ЭСКЕРОН ПОННА СТАТЬЯ 8
Тупаса улыны тырше но вожъяськонэн нюръяське
«Утчаломе сыӵе улонэз, кудӥз тупаса улонэз вае. Ог-огмес валэктыса-дышетыса уломе» (РИМ. 14:19).
113-ТӤ КЫРӞАН Мир — плод праведности
ТА СТАТЬЯЫН a
1. Кызьы вожъяськон Иосифлэн семьяез вылын шӧдӥськиз?
ИАКОВ вань пиоссэ яратӥз, нош 17 аресъем пиезлы со тужгес но яратэмзэ возьматӥз. Кызьы та шоры учкизы Иосифлэн агайёсыз? Соос солы вожъяськыны кутскизы, но соин сэрен вынзэс адӟемпотостэм каризы. Иосиф ӧз лэсьты номыр но, мар понна солэн агайёсыз сое адӟемпотостэм карыны кулэ вал. Озьы ке но Иосифлэн агайёсыз сое ляльчие вузазы, нош атайзылы веразы, сое сьӧсь пӧйшур кесяз шуыса. Вожъяськонлы сётскеменызы, соослэн семьяязы тупаса улонзы быриз, но соос атайзылэсь сюлэмзэ туж вӧсь каризы (Ул.-выл. 37:3, 4, 27—34).
2. Галатъёслы 5:19—21 гожтэмъя, малы вожъяськон сокем кышкыт луэ?
2 Библиын вожъяськон b пыртэмын «лулмугорлэн сьӧлыко ужъёсыз» пӧлы, кудъёсыз адямилы Инмарлэн Эксэйлыказ пырыны люкето. (Лыдӟе Галатъёслы 5:19—21.) Ӵем дыръя вожъяськон вае таӵе урод емышъёс: адӟонтэм карон, керетонъёс но вожпотон.
3. Мае ми эскеромы та статьяын?
3 Иосифлэн агайёсыз вылын адӟиське, кызьы вожъяськон быгатэ адямиослэсь умой кусыпъёссэс сӧрыны но семьяын тупаса улонэз быдтыны. Иосифлэн агайёсыз кадь ми ноку но ӧм лэсьтысалмы, озьы ке но ми тырбыдэстэмесь но, котькудмылэн сюлэммы кескич (Иер. 17:9). Соин ик паймонэз ӧвӧл, куддыръя ми мукетъёсызлы вожъяськиськомы шуыса. Ойдолэ эскеромы Библиысь алӥсь примеръёсты, кудъёсыз милемлы валаны юрттозы, малы вожъяськон сюлмамы выжы лэзьыны быгатэ. Собере ми эскеромы пайдаё визь-кенешъёсты, кудъёсыз юрттозы вожъяськонэн нюръяськыны но тупаса улыны.
МАЛЫ ВОЖЪЯСЬКОН КЫЛДЫНЫ БЫГАТЭ
4. Малы филистим калыкысь адямиос Исааклы вожъяськизы?
4 Ваньбуро улон. Исаак узыр адями вал, но филистим калыкысь адямиос солэн ваньбуро улэмезлы вожъяськизы (Ул.-выл. 26:12—14). Соос сюен ӵоксазы колодчаосты, кудъёсысьтыз Исаак ву басьтэ вал но пудо-животъёссэ люкта вал (Ул.-выл. 26:15, 16, 27). Филистим калык сямен, туннэ но куд-ог адямиос вожъясько соослы, кинъёслэн коньдонзы но ваньбурзы тросгес. Та адямиослэн потэ, соослэн но мед луоз шуыса созы, марзы вань мукетъёсызлэн, нош со сяна, соослэн потэ, мукетъёсызлэн созы медаз луы ини шуыса.
5. Малы религиозной кивалтӥсьёс Иисуслы вожъяськизы?
5 Гажамон луон. Иудей калыкысь религиозной кивалтӥсьёс Иисус Христослы вожъяськизы, малы ке шуоно сое огшоры калык яратӥз (Матф. 7:28, 29). Иисус Инмарлэсь кылъёссэ вераз но зэмлыклы дышетӥз. Нош религиозной кивалтӥсьёс Иисус сярысь пӧяса веразы но солэсь ӟеч нимзэ саптазы (Марк 15:10; Иоанн 11:47, 48; 12:12, 13, 19). Малы со милемыз дышетэ? Милемлы вожъяськоно ӧвӧл соослы, кинъёсты вын-агайёс но сузэр-апайёс умой сямъёссы понна дунъяло. Со интые, ми будэтыны кулэ сямъёсты, кудъёсыз понна милемыз яратозы (3 Иоанн 11; 1 Кор. 11:1).
6. Кытысь адӟиськиз Диотрефлэн вожъяськись луэмез?
6 Ужан-тыршонын дано ужъёс. Нырысетӥ даурын Диотреф вожъяськыны кутскиз соослы, кинъёс христиан кенешын кивалтон ужез нуизы. Солэн «азьпалъяськыны» мылкыдыз вал, соин ик со апостол Иоанн сярысь но кылкутӥсь мукет вын-агайёс сярысь урод кылъёс вӧлмытыса улӥз (3 Иоанн 9, 10). Ми ноку но Диотреф сямен асьмеды ум возе ке но, милям вожъяськон мылкыдмы кылдыны быгатэ, куке кинлы ке но дано ужъёс сёто, кудъёссэ милям асьмелэн быдэсъяммы потэ вал. Вожъяськон кылдыны быгатэ тужгес но соку, куке малпаськомы, со ужъёсты ми умойгес быдэстысалмы шуыса.
Милесьтым сюлэммес ӵошатыны луэ музъемен, нош умой сямъёсмес — чебер сяськаосын. Нош вожъяськон жагтурынлы укша. Вожъяськон согыны быгатэ умой сямъёсты, кылсярысь, яратонэз, гажан-жалянэз но ӟечлыкез (Учке 7-тӥ абзацез.)
7. Кызьы ми вылын шӧдӥськыны быгатэ вожъяськон?
7 Вожъяськон жагтурынлы укша. Со сюлмамы выжы лэзиз ке, сое ишкалтыны туж секыт луоз. Вожъяськонлы луыса кылдо мукет урод сямъёс но, кылсярысь, вожан, вылтӥяськон но астэ гинэ яратон. Кызьы жагтурын умой будосэз согыны быгатэ, озьы ик вожъяськон но согыны быгатэ умой сямъёсты, кылсярысь, яратонэз, гажан-жалянэз но ӟечлыкез. Соин ик эн возьмалэ, куке вожъяськон буй-буй будыны кутскоз,— ишкалтэ сое соку ик, куке адӟоды, со потыны кутскиз шуыса. Нош кызьы соин нюръяськоно?
ЗӤБЫТ-ВОСТЭМ ЛУЭ НО ШУМПОТЭ СОЛЫ, МАРДЫ ВАНЬ
Кызьы нюръяськоно жагтурынлы укшась вожъяськонэн? Святой духлэн юрттэменыз, ми быгатӥськомы вожъяськонэз сюлмысьтымы выжыеныз валче ишкалтыны но со интые будэтыны зӥбыт-востэм луонэз но шумпотонэз солы, мармы вань (Учке 8-тӥ но 9-тӥ абзацъёсты.)
8. Кыӵе сямъёс юрттозы милемлы вожъяськонэн нюръяськыны?
8 Ми вожъяськонэн нюръяськыны быгатомы, зӥбыт-востэм сямез будэтыса но шумпотыса солы, мармы вань. Милям сюлэммы та сямъёсын тырмемын ке, отын вожъяськонлы инты уз кыльы. Зӥбыт-востэм луон юрттоз милемлы вылтӥяськытэк улыны. Сыӵе адями уг возьма, сое данъялозы шуыса (Гал. 6:3, 4). Адями, кудӥз шумпотэ солы, маиз солэн вань, мукетъёсыныз ассэ уг ӵошаты (1 Тим. 6:7, 8). Зӥбыт-востэм но тыр луись адями мукетъёслэн азинсконъёссылы шумпотэ.
9. Мар карыны юрттэ милемлы святой дух, Галатъёслы 5:16 но Филиппыослы 2:3, 4 лыдэ басьтыса?
9 Инмарлэн святой духезлэн юрттэменыз, ми быгатомы вожъяськытэк, зӥбыт-востэм но шумпотыса улыны солы, мармы милям вань. (Лыдӟе Галатъёслы 5:16; Филиппыослы 2:3, 4.) Святой дух юрттэ милемлы сюлэм малпанъёсмес эскерыны. Инмарлэн юрттэменыз, ми быгатомы урод малпанъёсмес но шӧдонъёсмес палэнтыны, соос интые умой сямъёсты будэтыса (Пс. 25:2; 50:12). Тодамы ваёмы Моисейлэсь но Павеллэсь примеръёссэс, кудъёсыз вожъяськон сямзэс вормыны быгатӥзы.
Израиль калыкысь пияш Моисей но Иисус Навин доры бызьыса лыктэ но вера, калык пӧлын кык адямиос асьсэды пророкъёс кадь возё шуыса. Иисус Навин куре Моисеез соосты дугдытыны, нош Моисей озьы лэсьтыны пумит луэ. Со Иисус Навинлы шумпотэмзэ вера, Иегова со адямиослы святой духсэ сётӥз шуыса. (Учке 10-тӥ абзацез.)
10. Кыӵе учыр Моисейлэсь зӥбыт-востэм луэмзэ эскериз, вылды? (Учке вылбамысь суредэз.)
10 Моисейлы Инмарлэн калыкеныз кивалтыны бадӟым уж сётэмын вал, нош со вань кужмысьтыз та интыез борды кутӥськыса улыны ӧз тыршы. Кылсярысь, одӥг пол Иегова Моисейлы сётэм святой духлэсь оглюкетсэ басьтӥз но сётӥз израиль калыкысь куд-ог тӧроослы, кудъёсыз скиния дорын сылӥзы. Ӝоген Моисей тодӥз: кык тӧроослы но, кудъёсыз скиния доры ӧз потэ, святой дух сётэмын вал но соос асьсэды пророкъёс кадь возьыны кутскизы. Кызьы со ассэ возиз, куке Иисус Навин соосты дугдытыны куриз? Моисей ӧз вожъяськы, Иегова соослы но саклыксэ висъяз шуыса. Со интые, со ассэ зӥбыт-востэм возиз но шумпотӥз, соос азьпалзэ тодытыса вераны кутскизы шуыса (Лыд. 11:24—29). Малы дышетэ милемыз Моисейлэн учырез?
Кызьы христиан тӧроос адӟем карыны быгато Моисейлэсь зӥбыт-востэм сямзэ? (Учке 11-тӥ но 12-тӥ абзацъёсты.) c
11. Кызьы тӧроос Моисейлэсь адӟем карыны быгато?
11 Тӥ тӧро луиськоды ке, тӥледыз куке но куризы-а мукет агаез дышетыны, со быдэсъяны мед быгатоз шуыса кенешысь ужъёсты, кудъёссэ тӥ асьтэос шумпотыса быдэсъяды? Шуом, тӥ котькуд арняе кенешын «Возьмаськон башняез» эскеронэз ортчытъяськоды, но тӥледлы та уж туж кельше. Тӥ Моисей кадь зӥбыт-востэм луыны тыршиськоды ке, соку уд малпалэ, мукет агаез дышетыны куризы бере, тӥледыз уг дунъяло ини шуыса. Со интые, тӥ солы шумпотыса юрттоды.
12. Кызьы тросэз христианъёс возьмато, соос зӥбыт-востэмесь луо но шумпото шуыса солы, марзы вань?
12 Табере эскеромы учырез, кудӥныз пумиськыло трос арлыдо вын-агайёс. Соос пӧлысь куд-огъёсыз трос аръёс ӵоже тӧроослэн кенешсылэсь ужзэ радъясь луыса ужазы-тыршизы. Нош 80 арес тырмемзы бере, соос ужъёссэс, дась луыса, мукетъёсызлы сёто. Ёросэз чакласьёс но, 70 арес тырмемзы бере, ужъёссэс зӥбыт-востэмен егитгес агайёслы сёто но Иеговалэн организацияз мукет ужъёсты быдэсъяны соглаш карисько. Нош Вефильын тросэз ужась-тыршисьёс берпум аръёсы пионер луыса ужаны-тыршыны ыстэмын вал. Та оскымон вын-агайёс но сузэр-апайёс йыркурен уг учко соос шоры, кинъёс али быдэсъяло со ужъёсты, кудъёссэ куке но соос асьсэос быдэсъязы.
13. Малы Павел 12 апостолъёслы вожъяськыны быгатысал?
13 Апостол Павел — эшшо одӥгез, кин ассэ зӥбыт-востэм возиз но шумпотӥз солы, маиз вал. Со ӧз лэзьы, вожъяськон сюлмаз мед будоз шуыса. Павел ӟырдыт мылкыдын ужан-тыршонэ пыриськиз, озьы ке но зӥбыт-востэмен вераз: «Мон уго апостолъёс пӧлысь ваньмызлэсь пичиез, апостол шуыса лыдъяны но сылӥсьтэм» (1 Кор. 15:9, 10). 12 апостолъёс Иисусэн ӵош вал, куке со музъем вылын ужаз-тыршиз. Нош Павел христиан мурт луиз, Христослэн кулэмез но улӟемез бере гинэ. Берлогес Павел «язычникъёслэн апостолзы» луыса ужаз-тыршиз ке но, 12 апостолъёс пӧлы со ноку но ӧз пыры (Рим. 11:13; Ап. уж. 1:21—26). Павел ӧз вожъяськы та 12 пиосмуртъёслы, озьы ик соослэн Иисусэн матысь кусыпъёссылы но. Со интые, Павел шумпотыса улӥз солы, маиз вал.
14. Кызьы ми асьмеды возёмы, куке зӥбыт-востэм луыны тыршиськомы но шумпотӥськомы солы, мармы милям вань?
14 Асьмеды зӥбыт-востэм возьыса но шумпотыса солы, мармы милям вань, ми, Павел кадь, гажаломы соосты, кинъёсты Иегова кивалтыны пуктӥз (Ап. уж. 21:20—26). Иеговалэн малпамезъя, христиан кенешын кивалтэт сётэмын быръем пиосмуртъёслы. Соос тырбыдэстэмесь ке но, Иегова соос шоры учке «саламъёс-кузьымъёс» шоры кадь (Еф. 4:8, 11). Куке ми соосты гажаськомы но зӥбыт-востэмен кивалтэтсэс быдэсъяськомы, милям луозы матысь кусыпъёсмы Иеговаен, озьы ик вын-агайёсынымы но сузэр-апайёсынымы.
ТЫРШЕ ТУПАСА УЛЫНЫ
15. Мар милемлы карыны кулэ?
15 Отын, кытын вожъяськон буй-буй будэ, вын-агайёс куспын тупаса улон куасьме. Милемлы вожъяськонэз сюлмысьтымы выжыеныз ик ишкалтоно но мукетъёсызлэн сюлмазы сое кизёно ӧвӧл. Милемлы тае одно ик тодамы возьыны кулэ, Иеговалэн та курон-косонэзлэсь кылзӥськон понна: «Утчаломе сыӵе улонэз, кудӥз тупаса улонэз вае. Ог-огмес валэктыса-дышетыса уломе» (Рим. 14:19). Нош мар кароно, мукетъёсызлы вожъяськонэн нюръяськыны юрттон понна но тупаса улон понна?
16. Кызьы мукетъёсызлы юрттыны луэ вожъяськонэн нюръяськыны?
16 Милям ужъёсмы но мылкыдмы мукетъёсыз вылын туж зол шӧдӥськыны быгато. Та дуннелэн милесьтым мылкыдмес ӝутэмез потэ, ми ваньбуренымы ушъяськыса мед уломы шуыса (1 Иоанн 2:16). Нош соин сэрен вожъяськон кылдэ. Ми быгатомы юрттыны мукетъёсызлы вожъяськон мылкыдын нюръяськыны, куке ялан ум вераське арбериос сярысь, кудъёсыз милям вань яке кудъёссэ ми басьтыны малпаськомы. Эшшо одӥгез амал — зӥбыт-востэмен учкыны ужъёс шоры, кудъёсыз милемлы кенешын сётэмын. Соос сярысь гинэ вераськыса улӥськомы ке, соку ми асьмелы вожъяськыны муг сётӥськомы. Нош ми вын-агайёсын но сузэр-апайёсын сюлмысь тунсыкъяськиськомы ке, озьы ик ужъёссы понна соосты ушъяськомы ке, ми юрттӥськомы соослы шумпотыны солы, марзы вань, но кенешын тупаса но огкылысь улыны.
17. Мар карыны быгатӥзы Иосифлэн агайёсыз но малы?
17 Ми вожъяськонэз вормыны быгатӥськомы! Нош ик саклыкмес висъяломы Иосифлэн агайёсызлы. Трос аръёс ортчизы со дырысен, куке соос Иосифез ляльчие вузазы. Куке Иосиф агайёссэ Египетын пумитаз, кин луэмзэ со соослы соку ик ӧз вера, нош нырысь эскериз, соос воштӥськизы-а шуыса. Со соосты сиськыны ӧтиз, но, мукетъёсыныз ӵошатыса, Иосиф пичи вынзылы, Вениаминлы, тросгес сиён сётӥз (Ул.-выл. 43:33, 34). Нош агайёс Вениаминлы ӧз вожъяське. Со интые, соос туж сюлмаськизы вынзы сярысь но Иаков атайзы сярысь (Ул.-выл. 44:30—34). Иосифлэн агайёсыз вожъяськонзэс вормизы бере, соослэн семьязы нош ик тупаса улыны кутскиз (Ул.-выл. 45:4, 15). Озьы ик ми но, выжыеныз валче вожъяськонэз ишкалтӥськомы ке, ми семьяямы но кенешамы тупаса улонэз утьыны юрттӥськомы.
18. Иаковлэсь 3:17, 18 лыдэ басьтыса, мар луоз, ми тупаса улонэз утимы ке?
18 Иеговалэн потэ, ми вожъяськонэн мед нюръяськомы но тупаса улыны мед тыршомы шуыса. Милемлы вань кужмысьтымы тае быдэсъяны тыршоно. Кызьы ми эскеримы, милям ваньмылэн вожъяськон мылкыдмы вань. Озьы ик ми улӥськомы дуннеын, кудӥз мылкыдэз ӝутэ вожъяськыса улыны. Нош ми асьмеды зӥбыт-востэм возьыны тыршиськомы ке, шумпотыса но тау карыса улӥськомы ке солы, мармы вань, соку вожъяськонлы сюлмамы инты уз кыльы ни. Со интые, ми тупаса улонэз утёмы но «шонер улонлэсь емышсэ» будэтыны быгатомы. (Лыдӟе Иаковлэсь 3:17, 18.)
130-ТӤ КЫРӞАН Прощайте друг друга
a Иеговалэн организацияз ваньзы ог-огенызы тупаса уло, нош вожъяськон тупаса улонлы кышкытлык вайыны быгатэ. Та статьяын ми эскеромы, маин сэрен вожъяськон кылдэ, озьы ик тодомы, кызьы соин нюръяськоно но кызьы мукетъёсыныз тупаса улоно.
b ВАЛЭКТОН. Библия верамъя, вожъяськонлы луыса адямилэн мылкыдыз кылдэ, солэн но мед луоз шуыса соиз, марзы вань мукетъёсызлэн, нош со сяна, солэн потэ, мукетъёсызлэн созы медаз луы ини шуыса.
c СУРЕДЫН: Тӧроослэн кенешсылэн пумиськоназы арлыдо агаез, кудӥз кенешын «Возьмаськон башняез» эскеронэз ортчытъя, дышетыны куро та ужез быдэсъяны егитгес агаез. Арлыдо агай та ужзэ быдэсъяны туж яратэ ке но, тӧроослэн кутэм ужпуменызы со вань сюлмысьтыз соглаш кариське: со агайлы валэктӥз, кызьы та ужез быдэсъяны луоз, но сое сюлмысь ушъя.
