1. Сави бида андя и зависть андэ лэ Иосифоско ери?

О ИАКОВО любияс всаворэн пэстирэ шавэн, ай лэ Иосифос любияс со май фартэ. Сар пэ када диқэнас лэ Иосифостирэ ԥрала? Вонэ линэ лэсти тэ завидуин и важ када линэ лэс тэ вэрыцын. О Иосифо на тердя нисо вэрыто, кай лэса кадя тэ обжанпэ. И всаек и ԥрала битиндэ лэс андо рабство, ай лэ дадэсти ԥэндэ, кай лэстирэ любимонэ шавэс росхаля о дыко зверё. Важ кода кай вонэ завидуинас, андо ери ашэля наймирно и лэ дадэсти кадэлэстар ашэля фартэ ԥарэс по ди (Бытие 37:3, 4, 27—34).

2. Васо, сар пистромэ андэ Галатам 5:19—21, кала завидуис, када фартэ вэрыто?

² Андэ Библия пистромэ, кай и зависть *, када найлащи дила, сави камэл «и ӷрешно тила» и сави на домэкэла лэ манушэс тэ авэл андэ лэ Дэвлэско Царство. (Адиносар Галатам 5:19—21 *.) Через и зависть и мануша ашэн фартэ найлашэ, вэрыцын ек еқэс, споринпэ и фартэ холявэн.

3. Пала со амэ подаса дума андэ кадэя статья?

³ Кода, со сас лэ Иосифостирэ ԥралэнца, сыкавэл, кала завидуин, и мануша на ладин и андо ери на авэла мирно, сар сас. Амэ никала на тердоп кадя, сар лэ Иосифостирэ ԥрала. Но важ кода кай амэ найсовершэни, амаро ди можэт амэн тэ хохавэл  (Иеремия 17:9). Важ када амэ на удивисавас, кай дэкала амэ завидуисарас. Уӷанам, со терэнас дэсавэ мануша, пала савэ пистромэ андэ Библия, и сар када поможыя амэнди тэ полас, сар тэ фэрисавас, кай и зависть тэ на мэкэл и корнёря андэ амаро ди. Посли кода амэ подаса дума, со тэ терас, кай тэ на завидуисарас и тэ ладисарас машкар пэстэ.

4. Васо и филистимляноря завидуинас лэ Исаакости?

⁴ Барвалимос. О Исаако сас барвало мануш, и филистимляноря завидуинас лэстирэ барвалимасти (Бытие 26:12—14). Вонэ дажэ зашонас ԥувьяса и хаинга, анда савэ о Исаако паярэлас пэстирэ стадоря (Бытие 26:15, 16, 27). Адес дэсавэ мануша, сар и филистимляноря, завидуин лэ манушэнди, кастэ май бут ловэ и хабэ. Вонэ найпросто камэн, кай лэндэ тэ авэл кода жэ, со и аврэндэ, ай инке камэн, кай кодэла тэ хасарэн вся, со лэндэ исин.

5. Васо и книжникоря и фарисеёря завидуинас лэ Иисусости?

⁵ Кала варико бутэнди чалёл. И книжникоря и фарисеёря завидуинас лэ Иисусости, важ кода кай лэс любияс о просто народо (Матфея 7:28, 29). О Иисусо сас кодэва, кас бишалдя о Дэл, и во сытярэлас лэ чачимасти. Но и книжникоря и фарисеёря хохавэнас по Иисусо и дэнас дума найдраго пала лэстэ и римонас лэско лашо алав (Марка 15:10; Иоанна 11:47, 48; 12:12, 13, 19). Сости амэн када сытярэл? Нащи тэ домэкас, кай амэ тэ завидуисарас лэ ԥралэнди и лэ ԥэянди, кас цэнин, важ кода кай вонэ андярэн пэс драго. Фэдэр авэла, если амэ екжэнэ андяраса пэс кадя, кай тэ авэл, васо амэн тэ любин (1 Коринфянам 11:1; 3 Иоанна 11).

6. Со терэлас о Диотрефо, кала завидуияс?

⁶ Почотно дила андэ служэния. Андэ пэрво вико о Диотрефо ля тэ завидуий кодэлэнди, ко диқэлас пала собрании. Во камэлас тэ авэл май лашо аврэ христианонэндар, и важ када ля тэ розындярэл найлащи дума важ о апостоло Иоанно и важ авэр ԥрала, савэндэ сас почотно дила андэ собрания (3 Иоанна 9, 10). Амэ на тераса кадя найдраго, сар о Диотрефо. Но всаек амэ можэм тэ завидуисарас, кала варикасти дэн почотно дила, сави амэ аштярасас тэ дэн амэнди. Ай инке амэ можэм тэ гиндосарас, кай стердоп ла май фэдэр.

7. Со амэнца можэт тэ терэл и зависть?

⁷ И зависть, сар бурьяно. Если вой мэкэла корнёря андэ амаро ди, тэ вилас ла авэла фартэ ԥарэс. Ла завистятар лэнпэ инке и авэр найлашэ дилы, например, лэн тэ холявэн, на диқэн англа пэстэ манушэн, гиндон ек пала пэстэ. Инке, кала завидуин, парашэн тэ любин, тэ жалуин и тэ терэн лашимос. Важ када на аштярэн, пока и зависть на розбарёлапэ, сар, о бурьяно андэ тумаро ди. Вишынэн ла со май йто, и на домэкэн, кай вой тэ барёл. Но сар ла тэ улас амэндар?

8. Со трэбуй тэ авэл амэндэ андо ди, кай тэ на завидуисарас?

⁸ Кай тэ на завидуисарас, амэнди трэбуй тэ терас вся, кай тэ на гиндосарас пала пэстэ бут и май бут тэ цэнисарас кода, со амэндэ исин. Если амэндэ андо ди исин када вся, тоди амэ на ласа тэ завидуисарас. Кала о мануш на заваздэл о шэро, во на гиндой пала пэстэ бут. Тоди кацаво мануш на аштярэл, кай лэс фартэ тэ шон сама (Галатам 6:3, 4). Ай о мануш, саво цэний кода, со лэстэ исин, када важ лэстэ фартэ куч и во на сыстойпэ аврэнца (1 Тимофею 6:7, 8). Мануша, савэ на гиндон пала пэстэ бут, цэнин кода, со лэндэ исин, и вонэ радуинпэ, кала аврэндэ вся драго вижал.

9. Андэр со, сар пистромэ андэ Галатам 5:16 и Филиппийцам 2:3, 4, амэнди поможый о свынто духо?

⁹ Амэнди трэбуй о свынто духо, кай тэ на завидуисарас и тэ на гиндосарас пала пэстэ бут и тэ цэнисарас, со амэндэ исин. (Адиносар  Галатам 5:16 *; Филиппийцам 2:3, 4 *.) Лэ Иеговаско свынто духо поможый амэнди тэ полас, со амэндэ андо ди и васо. Лэ Дэвлэстирэ зорэса амэндэ вижала тэ вилас и найлашэ гиндоря и о найлашимос, саво амэндэ андо ди и тэ гиндосарас кати пала лашимос (Псалом 26:2; 51:10). Уӷанам, со сас лэ Моисеёса и лэ Павлоса, савэндэ вижалас тэ на завидуин.

10. Кала дицэля, кай о Моисеё на гиндояс пала пэстэ бут? (Диқэн и картинка пэ обложка.)

¹⁰ Кай о Моисеё сас бари власть по Дэвлэско народо, но во на старыияспэ, со бы тэ на авэл, тэ зритярэл пэстири власть. Еқварэс, о Иегова ля набут свынто духо, саво сас по Моисеё, и дя лэс лэ израильсконэ старейшынонэнди, савэ тердёнас паша бари катуна, кай тэлён лэ Дэвлэсти. Посли када, о Моисеё уӷангля, кай дуй старейшыноря, савэ на вижылэсас каринг кадэя катуна, пэр лэндэ кадяжэ сжыля свынто духо и вонэ линэ тэ андярэн пэс, сар пророкоря. Со во тердя, кала о Иисусо Навино мангля тэ улэн лэн? О Моисеё на ля тэ завидуий кодэлэсти, кай лэнди випэля кацави бах и о Иегова шутя сама лэн. Наоборот, во на гиндояс пала пэстэ бут и лошавэлас кодэлэсти, кай вонэ ашэлэ пророкоря (Числа 11:24—29). Сости амэ можэм тэ сытювас, кай о Моисеё?

11. Со и старейшыноря моӷут тэ сытён лэ Моисеёстар?

¹¹ Если ту старейшына, сас тутэ кацаво, кай тут манглэ тэ сытярэс аврэ ԥралэс, кай во тэ терэл и дила андэ собрания? Ай кадэя дила чалёл тути тэ терэс. Ԥэнаса, тути динэ тэ проандярэс и собрания, сави прожал кажно курко, кай сытён па журнало «Сторожэво башня», и тути фартэ чалёл кадэя дила. Тут манглэ тэ сытярэс аврэ ԥралэс и ту, кадя жэ сар и о Моисеё, на гиндос пала пэстэ бут. Тоди ту на гиндоса, кай будэр тут на цэнин. Ту авэса фартэ лошало лэсти тэ поможыс.

12. Андар со дицол, кай и христианоря на гиндон пала пэстэ бут и цэнин кода, со лэндэ исин?

¹² Давай поласа, со прижалпэ тэ пэрэандярэн лэ ԥралэнди, савэ андэ бэршэндэ. Дэсавэ андэр лэндэ бут бэрша служынас координатороря андо совето старейшын. Но кала лэнди ашэл 80 бэрш, вонэ пэрэдэн пэстири дила аврэнди. Кадяжэ и раёни надзирателя, савэнди ашэл 70 бэрш, на гиндон пала пэстэ бут и пэрэдэн пэсти дила лэ май тэрнэ ԥралэнди и лошалэ тэ терэн авэр дила андэ лэ Иеговастири арӷанизацыя. Ай андэ послидни бэрша бутэ вефильцонэн бишалдэ тэ служын па аврятэ. Кадэла ԥрала и ԥэя, савэ на парашэн тэ кандэн лэ Иеговас, на холявэн пэ кодэла, ко акана терэл и дила, сави вонэ терэнас.

13. Васо о Павло моӷ тэ завидуий?

¹³ О апостоло Павло, када инке ек мануш, саво на гиндояс пала пэстэ бут и цэнияс кода, со лэстэ исин. Во на домэкэлас, кай андэ лэско ди тэ авэл зависть. О Павло анда оди терэлас дила андэ служэния, но на гиндояс пала пэстэ бут и ԥэндя: «Мэ само найбаро анда апостолоря и на ашав, кай пэр мандэ тэ ԥэнэн, кай мэ апостоло» (1 Коринфянам 15:9, 10). О апостоло Павло на сас, сар и 12 апостолоря, савэ служынас лэ Иисусоса, кала во сас пэ ԥув. О Павло ашэля христианино посли кода, сар о Иисусо муля и рисайля каринг и жызня. Кала прожыля время, о Павло ашэля «апостоло важ авэр народоря». Но во никала на сас ек анда кодэла, ко ужалас андэ 12 апостолоря (Римлянам 11:13; Деяния 1:21—26). О Павло на завидуияс лэнди, кай вонэ сас фартэ пашэ лэ Иисусоса. Во цэнияс кода, со лэстэ сас.

14. Со амэ тераса, если на гиндосарас, кай май лашэ аврэндар и цэнисарас кода, со амэндэ исин?

¹⁴ Кала амэ на гиндосарас пала пэстэ бут и цэнисарас кода, со амэндэ исин, тоди амэ терас, сар о Павло и стас патив пэ власть, сави о Иегова дя аврэнди (Деяния 21:20—26).  О Иегова камэл, кай пала собрания тэ диқэн и ԥрала, савэн витидэ важ кадэя дила. И хоть вонэ найсовершэни, о Иегова лэн дя, сар лэ «манушэн, савэ, сар подаркоря» (Эфесянам 4:8, 11). Кала амэ стас патив пэ кадэла мануша и кандас лэн, амэ на хасараса и лащи дружба лэ Иеговаса и кадяжэ лэ ԥралэнца и лэ ԥэянца.

15. Со амэнди трэбуй тэ терас?

¹⁵ Котэ, кай исин бут зависть, нинай ладо машкар и ԥрала. Амэнди трэбуй ку корнё тэ вишынас и зависть амэндар анда оди и тэ старысавас тэ на терас нисо, кай вой тэ авэл аврэндэ. Амэнди трэбуй тэ сэрас када, кай тэ терас, со ԥэнэн о Иегова: «Давай тэ старысавас каринг кода, кай тэ авэл мирно и тэ подритярас ек еқэс» (Римлянам 14:19). Но со трэбуй тэ терас, кай тэ поможысарас аврэнди тэ на завидуин? И со тэ терас, кай тэ авэл мирно?

16. Сар тэ поможысарас аврэнди тэ на завидуин?

¹⁶ Кода, сар амэ диқас пэ вся и со амэ камас тэ терас, фартэ дицол аврэнди. И люма, савяса правий о Сатана, камэл, кай амэ тэ хвалисавас кодэлэса, со амэндэ исин (1 Иоанна 2:16). Через када и мануша лэн тэ завидуин. Тэ поможысарас аврэнди тэ на завидуин можно, если на ласа вся и время тэ дас дума пала кода, со амэндэ исин чи пала кода, со камас тэ тинас. Инке, сар можно тэ поможысарас тэ на завидуин, када тэ на путювас, кай амэндэ исин варисави дила андэ собрания. И кала амэ вся и время дас дума пала када, тоди амэнди лэн тэ завидуин. Авелоп драго тэ дас дума анда вся оди лэ ԥралэнца и лэ ԥэянца и тэ хвалисарас лэн, важ кода со вонэ терэн. Кадэлэса амэ поможысарас  лэнди тэ цэнин кода, со лэндэ исин и терас, кай тэ авэл мирно андэ собрания.

17. Сар паруделэ лэ Иосифостирэ ԥрала и сар када дицэля андэ лэнго ери?

¹⁷ Амэ можэм тэ победисарас и зависть! Давай упалэ шам сама пэ Иосифостирэ ԥрала. Прожыля бут время посли кода, сар вонэ битиндэ лэс андо рабство. Кала о Иосифо диқля лэн андо Египто, во на виԥэндя лэнди, ко во, ай май англал камля тэ диқэл, паруделэ вонэ чи най. Во ақардя лэн тэ хан. И кала вонэ ханас, во май фартэ шолас сама лэ цыкнэдэрэс ԥралэс, лэ Вениаминос (Бытие 43:33, 34). Но и ԥрала на линэ тэ холявэн, кай лэ Вениаминос во шутя май фартэ сама. Ай линэ фартэ тэ пэрэжывают пала пэско цыкнэдэр ԥрал, ай кадяжэ пала пэско дад (Бытие 44:30—34). Важ кода кай лэ Иосифостирэ ԥрала улинэ пэстар и зависть, андэ лэнго ери ашэля драго (Бытие 45:4, 15). Кадя и амэ, кала диқас, кай и зависть кати лэл тэ мэкэл и корнёря, ла трэбуй тэ вишынас. Кадэлэса амэ поможысараса тэ авэл мирно андо ери и андэ собрания.

18. Со авэла, сар пистромэ андэ Иакова 3:17, 18, если амэ терас вся, кай тэ авэл драго?

¹⁸ О Иегова камэл, кай амэндэ тэ на авэл зависть и амэ тэ терас вся, кай тэ авэл вся драго. Амэнди трэбуй анда вся зор тэ старысавас тэ терас вся кадя, кай тэ на завидуисарас и тэ авэл драго. Сар амэ ужэ дям дума и зависть исин кажнонэстэ (Иакова 4:5). Амэ жувас машкар кацавэ мануша, савэ завидуин и терэн кадя, кай и авэр тэ завидуин. Кала амэ терас вся, кай тэ на гиндосарас пала пэстэ бут, тэ цэнисарас кода, со исин, и тэ авас блаӷодарни, тоди амэндэ андо ди на авэла ҭан важ и зависть. Кадэлэса амэ поможысараса кодэлэнди, ко паша амэндэ, кай лэндэ тэ авэл мирно и драго и тоди авэла «о лашимос кодэлэстар, кай кандэн лэ Дэвлэс». (Адиносар Иакова 3:17, 18 *.)