuninkisa vantu va kare nomfudu. Nsene tu dira kusimwitira nkenye apa kuhamena yininke eyi twa kara nayo ndi eyi tuna hara kuranda, ayo kuvhura yi vatere wopeke va dire kukara nomfudu. Nkedi zimwe hena omu natu vatere wopeke va dire kukara nomfudu kuna  kara monkedi omu atu ruganesa yitumbukira eyi twa kara nayo mombungakriste. Nsene tu uyunga nkenye apa kuhamena yitumbukira eyi twa kara nayo, ayo kuvhura kuninkisa wopeke va tameke kukara nomfudu. Mokulisiga, nsene tu likida eharo kovakwetu ntani nokuvapandadeka koyirugana yawo yoyiwa, ose ngatu va vatera va lizuvhe asi ya va gwanena po eyi va kara nayo ntani ose ngatu retesa po mbili nouumwe mombungakriste.

17. Yisinke va rugene vakuru vaJosefa ntani yisinke ya va vaterere?

¹⁷ Kuvhura yi tu tompoke kunyokera po mfudu. Gazadara ko hena kosihonena sovakuru vaJosefa. Konyima zonomvhura dononzi kutunda apa va tekwire Josefa momudona, awo kwa ka ligwene naJosefa moEgipite. Komeho Josefa a lidivise mwene kovakuru vendi, age kwa va hetekere a tare nsene va siga nkareso zawo. Age kwa lire kumwe nawo, ntani age kwa pere mumbyendi Mbenyameni nondya dononzi unene kupitakana edi ga pere vakuru vendi. (Gen. 43:33, 34) Nye nampili ngoso, vakuru vendi kapi va fililire mfudu Mbenyameni. Nye awo kwa kere nosinka kwa mumbyawo ntani koguhwe Jakopo. (Gen. 44:30-34) Mokumona asi vakuru vaJosefa va sigire sikara somfudu, ayo kwa ninkisire epata lyawo li kare hena mombili. (Gen. 45:4, 15) Mokulifana, nsene tu siga sikara somfudu, ose ngatu vatera vemepata lyetu ntani womombungakriste va kare mombili.

18. Kuliza naJakopo 3:17, 18, yisinke ngayi horoka nsene tu retesa po mbili?

¹⁸ Jehova ana hara tu sige mfudu nokukondjera mbili. Twa hepa kukondja paapa twa hulira yipo tu sikise mo yininke oyo yivali. Ngomu tuna yi zogere mosirongwa esi, ayo ureru kwetu mokukara nomfudu. (Jak. 4:5) Ntani ose kwa tu kundurukida uzuni ou au korangeda sikara somfudu. Nsene tu tunga po elinunupiko nokulizuvha asi ya tu gwanena po eyi twa kara nayo nokukara norupandu, ose kapi ngatu kara nomfudu. Nye ngatu retesa po mbili ezi azi tu vatere tu kare noyikara yimwe yapeke yoyiwa.—Resa Jakopo 3:17, 18.