1. Σο αντάς η ζήλια κι φαμιλί κι Ιωσηφίσκι;

Ο ΙΑΚΩΒ μανγκέλας σαρέ πι τσσαβέν, αλλά τθερέλας αδυναμία κο Ιωσήφ σο ισινέ 17 μπρεσένγκο. Σαρ νιωσάλε ανταλέσκε ο πφραλά ι Ιωσηφίσκε; Αρχισάλε τι ζηλίνεν-λες ντα οντουλέσκε τσσουντέ λέσκε μπαρί χολί. Ο Ιωσήφ να κερντάας τίποτα για τι μισίνεν-λες. Όμως, βον μπικιντέ-λες σαρ δούλος ντα βακερντέ ψέματα πουμαρέ νταντέσκε ότι εκ άγριος ζώος μουνταρντάας λέσκε αγαπημέ τσσαβές. Λένγκι ζήλια κερντάς-λεν τι χαλαβέν ι ειρήνη πουμαρέ φαμιλιάκι ντα τι πφανγκέν πουμαρέ νταντέσκο γκι.​—Γέν. 37:3, 4, 27-34.

2. Σόσκε ισί αζόμ επικίνδυνη η ζήλια σαρ βακερένα ο εδάφια Γαλάτες 5:​19-21;

² Η Αγία Γραφή βακερέλα ότι η ζήλια * ισί αντρέ κο «πράγματα σο κερέλα ο σώμας» ντα να μουκχένα εκχέ τζενές τι νακχέλ κι Βασιλεία κι Ντεβλέσκι. (Διαβάνεν Γαλάτες 5:​19-21) Η ζήλια μπουτ φαρ ανέλα μπέτι πράγματα σαρ ισί ο ντουσμανλίκι, ο καβγκάδες ντα η χολί.

3. Σο κα ντικχάς ανταλέ μαθημάστε;

³ Ο παράδειγμας σο μουκχλέ ο πφραλά ι Ιωσηφίσκε σικαβέλα σαρ μπορίνελα η ζήλια τι κερέλ ι αμαλέν τι σουρντιόν ο εκ κατά γιαβέρ ντα τι χαλαβέλ ι ειρήνη εκχέ φαμιλιάκι. Παρόλο σο ποτές να κα κεράας οντουβά σο κερντέ ο πφραλά ι Ιωσηφίσκε, σαρέ ισινάμ ατελείς ντα αμαρό γκι χουχαβέλα-αμέν. (Ιερ. 17:9) Οτθάρ, νανέ περίεργος σο μπάζιμα μαράσα-αμέν τι νασκιαράς ι ζήλια. Κα ντικχάς μερικά παραδείγματα  κατά Γραφή σο βοηθίνενα-αμέν τι αγαβάς σόσκε μπορεί τι ασταρέν τθαν αμαρέ γκίστε ασακέ μπέτι αισθήματα. Σοράν κα ντικχάς σο τι κεράς για τι νασκιαράς ι ζήλια ντα τι ανάς ι ειρήνη.

4. Σόσκε ζηλίνενας τον Ισαάκ ο Φιλισταίοι;

⁴ Κάνα εκ τζενό ισί χουλάι. Ο Ισαάκ ισινέ χουλανό τζενό, οτθάρ ο Φιλισταίοι ζηλίνενας-λες. (Γέν. 26:​12-14) Πφερντέ τσικ ο χανινγκά σο τζάλας οτθέ για τι λελ πανί για το ζώα. (Γέν. 26:​15, 16, 27) Σαρ ο Φιλισταίοι, αντικάς μερικά τζενέ αντιβές ζηλίνενα οντουλέν σο τθερένα πιο μπουτ πράγματα λένταρ. Ο πρόβλημας νανέ σάντε ότι μανγκένα ο πράγματα σο τθερένα ο γιαβερά. Ισί ότι να μανγκένα τι τθερέν-λεν ο γιαβερά-ντα.

5. Σόσκε ο αρχηγοί ι θρησκειάκε ζηλίνενας ι Ιησούς;

⁵ Κάνα ο γιαβερά σικαβένα εκτίμηση εκχέ τζενέσκε. Ο Ιουδαίοι αρχηγοί ι θρησκειάκε ζηλίνενας ι Ιησούς επειδή μπουτ τζενέ σικαβένας λέσκε μπαρί εκτίμηση. (Ματθ. 7:​28, 29) Ο Ιησούς μπουτσσάντιλο κατά Ντεβέλ ντα σικλιαρέλας ι αλήθεια. Όμως, οντουλά αρχηγοί ι θρησκειάκε βακερένας γκεραλέ ψέματα για τι χαλαβέν λέσκο λατσσό ναβ. (Μάρκ. 15:​10· Ιωάν. 11:​47, 48· 12:​12, 13, 19) Σο σικλιάσα ανταλέ ιστοριάταρ; Πρέπει τι μαράς-αμέν μα τι ζηλίνας οντουλέν σο ο πφραλά κι κχανγκιρί μανγκένα-λεν χάρη κο λατσσέ ιδιότητες σο τθερένα. Πρέπει τι προσπαθίνας τι μοιάζας λέντε.​—1 Κορ. 11:1· 3 Ιωάν. 11.

6. Σαρ σικαντάς ζήλια ο Διοτρεφής;

⁶ Κάνα εκ πφραλ τθερέλα ευθύνες αντρέ κι κχανγκιρί. Κο πρώτος αιώνας, ο Διοτρεφής ζηλίνελας οντουλέν σο τθερένας ευθύνες αντρέ κι Χριστιανική κχανγκιρί. Μανγκέλας «τι τθερέλ ι πρώτη θέση» κι κχανγκιρί, οτθάρ βακερέλας γκεραλέ ψέματα για τι περαβέλ κι γιαβερένγκε γιακχά ι Ιωαννής ντα γιαβερέ υπεύθυνε πφραλέν. (3 Ιωάν. 9, 10) Παρόλο σο να κα κεράς ποτές οντουβά σο κερντάς ο Διοτρεφής, μπορεί τι αρχίνας τι ζηλίνας εκχέ πφραλές σο λέλα εκ διορισμός σο μανγκάας, ειδικά άμα νιωθίνασα ότι αμέν-ντα μπορίνασα τι κεράς-λες μπουτ λατσσές.

7. Σο μπορεί τι κερέλ η ζήλια;

⁷ Η ζήλια ισί σαρ ο τσαριά. Άμα ασταρντάς τθαν αμαρέ γκίστε, ισί δύσκολος τι νικαβάς-λα. Η ζήλια μπαριόλα άμα ισινάμ μπαρικανέ, ντικχάσα σάντε αμαρό νεαυτός ή μανγκάσα τι αβάς πιο λατσσέ κατά γιαβερά. Μπορεί τι κερέλ-αμέν μα τι μανγκάς ι γιαβερέν, μα τι πφαμπάς λένγκε ντα μα τι σικαβάς λένγκε λατσσιπέ. Άμα αγαντάμ ότι τθεράσα αμαρέ γκίστε ζήλια, πρέπει τι νασκιαράς-λα σουγκό. Σαρ κα κεράς-λες ανταβά;

8. Καλά ιδιότητες βοηθίνενα-αμέν τι νασκιαράς ι ζήλια;

⁸ Νασκιαράσα ι ζήλια κάνα ισινάμ ταπεινοί ντα κάνα ερεσένα-αμέν οντουλά σο τθεράσα. Κάνα τθεράσα ανταλά λατσσέ ιδιότητες, να κα μουκχάς τθαν αντρ’ αμέντε για τι μπαριόλ η ζήλια. Η ταπεινότητα βοηθίνελα-αμέν μα τι τθεράς μπαρί ιδέα αμαρέ νεαυτόσκε. Ο ταπεινός τζενό να πακιάλα ότι αξίνελα πιο μπουτ σαρέ κατά γιαβερά. (Γαλ. 6:3, 4) Ο τζενό σο ερεσένα-λες οντουλά σο τθερέλα ισί ευχαριστιμέ ντα να μανγκέλα οντουλά σο τθερένα ο γιαβερά. (1 Τιμ. 6:7, 8) Κάνα εκ τζενό σο ισί ταπεινός ντα ερεσένα-λες οντουλά σο τθερέλα ντικχέλα εκχέ γιαβερές τι λελ κάτι λατσσό, χαιρίνελα λέσκε.

9. Σο κα βοηθίνελ-αμέν τι κεράς ο άγιος πνεύμας ι Ντεβλέσκο σαρ βακερένα ο εδάφια Γαλάτες 5:​16 ντα Φιλιππησίους 2:3, 4;

⁹ Χρειαζίντιβασα ο άγιος πνεύμας ι  Ντεβλέσκο άμα μανγκάσα τι νασκιαράς ι ζήλια, τι αβάς ταπεινοί ντα τι ερεσέν-αμέν οντουλά σο τθεράσα. (Διαβάνεν Γαλάτες 5:​16· Φιλιππησίους 2:3, 4) Ο άγιος πνεύμας ι Ιεχωβάσκο βοηθίνελα-αμέν τι ρόντας αντρ’ αμέντε για τι αγαβάς σο ισί γκεραντό αμαρέ γκοντιάτε ντα σο τσσίντελα-αμέν τι κεράς πράγματα. Με τη βοήθεια ι Ντεβλέσκι, μπορίνασα τι νασκιαράς σκέψεις ντα αισθήματα σο κερένα ζιάνι ντα λένγκε θεσιάτε τι τσσουβάς πράγματα σο ντένα ζορ. (Ψαλμ. 26:2· 51:​10) Ντικχέν ο παράδειγμας σο μουκχλάς ο Μωυσής ντα ο Παύλος, σο να ζηλίνενας ι γιαβερέν.

10. Καβά πράγμας σο αβιλό-πες κα μπορίνελας τι κερέλ ι Μωυσής τι ζηλίνελ; (Ντικχέν ι φωτογραφία κι ανγκλαϊνί σελίδα)

¹⁰ Ο Μωυσής τθερέλας μπαρί εξουσία οπράλ κο λαός κι Ντεβλέσκο, αλλά να ατσσικιαρέλας σάντε πέσκε ανταβά προνόμιος. Για παράδειγμας, εκ φαρ, ο Ιεχωβά λιντάς χάνικ κατά άγιος πνεύμας σο ντινάς κο Μωυσής ντα τσσουντάς-λες οπράλ μερικέ πρεσβυτερόντε σο μπεσένας πασέ κι σκηνή της συνάντησης. Χάνικ πιο σοράν, ο Μωυσής σικλιλό ότι ντούι πρεσβύτεροι σο να αβιλέας κι σκηνή της συνάντησης λιντέας βον-ντα άγιος πνεύμας ντα αρχισάλε τι κερέν οντουλά σο κερένας ο προφήτες. Σο κερντάς κάνα ο Ιησούς του Ναυή μανγκλάς λέσταρ τι τσσιναβέλ-λεν; Ο Μωυσής να ζηλισάλο κάνα ο Ιεχωβά σικαντάς λένγκε προσοχή. Αλλά ισινέ ταπεινός ντα χαιρισάλο σο λιντέ οντουβά προνόμιος. (Αριθ. 11:​24-29) Σο σικλιάσα κατά Μωυσής;

11. Σαρ κα μοιάζεν ο πρεσβύτεροι κο Μωυσής;

¹¹ Άμα ισινάν πρεσβύτερος, μανγκλέ τούταρ ποτές τι σικλιαρές εκχέ γιαβερές για τι λελ εκ ευθύνη κι κχανγκιρί σο μανγκέσα μπουτ; Για παράδειγμας, μπορεί τι μπεϊντίνεσα μπουτ τι κερές ι Σκοπιά κάθε εβδομάδα. Αλλά άμα ισινάν ταπεινός σαρ ο Μωυσής, να κα νιωθίνες ότι κα χασαρές τι θέση άμα κα μανγκέν τούταρ τι σικλιαρές εκχέ γιαβερέ πφραλές τι κερέλ βοβ οντιά μπουτί πιο σοράν. Κα χαιρίνες μπουτ τι βοηθίνες-λες.

12. Σαρ σικαβένα μπουτ Χριστιανοί αντιβές ότι ερεσένα-λεν οντουλά σο τθερένα ντα ότι ισί ταπεινοί;

¹² Ντικχέν κάτι γιαβέρ σο νακχένα μπουτ πφραλά σο ισί πφουρέ. Για μπουτ μπρεσά, υπηρετιντέ σαρ συντονιστές πρεσβυτερίου. Κάνα όμως πφάντενα ο 80, μουκχένα αντράλ πουμαρέ γκίσταρ πουμαρό διορισμός. Ο επίσκοποι περιοχής σο πφάντενα ο 70 μουκχένα ταπεινά ανταβά προνόμιος ντα λένα γιαβέρ διορισμός. Ο τελευταία μπρεσά, μπουτ Μπεθελίτες σαρό κο ντουνιάς λιντέ νεβό διορισμός γιαβερτθέ. Ανταλά πιστά πφραλά ντα πφενιά να ατσσικιαρένα χολί ι πφραλένγκε σο ακανά τθερένα λένγκο διορισμός.

13. Σόσκε κα μπορίνελας ο Παύλος τι περέλ κο πειρασμός τι ζηλίνελ ι 12 αποστολόν;

¹³ Ο απόστολος Παύλος-ντα ισινέ εκ τζενό σο ερεσένας-λες οντουλά σο τθερέλας ντα ισινέ ταπεινός. Ο Παύλος να μουκχέλας τι μπαριόλ αντρέ λέστε ζήλια. Παρόλο σο μαρέλας-πες μπουτ κο έργος, βακερντάς ταπεινά: «Με ισινόμ ο πιο χουρντό κατά απόστολοι ντα να ισινόμ άξιος τι βακέρντιβαβ απόστολος». (1 Κορ. 15:9, 10) Ο 12 απόστολοι ισινέ ι Ιησούσαρ κάνα κερέλας έργος κι πφουβ, αλλά ο Παύλος αβιλό Χριστιανός σοράν κατά μεριπέ ντα κατά ανάσταση ι Ιησούσκι. Παρόλο σο τελικά αβιλό «απόστολος ι τθεμένγκο», ποτές να αβιλό εκ κατά 12 απόστολοι. (Ρωμ. 11:​13· Πράξ. 1:​21-26) Αντίς τι ζηλίνελ οντουλέ 12 μουρσέν ντα ι λατσσί φιλία σο τθερένας ι Ιησούσαρ, ερεσένας-λες οντουλά σο τθερέλας.

14. Σο κα κεράς άμα ερεσένα-αμέν οντουλά σο τθεράσα ντα ισινάμ ταπεινοί;

¹⁴ Άμα ερεσένα-αμέν οντουλά σο τθεράσα ντα ισινάμ ταπεινοί, κα αβάς σαρ  κο Παύλος ντα κα σεβάνας ι εξουσία σο ντινάς ο Ιεχωβά γιαβερέντε. (Πράξ. 21:​20-26) Βοβ τσσουντάς μουρσέν σο τθερένα ι ευθύνη αντρέ κι Χριστιανική κχανγκιρί. Παρόλο σο κερένα λάθη, κι Ιεχωβάσκε γιακχά ανταλά τζενέ ισί «σαρ δώρα». (Εφεσ. 4:8, 11) Κάνα σεβάνασα ανταλέ μουρσέν ντα ντάσα καν ταπεινά κο οδηγίες λένγκε, ατσσάσα πασέ κο Ιεχωβά ντα τθεράσα ειρήνη αμαρέ πφραλέντζαρ.

15. Σο πρέπει τι κεράς;

¹⁵ Η ειρήνη ναστί ατσσόλα τζουβντί άμα κα μουκχάς ι ζήλια τι μπαριόλ. Πρέπει τι νασκιαράς ι ζήλια αμαρέ γκίσταρ ντα μα τι κεράς ι γιαβερέν τι τθερέν ζήλια αντρέ πουμέντε. Πρέπει τι κεράς ανταλά σημαντικά πράγματα για τι ντας καν κι εντολή κι Ιεχωβάσκι «τι κεράς ο πράγματα σο ανένα ειρήνη ντα ντένα ζορ ι γιαβερέν». (Ρωμ. 14:​19) Καλά συγκεκριμέ πράγματα μπορίνασα τι κεράς για τι βοηθίνας ι γιαβερέν τι νασκιαρέν ι ζήλια, ντα σαρ κα ανάς ι ειρήνη;

16. Σαρ βοηθίνασα ι γιαβερέν τι νασκιαρέν ι ζήλια;

¹⁶ Ο τρόπος σο σκεφτίνασα ντα οντουλά σο κεράσα επηρεάνενα μπουτ ι γιαβερέν. Ο ντουνιάς μανγκέλα “τι σικαβάς μπαρικανές” οντουλά σο τθεράσα. (1 Ιωάν. 2:​16) Αλλά ανταβά ανέλα ζήλια. Εκ τρόπος για μα τι κεράς ι γιαβερέν τι ζηλίνεν ισί μα τι βακεράς συνέχεια ι πραγματένγκε σο τθεράσα ή μανγκάσα τι κινάς. Εκ γιαβέρ τρόπος ισί τι αβάς ταπεινοί κάνα τθεράσα προνόμια αντρέ κι κχανγκιρί. Άμα πουτράσα συνέχεια ανταλένγκε, κεράσα ι γιαβερέν τι  ζηλίνεν. Αλλά άμα σικαβάσα ότι πφαμπάσα ι γιαβερένγκε ντα εκτιμίνασα ο λατσσιπέ σο κερένα, βοηθίνασα-λεν τι νιωθίνεν ότι ερεσένα-λεν οντουλά σο τθερένα ντα ανάσα ι ενότητα ντα ι ειρήνη κι κχανγκιρί.

17. Σο κερντέ ι Ιωσηφίσκε πφραλά, ντα σόσκε αβιλό-πες ανταβά;

¹⁷ Μπορίνασα τι νικίνας ι ζήλια! Ντικχέν πάλι ο παράδειγμας σο μουκχλέ ο πφραλά ι Ιωσηφίσκε. Μπουτ μπρεσά πιο σοράν από αζομάν σο μπικιντέ-λες λέσκε πφραλά, ντικχλέ-λες πάλι κι Αίγυπτος. Πριν ο Ιωσήφ τι μουτθαβέλ λένγκε κον ισινέ μπαγιά, δοκιμαντάς-λεν για τι ντικχέλ άμα αλλαξάλεας. Κερντάς εκ τραπέζι ντα ντέλας πιο μπουτ χαμπέ πι χουρντέ πφραλές, ι Βενιαμινίς. (Γέν. 43:​33, 34) Όμως, τίποτα να σικαβέλας ότι λέσκε πφραλά τθερένας ζήλια ι Βενιαμινίσκε. Σικαντέ ότι πφαμπόνας μπαγιά πουμαρέ πφραλέσκε ντα πουμαρέ νταντέσκε. (Γέν. 44:​30-34) Επειδή ο πφραλά ι Ιωσηφίσκε νασκιαρντέας αντρά-πουμένταρ ι ζήλια, βοηθιντέ τι αβέλ πάλι η ειρήνη πουμαρέ φαμιλιάτε. (Γέν. 45:4, 15) Αντικάς, άμα αμέν-ντα νασκιαράσα σο-ντα ζήλια μπορεί τι τθεράσα, κα ατσσικιαράς ι ειρήνη αμαρέ φαμιλιάτε ντα αμαρέ κχανγκιριάτε.

18. Σο κα αβέλ-πες άμα κα τθεράς ειρήνη ι γιαβερέντζαρ σαρ βακερένα ο εδάφια Ιακώβου 3:​17, 18;

¹⁸ Ο Ιεχωβά μανγκέλα τι νασκιαράς ι ζήλια ντα τι ανάς ι ειρήνη. Όμως πρέπει τι μαράς-αμέν για τι κεράς ανταλά ντούι πράγματα. Σαρ ντικχλάμ ανταλέ μαθημάστε, νικιόλα αμένταρ τι ζηλίνας. (Ιακ. 4:5) Ντα τζουβντιάσα εκχέ ντουνιάστε σο ανέλα ζήλια. Άμα όμως ισινάμ ταπεινοί, ερεσένα-αμέν οντουλά σο τθεράσα ντα σικαβάσα εκτίμηση, να κα τθεράς τθαν αντρ’ αμέντε τι μπαριόλ η ζήλια. Αλλά κα τθεράς ειρήνη ι γιαβερέντζαρ, κα πφαμπάς λένγκε πιο μπουτ ντα κα σικαβάς λένγκε πιο μπουτ αγάπη ντα λατσσιπέ.​—Διαβάνεν Ιακώβου 3:​17, 18.