ALATIKE AKO 8
Tou Haga Kumi Te Tokalelei Kae Tou Tauʼi Te Manumanū
“Tou haga kumi te ʼu meʼa ʼae ʼe ʼaoga ki te tokalelei pea mo ʼae ʼe tou fefakalotomalohiʼaki ai.”—LOMA 14:19.
KATIKO 113 Kua Tou Ma’u Te Tokalelei
TE ’U MANATU FAKANOUNOU *
1. Kotea te ʼu fua ʼo te maheka ki te famili ʼo Sosefo?
NEʼE ʼofa ia Sakopo ki ʼona foha fuli kae neʼe makehe age tona ʼofa ia Sosefo. Kotea ʼae neʼe logoʼi e te ʼu tehina ʼo Sosefo? Neʼe natou maheheka pea mo fehihiʼa kia Sosefo logo la neʼe mole ina fai he aga ʼe kovi. ʼI tona kei taʼu 17, neʼe natou fakatau ia ia ohage ko he tagata kaugana. Pea neʼe natou lohiʼi tanatou tamai ʼo natou ui age kia ia neʼe kai tona foha fakapelepele e te manu. Meʼa fakaʼofaʼofa koteʼuhi neʼe puli ai leva te tokalelei ʼi te famili pea neʼe lotomamahi ʼaupito ai tanatou tamai ʼuhi pe ko tanatou maheka.—Sen. 37:3, 4, 27-34.
2. Ka tou lau ia Kalate 5:19-21, he koʼe ʼe fakatupu tuʼutamaki te manumanū?
2 ʼI te Tohi-Tapu ko te kupu manumanū * ʼe kau ki “te ʼu gaue ʼo te kakano” pea ʼaki te taʼi aga ʼaia ʼe mole feala ke tou maʼu te Puleʼaga ʼo te ʼAtua, kae ʼe ina taki tatou ki te mate. (Lau ia Kalate 5:19-21.) Ko te taʼi aga ʼaia ʼe hage ko he meʼa kafo kona ʼe ina fakatupu tuʼumaʼu he ʼu kē, fakatupu itaita mo fakatupu maveuveu.
3. Kotea ʼae ka tou vakaʼi anai ʼi te alatike ʼaeni?
3 ʼE ha ʼi te faʼifaʼitaki ʼo te ʼu tehina ʼo Sosefo, ko te maheka ʼe ina maumauʼi te ʼu felogoi lelei pea mo te tokalelei ʼo he famili. Logo la ʼe mole tou fai anai te aga ʼae neʼe fai e te ʼu tehina ʼo Sosefo ʼae ko tona fakatau, kae ʼe tou maʼu fuli he loto ʼe agahala mo kaka. (Sel. 17:9) Koia ʼe tonu ai ke tou haga tauʼi tuʼumaʼu te maheka. ʼE tou vakaʼi anai ʼi te alatike ʼaeni te ʼu faʼifaʼitaki Fakatohi-tapu ʼe tokoni mai anai ke tou mahino ʼe feala pe ki te maheka, peʼe ko te manumanū ke tauaka ʼi ʼotatou loto. ʼE tou toe vakaʼi ai te ʼu faʼahiga puleʼaki moʼo tauʼi ʼo te maheka peʼe ko te manumanū ke tou maʼu ai te tokalelei.
KOTEA ʼAE ʼE INA FAKATUPU TE MAHEKA?
4. He koʼe neʼe maheka te kau Filisitini kia Isaake?
4 Ko te ʼu koloa. Ko Isaake neʼe ko te tagata maʼu koloa pea neʼe maheka te kau Filisitini kia ia. (Sen. 26:12-14) Neʼe natou pupunu te ʼu vai keli ʼae neʼe ʼaoga moʼo fakainu tana faga manu. (Sen. 26:15, 16, 27) Pea ohage pe ko natou, ʼe feala ki ʼihi ia ʼaho nei ke natou maheheka kia natou ʼae ʼe maʼu koloa age ia natou. ʼE natou fakaʼamu ke natou maʼu age la te ʼu koloa ʼaia kae hala natou.
5. He koʼe neʼe maheka te kau takitaki lotu kia Sesu?
5 Moka ʼofainaʼi he tahi. Ko te kau takitaki lotu Sutea neʼe natou maheheka kia Sesu koteʼuhi neʼe ʼoʼofa te hahaʼi kia ia. (Mat. 7:28, 29) Neʼe fakafofoga e Sesu ia te ʼAtua pea neʼe ina akoʼi te moʼoni. Logo la te faʼahi ʼaia kae neʼe fakamafola e te kau takitaki lotu he ʼu loi ʼo ʼuhiga mo ia pea mo natou fai he ʼu fasituʼu ke ʼulihi ai tona matagafua. (Mko. 15:10; Soa. 11:47, 48; 12:12, 13, 19) Kotea te ako kia tatou? ʼE tonu ke tou tauʼi te ʼu agaaga ʼo te maheka ki he tahi ʼo te kokelekasio ʼe ʼofainaʼi e ʼihi ʼuhi ko ʼona kalitate. Tou faiga ke tou faʼifaʼitakiʼi ʼona kalitate fonu ʼi te ʼofa.—1 Ko. 11:1; 3 Soa. 11.
6. Neʼe liliu feafeaʼi ia Tiotefeso ʼo maheka?
6 Te ʼu pilivilesio ʼi te kokelekasio. ʼI te ʼuluaki sekulo neʼe maheka ia Tiotefeso kia natou ʼae neʼe natou takitaki te kokelekasio Fakakilisitiano. Neʼe ina fia “maʼu te ʼuluaki tuʼulaga” ia natou ʼaia. Neʼe laukovi ki te apositolo ko Soane pea mo ʼihi tehina takitaki ʼo ʼulihi ai tonatou matagafua. (3 Soa. 9, 10) ʼE feala pe mo tatou ke tou hage ko Tiotefeso ʼo tou maheka ki hotatou tehina peʼe tuagaʼane kua foaki age hona ʼu pilivilesio neʼe tou fakaʼamu mo tatou ki ai. Tafito la moka tou manatu ʼe tou fealagia pe la mo tatou ʼi te fakahoko ʼo te ʼu gaue ʼaia.
7. Kotea anai te ʼu fua kovi ʼo te maheka kia tatou?
7 ʼE fakatatau te maheka ki he fuʼu ʼakau kona. ʼI te temi pe ʼae kua malave loto ai te maheka pea lagi faigataʼa anai hona toe pulihi. ʼE lahi te ʼu agaaga ʼe kovi ʼo te maheka ohage la ko te fuaʼa, ko te fiatuʼu pea mo te manatu pe kia kita totonu. Ko te ʼu aluʼaga ʼaia mole feala ke maʼu ai te ʼofa, te agalelei mo te manavaʼofa. Kapau ʼe tou sisio kua kamata tuputupu te maheka ʼi totatou loto tou foimo taʼaki. ʼE tou lava tauʼi feafeaʼi te aluʼaga faigataʼa ʼaia?
TOU AGAVAIVAI PEA MO FIAFIA ʼI TE ʼU MEʼA ʼAE ʼE TOU MAʼU
8. Kotea te ʼu kalitate ʼe tokoni mai anai ke tou lava tauʼi ai te maheka?
8 ʼE feala ke tou tauʼi te maheka mo kapau ʼe tou maʼuliʼi te agavaivai pea mo tou fiafia ʼi te ʼu meʼa ʼae ʼe tou maʼu. Kapau ʼe fonu totatou loto ʼi te ʼu kalitate lelei ʼaia ʼe mole feala anai ke tou maheka. ʼE tokoni mai anai te agavaivai ke ʼaua naʼa tou fakamaʼuhigaʼi fau ia tatou totonu. Ko he tahi ʼe agavaivai ʼe mole manatu anai ia ʼe maʼuhiga age ia ʼi ʼihi. (Kal. 6:3, 4) Pea ko ia ʼae ʼe fiafia ʼi te ʼu meʼa ʼae ʼe ina maʼu, ʼe mole ina fakatatau ia ia ki ʼihi. (1 Tim. 6:7, 8) Kapau ʼe maʼuliʼi e he tahi te ʼu kalitate ʼaia ʼe lua, ʼe fiafia anai ia mo kapau ʼe maʼu e he tahi hana meʼa ʼe lelei.
9. Ka tou lau ia Kalate 5:16 pea mo Filipe 2:3, 4 kotea te tokoni ʼe tou maʼu mai te laumalie maʼoniʼoni?
9 ʼE ʼaoga kia tatou te laumalie maʼoniʼoni ʼo te ʼAtua, ke tou lava maʼuliʼi te agavaivai pea mo fiafia ʼi te ʼu meʼa ʼae ʼe tou maʼu, ʼo mole tou maheka ai. (Lau ia Kalate 5:16; Filipe 2:3, 4.) ʼE feala kia Sehova ke ina sivisivi ʼatatou manatu loloto pea mo ʼotatou loto. ʼAki te tokoni ʼa te ʼAtua ʼe feala ai hatatou fetogi te ʼu manatu mo te ʼu meʼa ʼae ʼe tou logoʼi ʼe mole lelei, ʼaki he ʼu manatu mo he ʼu fakatuʼutuʼu ʼe lelei. (Pes. 26:2; 51:10) Tou vakaʼi te ʼu faʼifaʼitaki ʼo Moisese pea mo Paulo, ko he ʼu tagata neʼe nā lava tauʼi te manumanū.
10. Kotea te aluʼaga ʼae neʼe tau pea mo Moisese? (Vakaʼi te pāki ʼo te takafi.)
10 Neʼe takitaki e Moisese te hahaʼi ʼa te ʼAtua, kae neʼe mole fia pipiki malohi ia ki te tuʼulaga ʼaia. Ohage la, ʼi te tahi ʼaho, neʼe toʼo e Sehova he koga ʼo tona laumalie maʼoniʼoni ʼo foaki ki he kutuga ko he kau tagata ʼafeā, neʼe tutuʼu ovi ki te fale la tapu. Hili leva te aluʼaga ʼaia, neʼe logo ia Moisese neʼe toe foaki ki te ʼu tagata ʼafeā ʼe toko lua te laumalie maʼoniʼoni, kae neʼe mole nā tutuʼu ovi ki te fale la tapu pea kua gaue naua ohage ko he ʼu polofeta. Neʼe feafeaʼi ia Moisese ʼi te kole age e Sosue ke ina taʼofi te gaue ʼa te ʼu tagata ʼaia ʼe toko lua? Neʼe mole maheka ia Moisese ki te tokagaʼi ʼae e Sehova te ʼu tagata ʼaia ʼe toko lua. Neʼe fakafiafia mo naua ki te pilivilesio ʼaia neʼe foaki kia naua. (Num. 11:24-29) Kotea te ako ʼe feala ke tou taʼofi mai te faʼifaʼitaki ʼo Moisese?
11. ʼE faʼifaʼitakiʼi feafeaʼi e te kau tagata ʼafeā ia Moisese?
11 Kapau ko koe ko he tagata ʼafeā, neʼe kua kole atu koa ke ke akoako ki he tahi ʼo te kokelekasio he gaue ʼe ke leleiʼia? Ohage la, ʼe ke fia takitaki tuʼumaʼu te Ako ʼo Te Tule Leʼo ʼi te vahaʼa fuli. Kae fakakaukauʼi age muʼa mo kapau ʼe kole atu ke ke akoʼi he tehina ke ʼaki te temi pea ina lava fakahoko Te Tule Leʼo. Kapau ʼe ke agavaivai ohage ko Moisese ʼe mole ke tuʼania anai, kae ʼe ke fiafia anai ʼi te tokoni ki tou tehina.
12. ʼE fakaha feafeaʼi e ʼihi tehina mo tuagaʼane tanatou agavaivai mo tanatou maʼuli fakafeʼauga?
12 Tou vakaʼi muʼa te tahi aluʼaga ʼe tau mo te ʼu tehina ʼae kua matuʼa. Lolotoga he ʼu lauʼi taʼu ko ʼihi ia natou ʼaia neʼe natou kootinatea ʼi te kolesi ʼo te kau tagata ʼafeā. Kae ʼi tonatou kua taʼu 80, ʼe natou lotolelei ʼo tuku te ʼu gaue ʼaia ki ʼihi. Ko te ʼu tehina ʼae neʼe taupau ki te ʼu siliko pea kua taʼu 70, ʼe natou tali agavaivai te taʼofi ʼo tanatou gaue ʼaia kae ke natou fai he tahi age gaue. Pea tahi heʼeki faʼa fualoa, neʼe kole ki he kau Petelite ʼi te malamanei katoa ke natou liliu ko he kau pionie. Ko te ʼu tehina mo tuagaʼane agatonu ʼaia ʼe mole natou maheka kia natou ʼae ʼe natou hoko atu te ʼu gaue ʼae neʼe natou fai ki muʼa atu.
13. He koʼe neʼe feala pe kia Paulo ke maheka ki te toko 12 apositolo?
13 Neʼe toe tuku mai e te apositolo ko Paulo he faʼifaʼitaki ʼo he tahi ʼe agavaivai pea mo fiafia tuʼumaʼu pe ʼi te ʼu meʼa ʼae ʼe ina maʼu. Koia neʼe mole ina tuku te manumanū ke tuputupu ʼi tona loto. Kae neʼe gaue malohi ia ʼi te faifakamafola, koia neʼe ina ui fenei ai ʼaki he agavaivai: “ ʼE ko au ʼae ʼe veliveli ʼosi ʼi te kau apositolo, pea ʼe mole tuha mo au ke fakahigoaʼi au ko he apositolo.” (1 Ko. 15:9, 10) Neʼe mulimuli lelei te kau apositolo ia Sesu lolotoga tona minisitelio ʼi te kele. Kae neʼe hoki liliu ia Paulo ko he apositolo hili te mate mo te fakatuʼuake ʼo Kilisito. Logo la neʼe fakahigoaʼi ia Paulo ko te “apositolo neʼe fekauʼi ki te ʼu puleʼaga kehekehe,” kae neʼe mole filifili ia ia ke ina fakakatoa te toko 12 apositolo. (Loma 11:13; Gaue 1:21-26) Neʼe mole maheka ia Paulo ki te toko 12 apositolo pea mo ʼanatou felogoi makehe ʼae mo Sesu. Neʼe fiafia pe ia ʼi tana kua liliu ko he apositolo.
14. Kotea anai ka tou fai mo kapau ʼe tou agavaivai mo tou fiafia tuʼumaʼu pe ʼi te ʼu meʼa ʼae ʼe tou maʼu?
14 Kapau ʼe tou agavaivai pea mo tou fiafia tuʼumaʼu pe ʼi te ʼu meʼa ʼae ʼe tou maʼu, ʼe tou fakaʼapaʼapa anai ohage ko Paulo ki te tuʼulaga pule ʼae ʼe foaki e Sehova ki ʼihi. (Gaue 21:20-26) Neʼe fakatuʼutuʼu e te ʼAtua ke hinoʼi he ʼu tagata ʼafeā ke natou takitaki te kokelekasio. Logo la tanatou heʼe haohaoa kae kia Sehova, ʼe ko “he ʼu tagata ohage ko ni meʼa ʼofa.” (Efe. 4:8, 11) Kapau ʼe tou fakaʼapaʼapa ki te ʼu tehina ʼaia neʼe hinoʼi ʼaki te laumalie maʼoniʼoni pea mo tou muliʼi ʼanatou fakatuʼutuʼu, ʼe tou nonofo ovi anai kia Sehova pea mo tokalelei mo ʼotatou tehina mo tuagaʼane.
“TOU HAGA KUMI TE ʼU MEʼA ʼAE ʼE ʼAOGA KI TE TOKALELEI”
15. Kotea ʼae ʼe tonu ke tou fai?
15 ʼE mole feala ke maʼu te tokalelei ʼi te faʼahi ʼae ʼe nofo ai te manumanū. ʼE tonu ke tou taʼaki te manumanū ʼi totatou loto pea mo tokaga naʼa tou uga ʼihi ke natou manumanū mo natou. ʼE maʼuhiga te faʼahi ʼaia mo kapau ʼe tou fia fakalogo kia Sehova ʼae neʼe ina fakatotonu mai ke tou haga “kumi te ʼu meʼa ʼae ʼe ʼaoga ki te tokalelei pea mo ʼae ʼe tou fefakalotomalohiʼaki.” (Loma 14:19) ʼE tou tokoni feafeaʼi ki ʼihi ke natou tauʼi te manumanū mo maʼu te tokalelei?
16. ʼE tou tokoni feafeaʼi ki ʼihi ke natou lava tauʼi te manumanū?
16 ʼE feala ke malave tatatou aga mo ʼatatou gaue ki ʼihi. Koteʼuhi ʼe loto e te malama ke tou ‘fakahaha te ʼu koloa.’ (1 Soa. 2:16) Kae ko te agaaga ʼaia ʼe mole lelei he ʼe fakatupu ai pe te manumanū. ʼE feafeaʼi hatatou faigaʼi ke ʼaua naʼa logoʼi ʼi te loto ʼo ʼotatou tehina mo tuagaʼane te aluʼaga ʼaia? ʼE lagi lelei ke mole tou palalau tuʼumaʼu ki te ʼu meʼa ʼae ʼe tou toʼo peʼe tou teuteu toʼo. Pea kapau leva ʼe ʼi ai hotatou ʼu pilivilesio ʼi te kokelekasio, tou agavaivai. Kapau ʼe tou palalau tuʼumaʼu ki ʼotatou pilivilesio ʼi te kokelekasio ʼe hage pe ʼe tou fakatuputupu te manumanū ki he tahi. Tou fakaha tatatou lototokaga ki ʼihi pea tou fakafetaʼi kia natou ʼo ʼuhiga mo te ʼu gaue lelei ʼae ʼe natou fai. ʼE tou tokoni ai kia natou ke natou fiafia tuʼumaʼu pe ʼi te ʼu gaue ʼae ʼe natou lava fai. ʼE tou haga kumi ai te tokalelei mo te logo tahi ʼo te kokelekasio.
17. Neʼe kei maʼu koa e te ʼu tehina ʼo Sosefo te maheka? Pea kotea tona tupuʼaga?
17 ʼE feala ke tou tauʼi te manumanū. Tou toe palalau muʼa ki te ʼu tehina ʼo Sosefo. Hili ni lauʼi taʼu ki tanatou gaohi koviʼi ia Sosefo, neʼe natou fakatahi leva mo ia ʼi Esipito. ʼI muʼa ʼo te fakaha e Sosefo pe ko ai moʼoni ia ia, neʼe ina ʼahiʼahiʼi ʼona tehina he neʼe ina fia iloʼi pe kua natou fetogi. Koia neʼe ina fakatuʼutuʼu ai leva he kaitahi, neʼe ina fakaha ai te lahi age ʼae ʼo tona ʼofa kia Pesamino ʼi ʼona tehina. (Sen. 43:33, 34) ʼE mole fakaha ʼi te Tohi-Tapu pe neʼe maheka te ʼu tehina ʼo Sosefo kia Pesamino. Kae neʼe natou fakaha ʼosi tanatou tokakaga fakamalotoloto kia Pesamino mo tanatou tamai ko Sakopo. (Sen. 44:30-34) Neʼe mole kei natou maʼu te maheka koia neʼe maʼu ai leva te tokalelei ʼi tonatou famili. (Sen. 45:4, 15) ʼO toe feia pe, kapau ʼe tou taʼaki ʼi totatou loto te ʼu aluʼaga ʼae ʼe pipiki ki te maheka, ʼe tou kumi ai pe te tokalelei ʼi totatou famili pea mo tatatou kokelekasio.
18. Ka tou lau ia Sakopo 3:17, 18, kotea ʼae ʼe hoko moka tou kumi tuʼumaʼu te tokalelei?
18 ʼE loto e Sehova ke tou tauʼi te maheka ʼo tou kumi te tokalelei. Kae ʼe ʼaoga he ʼu faiga malohi ke tou maʼu ai te tokalelei. Ohage pe ko tatatou kua vakaʼi ki muʼa atu, ʼe feala ke tou tau fuli mo te maheka pea mo te manumanū. (Sakp. 4:5) Pea ʼe tou maʼuli nei ʼi he malama ʼe uga ai tatou ke tou manumanū. Koia ʼe mole feala anai ke tou maʼu te manumanū mo kapau ʼe tou faiga fakamalotoloto ke tou agavaivai pea mo lotofakafetaʼi. ʼE tou fiafia ai pe ʼi te ʼu meʼa ʼae ʼe tou maʼu. Pea ʼe tokalelei anai te maʼuli pea mo faigafua hau fakaha he ʼu kalitate matalelei.—Lau ia Sakopo 3:17, 18.
KATIKO 130 Tou Lotofakamolemole
^ pal. 5 ʼE tokalelei te kautahi ʼa Sehova. Kae ʼe feala pe ke puli te tokalelei ʼaia mo kapau ʼe tou maheheka ki ʼihi. ʼE tou vakaʼi anai ʼi te alatike ʼaeni pe ʼe tuputupu feafeaʼi ia tatou te manumanū. ʼE tou toe vakaʼi anai pe ʼe feafeaʼi hatatou tauʼi te faʼahi ʼaia, pea mo feafeaʼi hatatou kumi te tokalelei?
^ pal. 2 HE ʼU FAKAMAHINO: Ohage pe ko tona ui ʼi te Tohi-Tapu, ʼe feala pe ki te manumanū ke ina uga he tahi ke ina fia maʼu te ʼu meʼa ʼa ʼihi, kae ʼe mole lelei te aga ʼaia.
^ pal. 61 FAKAMATALA ʼO TE ʼU PĀKI: Ko te fono ʼa te kau tagata ʼafeā. ʼE kole leva ki te tehina kua vaivai matuʼa ʼae ʼe ina takitaki Te Tule Leʼo ke ina ako te tehina tupulaga ki te fai ʼo Te Tule Leʼo. ʼE tatau aipe pe ʼe fia takitaki e te tehina Te Tule Leʼo kae ʼe lagolago malohi anai ki te tonu ʼae kua toʼo e te kau tagata ʼafeā. Pea ʼe ina foaki ki tona tehina tupulaga he ʼu tokoni lelei mo he ʼu fakamalo fakamalotoloto.