STADI ATIKOL 8
Kamapim Bel Isi na Daunim Pasin Bilong Bel Nogut
“Yumi mas wok strong long mekim ol samting i save kamapim bel isi na ol samting i save strongim ol arapela.”—ROM 14:19.
SINGSING 113 [39] Bel Isi Bilong Yumi
PRIVIU *
1. Pasin bilong bel nogut i mekim wanem long famili bilong Josep?
JEKOP i bin laikim tru olgeta pikinini bilong em, tasol em i laikim moa yet Josep husat i gat 17 krismas. Ol brata bilong Josep i pilim olsem wanem? Ol i bel nogut long em, na dispela i kirapim ol long heitim em. Josep i no mekim wanpela rong na ol brata bilong em i heitim em. Maski i olsem, ol i salim Josep na ol narapela lain i baim em long kamap wokboi nating, na ol i giamanim papa bilong ol na tok olsem wanpela wel animal i kilim feiveret pikinini bilong em. Pasin bilong bel nogut i kirapim ol long bagarapim bel isi insait long famili, na ol i mekim papa i bel hevi tru.—Stt. 37:3, 4, 27-34.
2. Olsem Galesia 5:19-21 i kamapim, wai na yumi mas abrusim pasin bilong bel nogut?
2 Long Baibel, bel nogut * em wanpela bilong “ol pasin em laik nogut bilong bel i kamapim,” na dispela pasin inap mekim na man i no inap kisim laip aninit long Kingdom Bilong God. (Ritim Galesia 5:19-21.) Planti taim, pasin bilong bel nogut i save kirapim man long mekim pasin birua, kros, na belhat.
3. Long dispela atikol, yumi bai skelim wanem samting?
3 Stori bilong ol brata bilong Josep i soim olsem pasin bilong bel nogut inap bagarapim sindaun bilong famili na pinisim bel isi bilong ol. Ating yumi no inap mekim samting em ol brata bilong Josep i bin mekim, tasol yumi sinman na bel bilong yumi inap giamanim yumi. (Jer. 17:9) Olsem na sampela taim yumi inap bel nogut long ol narapela. Yumi ken skelim sampela stori bilong Baibel we i soim klia sampela samting we inap kirapim yumi long bel nogut long ol narapela. Bihain, yumi bai stori long sampela samting yumi ken mekim bilong daunim pasin bilong bel nogut na strongim pasin bilong i stap bel isi.
WANEM SAMTING INAP KIRAPIM YUMI LONG BEL NOGUT?
4. Wai na lain Filistia i bel nogut long Aisak?
4 Planti mani kago. Aisak i gat planti mani kago, na lain Filistia i bel nogut long em. (Stt. 26:12-14) Ol i kisim graun na pulimapim i go daun long ol hulwara we Aisak i yusim long givim wara long ol sipsip na ol bulmakau bilong em. (Stt. 26:15, 16, 27) Wankain olsem ol lain Filistia, long nau sampela manmeri i save bel nogut long ol manmeri i gat planti mani kago. Ol i laikim ol samting em ol narapela i gat, na ol i laik tekewe ol dispela samting.
5. Wai na ol lida bilong lotu i bel nogut long Jisas?
5 Ol manmeri i laikim tru wanpela man o meri. Ol lida bilong lotu Juda i bel nogut long Jisas bikos ol manmeri i laikim tru Jisas. (Mat. 7:28, 29) Jisas em mausman bilong God, na em i skulim ol manmeri long tok i tru. Maski i olsem, ol lida bilong lotu i kamapim ol bikpela tok giaman bikos ol i laik bagarapim gutnem bilong Jisas. (Mak 15:10; Jon 11:47, 48; 12:12, 13, 19) Yumi inap kisim wanem tok lukaut long dispela stori? Yumi no ken bel nogut long ol narapela sapos ol i gat ol gutpela pasin we i mekim na ol wanbilip long kongrigesen i laikim ol. Mobeta yumi bihainim ol gutpela pasin bilong ol.—1 Kor. 11:1; 3 Jon 11.
6. Diotrefes i bel nogut long ol narapela na em i mekim wanem?
6 Wok tiokratik. Long taim bilong ol aposel, Diotrefes i bel nogut long ol man i go pas long mekim wok insait long kongrigesen. Em i laik “i stap nambawan” namel long ol narapela long kongrigesen, olsem na em i kamapim ol tok giaman bilong bagarapim gutnem bilong aposel Jon na ol narapela brata. (3 Jon 9, 10) Ating yumi no inap mekim wankain pasin olsem Diotrefes, tasol yumi inap bel nogut long wanbilip taim em i kisim asainmen we yumi laik kisim—ating yumi pilim olsem yumi tu i winim ol mak em i bin winim.
Bel bilong yumi i olsem graun, na ol gutpela pasin bilong yumi i olsem ol naispela plaua. Tasol pasin bilong bel nogut i olsem gras nogut. Pasin bilong bel nogut inap stopim yumi long kamapim ol gutpela pasin, olsem pasin laikim, pasin sori, na pasin helpim (See paragraph 7)
7. Pasin bilong bel nogut inap mekim wanem long yumi?
7 Pasin bilong bel nogut i olsem wanpela gras nogut. Taim ol sid bilong gras nogut i pundaun long graun, gras nogut bai kamap na i hatwok tru long rausim. Olsem tasol, taim yumi kisim pasin bilong bel nogut, yumi bai hatwok tru long rausim dispela pasin. Man inap bel nogut sapos em i pilim jeles, kisim pasin antap, na tingim laik bilong em yet tasol. Pasin bilong bel nogut inap stopim yumi long kamapim ol gutpela pasin, olsem pasin laikim, pasin sori, na pasin helpim. Taim yumi luksave olsem yumi bel nogut long narapela, kwiktaim yumi mas rausim dispela pasin. Olsem wanem yumi inap daunim pasin bilong bel nogut?
KISIM PASIN DAUN NA AMAMAS LONG OL SAMTING YUMI GAT
Hau bai yumi inap daunim pasin bilong bel nogut? Holi spirit bilong God inap helpim yumi long rausim dispela pasin na kisim pasin daun na amamas long ol samting yumi gat (Lukim paragraf 8-9)
8. Wanem ol pasin inap helpim yumi long daunim pasin bilong bel nogut?
8 Yumi inap daunim pasin bilong bel nogut sapos yumi kisim pasin daun na amamas long ol samting yumi gat. Taim yumi bihainim ol gutpela pasin, yumi no inap bel nogut long ol narapela. Pasin daun bai helpim yumi long sakim pasin bilong apim nem bilong yumi yet. Sapos man i gat pasin daun, em i no inap pilim olsem em i mas kisim planti samting moa winim ol narapela, nogat. (Gal. 6:3, 4) Em bai amamas long ol samting em i gat, na em i no inap skelim em yet wantaim ol narapela. (1 Tim. 6:7, 8) Taim man i bihainim pasin daun na amamas long ol samting em i gat, em bai amamas taim gutpela samting i kamap long ol narapela.
9. Olsem Galesia 5:16 na Filipai 2:3, 4 i kamapim, holi spirit bai helpim yumi long mekim wanem?
9 Yumi mas askim God long helpim yumi long sakim pasin bilong bel nogut, na kamapim pasin daun na amamas long ol samting yumi gat. (Ritim Galesia 5:16; Filipai 2:3, 4.) Holi spirit bilong Jehova inap helpim yumi long skelim gut tingting tru bilong yumi. God inap helpim yumi long rausim ol tingting nogut na kisim ol gutpela tingting. (Sng. 26:2; 51:10) Skelim eksampel bilong Moses na Pol, ol man husat i bin daunim tru pasin bilong bel nogut.
Wanpela yanpela man Israel i ran i go long Moses na Josua na givim ripot olsem 2-pela man long kem i stat long toktok olsem ol profet. Josua i askim Moses long stopim dispela 2-pela man, tasol Moses i no mekim olsem. Em i tokim Josua olsem em i amamas long Jehova i givim holi spirit long ol (Lukim paragraf 10)
10. Wanem samting i bin kamap na dispela inap traim Moses? (Lukim piksa long fran pes.)
10 Moses i holim bikpela namba olsem lida bilong ol manmeri bilong God, tasol em i no jeles long ol narapela bai kisim wok bilong em. Wanpela taim, Jehova i tekewe sampela strong bilong holi spirit long Moses na givim long ol hetman bilong Israel em ol i sanap klostu long haus lotu sel. Bihain liklik, Moses i harim olsem God i givim sampela strong bilong holi spirit long 2-pela narapela hetman em ol i no bin go long haus lotu sel, na ol i stat long toktok olsem ol profet. Moses i mekim wanem taim Josua i tokim em long stopim dispela 2-pela hetman? Jehova i tingim dispela 2-pela hetman, na Moses i no bel nogut long ol. Em i daunim em yet na amamas long tupela. (Nam. 11:24-29) Yumi inap kisim wanem skul long Moses?
Hau bai ol elda inap bihainim pasin daun olsem Moses i bin mekim? (Lukim paragraf 11-12) *
11. Olsem wanem ol elda inap bihainim pasin bilong Moses?
11 Sapos yu mekim wok elda na yu laikim tru asainmen bilong yu insait long kongrigesen, bai yu pilim olsem wanem sapos lain elda i askim yu long trenim narapela brata? Ating yu laikim tru asainmen bilong lukautim Wastaua Stadi long olgeta wik. Taim yu trenim narapela brata, em inap kisim dispela asainmen. Tasol sapos yu gat pasin daun olsem Moses, yu no inap kisim tingting kranki. Yu bai amamas long helpim em.
12. Olsem wanem planti Kristen long nau i soim olsem ol i bihainim pasin daun na amamas long wok ol i mekim?
12 Tingim samting i kamap long planti brata taim ol i kamap lapun. Inap planti yia, ol i mekim wok olsem kodineta bilong lain elda. Tasol taim ol i winim 80 krismas, ol i lusim dispela asainmen. Taim ol wasman sekit i winim 70 krismas, ol i daunim ol yet na lusim dispela wok na mekim narapela wok long kongrigesen. Insait long sampela yia i go pinis, planti bratasista long Betel long olgeta hap i kisim ol nupela asainmen long mekim wok painia. Ol dispela bratasista i no bel nogut long ol narapela husat i kisim olpela asainmen bilong ol.
13. Wanem samting inap kirapim Pol long bel nogut long ol 12-pela aposel?
13 Aposel Pol i stap gutpela piksa long bihainim pasin daun na amamas long wok em i mekim. Pol i no bel nogut long ol narapela. Em i givim bel tru long autim tok, na em i daunim em yet na tok: “Ol arapela aposel i winim mi. Mi no gutpela man inap long ol i kolim mi wanpela aposel.” (1 Kor. 15:9, 10) Ol 12-pela aposel i bihainim Jisas taim em i mekim wok bilong em hia long graun, tasol Pol i kamap Kristen bihain long Jisas i dai na kirap bek. Bihain Pol i kamap “wanpela aposel God i salim i go long ol manmeri,” tasol em i no kamap wanpela bilong ol 12-pela aposel. (Rom 11:13; Apo. 1:21-26) Ol dispela 12-pela man i bin pas gut wantaim Jisas, tasol Pol i no bel nogut long ol, nogat, em i amamas long wok em inap mekim.
14. Yumi bai mekim wanem sapos yumi bihainim pasin daun na amamas long wok yumi mekim?
14 Sapos yumi bihainim pasin daun na amamas long wok yumi mekim, yumi bai bihainim pasin bilong Pol na soim rispek long ol man em Jehova i bin makim ol long mekim wok bos. (Apo. 21:20-26) Em i stretim rot long ol man inap go pas long mekim wok insait long kongrigesen. Maski ol i sinman, Jehova i tingim ol “olsem ol presen.” (Efe. 4:8, 11) Taim yumi soim rispek long ol dispela man na daunim yumi yet na bihainim tok bilong ol, yumi bai pas gut wantaim Jehova na stap bel isi wantaim ol wanbilip bilong yumi.
“MEKIM OL SAMTING I SAVE KAMAPIM BEL ISI”
15. Yumi mas mekim wanem?
15 Sapos yumi gat pasin bilong bel nogut, yumi no inap stap bel isi wantaim ol narapela. Yumi mas rausim olgeta kain tingting we inap kirapim yumi long bel nogut long ol narapela, na no ken kirapim ol narapela long bel nogut long yumi. Yumi mas bihainim tok bilong Jehova na “wok strong long mekim ol samting i save kamapim bel isi na ol samting i save strongim ol arapela.” (Rom 14:19) Yumi mas mekim wanem na bai yumi no ken kirapim ol narapela long bel nogut? Olsem wanem yumi inap strongim pasin bilong i stap bel isi?
16. Hau bai yumi inap helpim ol narapela long daunim pasin bilong bel nogut?
16 Tingting na pasin bilong yumi i gat strong long stiaim ol narapela. Ol manmeri bilong dispela graun i laik bai yumi “hambak” long ol samting yumi gat. (1 Jon 2:16) Tasol dispela pasin i save kirapim man long bel nogut long narapela. Sapos yumi no laik kirapim ol narapela long bel nogut long yumi, orait yumi no ken toktok oltaim long ol samting yumi gat na ol samting yumi laik baim. Na tu, yumi mas bihainim pasin daun taim yumi mekim ol wok bilong yumi insait long kongrigesen. Sapos yumi toktok oltaim long ol wok yumi mekim, dispela inap kirapim ol narapela long bel nogut long yumi. Tasol taim yumi tingim gut ol narapela na tok amamas long wok ol i mekim, yumi helpim ol long amamas long wok bilong ol, na yumi strongim pasin wanbel na bel isi insait long kongrigesen.
17. Ol brata bilong Josep inap kamapim gen wanem pasin insait long famili? Bilong wanem?
17 Yumi inap sakim pasin bilong bel nogut! Tingim gen eksampel bilong ol brata bilong Josep. Ol i mekim nogut tru long em, na planti yia bihain ol i bungim em long Isip. Paslain long Josep i tokim ol brata bilong em long em i husat, em i traim ol bilong painimaut sapos ol i bin senisim pasin bilong ol. Em i stretim rot long ol inap kaikai, na em i givim planti moa kaikai long liklik brata bilong em, Benjamin. (Stt. 43:33, 34) Tasol ol brata bilong em i no mekim wanpela samting i soim olsem ol i bel nogut long Benjamin, nogat. Ol i soim olsem ol i tingim tru brata bilong ol, na papa bilong ol, Jekop. (Stt. 44:30-34) Ol brata bilong Josep i lusim pasin bilong bel nogut, olsem na ol inap kamapim gen bel isi insait long famili. (Stt. 45:4, 15) Olsem tasol, sapos yumi tu i rausim olgeta kain tingting bilong bel nogut, yumi bai helpim famili bilong yumi na kongrigesen long i stap bel isi.
18. Olsem Jems 3:17, 18 i kamapim, wanem samting bai kamap sapos yumi strongim pasin bilong i stap bel isi?
18 Jehova i laik bai yumi sakim pasin bilong bel nogut na strongim pasin bilong i stap bel isi. Yumi mas wok strong long mekim ol dispela samting. Olsem yumi stori pinis long dispela atikol, yumi inap kisim pasin bilong bel nogut. (Jems 4:5) Yumi stap namel long ol manmeri em ol i gat pasin bilong bel nogut. Tasol sapos yumi kisim pasin daun, na amamas long ol samting yumi gat, na tok amamas long ol narapela, yumi no inap kisim pasin bilong bel nogut. Yumi bai strongim pasin bilong i stap bel isi na yumi bai kamapim ol gutpela pasin.—Ritim Jems 3:17, 18.
SINGSING 130 [35] Fogivim Narapela
^ par. 5 Bel isi i stap insait long oganaisesen bilong Jehova. Tasol dispela bel isi inap bagarap sapos yumi kisim pasin bilong bel nogut. Long dispela atikol, yumi bai stori long ol samting i save kamapim pasin bilong bel nogut. Yumi bai stori tu long hau yumi inap daunim dispela pasin nogut na strongim pasin bilong i stap bel isi.
^ par. 2 MINING BILONG TOK: Stori bilong Baibel i soim olsem pasin bilong bel nogut inap kirapim man long laikim ol samting em ol narapela i gat, na em inap tekewe ol dispela samting.
^ par. 61 STORI BILONG PIKSA: Taim lain elda i mekim miting bilong ol, i gat wanpela lapun brata husat i save lukautim Wastaua Stadi bilong kongrigesen, na ol i askim em long trenim wanpela yangpela elda long mekim dispela wok. Maski dispela lapun brata i laikim tru asainmen bilong em, em i bihainim gut disisen bilong ol elda, na em i givim ol skultok long dispela yangpela brata na tok amamas long em.
